1 ଏ଼ ଦିନା ପ୍ରବୁ ତାନି କାର୍ମା ହିଲାଆ, କାଜା ବା଼ଡ଼୍‌ୟୁଗାଟି କାଣ୍ତା ତଲେ ଲିବିୟାତନ ଦ଼ରୁତି ତବେ ତା଼କିନି ରା଼ଚୁ ଅ଼ଡ଼େ ଆଡେୟି ତା଼କିନି ରା଼ଚୁ ଲିବିୟାତନତି ଡଣ୍ତ ହୀନେସି; ଅ଼ଡ଼େ ଏ଼ୱାସି ସାମ୍‌ଦୁରିତି କାଜା ଜ଼ନ୍ତତି ନା଼ସା କିନେସି।

2 ଏ଼ ଦିନା ର଼ ଅଙ୍ଗୁରିତି ବା଼ଡ଼ା ମାନେ, ମୀରୁ ଏ଼ଦାଣି ତାକି ପା଼ଚାଦୁ। 3 "ନା଼ନୁ ପ୍ରବୁତେଏଁ ଏ଼ଦାଆଁ ଗେଲ୍‌ପିଇଁ; ନା଼ନୁ ଅଲେ ଅଲେ ଏମ୍ବାଆଁ ଏ଼ୟୁ ହୀଇଁ; ଆମ୍ବାଆସି ଏ଼ନିକିଁ ଏ଼ଦାଣି ନା଼ସା କିଅସି, ଏ଼ଦାଆଁତାକି ନା଼ନୁ ଲା଼ଆଁୟାଁ ମାଦେନା ଏ଼ଦାଆଁ ଗେଲ୍‌ପିଇଁ। 4 ନା଼ ତା଼ଣା କାର୍‌ବି ହିଲେଏ; ହା଼ପ୍‌କା ମା଼ର୍‌କା ଜୁଜୁତା ନା଼ କ଼ପାଟି ନା଼ ସାତ୍ରୁ ଆୟାନୁ! ଆତିହିଁ ନା଼ନୁ ରିହାଁ ଏ଼ ବାରେତି ରଣ୍ତିଏ ଦେବା ହୂଡିତେଏଁମା। 5 ଆ଼ଆତିଁ ନା଼ ତଲେ ଆଣ୍ତାଲି ତାକି ଏ଼ଦି ନା଼ ବା଼ଡ଼୍‌ୟୁତି ଡ଼଼ଇକା ୱା଼ପେ; ହାଅ, ଏ଼ଦି ନା଼ ତଲେ ଆଣ୍ତାପେ।"

6 "ୱା଼ନି କା଼ଲାତା ଜାକୁବ ହୀରୁ ଜୀନେସି; ଇସ୍ରାୟେଲ ଗେଲ୍‌ପି ଆ଼ହାଁ ରା଼ହାଁ ଆ଼ନେସି ଅ଼ଡ଼େ ଏ଼ୱାରି ଦାର୍‌ତିତା ଏ଼ପା ଆ଼ହାଁ ନେଞ୍ଜିକିନେରି।"

7 ତାଙ୍ଗେ ୱେ଼ଚାମାଚାରାଇଁ ଏ଼ୱାସି ଏ଼ନିକିଁ ୱେ଼ତେସି, ଏଲେକିହିଁ କି ଏ଼ୱାସି ଏ଼ୱାଣାଇଁ ୱେ଼ଚା ମାନେସି ? ଆ଼ଆତିଁ ତାନି ତା଼ଣାଟି ହା଼ତି ଲ଼କୁ ଲେହେଁ ଏ଼ୱାସି କି ହା଼ହାମାନେସି ? 8 ନୀନୁ ଏ଼ଦାଣି ହେକ ପାଣ୍ତିତି ବେ଼ଲା ଏଚେ଼ତା ଡା଼ୟୁ ନ଼କିତା ଅଣ୍‌ପାହାଁ ଦୁକୁ ହୀତି; ଏ଼ଦି ୱେ଼ଡ଼ା ହ଼ପୁୱାକିତି ଗା଼ଲି ଦିନାତା ଏ଼ଦାଣି ତାନି କାଜା ଗା଼ଲି ତଲେ ଊପ୍‌ହା ମାନେସି। 9 ଈଦାଆଁତାକି ଈଦାଆଁ ତଲେ ଜାକୁବତି ଦ଼ହ ମେଣ୍‌ଙ୍ଗିନେ ଅ଼ଡ଼େ ଏ଼ୱାଣି ପା଼ପୁ ହେକ ଆ଼ନି କାତା ଈଦି; ଏ଼ୱାସି ପୂଜା ପିଣ୍ତାତି ୱାଲ୍‌କା ବାରେ ଦୂରୁ ୱାଲି ଲେହେଁ ଗୁଣ୍ତା କିନେସି, ଆସେର ବମା ଅ଼ଡ଼େ ୱେ଼ଡ଼ାତି ବମାୟାଁ ଅ଼ଡ଼େ ନିଙ୍ଗାଉ।

10 ଇଚିହିଁ ଆ଼ଟ୍‌ୱା କାତି ଗାଟି ଗା଼ଡ଼ା ଲ଼କୁ ହିଲାଆ ଗାଟାୟି ଆ଼ତେ, ଏ଼ୱି ପିସ୍ତି ଇଲ୍‌କା ଲେହେଁ ଲ଼କୁ ହିଲାଆଗାଟି ଜା଼ଡ଼ା ଆ଼ହାମାନେ; ଏ଼ ଟା଼ୟୁତା କ଼ଡି ଗରି ମେୟିଁନୁ ଅ଼ଡ଼େ ଡୂରିନୁ, ଅ଼ଡ଼େ ମା଼ର୍‌ନୁତି କମାୟାଁ ବାରେ ତିନୁ। 11 ଏମ୍ବାତି କମାୟାଁ ବାରେ ୱା଼ୟିତିହିଁ ଡିପ୍‌କି ଆ଼ନୁ; ଆୟାସିକା ଏମ୍ବାଆଁ ହିଚୁ ଡାହ୍‌ନୁ; ଇଚିହିଁ ଏ଼ ଲ଼କୁ ବୁଦି ହିଲାଆଗାଟାରି; ଏ଼ଦାଆଁତାକି ଆମ୍ବାଆସି ଏ଼ୱାରାଇଁ ରାଚିକିତେସି, ଏ଼ୱାସି ଏ଼ୱାରାଇଁ କାର୍ମା ଆ଼ଅସି, ଅ଼ଡ଼େ ଆମ୍ବାଆସି ଏ଼ୱାରାଇଁ ତିୟାରା କିତେସି ଏ଼ୱାସି ଏ଼ୱାରାଇଁ କାର୍ମା ତ଼ହ୍‌ଅସି।

12 ଏ଼ ଦିନା ପ୍ରବୁ ପରାତ୍‌ କାଡାଟିଏ ମିସରତି କାଡା ପା଼ଡ଼ି ପାତେକା ଇଞ୍ଜାଁ, ହେ଼ ଇସ୍ରାୟେଲ ମୀର୍‌କା, ମୀରୁ ରଅ ରଅତେରି କୂଡ଼ି କିୱିଆ଼ଦେରି।

13 ଅ଼ଡ଼େ, ଏ଼ ଦିନା କାଜା କମୁ ଊକ୍‌ୱି ଆ଼ନେ; ଇଞ୍ଜାଁ ଅସୁର ଦେ଼ସାତା ନା଼ସା ଆ଼ହିମାନି ଲେହେଁତି ଲ଼କୁ ଅ଼ଡ଼େ ମିସର ଦେ଼ସାତି ପେ଼ର୍‌ୱି ଆ଼ହାମାନି ଲ଼କୁ ୱା଼ନେରି; ଇଞ୍ଜାଁ ଏ଼ୱାରି ଜିରୁସାଲମତି ସୁଦୁ ହ଼ରୁତା ପ୍ରବୁଇଁ ଜହରା କିନେରି।