1 "ଆଲ, ବା଼ଞ୍ଜେଣି, ଜାର୍ନି କିହା ହିଲାଆଗାଟାତି, ନୀନୁ ପା଼ଚାମୁ,

ଆଲ, ଜାର୍ନିକିନି ବୀସା ହିଲାଆଗାଟାତି, ନୀନୁ କାଜା ଗିୟାଁ ତଲେ ପା଼ଚାହାଁ ରା଼ହାଁଟି କା଼ଲୱି ଆ଼ମୁ,"

ଇଚିହିଁ ପ୍ରବୁ ଏଲେଇଞ୍ଜି ମାନେସି, "ବୀହା ଆ଼ତି ଡକ୍ରିନି କକାରି ପ଼ଦାୟାଁ କିହାଁ କାର୍ମାଗାଟାରି କକାରି ପ଼ଦାୟାଁ ଗାଡି।"

2 ନୀନୁ ନୀ ତୂମୁତି ଟା଼ୟୁ ଲାମ୍ବା କିମୁ ଅ଼ଡ଼େ ଏ଼ୱାରି ନୀ ବାସା ଟା଼ୟୁତି ଗ଼ଞ୍ଜିନି ହିମ୍ବରି ଅ଼ସାରା କିପାରି;

କେୟୁ ସ଼ଟୁ କିଆଦୁ; ମୀ ଡ:ର୍‌କା ବାରେ ଲାମ୍ବା କିଦୁ ଅ଼ଡ଼େ କୁଟ୍‌ରୁୟାଁ ବାରେ ଆ଼ଟ୍‌ୱା କିଦୁ।

3 ଇଚିହିଁ ନୀନୁ ଟିଃନି ଅ଼ଡ଼େ ଟେ଼ବ୍ରି ୱାକି ଏ଼ପା ଆ଼ଦି ଅ଼ଡ଼େ ନୀ କୂଲୁ ଏଟ୍‌କା ଦେ଼ସାତି ଲ଼କୁଣି ଅଦିକାରା କିନେରି

ଅ଼ଡ଼େ ଲ଼କୁ ହିଲାଆ ଗା଼ଡ଼ାୟାଁ ବାରେ ବାସା ଟା଼ୟୁ କିନେରି।

4 ଆଜାଆନି; ଇଚିହିଁ ନୀନୁ ଲାଜା ଆ଼ଅତି।

ହାପ୍‌ଲି ଆ଼ଆନି; ଇଚିହିଁ ନିଙ୍ଗେ ଲାଜା କିୱିଆ଼ଏ;

ନୀନୁ ନୀ ଦାଂଗ୍‌ଣା ବେ଼ଲାତି ଲାଜା ବା଼ଣାଆ଼ଦି ଅ଼ଡ଼େ ନୀନୁ ନୀ ରା଼ଣ୍ତେଣି ବେ଼ଲାତି ଲାଗେଏତାଣି ଅଣ୍‌ପଅତି।

5 ଇଚିହିଁ ନୀ ରାଚି କିୟାତାସି ନୀ ଡକ୍ରା ଆ଼ନେସି;

ବା଼ଡ଼୍‌ୟୁଗାଟି ପ୍ରବୁ ଏ଼ୱାଣି ଦ଼ରୁ ଅ଼ଡ଼େ ଇସ୍ରାୟେଲତି ଦାର୍ମୁଗାଟି ମାହାପୂରୁ ନୀ ଗେଲ୍‌ପାନାସି;

ଏ଼ୱାସି ବାରେ ଦାର୍‌ତିତି ମାହାପୂରୁ ଇଞ୍ଜିଁ ୱେ଼ଙ୍ଗିନେସି।

6 ଇଚିହିଁ ନୀ ମାହାପୂରୁ ଏଲେଇଞ୍ଜି ମାନେସି,

"ପିସ୍ତାତି ଅ଼ଡ଼େ ମ଼ନତା ଦୁକୁଗାଟି ଡକ୍ରି ଆ଼ଆତିଁ ଡ଼ାଆ ବେ଼ଲାତା ପିସ୍ତି ଡକ୍ରି ସମାନା ପ୍ରବୁ ନିଙ୍ଗେ ହା଼ଟାମାଞ୍ଜାନେସି।

7 ନା଼ନୁ ଗା଼ଡ଼େକା ତାକି ନିଙ୍ଗେ ପିସାମାଞ୍ଜାଇଁ;

ସାମା ହା଼ରେକା କାର୍ମାଟି ମିଙ୍ଗେ କୂଡ଼ି କିୟାଇଁ।

8 ହା଼ରେକା କ଼ପାତଲେ ନା଼ନୁ ଗା଼ଡ଼େକା ତାକି ନା଼ ମୂମ୍ବୁ ନୀ ତା଼ଣାଟି ଡ଼ୁକ୍‌ହେଏଁ;

ସାମା କା଼ଲେଏତି କାର୍ମାଟି ନା଼ନୁ ନିଙ୍ଗେ କାର୍ମା ମେସ୍ତାଇଁ।"

ଈ କାତା ନିଙ୍ଗେ ଗେଲ୍‌ପାନି ପ୍ରବୁ ଏଲେଇଞ୍ଜି ମାନେସି।

9 ଇଚିହିଁ ଈଦି ନା଼ ତାକି ନ଼ହଁ ବେ଼ଲାତି ଏ଼ୟୁ ସମାନା;

ନ଼ହଁ ବେ଼ଲାତି ଏ଼ୟୁ ଅ଼ଡ଼େ ଦାର୍‌ତିତି କ୍ଡୁପ୍‌ଏ ଇଞ୍ଜିଁ ନା଼ନୁ ଏ଼ନିକିଁ ପାର୍‌ମାଣା କିହାମାଇଁ,

ଏଲେକିହିଁଏ ନା଼ନୁ ନିଙ୍ଗେ ତାକି କାର୍‌ବି କି ଦାକା ହିୟଅଁ ଇଞ୍ଜିଁ ପାର୍‌ମାଣା କିହାମାଇଁ।

10 ଏ଼ନିଇଚିହିଁ ନିଙ୍ଗେ ତାକି ଏମିନି ପ୍ରବୁ କାର୍ମା ଆ଼ହାମାଞ୍ଜାନେସି,

ଏମିନି ମାହାପୂରୁ ଏଲେଇଞ୍ଜି ମାନେସି, "ହ଼ର୍‌କା ବାରେ ୱୀଡାହାଁ ଗୁଚାଆ଼ନୁ ଅ଼ଡ଼େ କୁପ୍‌ଲିୟାଁ ବାରେ ଡା଼ଡ଼ାଆ଼ନୁ;

ସାମା ନା଼ କାର୍ମା ନୀ ତା଼ଣାଟି ୱୀଡେଏ, କି ନା଼ ହିତ୍‌ଡ଼ିତି ରା଼ଜିମା଼ନା କା଼ଲେଏ ଡ଼ୟିନେ।"

11 "ଆଲ ଦୁକୁଗାଟି ଗା଼ଲି ପିୟୁତା କିଲିବିଲି ଆ଼ତାତି, ଅ଼ଡ଼େ ଆମ୍ବାଆରାକି ହିତ୍‌ଡ଼ି ହିଲେଏ,

ମେହ୍‌ମୁ ନା଼ନୁ ହା଼ରେକା ଅ଼ଜିତି ୱା଼ଣା ତଲେ ନୀ ୱାଲ୍‌କା ଇଟିଇଁ ଅ଼ଡ଼େ ନିଲମଣି ୱାଲି ତଲେ ନୀ ପୁନାଦି ତିୟାରା କିଇଁ।

12 ନା଼ନୁ ପଦ୍ମରାଗ ୱାଲି ତଲେ ନୀ ସିଣ୍ତି ଅ଼ଡ଼େ ୱେ଼ଡ଼ାଜାସ୍‌ପରି ୱାଲି ତଲେ ନୀ ଗା଼ଡ଼ାତି ଦୁୱେରିକା

ଅ଼ଡ଼େ ମ଼ନକିତି ୱାଲ୍‌କା ତଲେ ନୀ ବାରେ ହାନ୍ଦି ତୀରି କିଇଁ।

13 ନୀ ବାରେ ମୀର୍‌କା ପ୍ରବୁ ତା଼ଣାଟି ଜା଼ପିନେରି

ଅ଼ଡ଼େ ନୀ ମୀର୍‌କାକି ହା଼ରେକା ହିତ୍‌ଡ଼ି ଆ଼ନେ।

14 ନୀନୁ ଦାର୍ମୁଟି ତୀରି ଆ଼ଦି; ନୀନୁ ଲାଗେଏ ତା଼ଣାଟି ହେକ ଡ଼ୟିଦି,

ଇଚିହିଁ ନୀନୁ ଆଜଅତି ଇଞ୍ଜାଁ ଆଜିନି ତା଼ଣାଟି ହେକ ଡ଼ୟିଦି,

ଇଚିହିଁ ଏ଼ଦି ନୀ ଡାଗେ ୱା଼ଏ।

15 ମେହ୍‌ଦୁ, ଲ଼କୁ ରଣ୍ତିଏ ଜାଟୁ ଆ଼ହାଲି ଆ଼ଡିନେରି,

ସାମା ନା଼ ତା଼ଣାଟି ଆ଼ଏ, ଆମ୍ବାଆସି ନୀ କ଼ପାଟି ରଣ୍ତିଏ ଜାଟୁ ଆ଼ନେସି,

ଏ଼ୱାସି ନୀ ତା଼ଣାଟି ହା଼ରୱି ଆ଼ନେରି।

16 ମେହ୍‌ଦୁ, ଏମିନି କାମ୍ବ୍ରେଃଏସି ରୀଙ୍ଗାତି ହିଚୁତା ଊକିକିହାଁ କା଼ନ୍ଦିସାରେ ତାନି କାମା ତାକି ଆ଼ସ୍ତି ତିୟାରା କିନେସି,

ନା଼ନୁ ଏ଼ୱାଣି ଗା଼ଡ଼ି କିତାତେଏଁ ଅ଼ଡ଼େ ନା଼ସା କିହାଲି ନା଼ସା କିନାଣି ଜିକେଏ ନା଼ନୁ ଗା଼ଡ଼ି କିହାମାଇଁ।

17 ଏ଼ନି ଆ଼ସ୍ତି ନୀ କ଼ପାଟି ତିୟାରା ଆ଼ନେ ଏ଼ଦି ଆ଼ହାଲି ଆ଼ଡେଏ

ଅ଼ଡ଼େ ବାରେ ୱେନ୍ଦରିକା ନୀହାଁୟିତା ନୀ କ଼ପାଟି ନିଙ୍ଗିନେ,

ନୀନୁ ଏ଼ଦାଣି ଦ଼ହ ଗାଟାୟି କିଦି।

ପ୍ରବୁତି ହ଼ଲିୟାଙ୍ଗା ଅଦିକାରା ଅ଼ଡ଼େ ନା଼ ହୀହାମାନି ଏ଼ୱାରି ଦାର୍ମୁ ଈଦି।"

ଈ କାତା ପ୍ରବୁ ୱେସିମାନେସି।