1 ଏଚେଟିଏ ନା଼ନୁ ଦାର୍‌ତିତି ସା଼ରି କନତା ସା଼ରିଗଟା ଦୂତୁୟାଁଇଁ ନିଚାମାନାଣି ମେସ୍ତେଏଁ, ଅ଼ଡ଼େ ଦାର୍‌ତିତି ସା଼ରିୱାକିତି ଗା଼ଲି ଆ଼ଙ୍ଗାମାନେରି, ଏଚେଟିଏ ଦାର୍‌ତି ସାମ୍‌ଦୁରି ଅ଼ଡ଼େ ଆମିନି ମା଼ର୍‌ନୁ ମୁହେଁ ଗା଼ଲି ୱା଼ଆପେୱା ଇଞ୍ଜିଁ ଗା଼ଲିତି ଆ଼ଙ୍ଗାମାନେରି । 2 ଅ଼ଡ଼େ ନା଼ନୁ ର଼ ଦୂତୁଇଁ ୱେ଼ଡ଼ା ହ଼ପୁୱାକିଟି ହ଼ଚାୱା଼ତାଣି ମେସ୍ତେଏଁ, ଏ଼ଦାନି କେୟୁତା ଜୀୱୁତି ମାହାପୂରୁତି ବୁଟୁ ମୁଦ୍ରା ମାଚେ, ଏ଼ ଦୂତୁ ଦାର୍‌ତି ଅ଼ଡ଼େ ସାମ୍‌ଦୁରି ନସ୍ତ କିହାଲି ତାକି ସା଼ରିଗଟା ଦୂତୁକି ଅଦିକାରା ହୀହାମାଚେସି, ଏ଼ୱାସି କାଜା ଗିୟାଁତଲେ ହା଼ଟାହାଁ ଏଲେଇଚେସି, 3 "ମା଼ମ୍ବୁ ମାହାପୂରୁତି ସେ଼ବା କିନାରି ମୁଞ୍ଜୁତା ବୁଟୁ ମୁଦ୍ରା ନାବ୍‌ଗାଆ ପାତେକା ମୀରୁ ଦାର୍‌ତି, ସାମ୍‌ଦୁରି, କି ମା଼ର୍‌କାଣି ନସ୍ତ କିଆଦୁ ।" 4 ଏଚେଟିଏ ମୁଞ୍ଜୁତା ବୁଟୁ ମୁଦ୍ରା ନାବ୍‌ଗା କଡିତାରି , ଲ଼କୁ ମାଚେରି ଇଞ୍ଜିଁ ନା଼ନୁ ୱେଚେଏଁ ଏ଼ୱାରି ଇସ୍ରାୟେଲତି ବା଼ର କୂଡ଼ାତି ଲ଼କୁ ମାଚେରି । 5 ଜୀହୁଦା କୂଡ଼ାଟି ବା଼ର ମା଼ଣା ଲ଼କୁଇଁ ବୁଟୁ ମୁଦ୍ରା କିହାମାନେସି, ରୁବେନ୍‌ କୂଡ଼ାଟି ବା଼ର ମା଼ଣା, ଗାଦ୍‌ କୂଡ଼ାଟି ବା଼ର ମା଼ଣା, 6 ଆସେର୍‌ କୂଡ଼ାଟି ବା଼ର ମା଼ଣା, ନପ୍ତାଲି କୂଡ଼ାଟି ବା଼ର ମା଼ଣା, ମନଃସି କୂଡ଼ାଟି ବା଼ର ମା଼ଣା, 7 ସିମିୟନ କୂଡ଼ାଟି ବା଼ର ମା଼ଣା, ଲେ଼ବି କୂଡ଼ାଟି ବା଼ର ମା଼ଣା, ଇସାକାର କୂଡ଼ାଟି ବା଼ର ମା଼ଣା, 8 ସୁବୁଲୁନ୍‌ କୂଡ଼ାଟି ବା଼ର ମା଼ଣା, ଜସେପ କୂଡ଼ାଟି ବା଼ର ମା଼ଣା, ବିନ୍ୟାମିନ୍‌ କୂଡ଼ାଟି ବା଼ର ମା଼ଣା ଲ଼କୁଇଁ ବୁଟୁ ମୁଦ୍ରା କିହାମାନେସି ।

9 ଏଚେଟିଏ ନା଼ନୁ ସିନିକିତେଏଁ ମେହ୍‌ଦୁ ବାରେ ଜା଼ତି, ବାରେ କୂଡ଼ା, ବାରେ ଦେ଼ସା, ବାରେ ହା଼ଡା, ଏଜିକିହାଲି ଆ଼ଡାଆଗାଟି ର଼ ମାନ୍ଦା ଲ଼କୁ ଅ଼ଜିତି ଦବ୍‌ଲା ହିମ୍ବରିକା ହୁଚାହାଁ କାଜୁରି ମାଟାୟାଁ କେୟୁତା ଆସାହାଁ ସିଂଗାସାଣି ଅ଼ଡ଼େ ମେ଼ଣ୍ତା ଡା଼ଲୁ ନ଼କିତା ନିଚାମାନେରି । 10 ଏ଼ୱାରି କାଜା ଗିୟାଁତଲେ ଏଲେଇଚେରି, "ୱାର୍‌ଇ ସିଂଗାସାଣିତା କୁଗାମାନି ମାହାପୂରୁ ଅ଼ଡ଼େ ମେ଼ଣ୍ତା ଡା଼ଲୁ ମାଙ୍ଗେ ଗେଲ୍‌ପାନାସି ।" 11 ସିଂଗାସାଣି, ପ୍ରାଚିନାଙ୍ଗା ଅ଼ଡ଼େ ବାରେ ସା଼ରିଗଟା ଜ଼ନ୍ତ ସା଼ରିସୁଟୁ ଲାକପୂରୁତି ଦୂତୁୟାଁ ନିଚାମାନେରି, ଅ଼ଡ଼େ ସିଂଗାସାଣି ନ଼କିତା ମୁନୁ କୁତାହାଁ ମାହାପୂରୁଇଁ ଜହରା କିହାଁ, 12 ଏଲେଇଚେରି, "ଆ଼ମେନ୍‌ ନେହାୟି, ଗା଼ୱୁରମି, ବୁଦି, ଜହରା, ସାମ୍ବ୍ରମି, ଅଦିକାରା ଅ଼ଡ଼େ ବା଼ଡ଼୍‌ୟୁ, କା଼ଲାକା଼ଲା ତାକି ମା଼ ମାହାପୂରୁୱାୟି! ଆ଼ମେନ୍‌ ।"

13 ଅ଼ଡ଼େ ପ୍ରାଚିନାଙ୍ଗା ବିତ୍ରାଟି ରଅସି ନାଙ୍ଗେ ୱେଞ୍ଜାତେସି, "ଦବ୍‌ଲା ହିମ୍ବରିକା ହୁଚାମାନି ଈ ଲ଼କୁ ଆମ୍ବାଆରି ? ଅ଼ଡ଼େ ଏ଼ୱାରି ଏମ୍ବିଟି ୱା଼ହାମାନେରି ?" 14 ✝୭:୧୪ ମାତି ୨୪:୨୧; ମାର୍କ ୧୩:୧୯ନା଼ନୁ ଏ଼ୱାଣାଇଁ ଏଲେଇଚେଏଁ, "ଏ଼ ନା଼ ପ୍ରବୁ ନୀନୁଏ ଏ଼ଦାଆଁ ପୁଞ୍ଜାମାଞ୍ଜି" ଏମ୍ବାଟିଏ ଏ଼ୱାସି ଏଲେଇଞ୍ଜାତେସି, "ଈୱାରି ଆଜିହ଼ପେତି ସା଼ସ୍ତି ଅ଼ର୍‌ହାନା ହ଼ଚା ୱା଼ହାମାନେରି, ଇଞ୍ଜାଁ ମେ଼ଣ୍ତା ଡା଼ଲୁତି ନେତେରି ତଲେ ଏ଼ୱାରି ତାମି ହିମ୍ବରିକା ରା଼ଚାହାଁ ଦବ୍‌ଲା କିହାମାନେରି । 15 ଏ଼ଦାଆଁତାକି ଏ଼ୱାରି ମାହାପୂରୁ ଇଲୁତି ସିଂଗାସାଣି ନ଼କିତା ନିଚାହାଁ ଲା଼ଆଁ ମାଦେନା ଏ଼ୱାଣି ଜହରା କିନେରି, ଇଞ୍ଜାଁ ସିଂଗାସାଣିତା କୁଗାମାନାସି ଏ଼ୱାରାକି ବାସାଟା଼ୟୁ ହୀନେସି । 16 ଏ଼ୱାରାକି ଏଚେଲାୱା ହାକି କି ଏ଼ସ୍‌କି ଆ଼ଏ; ଇଞ୍ଜାଁ କାରା କି ଏ଼ନି ୱେହ୍‌ନାୟି ଡୀଗାଲି ଆ଼ଡେଏ । 17 ଇଚିହିଁ ସିଂଗାସାଣି ମାଦିତି ମେ଼ଣ୍ତା ଡା଼ଲୁ ଏ଼ୱାରି ମେ଼ଣ୍ତା ଗ଼ଡ଼ୁ ଆ଼ନେସି । ଅ଼ଡ଼େ ଜୀୱୁହୀନି ଏ଼ୟୁ ହ଼ଚିମାନି ତା଼ଣା ଏ଼ୱାରାଇଁ ତା଼କିକିହା ଅ଼ନେସି, ଅ଼ଡ଼େ ମାହାପୂରୁ ଏ଼ୱାରି କାନୁତି ବାରେ କାଣ୍ତ୍ରୁ ଜେ଼ଜାତୁହ୍‌ନେସି ।"