1 ଏମିନି ବାର୍ସା ଉସିୟ ରାଜା ହା଼ତେସି, ନା଼ନୁ ପ୍ରବୁଇଁ ପାଡାଆ଼ତି କାଜା ସିଂଗାସାଣିତା କୁଗାମାଚାଣି ମେସ୍ତେଏଁ; ତାନି ବାସ୍ତେରିତି ତ଼ର ବାରେ ଦେ଼ୱୁଡ଼ିତା ନେଞ୍ଜା ମାଚେ। 2 ତାନି ଟଟତା ସରାପ ଦୂତୁୟାଁ ନିତୁ; ଏ଼ୱାସିକା ବାରେତି ସ଼ ସ଼ଗଟା ମା଼ରାୟାଁ ମାଚୁ; ବାରେ ରୀ ମା଼ରାୟାଁ ତଲେ ତାମି ମୂମ୍ବୁ ପ୍ଡିକ୍‌ହା କଡିତୁ, ରୀ ମା଼ରାୟାଁ ତଲେ ପାଃଆନାୟାଁ ପ୍ଡିକ୍‌ହୁ ଅ଼ଡ଼େ ରୀ ମା଼ରାୟାଁ ତଲେ ଊମ୍ବିତୁ। 3 ଅ଼ଡ଼େ ଏ଼ୱି ତା଼ମ୍ବୁ ତା଼ମ୍ବୁ ହା଼ଟାହାଁ ଏଲେଇଚୁ, "ବା଼ଡ଼୍‌ୟୁଗାଟି ପ୍ରବୁ ସୁଦୁ, ସୁଦୁ, ସୁଦୁ; ବାରେ ଦାର୍‌ତି ତାନି ଗା଼ୱୁରମିତା ନେଞ୍ଜାମାନେ।"

4 ଏଚିବେ଼ଲା ୱେ଼କ୍‌ହି ମାନାଣି ଗିୟାଁ ତାକି ଦୁୱେରି ଟଟତି ପୁନାଦି ତୀର୍‌ଗିତେ ଅ଼ଡ଼େ ଦେ଼ୱୁଡ଼ି ବିତ୍ରା ବ଼ୟିଁ ନେଞ୍ଜାହାଚେ।

5 ଏଚେଟିଏ ନା଼ନୁ ଏଲେଇଚେଏଁ, "ଆୟ଼ତା ଆୟ଼ତା! ନା଼ନୁ ନା଼ସା ଆ଼ତେଏଁ; ଇଚିହିଁ ନା଼ନୁ ଲାଗେଏତି ଲୂଡ଼ାଗାଟି ମାଣ୍‌ସିତେଏଁ ଅ଼ଡ଼େ ନା଼ନୁ ଲାଗେଏତି ଲୂଡ଼ାଗାଟି କୂଡ଼ା ବିତ୍ରା ବାସା କିହିମାଇଁ; ଆ଼ତିଜିକେଏ ନା଼ କାନୁ ବା଼ଡ଼୍‌ୟୁଗାଟି ପ୍ରବୁ ରାଜାଇଁ ମେସାମାନେ।"

6 ଏଚେଟିଏ ଏ଼ ସରାପ ଦୂତୁୟାଁ ବିତ୍ରାଟି ରଣ୍ତି ନା଼ ତା଼ଣା ଊମ୍ବା ୱା଼ତେ, ତାନି କେୟୁତା ରଚାୟି ଡ଼ୀଞ୍ଜିମାନି ରୀଙ୍ଗା ମାଚେ, ଏ଼ଦି ପୂଜା ପିଣ୍ତାଟି ସିମ୍‌ଟା ତଲେ ଏ଼ଦାଆଁ ଅ଼ହାମାଚେ; 7 ଇଞ୍ଜାଁ, ଏ଼ଦି ଏ଼ଦାନି ତଲେ ନା଼ ଗୂତି ଡୀଗାହାଁ ଏଲେଇଞ୍ଜାତେ, "ମେହ୍‌ମୁ, ଈଦି ନୀ ଲୂଡ଼ାତି ଡୀଗାମାନେ; ଏ଼ଦାଆଁତାକି ନୀ ଦ଼ହ ହେକ ଆ଼ତେ ଅ଼ଡ଼େ ନୀ ପା଼ପୁ ମେଣ୍‌ଙ୍ଗିତେ।"

8 ଏଚେଟିଏ "ନା଼ନୁ ଆମ୍ବାଆରାଇଁ ପାଣ୍ତିଇଁ ? ଅ଼ଡ଼େ ଆମ୍ବାଆସି ନା଼ ତାକି ହାନେସି ?" ପ୍ରବୁତି ଈ ଗିୟାଁ ନା଼ନୁ ୱେଚେଏଁ। ଏଚେଟିଏ ନା଼ନୁ ଏଲେଇଚେଏଁ, "ନା଼ନୁ ମାଇଁ; ନାଙ୍ଗେ ପାଣ୍ତାମୁ।"

9 ଏଚେଟିଏ ଏ଼ୱାସି ଏଲେଇଞ୍ଜାତେସି, "ହାଲାମୁ ଅ଼ଡ଼େ ଈ କୂଲୁତି ୱେହ୍‌ମୁ, ମୀରୁ ୱେଞ୍ଜିମାଞ୍ଜେରି ସାତା, ସାମା ତେଲ୍‌ହି ହିଲଅତେରି ଅ଼ଡ଼େ ମେସି ମାଞ୍ଜେରି ସାତା, ସାମା ପୁଞ୍ଜି ହିଲଅତେରି। 10 ଈ ଲ଼କୁ ଜାହାରା କାନୁ ତଲେ ମେସାହାଁ ଅ଼ଡ଼େ କିର୍ୟୁଁତା ୱେଞ୍ଜାହାଁ ଅ଼ଡ଼େ ହିୟାଁତା ତେଲ୍‌ହାଁ ମ଼ନ ୱେଟ୍‌ହାଁ ଏ଼ନିକିଁ ନେହିଁ ଆ଼ଅରି, ଏ଼ଦାଆଁତାକି ନୀନୁ ଏ଼ୱାରି ହିୟାଁ ଆ଼ଟ୍‌ୱା କିମୁ ଅ଼ଡ଼େ ଏ଼ୱାରି କିର୍ୟୁଁ ବେ଼ରା କିମୁ ଅ଼ଡ଼େ ଏ଼ୱାରି କାଣ୍‌କା ପଜାମୁ।"

11 ଏଚେଟିଏ ନା଼ନୁ ୱେଚେଏଁ, "ଏ଼ ପ୍ରବୁ, ଏଚର କା଼ଲା ପାତେକା ?" ଏଚେଟିଏ ଏ଼ୱାସି ଏଲେଇଞ୍ଜାତେସି, ଏମିନି ପାତେକା ବାରେ ଗା଼ଡ଼ା ବାସା କିଆଗାଟାୟି ଆ଼ନେ ଅ଼ଡ଼େ ଇଲ୍‌କା ବାରେ ୱାର୍‌ଆଇ ଆ଼ହାଁ ନସ୍ତ ଆ଼ଉ ଅ଼ଡ଼େ ବୂମି ବାରେ ତୀରେ ତଲେ ନା଼ସା ଆ଼ଏ, 12 ଇଞ୍ଜାଁ, ପ୍ରବୁ ଲ଼କୁଣି ହା଼ରେକା ହେକ କିଅସି ଅ଼ଡ଼େ ଦେ଼ସା ବିତ୍ରା ହା଼ରେକା ପିସ୍ତି ଟା଼ୟୁ ଆ଼ଏ, ଏ଼ ପାତେକା। 13 ଅ଼ଡ଼େ, ଏମ୍ବାତି ଦସ ବା଼ଗା ଡ଼ୟିସାରେ, ଆ଼ତିଜିକେଏ ଏ଼ଦି ୱେଣ୍ତେ ନା଼ସା ଆ଼ନେ; ଏଲା ଅ଼ଡ଼େ ଅଲନ୍‌ ମା଼ର୍‌ନୁ ଟୂଣ୍‌ୱି ଆ଼ତିଜିକେଏ ଏ଼ନିକିଁ ଏ଼ଦାନି ଡାକି ଡ଼ୟିନେ; ଏଲେକିହିଁ ଏ଼ ସୁଦୁ କୂଡ଼ା ଈ କୂଲୁତି ଡାକି ଲେହେଁ ଆ଼ନେରି।