ଜିସା 5

ଅଙ୍ଗୁରି ବା଼ଡ଼ାତି ପା଼ଚୁ

1 ନା଼ନୁ ନା଼ ଜୀୱୁ ନ଼ହିମାନାଣି ତାକି, ତାନି ଅଙ୍ଗୁରି ବା଼ଡ଼ା ତାକି ନା଼ ଜୀୱୁ ନ଼ନାଣାକି ର଼ ପା଼ଚୁ ପା଼ଚିଇଁ।

ହା଼ରେକା ବୁର୍‌ବୁରା ର଼ ହ଼ରୁତା ନା଼ ଜୀୱୁ ନ଼ହିମାନାଣା ର଼ ଅଙ୍ଗୁରି ବା଼ଡ଼ା ମାଚେ;

2 ଇଞ୍ଜାଁ, ଏ଼ୱାସି ଏ଼ଦାଆଁ କା଼ର୍‌ହାଁ ୱାଲ୍‌କା ବାରେ ହ଼ପ୍‌ହେସି

ଅ଼ଡ଼େ ହା଼ରେକା ନେହିଁ ଅଙ୍ଗୁରିମା଼ଡ଼ା ଏମ୍ବାଆଁ ଉହିତେସି

ଅ଼ଡ଼େ ଏ଼ ଟା଼ୟୁତି ମାଦି ର଼ ପାଡା ଆ଼ତି ଇଲୁ କେ଼ପାହାଁ ଅଙ୍ଗୁରି ପୀଚିନି ଦ଼ନି ଜିକେଏ କା଼ର୍‌ହେସି,

ଅ଼ଡ଼େ ଅଙ୍ଗୁରି ପା଼ଡ଼େୟି ଆ଼ୟିନେ ଇଞ୍ଜିଁ କା଼ଚାହାଁ ଡ଼ୟିତେସି,

ସାମା ଏମ୍ବାଆଁ ଜା଼ଡ଼ା ଅଙ୍ଗୁରି ପା଼ଡ଼େୟି ଆ଼ୟିତେ।

3 ଏ଼ଦାଆଁତାକି ନୀଏଁ ଏ଼ ଜିରୁସାଲମତା ବାସା କିହାମାନାତେରି ଅ଼ଡ଼େ ଜୀହୁଦାତି ଲ଼କୁ, ନା଼ନୁ ମିଙ୍ଗେ ବାତିମା଼ଲି ମାଞ୍ଜାଇଁ, ମୀରୁ ନାଙ୍ଗେ ଅ଼ଡ଼େ ନା଼ ଅଙ୍ଗୁରି ବା଼ଡ଼ାତି ବିଚାରା କିଦୁ। 4 ନା଼ନୁ ନା଼ ଅଙ୍ଗୁରି ବା଼ଡ଼ାତା ଏ଼ନାଆଁ କିହାହିଲଅଁ, ଇଲେତି ଏମିନି କାମା ଏମ୍ବାଆଁ କିହାଲି ଆ଼ତେମା ? ଏ଼ଦାଆଁତାକି ନା଼ନୁ ଅଙ୍ଗୁରି ପା଼ଡ଼େୟି ଆ଼ୟିନେ ଇଞ୍ଜିଁ କା଼ତିହିଁ ଏମ୍ବାଆଁ ଜା଼ଡ଼ା ଅଙ୍ଗୁରି ପା଼ଡ଼େୟି ଏ଼ନାଆଁତାକି ଆ଼ୟିତେ ?

5 ଏ଼ଦାଆଁତାକି ନୀଏଁ ୱେଞ୍ଜୁ; ନା଼ନୁ ନା଼ ଅଙ୍ଗୁରି ବା଼ଡ଼ାତି ଏ଼ନାଆଁ କିଇଁ, ଏ଼ଦାଆଁ ମିଙ୍ଗେ ପୁଣ୍‌ମ୍ବି କିୟାଇଁ; ନା଼ନୁ ଏମ୍ବାତି ବେୟିଁ ରିକ୍‌ହା ତୁହ୍‌ଇଁ, ଏଚେଟିଏ ଏ଼ଦି ନା଼ସା କିୱିଆ଼ନେ; ନା଼ନୁ ଏମ୍ବାତି କାତି ଡିକ୍‌ହା ତୁହ୍‌ଇଁ, ଏଚେଟିଏ ଏ଼ଦି କଡାତଲେ ୱିସ୍‌ପି ଆ଼ନେ; 6 ଇଞ୍ଜାଁ, ନା଼ନୁ ଏ଼ଦାଆଁ ନସ୍ତ କିଇଁ; ତାନି କମାୟାଁ ରାତ୍‌ପି ଆ଼ଉ କି ବୂମି କୁସିକିୱି ଆ଼ଏ; ସାମା ଏ଼ଦି ଅଣ୍‌ଙ୍ଗ ଅ଼ଡ଼େ ହା଼ପ୍‌କା ମା଼ର୍‌ନୁ ଲେହେଁ ଆ଼ନେ; ଅ଼ଡ଼େ ଏ଼ଦାନି ଲାକ ପିୟୁ ରିଏ ଏ଼ଦାଆଁତାକି ନା଼ନୁ ଦୂନ୍ଦ୍ରାତି ହୁକୁମି ହୀଇଁ।

7 ଇଚିହିଁ ଇସ୍ରାୟେଲ କୂଲୁ ବା଼ଡ଼୍‌ୟୁଗାଟି ପ୍ରବୁତି ଅଙ୍ଗୁରି ବା଼ଡ଼ା

ଅ଼ଡ଼େ ଜୀହୁଦାତି ଲ଼କୁ ତାନି ଅ଼ଜିତି ପା଼ଲା; ଏ଼ୱାସି ନୀହାଁୟି କା଼ତେସି,

ସାମା ମେହ୍‌ମୁ ଲାଗେଏ ଆ଼ତେ; ଦାର୍ମୁତି କା଼ତେସି,

ସାମା ମେହ୍‌ମୁ, ଡ଼ୀକି ଆ଼ତେ।

ଲାଗେଏ କାମା କିନାରି

8 ଦେ଼ସାତା ଏ଼ନିକିଁ ଅ଼ଡ଼େ ଟା଼ୟୁ ଡ଼ୟେଏ ଅ଼ଡ଼େ ମୀରୁ ଏ଼ନିକିଁ ଏମ୍ବାଆଁ ରଅତେରି ବାସା କିଦେରି, ଏ଼ଦାଆଁତାକି ଇଲୁ ତାକି ଇଲୁ, ବୂମି ତାକି ବୂମି ଆଟ୍‌ହି ମାଞ୍ଜେରି ମୀରୁ, ମୀରୁ ବା଼କା ବେଟାଆ଼ନାତେରି! 9 ବା଼ଡ଼୍‌ୟୁଗାଟି ପ୍ରବୁ ନା଼ କିର୍ୟୁଁତା ଏଲେଇଞ୍ଜି ମାନେସି, ସାତେଏ ହା଼ରେକା ଇଲ୍‌କା ନା଼ସା ଟା଼ୟୁ, କାଜା କାଜାଇ ଅ଼ଡ଼େ ଅ଼ଜିତି ଇଲ୍‌କା ବାସା କିଆଗାଟାଇ ଆ଼ନୁ। 10 ଇଚିହିଁ ଦସ ଆକ୍ରା ଅଙ୍ଗୁରି ବା଼ଡ଼ାତା ର଼ ମହଣ*5:10 ର଼ ମହଣ ଇଚିହିଁ ୨୨ ଗା଼ଜୁ ଅଙ୍ଗୁରି ରାସା ହ଼ନେ ଅ଼ଡ଼େ ଦସ ମହଣ*5:10 ଦସ ମହଣ ଇଚିହିଁ ୨୨୦ କେ଼ଜି ବିଚାଟି ୱାର୍‌ଇ ର଼ ମହଣ*5:10 ର଼ ମହଣ ଇଚିହିଁ ୨୨ କେ଼ଜି ଆର୍ନା କାମ୍ବିନେ।

11 ଆମ୍ବାଆରି କା଼ଡ଼ୁ ଗସାଲି ଲା଼ଇ ଲା଼ଇସିଏ ନିଙ୍ଗିନେରି; ଅଙ୍ଗୁରି ରାସାତା ହ଼ଚିନି ପାତେକା ଲା଼ଆଁୟାଁ ୱେ଼ଡ଼ା କିନେରି, ଏ଼ୱାରି ବା଼କା ବେଟାଆ଼ନେରି। 12 ଏ଼ୱାରି ବ଼ଜିତା ଡୁଣ୍ତୁଣି, ସେର୍‌ଙ୍ଗି, ଟାମ୍‌କି, ପୀରୁଡ଼ି ଅ଼ଡ଼େ ଅଙ୍ଗୁରି ରାସା ଡ଼ୟିନେ; ସାମା ଏ଼ୱାରି ପ୍ରବୁତି କାମା ସିନିକିଅରି କି ତାନି କେୟୁତି କାମା ଏ଼ୱାରି ଅଣ୍‌ପା ହିଲଅରି। 13 ଏ଼ଦାଆଁତାକି ନା଼ ଲ଼କୁ ବୁଦି ଊଣା ମାନାକି ଦସ୍‌ପି ଆ଼ନେରି; ଇଞ୍ଜାଁ, ତାମି ବାତ୍‌କୁଗାଟି ଲ଼କୁ ହାକି ଅ଼ଡ଼େ ତାମି ଲ଼କୁ ଏ଼ସ୍‌କି ତାକି ୱା଼ୟିନେରି। 14 ଏ଼ଦାଆଁତାକି ତା଼ଡ଼େପୂରୁ ତାନି ବାଣ୍ତି ଅ଼ସାରା ଅ଼ଡ଼େ ତାନି ଗୂତି କାଟୁ ହିଲାଆ ରେ଼ଟୁ ଦେଚାମାନେ; ଇଞ୍ଜାଁ, ଏ଼ୱାରି ଗା଼ୱୁରମି, ଏ଼ୱାରି ଲ଼କୁ, ଏ଼ୱାରି କା଼ଲୱି ଅ଼ଡ଼େ ଏ଼ୱାରି ବିତ୍ରା ରା଼ହାଁ ଆ଼ନି ଲ଼କୁ ଏମ୍ବାଆଁ ରେ଼ଚା ହାନେରି।

15 ଇଞ୍ଜାଁ, ଏ଼ଦାଆଁତାକି ବାରେ ଲ଼କୁ ହୀଣି କିୱିଆ଼ନେରି ଅ଼ଡ଼େ କାଜା ଲ଼କୁ ଊଣା ଆ଼ନେରି, ଇଞ୍ଜାଁ ଡା଼ହାରା ଗାଟାରି କାନୁ ମେସାଲି ଊଣା ଆ଼ନେ; 16 ସାମା ବା଼ଡ଼୍‌ୟୁଗାଟି ପ୍ରବୁ ବିଚାରାତା କାଜାସି ଆ଼ନେସି, ଇଞ୍ଜାଁ ଦାର୍ମୁ ଲେହେଁତି ମାହାପୂରୁ ଦାର୍ମୁତା ସୁଦୁ ତଲେ ମା଼ନି ଆ଼ନେସି। 17 ଏଚିବେ଼ଲାତା ମେ଼ଣ୍ତା ଡା଼ଲୁ ଜାହାରା ମେୟିଁନି ଟା଼ୟୁତା ମେୟିଁନି ଲେହେଁ ମେୟିଁନୁ, ଇଞ୍ଜାଁ, ଇତାଲା ଆତାଲା ରେ଼ନାରି ନେହିଁ ବାତ୍‌କୁ ଗାଟାରି ନା଼ସା ଆ଼ତି ଟା଼ୟୁତା ବାସା କିନେରି।

18 ଆମ୍ବାଆରି ଉଜେଏତି ନା଼ଡ଼ିକିନି ଡ:ରି ଅ଼ଡ଼େ ସଗଡ଼ି ଡ:ରି ତଲେ ପା଼ପୁତି ରେଜା ତାନେରି, ଏ଼ୱାରି ବା଼କା ବେଟାଆ଼ନାରି! 19 ଏ଼ୱାରି ଏଲେଇନେରି, "ମା଼ମ୍ବୁ ଏ଼ନିକିଁ ପାରାହାଁ ବେଟାଆ଼ନମି, ଏ଼ଦାଆଁତାକି ଏ଼ୱାସି ପୂରା କିପେସି, ଏ଼ୱାସି ତାନି କାମା ତବେ କିପେସି; ଅ଼ଡ଼େ, ମା଼ର ଏ଼ନିକିଁ ପୁଞ୍ଜାଲି ଆ଼ଡିନାୟି, ଏ଼ଦାଆଁତାକି ଇସ୍ରାୟେଲତି ଦାର୍ମୁ ଗାଟାଣି କାତା ୱା଼ହାଁ ଆ଼ପେ।"

20 ଆମ୍ବାଆରି ଲାଗେଏତାଣି ନେହାୟି ଅ଼ଡ଼େ ନେହାଣି ଲାଗେଏ ଇନେରି; ଆମ୍ବାଆରି ଆନ୍ଦେରିତି ଉଜେଡ଼ି ଅ଼ଡ଼େ ଉଜେଡ଼ିତି ଆନ୍ଦେରି ଇଞ୍ଜିଁ ଅଣ୍‌ପିନେରି, ଆମ୍ବାଆରି କାମ୍ବେଲିତି ହେତାୟି ହେତାଣିତି କାମ୍ବେଲି ଇଞ୍ଜିଁ ଅଣ୍‌ପିନେରି, ଏ଼ୱାରି ବା଼କା ବେଟାଆ଼ନାରି।

21 ଆମ୍ବାଆରି ଜାହାରା କାନୁତା ବୁଦିଗାଟାରି ଅ଼ଡ଼େ ଜାହାରା ଅଣ୍‌ପୁତା ସୁତର ଗାଟାରି, ଏ଼ୱାରି ବା଼କା ବେଟାଆ଼ନାରି।

22 ଆମ୍ବାଆରି ଅଙ୍ଗୁରି ରାସା ଗସାଲି ବା଼ଡ଼୍‌ୟୁ ଗାଟାରି ଅ଼ଡ଼େ କା଼ଡ଼ୁ ତବେ କିହାଲି ବପୁ ଗାଟାରି; 23 ଆମ୍ବାଆରି ଲା଼ଞ୍ଚା ତାକି ଲାଗେଏତାଣାଇଁ ଦ଼ହ ହିଲାଆଗାଟି ଲ଼କୁ କିନେରି ଅ଼ଡ଼େ ଦାର୍ମୁ ଗାଟାଣି ଦାର୍ମୁତି ତାନି ତା଼ଣାଟି ହେକ କିନେରି, ଏ଼ୱାରି ବା଼କା ବେଟାଆ଼ନାରି। 24 ଏ଼ଦାଆଁତାକି ହିଚୁ ପୁୟାଁଟି ଏ଼ନିକିଁ ନା଼ଡା ୱେନେ ଅ଼ଡ଼େ ୱା଼ୟିତି ଜା଼ଡ଼ା ଏ଼ନିକିଁ ହିଚୁ ଗୁଦ୍‌ୱାତା ୱେନେ, ଏଲେକିହିଁଏ ଏ଼ୱାରି ଡାକି ସୀର୍‌ହା ହାନେ ଅ଼ଡ଼େ ଏ଼ୱାରି ପୂୟୁ ଦୂଡ଼ି ଲେହେଁ ଊମ୍ବାହାନେ; ଇଚିହିଁ ଏ଼ୱାରି ବା଼ଡ଼୍‌ୟୁଗାଟି ପ୍ରବୁତି ମେ଼ରା ଅ଼ପା ହିଲଅରି ଅ଼ଡ଼େ ଇସ୍ରାୟେଲତି ଦାର୍ମୁ ଗାଟାଣି ବ଼ଲୁ ଅ଼ପା ହିଲଅରି। 25 ଏ଼ଦାଆଁତାକି ପ୍ରବୁତି କାର୍‌ବି ତାନି ଲ଼କୁ କ଼ପାଟି ଗାଡି ଆ଼ହାମାନେ ଅ଼ଡ଼େ ଏ଼ୱାସି ଏ଼ୱାରି କ଼ପାଟି ତାନି କେୟୁ ଦା଼ସାହାଁ ଏ଼ୱାରାଇଁ ୱେ଼ଚାମାନେସି, ଇଞ୍ଜାଁ, ଊଣା ହ଼ର୍‌କା ତୀର୍‌ଗିତୁ ଅ଼ଡ଼େ ଲ଼କୁତି ମାଡ଼୍‌ହା ପା଼ହେରିତା ଜା଼ଣ୍ତୁ ଲେହେଁ ଆ଼ତୁ। ଈ ବାରେ ଆ଼ତି ଜିକେଏ ତାନି କାର୍‌ବି ଡୂଙ୍ଗେଏ, ସାମା ତାନି କେୟୁ ତଲିତି ଲେହେଁ ଦା଼ସାହାଁ ଡ଼ୟାମାନେ।

26 ଇଞ୍ଜାଁ, ଏ଼ୱାସି ହେକ ଦେ଼ସା କୂଲୁ ତାକି ର଼ ସିରେଲି ଗ଼ଞ୍ଜିନେସି ଅ଼ଡ଼େ ଦାର୍‌ତି ମୁଟ୍‌ପେଟି ଏ଼ୱାରାଇଁ ୱାଞ୍ଜୁ ଊକାହାଁ ହା଼ଟିନେସି, ଇଞ୍ଜାଁ, ମେହ୍‌ଦୁ, ଏ଼ୱାରି ତବେ ୱା଼ନେରି; 27 ଏ଼ୱାରି ବିତ୍ରାଟି ଆମ୍ବାଆରି ୱା଼ହଅରି, କି ପୁଟି କିଅରି; ଆମ୍ବାଆରି କଟଣି ହ଼ଅରି କି ଇଦା କିଅରି; ଅ଼ଡ଼େ, ଏ଼ୱାରି ବୁଡ଼୍‌ପାମା଼ଡ଼ା ହୁଙ୍ଗେଏ କି ଏ଼ୱାରି ପାଃଆନାତି ସେପୁ ଡାମ୍ବେଏ; 28 ତାମି ୱେଲୁ ୱାସ୍ତାୟି ଅ଼ଡ଼େ ଏ଼ୱାରି ଆପ୍‌କା ବାରେ ଜାଗ୍ରାତା ମାନୁ; ଏ଼ୱାରି ଗ଼ଡ଼ାୟାଁତି କୁରା ମିଣ୍‌ସିମାନି ୱାଲି ଲେହେଁ ଅ଼ଡ଼େ ଏ଼ୱାରି ରାତାତି ବିଲାୟାଁ ରୁୱାଗା଼ଲି ଲେହେଁ; 29 ତାମି ଗାର୍ଜିନାୟି ସିହଁ କ୍ଡାଃନି ଲେହେଁ, ଏ଼ୱାରି ଦାଂଗ୍‌ଣା ସିହଁ କ୍ଡାଃନିତି ଲେହେଁ ଗାର୍ଜିନେରି; ଅ଼ଡ଼େ, ଏ଼ୱାରି ଗାର୍ଜାହାଁ ଅ଼ଡ଼େ ବେ଼ଟା ଆସାହାଁ ଆଜାଆ ରେ଼ଟୁ ଏ଼ଦାଆଁ ଅ଼ନେରି ଅ଼ଡ଼େ ଗେଲ୍‌ପାଲି ଆମ୍ବାଆରି ଡ଼ୟଅରି।

30 ଇଞ୍ଜାଁ, ଏ଼ୱାରି ଏ଼ ଦିନା ସାମ୍‌ଦୁରି ଗାର୍ଜିନି ଲେହେଁ ଲ଼କୁ ଲାକ ଗାର୍ଜିନେରି; ଏଚେଟିଏ ଆମ୍ବାଆସି ଦେ଼ସାତି ସିନିକିନେସି, ଆତିହିଁ ମେହ୍‌ଦୁ, ଆନ୍ଦେରି ଅ଼ଡ଼େ ବା଼ଦା, ଇଞ୍ଜାଁ, ଏ଼ ଟା଼ୟୁତି ଉଜେଡ଼ି ଦୂନ୍ଦ୍ରାତା ଆନ୍ଦେରି ଆ଼ନେ।