1 ଆମ୍ବାଆରି ଲାଗେଏତି ମେ଼ରା ତୀରି କିନେରି ଅ଼ଡ଼େ ଏମିନି ରା଼ଚିନାରି ଲାଗେଏତି କାତା ରା଼ଚିନେରି, ଏ଼ୱାରି ଏଚେକା ଡଣ୍ତ ବେଟାଆ଼ନେରି! 2 ଏ଼ୱାରି ରା଼ଣ୍ତେଣିସିକାଣି ତାମି ଦୂହିତି ଦିଣ୍ସୁ ଲେହେଁ କିହାଲି ତାକି, ତାଲି ତାଞ୍ଜି ହିଲାଆଗାଟାରାଇଁ ତାମି ଅଦିକାରା ମୀଞ୍ଜାଲି ତାକି, କା଼କୁଲି ଗାଟାରାଇଁ ନୀହାଁୟି ବିଚାରାଟି ୱେଟ୍ହା ତୁହ୍ନେରି ଅ଼ଡ଼େ ନା଼ ଦୁକୁଗାଟି ଲ଼କୁତି ଅଦିକାରା ମୀଞ୍ଜିନେରି। 3 ଏ଼ଦାଆଁତାକି ଡଣ୍ତ ହୀନି ଦିନାତା ଅ଼ଡ଼େ ହେକଟି ୱା଼ହିମାନି ନା଼ସାଆ଼ନି ବେ଼ଲାତା ମୀରୁ ଏ଼ନାଆଁ କିଦେରି ? ସା଼ୟେମି ତାକି ମୀରୁ ଆମ୍ବାଆରି ତା଼ଣା ହଣ୍ଦେରି ? ଅ଼ଡ଼େ ମୀ ଦ଼ନ ଆମ୍ବିୟା ଇଟିଦେରି ? 4 ଏ଼ୱାରି ୱାର୍ଇ କା଼ୟିଦି ଗାଟାରି କଡା ଡ଼଼ଇକା ରିନେରି ଅ଼ଡ଼େ ହା଼ତାରି ଡ଼଼ଇକା ରିନେରି। ଈ ବାରେ ଆ଼ତି ଜିକେଏ ଏ଼ୱାଣି କାର୍ବି ଊଣା ଆ଼ଏ, ସାମା ତାନି କେୟୁ ତଲିତି ସମାନା ଦା଼ସାହାଁ ଡ଼ୟାମାନେ।
ଅସୁରିୟ ତାକି ମାହାପୂରୁତି ସା଼ସ୍ତି
5 ପ୍ରବୁ ଏଲେଇଞ୍ଜି ମାନେସି, ଏ଼ ଅସୁର! ନୀ କେୟୁତା ନା଼ କାର୍ବିତି ବାଡ଼୍ଗା ମାନେ, ଏ଼ଦି ନା଼ କ଼ପାତି ଡଣ୍ତ। 6 ନା଼ନୁ ଏ଼ୱାଣାଇଁ ଦୂହିତି ଦିଣ୍ସୁ ଅ଼ଡ଼େ ଦ଼ନ ସ଼ରୁ କିହାଲି ତାକି ଅ଼ଡ଼େ ଲ଼କୁଣି ଜିରୁତି କା଼ଦ ଲେହେଁ ୱିସାଲି ତାକି ଦାର୍ମୁ ହିଲାଆ କୂଡ଼ାତି ଅ଼ଡ଼େ ନା଼ କାର୍ବିତି ଲ଼କୁ କ଼ପାଟି ହୁକୁମି ହୀଇଁ।
7 ଆ଼ତିଜିକେଏ ତାନି ଅଣ୍ପୁ ଏଲେକିଁ ଆ଼ଏ, କି ତାନି ହିୟାଁ ଏଲେକିଁ ଅଣ୍ପେଏ; ସାମା ନା଼ସା କିହାଲି ଅ଼ଡ଼େ ହା଼ରେକା କୂଡ଼ାତି ନସ୍ତ କିହାଲି ତାନି ହିୟାଁତା ମାନେ। 8 ଇଚିହିଁ ଏ଼ୱାସି ଏଲେଇନେସି, ମା଼ ପା଼ସା କ଼ଡ଼ି ମୁହେଁ କାଜାରି ବାରେ କି ରାଜାୟାଁ ଆ଼ଏ ? 9 କଲ୍ନ ଗା଼ଡ଼ା କି କର୍କମିସ୍ ଗା଼ଡ଼ା ଲେହେଁ ଆ଼ଏ ? ହମାତ୍ ଗା଼ଡ଼ା କି ଅର୍ପଦ ଗା଼ଡ଼ା ଲେହେଁ ଆ଼ଏ ? ସମରିୟା କି ଦମେସକ ଲେହେଁ ଆ଼ଏ ? 10 ଏମିନି ବମାୟାଁ ରା଼ଜିତି ତୀର୍ସିତି ବମାୟାଁ ବାରେ, ଜିରୁସାଲମ ଅ଼ଡ଼େ ସମରିୟାତି ବମାୟାଁ କିହାଁ କାଜାଇ, ଏ଼ ବାରେ ରା଼ଜି ନା଼ କେୟୁତା ମାନୁ; 11 ନା଼ନୁ ସମରିୟା ଅ଼ଡ଼େ ତାନି ବମାୟାଁଣି ଏ଼ନିକିଁ କିହାମାଇଁ, ଜିରୁସାଲମ ଅ଼ଡ଼େ ତାନି ବମାୟାଁଣି ଏ଼ନାଆଁ ଏଲେକିହିଁ କିଅଁ ?
12 ଏ଼ଦାଆଁତାକି ଇଲେକିଁ ଆ଼ନେ, କି ପ୍ରବୁ ସିୟନ ହ଼ରୁତା ଅ଼ଡ଼େ ଜିରୁସାଲମତା ତାନି ବାରେ କାମା କିତି ଡା଼ୟୁ ନା଼ନୁ ଅସୁର ରାଜାତି ଡା଼ହାରାଗାଟି ହିୟାଁତି ପା଼ଡ଼େୟି ଅ଼ଡ଼େ ତାନି କାଜାପା଼ଣାଗାଟି ବଡପଣତି ପା଼ଡ଼େୟି ହୀଇଁ।
13 ଇଚିହିଁ ଏ଼ୱାସି ଏଲେଇଞ୍ଜାମାନେସି, "ନା଼ନୁ ବୁଦି ଗାଟାତେଏଁ ଆ଼ତାକି ନା଼ କେୟୁତି ବା଼ଡ଼୍ୟୁ ଅ଼ଡ଼େ ନା଼ ବୁଦି ତଲେ ଈଦାଆଁ କିହାମାଇଁ; ଇଞ୍ଜାଁ, ନା଼ନୁ ହା଼ରେକା କୂଲୁତି ହାନ୍ଦି ହେକ କିହାମାଇଁ ଅ଼ଡ଼େ ତାମି କୂଡ଼ି କିହାମାନି ଦ଼ନ ଦୂହାମାଇଁ, ଅ଼ଡ଼େ ନା଼ନୁ ବା଼ଡ଼୍ୟୁଗାଟି ଲ଼କୁ ଲେହେଁ ସିଂଗାସାଣିତା କୁଗାମାନି ଲ଼କୁଣି ଡ଼଼ଇ ରେ଼ପ୍ହା ତାଚାମାଇଁ; 14 ଇଞ୍ଜାଁ, ନା଼ କେୟୁ ହା଼ରେକା କୂଡ଼ାତି ଦ଼ନ ପଟାତି ବାସା ଲେହେଁ ବେଟାଆ଼ହାମାଇଁ ଅ଼ଡ଼େ ଆମ୍ବାଆସି ଏ଼ନିକିଁ ପିସାମାନି ଗୁଡୁୟାଁ କୂଡ଼ି କିନେସି; ଏଲେକିହିଁ ନା଼ନୁ ବାରେ ଦାର୍ତିତି କୂଡ଼ି କିହାମାଇଁ; ଅ଼ଡ଼େ ମା଼ରାୟାଁ ୱୀଟ୍ହାଲି କି ଗୂତି ଦେଚାଲି କି ଚିଁ ଚିଁ ହା଼ଡା କିହାଲି ଆମ୍ବାଆସି ହିଲାଆତେସି।"
15 ଦୁବା କାଃଆଲି ଏ଼ନାଆଁ ଟୂଣ୍ନାଣି କ଼ପାଟି ବଡପଣ କିନେ ? କ଼ର୍ତ ଏ଼ନାଆଁ ଦା଼ଃନାଣି କିହାଁ ଜାହାରାଇଁ କାଜାୟି କିନେ ? ଆମ୍ବାଆରି ବାଡ଼୍ଗା ପେର୍ନେରି, ବାଡ଼୍ଗା ଏ଼ନାଆଁ ଏ଼ୱାରାଇଁ ତୀର୍ଗି କିନେ ? ଏମିନାୟି ୱେଗୁ ଆ଼ଏ, ବାଡ଼୍ଗା ଏ଼ନାଆଁ ଏ଼ଦାଆଁ ପେର୍ନେ ?
16 ଏ଼ଦାଆଁତାକି ପ୍ରବୁ ବା଼ଡ଼୍ୟୁଗାଟି ପ୍ରବୁ ଏ଼ ଆଙ୍ଗା ଆ଼ତି ବା଼ଡ଼୍ୟୁଗାଟି ଲ଼କୁଣି ର଼ଗ ପାଣ୍ତାହାଁ ଡାହି କିନେସି, ଅ଼ଡ଼େ ତାନି ବାତ୍କୁ ଡ଼଼ଇ ହିଚୁ ଲେହେଁ ଡ଼ୀଞ୍ଜିନେ। 17 ଇଞ୍ଜାଁ, ଇସ୍ରାୟେଲତି ଉଜେଡ଼ି ହିଚୁ ଲେହେଁ ଆ଼ନେ ଅ଼ଡ଼େ ତାନି ଦାର୍ମୁ ହିଚୁ ଗୁଦ୍ୱା ଲେହେଁ ଆ଼ନେ, ଅ଼ଡ଼େ ଏ଼ଦି ଡ଼ୀଞ୍ଜାହାଁ ରଣ୍ତିଏ ଦିନା ତାନି ଅଣ୍ଙ୍ଗ ଅ଼ଡ଼େ ହା଼ପ୍କା ମା଼ର୍କା ବାରେ ଗୂହ୍ନେ। 18 ଅ଼ଡ଼େ ଏ଼ୱାସି ଏ଼ୱାଣି ପା଼ଡ଼ୁ ଜା଼ଡ଼ା ଅ଼ଡ଼େ ବୁର୍ବୁରା ଟା଼ୟୁତି ଗା଼ୱୁରମି, ଜୀୱୁ ଅ଼ଡ଼େ ଆଙ୍ଗା ଜିକେଏ ନା଼ସା କିନେସି; ଏଚେଟିଏ ର଼ଗଗାଟାସି ଏ଼ନିକିଁ ଡାହିନେସି, ଏ଼ୱାସି ଏଲେକିହିଁ ଆ଼ନେସି। 19 ଇଞ୍ଜାଁ, ତାନି ଜା଼ଡ଼ାତି ଡ଼ୟାମାନି ମା଼ର୍କା ଇଚରା ଆ଼ନୁ, ର଼ କକାସି ଏ଼ୱାଆଁ ଲେକା କିହାଲି ଆ଼ଡିନେସି।
ଇସ୍ରାୟେଲତି ଡ଼ୟାମାଚି ଲ଼କୁ ୱେଣ୍ତିନାୟି
20 ଇଞ୍ଜାଁ, ଏ଼ ଦିନାତା ଇଲେକିଁ ଆ଼ନେ, କି ଇସ୍ରାୟେଲତି ଡ଼ୟାମାନି ଲ଼କୁ ଅ଼ଡ଼େ ଜାକୁବ କୂଡ଼ାତି ଗେଲ୍ପିଆ଼ତି ଲ଼କୁ ତାମ୍ଙ୍ଗେ ୱେ଼ଚିମାନି ଲ଼କୁଣି ଅ଼ଡ଼େ ବା଼ର୍ସୁ କିଅରି; ସାମା ଏ଼ୱାରି ସାତା ତଲେ ଇସ୍ରାୟେଲତି ଦାର୍ମୁଗାଟି ପ୍ରବୁତି ଲାକ ବା଼ର୍ସୁ କିନେରି। 21 ଜାକୁବତି ଡ଼ୟାମାନି ଲ଼କୁ, ବା଼ଡ଼୍ୟୁଗାଟି ମାହାପୂରୁ ତା଼ଣା ୱେଣ୍ତା ୱା଼ନେରି। 22 ଇଚିହିଁ ମୀ ଇସ୍ରାୟେଲ ଲ଼କୁ ସାମ୍ଦୁରିତି ବାଃଲି ଲେହେଁ ଆ଼ତି ଜିକେଏ, ଏ଼ୱାରି ୱାର୍ଇ ଡ଼ୟାମାନି ଲ଼କୁ ୱେଣ୍ତା ୱା଼ନେରି; ଦାର୍ମୁତି ୱା଼ରୁ ଲେହେଁ ନା଼ସା ତୀରି ଆ଼ହାମାନେ। 23 ଏ଼ନାଆଁତାକି ଇଚିହିଁ ପ୍ରବୁ ବା଼ଡ଼୍ୟୁଗାଟି ପ୍ରବୁ ବାରେ ଦାର୍ତିତା ନା଼ସା, ଇଚିହିଁ ତୀରି କିହାମାନି ନା଼ସା ପୂରା କିନେସି।
ମାହାପୂରୁ ଅସୁରତି ଡଣ୍ତ ହୀନାୟି
24 ଏ଼ଦାଆଁତାକି ପ୍ରବୁ, ବା଼ଡ଼୍ୟୁଗାଟି ପ୍ରବୁ ଏଲେଇଞ୍ଜି ମାନେସି, ଏ଼ ସିୟନତା ବାସା କିହାମାନି ନା଼ ଲ଼କୁତେରି, ଅସୁର ମିସରତି ମେ଼ରା ଲେହେଁ ମିଙ୍ଗେ ଡଣ୍ତ ହିୟାନେ ଅ଼ଡ଼େ ମୀ ଏଟ୍କାୱାକି ତାନି ବାଡ଼୍ଗା ନିକ୍ନେ, ଆ଼ତିୱା ଏ଼ଦାନି କାତାତି ଆଜାଆଦୁ। 25 ଇଚିହିଁ ର଼ ଏଚର ଦିନା ହାଚି ଡା଼ୟୁ ନା଼ କାର୍ବି ଅ଼ଡ଼େ ଏ଼ୱାରି ନା଼ସା କିନି ତା଼ଣା ନା଼ କାର୍ବି ପୂରା ଆ଼ନେ। 26 ନା଼ନୁ ବା଼ଡ଼୍ୟୁଗାଟି ପ୍ରବୁ, ଅରେବ ପା଼କାତା ମିଦିୟନତି ପା଼ୟିତି ବେ଼ଲାତା ଏ଼ନିକିଁ କିହାମାଚେସି, ଏଲେକିହିଁଏ ତାନି କ଼ପାଟି ତାନି ସା଼ଟ୍ଣି ପେର୍ନେସି; ଅ଼ଡ଼େ ତାନି ଡଣ୍ତ ସାମ୍ଦୁରି ଲାକ ଡ଼ୟିନେ ଅ଼ଡ଼େ ମିସରତି ମେ଼ରା ତଲେ ଏ଼ଦାଣି ଡଣ୍ତ ହୀନେସି। 27 ଇଞ୍ଜାଁ ଏ଼ ଦିନା ତାନି ବ଼ଜୁ ମୀ ବମିଟି ଅ଼ଡ଼େ ବ଼ଜୁ ମୀ ହେର୍କିଟି ହେକ କିୱିଆ଼ନେ, ଇଞ୍ଜାଁ ବ଼ରତି କ଼ସମି ବ଼ଜୁ ନା଼ସା ଆ଼ନେ।
କ଼ସ୍କା ଜୁଜୁ କିନେରି
28 ଏ଼ୱାସି ଅୟାତତା ୱା଼ହାମାନେସି, ଏ଼ୱାସି ମିଗ୍ରଣ ହୀହାଁ ହାଜାମାନେସି; ଏ଼ୱାସି ମିକ୍ମସତା ତାନି ଦିଣ୍ସୁ ଇଟିମାନେସି; 29 ଏ଼ୱାରି ଗା଼ଟି ଗା଼ଣ୍ଚାହାଁ ହାଜାମାନେରି; ଏ଼ୱାରି ଗେବାତା ବାସା କିହାମାନେରି; ରାମା ତୀର୍ଗିମାନେ; ସାୱୁଲତି ଗିବିୟା ହଟାମାନେ। 30 ଗଲ୍ଲିମତି ଲ଼କୁ, ମୀରୁ ମୀ ହା଼ଡା ତଲେ କାଜା ହା଼ଡା କିଦୁ, ଏ଼ ଲୟିସ୍, କିର୍ୟୁଁ ଅଡାଦୁ, ଅ଼ହ ଦୁକୁଗାଟି ଅନାତତ୍, 31 ମଦମେନା ହ଼ଡ଼୍ନାୟି ଆ଼ହାମାନେସି; ଗେବିମତା ବାସା କିହାମାନାରି ହଟାଲି ତାକି ରୁଣ୍ତା ଆ଼ହିମାନେରି। 32 ଏ଼ୱାସି ନୀଞ୍ଜୁ ନବତା ଡ଼ୟିନେସି; ଏ଼ୱାସି ସିୟନ ମା଼ଙ୍ଗାତି ହ଼ରୁ ଜିରୁସାଲମ ଊଣା ହ଼ରୁ ତାକି କେୟୁ ୱୀଟ୍ହି ମାନେସି।
33 ମେହ୍ଦୁ, ପ୍ରବୁ, ବା଼ଡ଼୍ୟୁଗାଟି ପ୍ରବୁ ଆଜିହ଼ପେ ତଲେ କମାୟାଁ ବାରେ ଟୂଣ୍ନେସି; ଇଞ୍ଜାଁ, ପାଡାଆ଼ତି ମା଼ର୍କା ବାରେ ଟୂଣ୍ୱି ଆ଼ନୁ ଅ଼ଡ଼େ ପାଡା ଆ଼ତାଇ ବାରେ ଊଣା କିୱିଆ଼ନୁ। 34 ଏ଼ୱାସି ଲ଼ହ କ୍ଡାଃଲି ତଲେ ପା଼ଡ଼ୁ ଜା଼ଡ଼ାତି ଟା଼ୟୁ ବାରେ ଟୂଣ୍ହାତୁହ୍ନେସି, ଇଞ୍ଜାଁ ର଼ କାଜା ବା଼ଡ଼୍ୟୁ ତଲେ ଲିବାନନ ନା଼ସା କିୱିଆ଼ନେ।
/images/a/b7d72741-6189-4a89-94c2-43952d9f2700)
/images/a/6c03efee-c76a-4ab8-fe2e-555683f90900)