1 We Izraeli, bwelela kuli Yawe Leza obe.

Bibalo byobe byakikuponia!

2 Be mwali ni twebo

mubwelele kuli Yawe.

Mumwane nangue,

"Eleela bibalo byetu byonse

ni kutupokelela na buwame,

pakuti tufumie buzabo bwetu bwa ku milomo.

3 Asuria tavinda kutupususia,

tetukikasela pa farasi wa bului.

Tetukikalanda nangue, ‘Baleza betu’

ku bintu bitwaakitile na minue yetu,

pantu kuli wewe, mwana nsiwa aliwaunvwilua nkumbu."

4 "Naakoondapa butaale bwabo

ni kubatona na mutima wane onse,

pantu nsikibafiitiilue.

5 Naakaba nga lume kuli Izraeli,

waakatoota nga buluba.

Waakengizia misila pansi

nga kimuti kya mumpelempele kya ku Lebanoni.

6 Misambo yakue yaakabazalala.

Kuvumba kwakue kwaakaba nga kimuti kya muzeituni,

bunu bwakue nga kimuti kya mumpelempele kya ku Lebanoni.

7 Bantu baakeekala mu bulelo bwakue paakale,

baakasana nga nghano,

baakatoota nga mizabibu.

Kumanika kwakua Izraeli kwaakaba nga divai ifumine ku Lebanoni.

8 We Efraimu, kubako ni bwampanoki buli pali nene ni mikisi?

Nene ndikukwasuka ni kukulabukila.

Nene ndi nga kimuti kibisi kisili kyauma lyonse.

Kuseeka kwa mazabo kobe kulikwafuma kuli nene."

9 Nani ali ni mulangue? Enike totu twebo.

Nani ali ni maano? Amane totu twebo.

Nzila yakua Yawe ilungheeme,

balunghami i balibaendamo,

inzi babisanguka balibaipuutalamo.