1 ଆମସ ମୀର୍‌ଏସି ଜିସାୟ, ଜୀହୁଦା ଅ଼ଡ଼େ ଜିରୁସାଲମ କାତାତି ଏମିନି ସେୟାଁଣା ହାପାନା ବେଟାଆ଼ତେସି ଏମ୍ବାତି କାତା।

2 ରା଼ନି ଦିନାତା ଇଲେକିଁ ଆ଼ନେ,

ପ୍ରବୁ ଇଲୁତି ହ଼ର୍‌କା,

ବାରେ ହ଼ର୍‌କା ସିଣ୍ତି ଲାକ କେ଼ପ୍‌ୱିଆ଼ନୁ,

ଅ଼ଡ଼େ ଊଣା ହ଼ର୍‌କା କିହାଁ ଲାକ ପାଡିକିୱି ଆ଼ନେ;

ଅ଼ଡ଼େ ବାରେ ଗଚିତି ଲ଼କୁ କାଡା ଲେହେଁ ଏମ୍ବାଟି ରେ଼ଚା ୱା଼ନେରି।

3 ଇଞ୍ଜାଁ, ହା଼ରେକା କୂଡ଼ା ହାଜି ହାଜି ଏଲେଇନେରି,

"ମୀରୁ ୱା଼ଦୁ, ମା଼ର ପ୍ରବୁତି ହ଼ରୁତା,

ଜାକୁବତି ମାହାପୂରୁ ଇଲୁତା ହାନ;

ଏଚେଟିଏ ଏ଼ୱାସି ତାନି ଜିରୁତି କାତା ମାଙ୍ଗେ ଜା଼ପ୍‌ହାନେସି

ଅ଼ଡ଼େ ମା଼ର ତାନି ଜିରୁତା ତା଼କିନ;

ଇଚିହିଁ ସିୟନଟି ମେ଼ରା ଅ଼ଡ଼େ ଜିରୁସାଲମଟି ପ୍ରବୁତି ବ଼ଲୁ ହ଼ନେ।"

4 ଇଞ୍ଜାଁ, ଏ଼ୱାସି ଦେ଼ସାତି ଲ଼କୁ ବିତ୍ରା ବିଚାରା କିନେସି ଅ଼ଡ଼େ ହା଼ରେକା କୂଡ଼ାତି କାତା ତୀରି କିନେସି;

ଏଚେଟିଏ ଏ଼ୱାରି ତାମି କାଣ୍ତା ଡିକ୍‌ହାଁ ନା଼ଙ୍ଗେଲିତି ନାକୁ କିନେରି

ଅ଼ଡ଼େ ତାମି ବା଼ଲା ଡିକ୍‌ହାଁ କ଼ଚାଡୱେଲି କେ଼ପିନେରି;

ର଼ ଦେ଼ସାତି ଲ଼କୁ ଅ଼ର ଦେ଼ସାତି ଲ଼କୁ କ଼ପାଟି କାଣ୍ତା ଆହ୍‌ଅରି,

ଅ଼ଡ଼େ ଏ଼ୱାରି ଜୁଜୁ ଜା଼ପଅରି।

5 ଏ଼ ଜାକୁବ କୂଡ଼ା, ୱା଼ଦୁ, ମା଼ର ପ୍ରବୁତି ଉଜେଡ଼ିତା ତା଼କିନ।

6 ଇଚିହିଁ ନୀନୁ ଜାହାରା ଲ଼କୁ ଜାକୁବ କୂଲୁତି ପିସାମାଞ୍ଜି, ଏ଼ନିଇଚିହିଁ ଏ଼ୱାରି ୱେ଼ଡ଼ାହ଼ପୁ ୱାକିତି ଲ଼କୁ ମାଣ୍‌କିତା ମ଼ନ ହୀହାମାନେରି ଅ଼ଡ଼େ ପାଲେସ୍ତିୟ ଲ଼କୁ ଲେହେଁ ପା଼ଞ୍ଜି ସିନିକିନାରି ଆ଼ହାମାନେରି, ଇଞ୍ଜାଁ ଏ଼ୱାରି ଏଟ୍‌କା ଦେ଼ସାତି ମୀର୍‌କା ତଲେ କେୟୁ ଆଟ୍‌ହା ମାନେରି। 7 ଏ଼ୱାରି ଦେ଼ସା ଜିକେଏ ବାଂଗାରା ଅ଼ଡ଼େ ୱେଣ୍ତି ତଲେ ନେଞ୍ଜାମାନେ; ଏ଼ୱାରି ବାତ୍‌କୁ ହା଼ରେକା ଆ଼ହାମାନେ; ଅ଼ଡ଼େ, ଏ଼ୱାରି ଦେ଼ସାତା ଗ଼ଡ଼ାୟାଁ ନେଞ୍ଜାମାନୁ ଅ଼ଡ଼େ ଏ଼ୱାରି ରାତାୟାଁ ଏଜି ହିଲେଏ। 8 ଏ଼ୱାରି ଦେ଼ସା ଜିକେଏ ପେ଼ଣ୍‌କା ବମାୟାଁ ତଲେ ନେଞ୍ଜାମାନେ; ଏ଼ୱାରି ତାମି କେୟୁତି ୱାସ୍‌କା ତଲେ କିତି ଦିଣ୍‌ସୁତି ଜହରା କିନେରି।

9 ଇମ୍ବାଆଁ ମାଣ୍‌ସି ଜହରା କିହିମାନେସି, କାଜା ମାଣ୍‌ସି ଊଣା କିୱି ଆ଼ହିମାନେସି; ଏ଼ଦାଆଁତାକି ଏ଼ୱାରାଇଁ କେମା କିଆନି। 10 ମୀରୁ ପ୍ରବୁତି ଆଜିଟି ଅ଼ଡ଼େ ତାନି ଗା଼ୱୁରମି ଉଜେଡ଼ିଟି, ପା଼କା ପାରୁତା ହ଼ଡାହାଁ ଦୂଡ଼ିତା ଜାହାରାଇଁ ଡ଼ୁକ୍‌ଦୁ। 11 ମାଣ୍‌ସିତି ବଡପଣ ଊଣା କିୱିଆ଼ନେ ଅ଼ଡ଼େ ମାଣ୍‌ସିୟାଁତି ଆଙ୍କାରା ଡ଼଼ଇକା ରିନେ, ଇଞ୍ଜାଁ, ଏ଼ ଦିନା ୱାର୍‌ଇ ପ୍ରବୁ କାଜାସି ଆ଼ନେସି। 12 ଇଚିହିଁ ଡା଼ହାରା ଅ଼ଡ଼େ, ବଡପଣ ବାରେ କାଜାରି ଲ଼କୁ କ଼ପାଟି ବା଼ଡ଼୍‌ୟୁଗାଟି ପ୍ରବୁତି ର଼ ଦିନା ୱା଼ନେ, ଏଚେଟିଏ ଏ଼ଦି ଊଣା ଆ଼ନେ; 13 ଏ଼ୱାସି ହା଼ରେକା ପାଡା ଆ଼ତି ଲିବାନନତି ଏରସ ମା଼ର୍‌ନୁ ଅ଼ଡ଼େ ବାସନତି ବାରେ ଆ଼ଟ୍‌ୱା ଅଲନ୍‌ ମା଼ର୍‌ନୁ କ଼ପାଟି; 14 ଇଞ୍ଜାଁ ବାରେ ପାଡାଆ଼ତି ହ଼ର୍‌କା କ଼ପାଟି ଅ଼ଡ଼େ ବାରେ ଊଣା ହ଼ର୍‌କା କ଼ପାଟି; 15 ବାରେ ପାଡାଆ଼ତି କ଼ଟା କାତି କ଼ପାଟି, ଅ଼ଡ଼େ ବାରେ ଆ଼ଟ୍‌ୱା କ଼ଟା କାତି କ଼ପାଟି; 16 ତର୍ସିସତି ବାରେ ଜା଼ଜାୟାଁ କ଼ପାଟି ଅ଼ଡ଼େ ବାରେ ଅ଼ଜିତି କିନି କାମା କ଼ପାଟି ଆ଼ନେ। 17 ଇଞ୍ଜାଁ ମାଣ୍‌ସିତି ବଡପଣ ଊଣା ଆ଼ନେ, ଅ଼ଡ଼େ ମାଣ୍‌ସିତି ଡା଼ହାରା ଊଣା କିୱିଆ଼ନେ; ଅ଼ଡ଼େ ଏ଼ ଦିନା ୱାର୍‌ଇ ପ୍ରବୁ ରଅସିଏ କାଜାସି ଆ଼ନେସି। 18 ଇଞ୍ଜାଁ, ପେ଼ଣ୍‌କା ବମାୟାଁ ବାରେ ମେଣ୍‌ଙ୍ଗିନୁ।

19 ଅ଼ଡ଼େ, ଏଚିବେ଼ଲା ପ୍ରବୁ ଦାର୍‌ତିତି ହା଼ରେକା ତୀର୍‌ଗି କିହାଲି ନିଙ୍ଗିନେସି, ଏଚିବେ଼ଲା ଲ଼କୁ ତାନି ଆଜିଟି ଅ଼ଡ଼େ ଗା଼ୱୁରମି ଉଜେଡ଼ିଟି ୱାଲିତି ପା଼ୱୁ ଅ଼ଡ଼େ ଦାର୍‌ତିତି ଗା଼ଡ଼୍‌ୟୁତା ହ଼ଡ଼୍‌ନେରି। 20 ମାଣ୍‌ସି ଜାହାରା ଜହରା କିହାଲି କେ଼ପିତି ବାଂଗାରା ଅ଼ଡ଼େ ୱେଣ୍ତିତି ପୂତ୍‌ଲାୟାଁଣି ଏ଼ ଦିନା ଅର୍‌ଲି ଅ଼ଡ଼େ ବା଼ପ୍‌ଲାୟାଁ ତା଼ଣା ମେତ୍‌ହା ତୁହ୍‌ନେରି। 21 ଅ଼ଡ଼େ ଏଚେ଼ତା ପ୍ରବୁ ଦାର୍‌ତିତି ହା଼ରେକା ତୀର୍‌ଗି କିହାଲି ନିଙ୍ଗିସାରେ, ତାନି ଆଜିଟି ତାନି ଗା଼ୱୁରମିଗାଟି ଉଜେଡ଼ିଟି ୱାଲିତି ପା଼ୱୁତା ଅ଼ଡ଼େ ୱାଲିତି ଡ଼ାୟିତି ଟା଼ୟୁତା ହ଼ଡ଼୍‌ନେରି।

22 ଏ଼ଦାଆଁତାକି ମୀରୁ ମୁଙ୍ଗେଲିଟି ନେ଼ଞ୍ଜିମାନି ମାଣ୍‌ସି ତା଼ଣା ଆ଼ସା ଇଟାଆଦୁ, ଇଚିହିଁ ଏ଼ୱାରି ଦାରା ହିଲାଆଗାଟାରି।