1 ଏ଼ ସାମ୍‌ଦୁରି ମାଦି ମାନି ଟା଼ୟୁ, ନା଼ ନ଼କିତା ପାଲେଏ ଆ଼ମୁ ଅ଼ଡ଼େ ୱେନାମୁ;

ବାରେ ଦେ଼ସାତି ଲ଼କୁ ପୁଃନି ପୁଃନି ବା଼ଡ଼୍‌ୟୁ ବେଟାଆ଼ପେରି;

ଏ଼ୱାରି ଦାରି ୱା଼ହାଁ କାତା ଆ଼ପେରି; ମା଼ର ବାରେ ରଣ୍ତିଏ ଆ଼ହାଁ ବିଚାରା କିନ।

2 ଏ଼ୱାସି ଦାର୍ମୁ ତଲେ ଆମ୍ବାଆରାଇଁ ତାନି ପା଼ୱୁଲି ନ଼କିତା ହା଼ଟିନେସି,

ଇଲେତି ରଅଣାଇଁ ୱେ଼ଡ଼ା ହ଼ପୁ ୱାକିଟି ଆମ୍ବାଆସି ନିକ୍‌ହାମାନେସି ?

ଏ଼ୱାସି ବାରେ ଦେ଼ସାତି ଲ଼କୁଣି ଏ଼ୱାଣି ନ଼କିତା ହେର୍‌ପିନେସି

ଅ଼ଡ଼େ ରାଜାୟାଁ ମୁହେଁ ଏ଼ୱାଣାଇଁ ଅଦିକାରା ହୀନେସି;

ଏ଼ୱାସି ତାନି କାଣ୍ତା ନ଼କିତା ଏ଼ୱାରାଇଁ ଦୂଡ଼ି ଲେହେଁ

ଅ଼ଡ଼େ ତାନି ଆପ୍‌କା ନ଼କିତା ଊମ୍ବିନି ପ଼ଡ଼ୁ ଲେହେଁ ହେର୍‌ପିନେସି।

3 ଏ଼ୱାସି ଏ଼ୱାରି ଜେ଼ଚ ପେ଼ର୍‌ହା ଅ଼ନେସି,

ଏମିନି ଜିରୁତା ଏ଼ୱାସି ହାଜା ହିଲଅସି ଏ଼ ଜିରୁତା ଜିକେଏ

ଏ଼ୱାସି ଆଜାଆନା ତା଼କିନେସି।

4 ତଲିଟିଏ ଆମ୍ବାଆସି ଆ଼ବାୟାଁଇଁ ହା଼ଟାହାଁ ଈ କାମା କିହାମାନେସି ?

ନା଼ନୁ ପ୍ରବୁତେଏଁ ମା଼ଟ୍‌ନାତେଏଁ ଅ଼ଡ଼େ ରା଼ନି ବେ଼ଲା ପାତେକା

ଲ଼କୁ ତଲେ ଡ଼ୟିଇଁ. ନା଼ନୁ ଏ଼ୱାତେଏଁ।

5 ସାମ୍‌ଦୁରି ମାଦି ମାନି ଦେ଼ସା ମେସାହାଁ ଆଜିତୁ;

ଦାର୍‌ତିତି ହେକ ଦେ଼ସା ତୀର୍‌ଗିତୁ;

ଏ଼ୱାରି ଡାଗେ ଆ଼ହାଁ ୱା଼ତେରି।

6 ଏ଼ୱାରି ବାରେ ଜାହାରା ପା଼ଡ଼ିତି ଲ଼କୁଣି ସା଼ୟେମି କିତେରି

ଅ଼ଡ଼େ ସା଼ସା ଆ଼ଦୁ ଇଞ୍ଜିଁ ବାରେ ଜାହାରା ତାୟିଇଁ ଏଲେଇଚେରି।

7 ଇଲେକିହିଁ କାତି ଇଟିନାସି କାମ୍ବାସା଼ଲିିଇଁ ସା଼ସା ହୀତେସି

ଅ଼ଡ଼େ ମୂତ୍‌ଲା ତଲେ ତୀର୍‌ସିନି ଲ଼କୁ ଦ୍ରୁହ୍‌ନାୟି ନେହିଁ ଆ଼ହାମାନେ ଇଞ୍ଜିଁ କାମ୍ୱ୍ରେଃଏଣାଇଁ ସା଼ସା ହୀତେସି;

ଇଞ୍ଜାଁ ବମା ଏ଼ନିକିଁ ୱୀଡେଏ ଏ଼ଦାଆଁତାକି ଏ଼ୱାସି କୁଟିୟାଁ ତଲେ ଏ଼ଦାଆଁ ଆ଼ଟ୍‌ୱା କିତେସି।

8 ସାମା ଏ଼ ନା଼ ହ଼ଲେଏଣା ଇସ୍ରାୟେଲ, ନା଼ନୁ ଆ଼ଚାମାନି ଜାକୁବ,

ନା଼ ତ଼ଣେ ଅବ୍ରାହାମତି କୂଡ଼ା;

9 ନା଼ନୁ ନିଙ୍ଗେ ଆସାହାଁ ଦାର୍‌ତିତି ହେକ ଦେ଼ସାତା ତାଚାମାଞ୍ଜାଇଁ

ଅ଼ଡ଼େ ଦାର୍‌ତିତି କନଟି ନିଙ୍ଗେ ହା଼ଟାମାଞ୍ଜାଇଁ,

ନୀନୁ ନା଼ ହ଼ଲେଏଣାତି,

ନା଼ନୁ ନିଙ୍ଗେ ଆ଼ଚାମାଞ୍ଜାଇଁ ଅ଼ଡ଼େ ପିସାମାଞ୍ଜଅଁ;

10 ନୀନୁ ଆଜାଆନି, ଇଚିହିଁ ନା଼ନୁ ନୀ ତଲେ ମାଇଁ;

ନୀରାସା ଆ଼ଆନି, ଇଚିହିଁ ନା଼ନୁ ନୀ ମାହାପୂରୁତେଏଁ;

ନା଼ନୁ ନିଙ୍ଗେ ବା଼ଡ଼୍‌ୟୁ ହିୟାଇଁ;

ହାଅ, ନା଼ନୁ ନା଼ ଦାର୍ମୁତି ଟିଃନି କେୟୁତା ଆସା ଇଟାଇଁ।

11 ମେହ୍‌ମୁ ଆମ୍ବାଆରି ନିଙ୍ଗେ କାର୍‌ବି ଆ଼ହାମାଞ୍ଜାନେରି,

ଏ଼ୱାରି ବାରେ ଲାଜା ଅ଼ଡ଼େ କିଲିବିଲି ଆ଼ନେରି;

ଆମ୍ବାଆରି ନିଙ୍ଗେ ଗଡ଼୍‌ହା ଆୟାନେରି

ଏ଼ୱାରି ୱାର୍‌ଆରି ଲେହେଁ ଆ଼ହାଁ ନା଼ସା ଆ଼ନେରି।

12 ଆମ୍ବାଆରି ନିଙ୍ଗେ ଗଡ଼୍‌ହା କିୟାନେରି,

ନୀନୁ ଏ଼ୱାରାଇଁ ପାରିଦି, ସାମା ଏ଼ୱାରାଇଁ ବେଟାଆ଼ଅତି;

ଆମ୍ବାଆରି ନୀ ତଲେ ଜୁଜୁ କିୟାନେରି,

ଏ଼ୱାରି ନା଼ସା ଆ଼ହାଁ ମେଣ୍‌ଙ୍ଗା ହାନେରି।

13 ଇଚିହିଁ ନା଼ନୁ ପ୍ରବୁ ନୀ ମାହାପୂରୁତେଏଁ,

ନୀ ଟିଃନି କେୟୁ ଆସାହାଁ ନିଙ୍ଗେ ଏଲେଇଞ୍ଜାଇଁ,

"ଆଜାଆନି; ନା଼ନୁ ନିଙ୍ଗେ ସା଼ୟେମି କିୟାଇଁ।"

14 ଏ଼ ପିଡ଼୍‌ୟୁଲି ଲେହେଁତି ଜାକୁବ ଅ଼ଡ଼େ ଏ଼ ଇସ୍ରାୟେଲତି ମାଣ୍‌ସି, ଆଜାଆନି;

ପ୍ରବୁ ଏଲେଇଞ୍ଜି ମାନେସି, ନା଼ନୁ ନୀ ସା଼ୟେମି କିୟାଇଁ।

ଅ଼ଡ଼େ ଇସ୍ରାୟେଲତି ଦାର୍ମୁଗାଟି ମାହାପୂରୁ ନିଙ୍ଗେ ଗେଲ୍‌ପାନାସି।

15 "ମେହ୍‌ମୁ ନା଼ନୁ ନିଙ୍ଗେ ୱାସାହାନି ସୂରି ଲେହେଁ ର଼ ପୁଃନି ଆର୍ନା ଉହ୍‌ନି କ଼ଲୁ ଲେହେଁ କିୟାଇଁ;

ନୀନୁ ହ଼ର୍‌କାଣି ୱିସାହାଁ ଗୁଣ୍ତା କିଦି ଅ଼ଡ଼େ କୁପ୍‌ଲି ହ଼ର୍‌କାଣି ପ଼ଡ଼ୁ ଲେହେଁ କିଦି।

16 ନୀନୁ ଏ଼ୱାରାଇଁ ହେ଼ଚି ତଲେ ଊପ୍‌ହିସାରେ,

ଗା଼ଲି ଏ଼ୱାରାଇଁ ଊପ୍‌ହା ଅ଼ନେ ଅ଼ଡ଼େ ରୁୱାଗା଼ଲି ଏ଼ୱାରାଇଁ ସିନାସାତ୍ରା କିନେ;

ଇଞ୍ଜାଁ ନୀନୁ ପ୍ରବୁ ତା଼ଣା ରା଼ହାଁ କିଦି

ଅ଼ଡ଼େ ଇସ୍ରାୟେଲତି ଦାର୍ମୁଗାଟି ମାହାପୂରୁ ତା଼ଣା ବଡପଣ କିଦି।

17 କାର୍ମା କା଼କୁଲି ଗାଟାରି ଏ଼ୟୁ ପାରିନେରି, ସାମା ବେଟାଆ଼ଅରି,

ଏଚେଟିଏ ଏ଼ୱାରି ୱେନ୍ଦରି ଏ଼ସ୍‌କିତାକି ୱା଼ୟା ହାନେ;

ନା଼ନୁ ପ୍ରବୁ ଏ଼ୱାରା ହା଼ଡା ୱେନାତେଏଁ,

ନା଼ନୁ ଇସ୍ରାୟେଲତି ମାହାପୂରୁତେଏଁ ଏ଼ୱାରାଇଁ ଏଚେଲା ପିହ୍‌ଅଁ।

18 ନା଼ନୁ ମା଼ର୍‌କା ହିଲାଆ ହ଼ରୁତା କାଡା

ଅ଼ଡ଼େ କୁପ୍‌ଲିୟାଁଣା ଜାର୍‌ଣା ହ଼ପ୍‌ଇଁ;

ନା଼ନୁ ବାଟାତା ବାନ୍ଦା ଅ଼ଡ଼େ ୱା଼ୟିତି ବୂମିତା ଏ଼ୟୁ ଜାର୍‌ଣା କିଇଁ।

19 ନା଼ନୁ ଜା଼ଡ଼ାତା ଏରସ, ସିଟିମ, ମେହେନ୍ଦି ଅ଼ଡ଼େ ନିୟୁଁ ମା଼ର୍‌କା ନେୟିଁ କିଇଁ;

ନା଼ନୁ ବାଃଲି ବୂମିତା ଦେବଦାରୁ, ତିଦର ଅ଼ଡ଼େ ତାସୁର ମା଼ର୍‌କା ରହେଁଏ ଉହିଇଁ।

20 ଏଚେଟିଏ ପ୍ରବୁତି କେୟୁ ଈ କାମା କିହାମାନେ

ଅ଼ଡ଼େ ଇସ୍ରାୟେଲତି ଦାର୍ମୁଗାଟି ମାହାପୂରୁ ଗା଼ଡ଼ି କିହାମାନେସି

ଇଞ୍ଜିଁ ଲ଼କୁ ମେସାହାଁ ଅଣ୍‌ପାହାଁ ତେଲ୍‌ହିନେରି।"

21 ପ୍ରବୁ ଏଲେଇଞ୍ଜି ମାନେସି, "ମୀରୁ ମୀ ଦାୱା ବାରେ ତାଦୁ,"

ଜାକୁବତି ରାଜା ଏଲେଇଞ୍ଜି ମାନେସି, "ମୀରୁ ମୀ ପାର୍‌ମାଣା ବାରେ ତାଦୁ।"

22 ଏ଼ୱାରି ଏ଼ ବାରେ ହ଼ପ୍‌ହାଁ ଏ଼ନା ଏ଼ନାଆଁ ଆ଼ନେ,

ଏ଼ଦାଆଁ ମା଼ ନ଼କିତା ୱେସ୍ତାପେରି;

ମୂଲୁଏ ଏ଼ନା ଏ଼ନାଆଁ ଆ଼ହାମାଚେ ଏ଼ଦାଆଁ ମୀରୁ ୱେସ୍ତାଦୁ,

ଆତିହିଁ ମା଼ମ୍ବୁ ଅଣ୍‌ପାହାଁ ଏମ୍ବାତି ଡା଼ୟୁତି କାତା ପୁଞ୍ଜାଲି ଆ଼ଡିନମି;

ଆ଼ଆତିଁ ୱା଼ହିମାନି କାତା ମାଙ୍ଗେ ୱେସ୍ତାଦୁ।

23 ଏଚେଟିଏ ଡା଼ୟୁ ଏ଼ନା ଏ଼ନାଆଁ ଆ଼ନେ ଏ଼ଦାଆଁ ୱେସ୍ତାଦୁ,

ଏଚେଟିଏ ମୀରୁ ପେ଼ଣ୍‌କାତେରି, ଈଦାଆଁ ମା଼ମ୍ବୁ ପୁନମି;

ହାଅ, ନେହିଁ କିଦୁ କି ଲାଗେଏ କିଦୁ,

ଏଚେଟିଏ ମା଼ମ୍ବୁ ନୀରାସା ଆ଼ହାଁ ବାରେ ରହେଁଏ ଏ଼ଦାଆଁ ମେହ୍‌ନମି।

24 ମେହ୍‌ଦୁ ମୀରୁ ଏ଼ନାତେରି ଆ଼ଏ ଅ଼ଡ଼େ ମୀ କାମା ଏ଼ନାୟି ଆ଼ଏ;

ଆମିନି ମାଣ୍‌ସି ମିଙ୍ଗେ ବାଚିକିୟାନେସି ଏ଼ୱାସି ଅ଼ପାଆଗାଟାସି।

25 ନା଼ନୁ ଟେ଼ବ୍ରି ୱାକିଟି ରଅଣାଇଁ ନିକ୍‌ହାମାଇଁ ଅ଼ଡ଼େ ଏ଼ୱାସି ମାନେସି;

ଏ଼ୱାସି ୱେ଼ଡ଼ା ହ଼ପୁ ୱାକିଟି ନା଼ ଦ଼ରୁ ହା଼ଟାନେସି;

ଏ଼ୱାସି କୁମ୍ବ୍ରେଏସି କାତି କିହାଲି ୱିସାମାନି ଇର୍‌ଆ ଲେହେଁ ଦେ଼ସାତି ସା଼ଲୱି କିନାରାଇଁ ୱିହ୍‌ନେସି।

26 ମା଼ମ୍ବୁ ଏ଼ନିକିଁ ପୁଞ୍ଜାଲି ଆ଼ଡିନମି, ଈଦାଆଁତାକି ମୂଲୁଏ ଆମ୍ବାଆସି ଈଦାଆଁ ୱେସାମାନେସି ?

ଇଞ୍ଜାଁ ଏ଼ୱାସି ଦାର୍ମୁଗାଟାସି ଇଞ୍ଜିଁ ମା଼ମ୍ବୁ ଏ଼ନିକିଁ ୱେସାଲି ଆ଼ଡିନମି,

ଈଦାଆଁତାକି ମୂଲୁଏ ଆମ୍ବାଆସି ଈଦାଆଁ ୱେସାମାନେସି ?

ହାଅ, ୱେହ୍‌ନାସି ଆମ୍ବାଆସି ହିଲଅସି,

ହାଅ, ତ଼ହ୍‌ନାସି ଆମ୍ବାଆସି ହିଲଅସି,

ମୀ କାତା ୱେନାସି ଆମ୍ବାଆସି ହିଲଅସି।

27 ନା଼ନୁ ମୂଲୁଏ ସିୟନଇଁ ଏଲେଇଇଁ, "ମେହ୍‌ମୁ, ଏ଼ୱାରାଇଁ ମେହ୍‌ମୁ,

ଇଞ୍ଜାଁ ନା଼ନୁ ଜିରୁସାଲମତା ନେହିଁ କାବ୍ରୁ ତାନାଣାଇଁ ରଅଣାଇଁ ହୀଇଁ।"

28 ନା଼ନୁ ସିନିକିନି ବେ଼ଲାତା ଆମ୍ବାଆସି ହିଲଅସି;

ନା଼ନୁ ୱେଚି ବେ଼ଲାତା ଆମ୍ବାଆସି ର଼ ପଦୁ ଜ଼ଲାଲି ଆ଼ଡିନେସି

ଏ଼ୱାରି ବିତ୍ରା ଇଲେତି ୱେହ୍‌ନାସି ଜିକେଏ ଆମ୍ବାଆସି ହିଲାଆତେସି।

29 ମେହ୍‌ଦୁ ଏ଼ୱାରି ବାରେ,

ଏ଼ ବାରେତି କାମା ଉଜେଏତାୟି;

ଏ଼ୱାରି ଗାରାତଲେ କେ଼ପିତି ବମାୟାଁ ଗା଼ଲି ଅ଼ଡ଼େ ୱାର୍‌ଆଇ।