ଜିସା 23

ସ଼ର ଅ଼ଡ଼େ ସିଦନ ତାକି ନ଼କିତା ଆ଼ନି କାତା

1 ସ଼ର ତାକି ନ଼କିତା ଆ଼ନି କାତା। ଏ଼ ତର୍ସିସତି ଜା଼ଜାୟାଁ ବାରେ, ମୀରୁ କା଼ଲୱି ଆ଼ଦୁ; ଏ଼ନିଇଚିହିଁ ଏ଼ଦି ଇଲେକିଁ ନା଼ସା ଆ଼ତେ କି, ଏମ୍ବାଆଁ ଏ଼ନି ଇଲୁ ହିଲେଏ, କି ହାଜାଲି ଜିରୁ ହିଲେଏ; କିତିମ ଦେ଼ସାଟି ଈଦି ତାମ୍‌ଙ୍ଗେ ତାକି ୱେ଼ପ୍‌କି ଆ଼ତେ। 2 ଏ଼ ସାମ୍‌ଦୁରି ମାଦି ମାନି କୁପ୍‌ଲିତା ମାନାତେରି, ମୀରୁ ସାପି ଆ଼ଦୁ; ସାମ୍‌ଦୁରି ଗା଼ଣ୍‌ଚାହାଁ ସିଦନତି ବେ଼ବାରା କିନାରି ମୀ ଦେ଼ସାତା ନେଞ୍ଜିତେରି। 3 ଇଞ୍ଜାଁ, ହା଼ରେକା ଏ଼ୟୁତା ସିୟରତି ବିଚା ଅ଼ଡ଼େ ନିଲ କାଡାତି ଆର୍ନା ତାନି ଲା଼ବା ମାଚେ; ଇଞ୍ଜାଁ, ଏ଼ଦି ବାରେ ଦେ଼ସାତାରା ବେ଼ବାରା ଟା଼ୟୁ ଲେହେଁ ମାଚେ।

4 ଏ଼ ସିଦନ, ନୀନୁ ଲାଜା ଆ଼ମୁ, ଏ଼ନିଇଚିହିଁ ସାମ୍‌ଦୁରି, ଇଚିହିଁ ସାମ୍‌ଦୁରିତି ଆ଼ଟ୍‌ୱା ଟା଼ୟୁ ଈ କାତା ଜ଼ଲାମାନେ, "ନା଼ନୁ ଜାର୍ନିକିନି ବେ଼ଲାତି ବା଼ଦା ବେଟାଆ଼ହାହିଲଅଁ, ଜାର୍ନି କିହାହିଲଅଁ କି ଦାଂଗ୍‌ଣା କକାରାଇଁ ପ଼ହି କିହାହିଲଅଁ, କି ଡ଼ାଆ ପ଼ଦାୟାଁଣି ପ଼ହି କିହାହିଲଅଁ।"

5 ଈ କାବ୍ରୁ ମିସରତା ଏତିସାରେ, ଲ଼କୁ ସ଼ର କାତାତି କାବ୍ରୁତା ହା଼ରେକା ବିଲ୍‌କି ଆ଼ନେରି।

6 ମୀରୁ ସାମ୍‌ଦୁରି ଗା଼ଣ୍‌ଚାହାଁ ତର୍ସିସତା ହାଜୁ; ଏ଼ ସାମ୍‌ଦୁରି ମାଦି ମାନି କୁପ୍‌ଲିତା ମାନାତେରି, କା଼ଲୱି ଆ଼ଦୁ। 7 ଈଦି କି ମୀ ରା଼ହାଁକିନି ଗା଼ଡ଼ା ? ଈଦି ତଲି କା଼ଲାତେଏ ପୁର୍ବେତାୟି ମାଚେ; ଈଦାନି କଡାୟାଁ ହେକ ଦେ଼ସାତା ହ଼ଡାଲି ତାକି ଈଦାନି ଅ଼ତେ। 8 ଟ଼ପେରି ହାସ୍‌ପିନି ସ଼ରତି ବେ଼ବାରା କିନାରି ରାଜା ଲେହେଁ, ତାନି ବାତ୍‌କୁ ଗାଟାରି ଦାର୍‌ତିତି କାଜା ଲ଼କୁ; ତାନି କ଼ପାଟି ଆମ୍ବାଆସି ଈ କାତା କିହାମାନେସି ? 9 ବା଼ଡ଼୍‌ୟୁଗାଟି ପ୍ରବୁ ତାନି କାଜା ଆଙ୍କାରା ହୀଣି କିହାଲି ଅ଼ଡ଼େ ଦାର୍‌ତିତି ବାରେ ଗା଼ୱୁରମିଗାଟି ଲ଼କୁଣି ହୀଣି କିହାଲି ତାକି ଈ କାତା କିହାମାନେସି।

10 ଆଲ ତର୍ସିସତି ମା଼ଙ୍ଗା, ନୀନୁ ନିଲ କାଡା ଲେହେଁ ଜାହାରା ଦେ଼ସା ବିତ୍ରାଟି ହାଲାମୁ, ମୀ ବୁଡ଼୍‌ପାମା଼ଡ଼ା ଅ଼ଡ଼େ ହିଲେଏ। 11 ପ୍ରବୁ ସାମ୍‌ଦୁରି ଲାକ ଜାହାରା କେୟୁ ଦା଼ସାମାନେସି, ଏ଼ ରା଼ଜି ବାରେତି ଦା଼କ୍‌ହା ମାନେସି; ପ୍ରବୁ କିଣାନତି ଆ଼ଟ୍‌ୱା କାତି ବାରେ ନା଼ସା କିହାଲି ତାକି ତାନି କ଼ପାଟି ହୁକୁମି କିହାମାନେସି। 12 ଇଞ୍ଜାଁ, ଏ଼ୱାସି ଏଲେଇଚେସି, "ଆକେ, ସିଦନତି ଲାଗେଏ କିୱିଆ଼ହାମାନି, ଡ଼ାଆମା଼ଙ୍ଗା, ନୀନୁ ଅ଼ଡ଼େ ରା଼ହାଁ କିଅତି, ନିଙ୍ଗାମୁ, ଗା଼ଣ୍‌ଚାହାଁ କିତିମତା ହାଲାମୁ; ଏମ୍ବାଆଁ ଜିକେଏ ନୀନୁ ରଚାଣି ଜ଼ମାଲି ବେଟାଆ଼ଅତି।"

13 କଲ୍‌ଦିୟ ଲ଼କୁତି ଦେ଼ସା ସିନିକିମୁ; ଈ ଲ଼କୁ ଅ଼ଡ଼େ ହିଲଅରି; ଜା଼ଡ଼ା ଜ଼ନ୍ତ ତାକି ଅସୁରିୟ ଏ଼ଦାଆଁ ତୀରି କିହାମାନେ; ଏ଼ୱାରି କ଼ଟା ଲାକ ଇଲୁ କିହାଁ ଗା଼ଡ଼ା ନା଼ସା କିତେରି; ଏ଼ୱାସି କାତିୟାଁ କୁଟୁକୁଟା କିତେସି।

14 ଏ଼ ତର୍ସିସତି ଜା଼ଜାୟାଁ ବାରେ, କା଼ଲୱି ଆ଼ଦୁ, ଏ଼ନିଇଚିହିଁ ମୀ ଆ଼ଟ୍‌ୱା କ଼ଟା ନା଼ସା ଆ଼ତେ।

15 ଏ଼ ଦିନା ଇଲେକିଁ ଆ଼ନେ, ର଼ ରାଜାତି ଅଦିକାରାତି ବେ଼ଲା ସ଼ର ତୀନିକ଼ଡ଼ି ଦସ ବାର୍ସା ପାତେକା ବା଼ଣା ଆ଼ନେରି; ତୀନିକ଼ଡ଼ି ଦସ ବାର୍ସା ରା଼ତି ଡା଼ୟୁ ଦା଼ରେଣିତି ପା଼ଚୁ ଲେହେଁ ସ଼ର ତାକି ଆ଼ନେ।

16 ଏ଼ ରେ଼ଜିହିଁ ଡ଼ୟିନି ଦା଼ରେଣି, ସେର୍‌ଙ୍ଗି ଅ଼ହାଁ ଗା଼ଡ଼ାତା ରେ଼ମୁ;

ନୀନୁ ଏ଼ନିକିଁ ଅଣ୍‌ପୁତି ଜିରୁତା ୱା଼ଦି,

ଏ଼ଦାଆଁତାକି ନେହିଁ ଡିସା ତଲେ ୱେ଼ମୁ,

ହା଼ରେକା ପା଼ଚୁ ପା଼ଚାମୁ।

17 ଅ଼ଡ଼େ, ତୀନିକ଼ଡ଼ି ଦସ ବାର୍ସା ରା଼ତି ଡା଼ୟୁ ପ୍ରବୁ ସ଼ରତି କାତା ସିନିକିନେସି, ଏଚେଟିଏ ଏ଼ଦି ଜାହାରା ତଲିତି କାମାତା ୱେଣ୍ତିନେ, ଇଞ୍ଜାଁ, ବୂମିତି ବାରେ ଦାର୍‌ତି ତଲେ ଅ଼ଡ଼େ ବାରେ ରା଼ଜି ତଲେ ଦା଼ରି କାମା କିନେ। 18 ଅ଼ଡ଼େ, ତାନି ବେ଼ବାରା ଅ଼ଡ଼େ ବା଼ଡ଼ା ପ୍ରବୁତି ତାକି ସୁଦୁ ଆ଼ନେ; ଏ଼ଦାଆଁ କୂଡ଼ିକିନି ଇଲୁତା ଇଟ୍‌କି ଆ଼ଏ କି କୂଡ଼ିକିୱି ଆ଼ଏ; ଏ଼ନିଇଚିହିଁ ଆମିନିଗାଟାରି ପ୍ରବୁତି ନ଼କିତା ବାସା କିନେରି, ଏ଼ୱାରି ହା଼ରେପୂରେ କା଼ଦି ଅ଼ଡ଼େ କା଼ଲେଏତି ବାସ୍ତେରି ତାକି ତାନି ବେ଼ବାରା ଆ଼ନେ।