Apocalipse 15

ସା଼ତାଗଟା ର଼ଗ କିନି ସା଼ତାଗଟା ଦୂତୁୟାଁ

1 ଏମ୍ବାଟିଏ ନା଼ନୁ ହା଼ଗୁତା ଅ଼ଡ଼େ ର଼ କାବାଆ଼ନି ଲେହେଁତି ସିନା ମେସ୍ତେଏଁ, ସା଼ତାଗଟା ଦୂତୁୟାଁ ସା଼ତାଗଟା ର଼ଗୟାଁ ତାମି କେୟୁତା ଆସାହାଁ ତ଼ଞ୍ଜାଆ଼ତୁ, ଏ଼ ର଼ଗୟାଁ ମାହାପୂରୁତି କ଼ପା ତ଼ହ୍‌ନାୟି ରା଼ନାୟି ମାଚେ ।

2 ଅ଼ଡ଼େ ନା଼ନୁ ମେସ୍ତେଏଁ, ହିଚୁ କାଲ୍‌ହି ଦାର୍ପେଣି ଲେହେଁତି ସାମ୍‌ଦୁରି, ଆମ୍ବାଆରି ଜ଼ନ୍ତ, ଏ଼ଦାନି ବମା ଇଞ୍ଜାଁ ଏ଼ଦାନି ଦ଼ରୁତି ଲମ୍ବରଟି ଜୀଣା ଆ଼ତାରି, ଏ଼ୱାରି ମାହାପୂରୁ ହୀହାମାନି ସେର୍‌ଙ୍ଗି ଆସାହାଁ ଗା଼ଜୁ ଲେହେଁତି ସାମ୍‌ଦୁରି ଗିଚୁତା ନିଚାମାଚେରି । 3 ଏ଼ୱାରି ମାହାପୂରୁ ହୀତି ରାମଗଂଟ ୱେଚିହିଁ ମାହାପୂରୁତି ସେ଼ବାକିନି ମ଼ସାତି ପା଼ଚୁ ଇଞ୍ଜାଁ ମେ଼ଣ୍ତା ଡା଼ଲୁତି ପା଼ଚୁ ପା଼ଚିହିଁ ଏଲେ ଇଞ୍ଜିଁ ମାନେରି,

"ବାରେତି କିହାଁ ବା଼ଡ଼୍‌ୟୁ ଗାଟି ପ୍ରବୁ ମାହାପୂରୁତି,

ନୀ କାମା ଏଚେକା କାଜାୟି ଅ଼ଡ଼େ କାବା ଆ଼ନାୟି,

ବାରେ ଲ଼କୁତି ରାଜାତି,

ନୀ କାମାତି ଜିରୁ ବାରେ ନୀହାଁୟି ଗାଟାୟି ଇଞ୍ଜାଁ ସାତାତାୟି ।

4 ପ୍ରବୁ! ନିଙ୍ଗେ ଆମ୍ବାଆସି ଆଜାଆ ଗାଟାସି ମାନେସି ?

ଆମ୍ବାଆସି ନୀ ଗା଼ୱୁରମି ୱେ଼କ୍‌ଆଗାଟାସି ମାନେସି ?

ଇଚିହିଁ ନୀନୁ ରଅତିଏ ସୁଦୁ ଗାଟାତି;

ବାରେ କୂଡ଼ାତି ଲ଼କୁ ୱା଼ହାଁ ନୀ ପୂଜା କିନେରି,

ଏ଼ନାଆଁତାକି ଇଚିହିଁ ନୀ ଦାର୍ମୁଗାଟି ନୀହାଁୟିତି କାମାୟାଁ ବାରେଜା଼ଣା ମେସାମାନେରି ।"

5 ଏମ୍ବାଟିଏ ନା଼ନୁ ମେସ୍ତେଏଁ, ଲାକପୂରୁତି ସା଼କି ହୀନି ତୂମୁ ଦେ଼ୱୁଡ଼ିତି ଦା଼ରା ଦେପିଆ଼ତେ 6 ସା଼ତାଗଟା କସ୍ତୟାଁ ଆସାମାନି ସା଼ତାଗଟା ଦୂତୁୟାଁ ଲାକପୂରୁତି ଦେ଼ୱୁଡ଼ିଟି ହ଼ଚାୱା଼ତେରି; ଏ଼ୱାରି ଅପ୍‌ହି ମ୍ଣିହ୍‌ନି ହିମ୍ବରିକା ହୁଚାମାଚେରି ଇଞ୍ଜାଁ ଏ଼ୱାସିକା ବକ ସା଼ରିସୁଟୁ ବାଂଗାରା ପା଼ଟା ଦସାମାଚେରି । 7 ସା଼ରିଗଟା ଜ଼ନ୍ତୟାଁ ବିତ୍ରାଟି ର଼ ଜ଼ନ୍ତ କା଼ଲେଏ ତାକି ନୀଡାମାନି ମାହାପୂରୁ କ଼ପାତଲେ ନେଞ୍ଜାମାନି ସା଼ତାଗଟା ବାଂଗାରା ଗିନାୟାଁ ଏ଼ ସା଼ତାଗଟା ଦୂତୁୟାଁକି ହୀତେସି । 8 ମାହାପୂରୁତି ଗା଼ୱୁରମି ଅ଼ଡ଼େ ତାନି ବା଼ଡ଼୍‌ୟୁଟି ହ଼ଚିମାନି ବ଼ୟିଁ ଦେ଼ୱୁଡ଼ିତା ନେଞ୍ଜାହାଚେ; ସା଼ତାଗଟା ଦୂତୁୟାଁ ତାଚାମାନି ସା଼ତାଗଟା ର଼ଗୟାଁ ରା଼ଆ ପାତେକା ଏ଼ ଦେ଼ୱୁଡ଼ି ବିତ୍ରା ଆମ୍ବାଆସି ହ଼ଡାଲି ଆ଼ଡାଆତେସି ।