ୱେ଼କ୍‌ହି ବ଼ଲୁ 8

ସା଼ତା ଲମ୍ବର ସୀଲି

1 ମେ଼ଣ୍ତା ଡା଼ଲୁ ଏଚିବେ଼ଲା ସା଼ତା ଲମ୍ବର ମୁଦ୍ରା ଦେତି ଦେବୁଣିଏ ଲାକପୂରୁ ଆଦା ଗଂଟା ପାତେକା ସାପିଆ଼ତେ । 2 ଏମ୍ବାଟିଏ ନା଼ନୁ ମାହାପୂରୁ ନ଼କିତା ନିଚାମାନି ସା଼ତା ଜା଼ଣା ଦୂତୁୟାଁଇଁ ମେସ୍ତେଏଁ, ଏ଼ୱାରାକି ସା଼ତାଗଟା ତୀତ୍ରି ମ଼ହ୍‌ରି ହୀପ୍‌କି ଆ଼ତୁ ।

3 ଏମ୍ବାଟିଏ ଅ଼ଡ଼େ ର଼ ଦୂତୁ ୱା଼ହାଁ ପିଣ୍ତା ନ଼କିତା ନିତେସି, ଏ଼ୱାଣି କେୟୁତା ବାଂଗାରା ଦୁପ୍‌ଣି ସାଡ଼୍‌ୱା ମାଚେ, ଅ଼ଡ଼େ ସିଂଗାସାଣି ନ଼କିତି ବାଂଗାରା ପୂଜାପିଣ୍ତା ଲାକ ବାରେ ମାହାପୂରୁ ଲ଼କୁତି ପ୍ରା଼ତାନା ତଲେ ହେର୍‌ପାଲି ତାକି ହା଼ରେକା ଦୁପ୍‌ଣି ହୀପ୍‌କିଆ଼ତେ । 4 ଏମ୍ବାଟିଏ ଲାକପୂରୁ ଦୂତୁ କେୟୁତି ଦୁପ୍‌ଣି ବ଼ୟିଁ ମାହାପୂରୁ ଲ଼କୁତି ପ୍ରା଼ତାନା ତଲେ ଆଣ୍ତାହାଁ ମାହାପୂରୁ ନ଼କିତା ଏଗାତେ । 5 ଡା଼ୟୁ ଏ଼ ଦୂତୁ ଦୁପ୍‌ଣି ସାଡ଼୍‌ୱାତା ପୂଜା ପିଣ୍ତାତି ହିଚୁତଲେ ନେଞ୍ଜିକିହାଁ ଦାର୍‌ତି ଲାକ ଡ଼ାଞ୍ଜିତେସି, ଏମ୍ବାଟି ହା଼ଗୁ ଗୂଣ୍‌ତେ ବିଜା ରିନିହା଼ଡା ୱେ଼ଙ୍ଗିତେ ଇଞ୍ଜାଁ ବୂମି ୱୀଡିତେ ।

ତୀତ୍ରି ଊକିନାୟି

6 ଏଚିବେ଼ଲା ସା଼ତା ଜା଼ଣା ତୀତ୍ରି ଆସାମାନି ଦୂତୁୟାଁ ସା଼ତା ଜା଼ଣା ତୀତ୍ରି ଊକାଲି ତିୟାରା ଆ଼ତେରି ।

7 ର଼ ଲମ୍ବର ଦୂତୁ ତାନି ତୀତ୍ରି ଊକିତେସି ଏଚେଟିଏ ନେତେରି ତଲେ ଆ଼ଜିୟାଁ ଅ଼ଡ଼େ ହିଚୁ ଆଣ୍ତ୍‌ୱି ଆ଼ହାଁ ଦାର୍‌ତି ଲାକ ରିତୁ, ଇଞ୍ଜାଁ ବାରେ ମା଼ର୍‌ନୁ ମା଼ଡ଼ା, ହିଃଲି ଜା଼ଡ଼ା ତଲେ ଦାର୍‌ତିତି ତୀନି ବା଼ଗାଟି ର଼ ବା଼ଗା ବାରେ ୱେହା ହାଚେ ।

8 ଏଚେଟିଏ ରୀ ଲମ୍ବର ଦୂତୁ ତାନି ତୀତ୍ରି ଊକିନି ଦେବୁଣିଏ ଡ଼ୀଞ୍ଜିମାନି ର଼ କାଜା ହ଼ରୁ ଲେହେଁତାୟି ସାମ୍‌ଦୁରି ଲାକ ରିତେ ଇଞ୍ଜାଁ ସାମ୍‌ଦୁରିତି ଏ଼ୟୁ ତୀନି ବା଼ଗାଟି ର଼ ବା଼ଗା ନେତେରି ଆ଼ହାହାଚୁ । 9 ସାମ୍‌ଦୁରିତା ମାନି ତୀନି ବା଼ଗାଟି ର଼ ବା଼ଗା ଜୀୱୁ ଗାଟାଇ ହା଼ହାହାଚୁ, ଅ଼ଡ଼େ ସାମ୍‌ଦୁରିତା ମାନି ଜା଼ଜାୟାଁ ତୀନି ବା଼ଗାଟି ର଼ ବା଼ଗା ଜା଼ଜାୟାଁ ବିଡ଼୍‌ହାହାଚୁ ।

10 ତୀନି ଲମ୍ବର ଦୂତୁ ତୀତ୍ରି ଊକିତେସି, ଇଞ୍ଜାଁ ଦେବୁଣିଏ ହିଚୁ ବ଼ନ୍ଦାଲେହେଁ ଡ଼ୀଞ୍ଜିମାନି ର଼ କାଜା ହୁକା ହା଼ଗୁଟି ତୀନି ବା଼ଗା କାଡା ଅ଼ଡ଼େ ଊସାଣାଁ ରିତେ । 11 ଏ଼ ହୁକାତି ଦ଼ରୁ "କାମ୍ବେଲି" ଏଚେଟିଏ ତୀନି ବା଼ଗାଟିଏ ର଼ ବା଼ଗା ଏ଼ୟୁ କାମ୍ବେଲି ଆ଼ତୁ, ଇଞ୍ଜାଁ ହା଼ରେକା ଲ଼କୁ ଏ଼ୟୁ ଗସାହାଁ ହା଼ତେରି, ଇଚିହିଁ ଏ଼ୱି କାମ୍ବେଲି କିୱି ଆ଼ହାମାଚୁ ।

12 ସା଼ରି ଲମ୍ବର ଦୂତୁ ତୀତ୍ରି ଊକିତେସି ଇଞ୍ଜାଁ ୱେ଼ଡ଼ା, ଲେ଼ଞ୍ଜୁ, ହୁକାୟାଁତି ବାରେ ତୀନି ବା଼ଗାଟି ର଼ ବା଼ଗା ନସ୍ତ ଆ଼ତୁ, ଇଞ୍ଜାଁ ତୀନି ବା଼ଗାଟି ର଼ ବା଼ଗା ଉଜେଡ଼ି ଊଣା ଆ଼ତେ, ଇଞ୍ଜାଁ ଲା଼ଆଁୟାଁ ମାଦେନା ତୀନି ବା଼ଗାଟି ର଼ ବା଼ଗା ଉଜେଡ଼ି ଊଣା ଆ଼ତେ ।

13 ଡା଼ୟୁ ନା଼ନୁ ମେସ୍ତେଏଁ, ହା଼ଗୁତି ମାଦି ଊମ୍ବିମାନି ର଼ ଲେ଼ଡ଼ୁ କାଜା ହା଼ଡାତଲେ ଏଲେଇଞ୍ଜିମାଚାଣି ୱେଚେଏଁ, "ଆ଼ହା! ଦାର୍‌ତିତା ବାସା ଆ଼ହାମାନି ଲ଼କୁ ଆଜିହ଼ପେତି ଡଣ୍ତ ବେଟାଆ଼ନାରି, ଇଚିହିଁ ଅ଼ଡ଼େ ତୀନି ଜା଼ଣା ଦୂତୁୟାଁ ତୀତ୍ରି ଊକାଲି ହାଜିମାନେରି ।"