ଜିସା 47

ବାବିଲତି ବିଚାରା

1 "ଆଲ, ବାବିଲତି ଡ଼ାଆ ମା଼ଙ୍ଗା,

ରେ଼ଚା ୱା଼ହାଁ ଦୂଡ଼ିତା କୁଗାମୁ;

ଆଲ, କଲ୍‌ଦିୟ ମା଼ଙ୍ଗା, ନୀନୁ ସିଂଗାସାଣି ହିଲାଆନା ବୂମିତା କୁଗାମୁ;

ଇଚିହିଁ ମୀରୁ ଅ଼ଡ଼େ କ଼ଡ଼୍‌ଗି ଇଞ୍ଜାଁ ନେହିଁ ଡ଼ାଆ ମା଼ଙ୍ଗା ଇଞ୍ଜିଁ ୱେ଼ଙ୍ଗଅତେରି।

2 ଜେତା ଅ଼ହାଁ ଆର୍ନା ନୂୟାମୁ, ମୀ ପୀଡ଼୍‌ଗା ମାନାଣି ହୁକ୍‌ମୁ,

ସକାୟାଁ ହୁକ୍‌ହା ତୁହ୍‌ମୁ ଅ଼ଡ଼େ ୱାର୍‌ଇ ପାଃଆନାୟାଁ ତଲେ କାଡାତା ତା଼କିହିଁ ହାଲାମୁ।

3 ନୀ ନା଼ଗ୍‌ଡ଼ା ତ଼ଞ୍ଜା ଆ଼ନେ, ହାଅ, ନୀ ଲାଜାଗାଟାୟି ତ଼ଞ୍ଜା ଆ଼ନେ;

ନା଼ନୁ ବାଦୁଲି ଅ଼ଇଁ ଆମ୍ବାଆରି ଗ଼ହାରା ୱେନଅଁ।"

4 ମାଙ୍ଗେ ଗେଲ୍‌ପାନି ଇସ୍ରାୟେଲ ଦାର୍ମୁତି ବା଼ଡ଼୍‌ୟୁଗାଟି ପ୍ରବୁ ଏ଼ୱାଣି ଦ଼ରୁ।

5 ଆଲ, କଲ୍‌ଦିୟ ମା଼ଙ୍ଗା, ନୀନୁ ଆନ୍ଦେରିତା ହାଜାହାଁ ପାଲେଏ କୁଗାମୁ;

ଇଚିହିଁ ରା଼ଜି ରା଼ଜିତି ସା଼ଲୱି କିନାତି ଇଞ୍ଜିହିଁ ୱେ଼ଙ୍ଗଅତି।

6 ନା଼ନୁ ନା଼ ଲ଼କୁଣି କାର୍‌ବି ଆ଼ହାଁ ଜାହାରା ଅଦିକାରା ଲାଗେଏ କିତେଏଁ

ଅ଼ଡ଼େ ନୀ କେୟୁତା ଏ଼ୱାରାଇଁ ହେର୍‌ପାତେଏଁ;

ନୀନୁ ଏ଼ୱାରାଇଁ ଏ଼ନି କାର୍ମା ମେହ୍‌ଆତି;

ନୀନୁ ବୁଡ଼୍‌ହା ଲ଼କୁତି ଲାକ ନୀ ବ଼ଜୁତି ଜୁୱେଡ଼ି ଏକ୍‌ହି।

7 ଇଞ୍ଜାଁ ନୀନୁ ଏଲେଇଚି, "ନା଼ନୁ କା଼ଲେଏ ସା଼ଲୱି କିନାତେଏଁ ଆ଼ହାଁ ଡ଼ୟିଇଁ;

ଇଚିହିଁ ନୀନୁ ଈ ବାରେ କାତାତି ମ଼ନ ହୀଆତି,

କି ଏମ୍ବାତି ଡା଼ୟୁତି ପା଼ଡ଼େୟି ଅଣ୍‌ପାଆତି।"

8 ଏ଼ଦାଆଁତାକି ଆଲ, ସୁକୁ ବେଟାଆ଼ନାତି ନୀଏଁ ଈଦାଆଁ ୱେନାମୁ,

ନୀନୁ ଆଜାଆନା ବାସା କିହାଁ ମ଼ନ ମ଼ନତା ଏଲେ ଇଞ୍ଜିମାଞ୍ଜି,

"ନା଼ନୁ ମାଇଁ, ନା଼ ପିସ୍‌ପେ ଅ଼ଡ଼େ ଆମ୍ବାଆସି ହିଲଅସି;

ନା଼ନୁ ରା଼ଣ୍ତେଣି ଲେହେଁ କୁଗଅଁ, ନା଼ ମୀର୍‌କା ନା଼ସା ଆ଼ନାଣି ପୁନଅଁ।"

9 ସାମା ୱେନାମୁ, ଈ ରୀ ଦୁକୁ ଇଚିହିଁ ମୀର୍‌କାତି ନା଼ସା ଆ଼ନାୟି ଅ଼ଡ଼େ ନୀନୁ ରା଼ଣ୍ତେଣି ଆ଼ନାୟି,

ଦେବୁଣିଏ ରଣ୍ତିଏ ଦିନା ନିଙ୍ଗେ ତାକି ୱା଼ନେ।

ନିଙ୍ଗେ ହା଼ରେକା ଗୂର୍‌କା ଅ଼ଡ଼େ ଗାର୍‌ଡ଼ି ଗାଟାରି ମାଚିହିଁ ଜିକେଏ

ଏ଼ ରିଣ୍ତି ସାତେଏ ନୀ ତାକି ଆ଼ନେ।

10 ଇଚିହିଁ ନୀନୁ ନୀ ଲାଗେଏତି ତା଼ଣା ଆ଼ସା କିହାମାଞ୍ଜି;

ନୀନୁ ଏଲେ ଇଞ୍ଜିମାଞ୍ଜି ଆମ୍ବାଆସି ନାଙ୍ଗେ ମେସିମାଞ୍ଜଅସି,

ନୀ ବୁଦି ନିଙ୍ଗେ ଲାଗେଏତି ଜିରୁତା ଅ଼ହାମାଞ୍ଜାନେ;

ଇଞ୍ଜାଁ ନୀନୁ ମ଼ନ ମ଼ନତା ଏଲେଇଞ୍ଜିମାଞ୍ଜି,

ନା଼ନୁ ମାଇଁ, ନା଼ ପିସ୍‌ପେ ଅ଼ଡ଼େ ଆମ୍ବାଆସି ହିଲଅସି;

11 ଇଞ୍ଜାଁ ନୀ ତାକି ଲାଗେଏତାୟି ୱା଼ନେ,

ନୀନୁ ଏ଼ ୱା଼ନାଣି ପୁଞ୍ଜାଲି ଆ଼ଡଅତି;

ଇଞ୍ଜାଁ ନୀ ତା଼ଣା କସ୍ତ ୱା଼ନେ ନୀନୁ ଏ଼ଦାଆଁ ହେକ କିହାଲି ଆ଼ଡଅତି;

ଅ଼ଡ଼େ ନୀନୁ ଏ଼ନାଆଁ ପୁଞ୍ଜିହିଲଅତି ଇଲେତି ନା଼ସା ଆ଼ନାୟି ଦେବୁଣିଏ ନୀ ତା଼ଣା ୱା଼ନେ।

12 ନୀନୁ ଊଣା ୱେ଼ଡ଼ାଟିଏ ନୀ ଏମିନି ଗୂର୍‌କା ଅ଼ଡ଼େ ଗାର୍‌ଡ଼ି କାମା କିହିଁ ୱା଼ହାମାଞ୍ଜି,

ଏ଼ଦାଆଁ ନୀଏଁ କିମୁ। ଆ଼ତିହିଁ ନୀନୁ ଏମ୍ବାତି ଲା଼ବା ବେଟାଆ଼ଦି,

ଆ଼ଆତିଁ ନୀନୁ ଜୀଣା ଆ଼ହାଲି ଆ଼ଡିଦି।

13 ନୀନୁ ନୀ ହା଼ରେକା କାତାୟାଁ ତଲେ ୱା଼ହାମାଞ୍ଜି;

ନୀଏଁ ପା଼ଞ୍ଜି ସିନିକିନାରି ହୁକାୟାଁ ସିନିକିନାରି ଅ଼ଡ଼େ ସ଼ଗୁ ସିନିକିନାରି ନିପାରି

ଅ଼ଡ଼େ ନିଙ୍ଗେ ତାକି ଏ଼ନା ଏ଼ନାୟି ଆ଼ନେ ଏମ୍ବାଟି ନିଙ୍ଗେ ଗେଲ୍‌ପାପେରି।

14 ମେହ୍‌ଦୁ ଏ଼ୱାରି ନା଼ଡା ଲେହେଁ ଆ଼ନେରି;

ହିଚୁ ଏ଼ୱାରାଇଁ ଡ଼ୀଞ୍ଜିକିନେ,

ଏ଼ୱାରି ହିଚୁ ଗୁଦ୍‌ୱା ବା଼ଡ଼୍‌ୟୁଟି ଜାହାରାଇଁ ଗେଲ୍‌ପାଲି ଆ଼ଡଅରି।

ଏ଼ଦି ଉସମି ଆ଼ହାଲି ଡ଼ୀଞ୍ଜିମାନି ରୀଙ୍ଗାୟାଁ ଆ଼ଆତିଁ ତାନି ନ଼କିତା କୁଗାଲି ଆ଼ନି ହିଚୁ ଲେହେଁ ଆ଼ଏ।

15 ଏମି ଏମିନି କାମା ବାରେ ନୀନୁ କସ୍ତ କିହାମାଞ୍ଜି,

ଏ଼ ବାରେ ନିଙ୍ଗେ ତାକି ଇଲେକିଁ ଆ଼ନେ;

ନୀ ଡ଼ାଆ ବେ଼ଲାଟିଏ ଆମ୍ବାଆରି ନୀ ତଲେ ବେ଼ବାରା କିହାମାନେରି,

ଏ଼ୱାରି ବାରେ ଇତାଲା ଆତାଲା ରେ଼ଜିହିଁ ଜାହା ଜାହାରା ଟା଼ୟୁତା ହାନେରି,

ସାମା ନିଙ୍ଗେ ଗେଲ୍‌ପାଲି ଆମ୍ବାଆସି ଡ଼ୟଅସି।