ଜହନ 20

ଜୀସୁ ମଗ୍‌ଦଲିନି ମରିୟମଇଁ ତ଼ଞ୍ଜା ଆ଼ନାୟି

11 ସାମା ମରିୟମ ଡ଼ୀହି ଡ଼ୀହି ପାଙ୍ଗାତା ନିଚା ଡ଼ୟିତେ; ଇଞ୍ଜାଁ ଡ଼ୀହି ଡ଼ୀହି ବଙ୍ଗାହାଁ ମାହ୍‌ଣି ମାଣ୍ତା ବିତ୍ରା ସିନିକିତେ, 12 ଜୀସୁତି ଆଙ୍ଗା ଏମିନି ଟା଼ୟୁତା ଇଟ୍‌କି ଆ଼ହାମାଚେ, ଏମ୍ବାଆଁ ତା଼ର୍ୟୁଁ ୱାକି ରଅସି ଅ଼ଡ଼େ କଡାୟାଁ ୱାକି ରଅସି ଦବ୍‌ଲା ହିମ୍ବରିକା ପର୍‌ହାନା ରିଆରି ଦୂତୁୟାଁ କୁଗାମାନାଣି ମେସ୍ତେ । 13 ଏ଼ୱାରି ଏ଼ଦାନି ଏଲେଇଚେରି, "ଏ଼ ଇୟା ଏ଼ନାଆଁତାକି ଡ଼ୀହିମାଞ୍ଜି ?" ଏ଼ଦି ଏ଼ୱାରାଇଁ ଏଲେଇଚେ, "ଆମ୍ବାଆରି ନା଼ ପ୍ରବୁଇଁ ଅ଼ହାମାନେରି, ଅ଼ଡ଼େ ଏ଼ୱାଣାଇଁ ଆମ୍ବିୟା ଇଟାମାନେରି ପୁଞ୍ଜାହିଲଅଁ ।"

14 ଏ଼ଦି ଏଲେଇଞ୍ଜାନା ଡା଼ୟୁୱାକି ସିନିକିହାଁ ଜୀସୁଇଁ ମେସ୍ତେ, ସାମା ଏ଼ୱାସି ଜୀସୁ ପୁଞ୍ଜାଲି ଆ଼ଡାଆତେ । 15 ଜୀସୁ ଏ଼ଦାନି ଏଲେଇଚେସି, "ଏ଼ ଇୟା ଏ଼ନାଆଁତାକି ଡ଼ୀହିମାଞ୍ଜି ? ଆମ୍ବାଆରାଇଁ ପାରିମାଞ୍ଜି ?"

ଏ଼ଦି ଏ଼ୱାଣାଇଁ ବା଼ଡ଼ା ଗାଟାସି ଇଞ୍ଜିଁ ଅଣ୍‌ପାହାଁ ଏଲେଇଚେ, "ବା଼ବୁ ନୀନୁ ଏ଼ୱାଣାଇଁ ଅ଼ହାମାଞ୍ଜି ଇଚିହିଁ ଆମ୍ବିୟା ଇଟାମାଞ୍ଜି, ନାଙ୍ଗେ ୱେସ୍ତାମୁ ନା଼ନୁ ଅ଼ଇଁ ।"

16 ଜୀସୁ ଏ଼ଦାନି ଏଲେଇଚେସି, "ମରିୟମ!" ମରିୟମ ଏ଼ୱାଣି ୱାକି ସିନିକିହାଁ ଏବ୍ରି ହା଼ଡାତଲେ ଏଲେଇଚେ, "ରାବ୍‌ବୁନି" ଇଚିହିଁ ଏ଼ ଗୂରୁ ।

17 ଜୀସୁ ଏ଼ଦାନି ଏଲେଇଚେସି, "ନାଙ୍ଗେ ଆସା ଇଟାଲି ଅଣ୍‌ପାଆନି, ଇଚିହିଁ ନା଼ନୁ ନୀଏଁ ପାତେକା ଆ଼ବା ତା଼ଣା ହାଜାହିଲଅଁ; ସାମା ନା଼ ତାୟିୟାଁ ତା଼ଣା ହାଜାହାଁ କାବ୍ରୁ ହୀମୁ, ନା଼ନୁ ନା଼ ଆ଼ବା ମୀ ଆ଼ବା ନା଼ ମାହାପୂରୁ ମୀ ମାହାପୂରୁ ତା଼ଣା ହାଜିମାଇଁ ।"

18 ମଗ୍‌ଦଲିନି ମରିୟମ ହାଜାହାଁ ସୀସୁୟାଁଇଁ କାବ୍ରୁ ହୀତେ, ନା଼ନୁ ପ୍ରବୁଇଁ ମେସାମାଇଁ ଏ଼ୱାସି ନାଙ୍ଗେ ଈ ବାରେ କାତା ୱେସାମାଞ୍ଜାନେସି ।