1 ମେହ୍‌ଦୁ, ପ୍ରବୁ ଦାର୍‌ତିତି ୱାର୍‌ଆୟି ଅ଼ଡ଼େ ନା଼ସା କିନେସି, ଅ଼ଡ଼େ ଏ଼ଦାଆଁ ତିରିମ୍ଣିପ୍‌ହାଁ ଏମ୍ବାତି ବାସା କିହାମାନାରାଇଁ ସିନାସାତ୍ରା କିହାଲି ହାଜିମାନେସି। 2 ଏ଼ନିକିଁ ଲ଼କୁତାକି, ଏଲେକିଁ ପୂଜେରାକି; ହ଼ଲେଏଣାକି ଅ଼ଡ଼େ ସା଼ୱୁକାରିକି; ହ଼ଲେଣିନାକି ଅ଼ଡ଼େ ସା଼ୱୁକାରିଣିକି; କଡିନାଣାକି ଅ଼ଡ଼େ ପା଼ର୍‌ନାଣାକି; ଉଦାରା ହୀନାଣାକି ଅ଼ଡ଼େ ଉଦାରା ଅ଼ନାଣାକି; କଲନ୍ତର ଅ଼ନାଣାକି ଅ଼ଡ଼େ କଲନ୍ତର ହୀନାଣାକି ଏଲେକିହିଁଏ ଆ଼ନେ। 3 ଦାର୍‌ତି ବାରେ ୱାର୍‌ଆୟି ଆ଼ହାଁ କୁଡ଼୍‌ପୁନା଼ସା ଆ଼ନେ; ଇଚିହିଁ ପ୍ରବୁ ଈ କାତା ଏଲେଇଞ୍ଜାମାନେସି।

4 ଦାର୍‌ତି ଦୁକୁ କିହାଁ ୱା଼ଡ଼ିମାନେ, ବାରେ ଦାର୍‌ତି ବା଼ଡ଼୍‌ୟୁ ହିଲାଆଗାଟାୟି ଆ଼ହାଁ ୱା଼ଡ଼ିମାନେ, ଦାର୍‌ତିତି କାଜା ଲ଼କୁ ୱା଼ଡ଼ିନେରି। 5 ଦାର୍‌ତି ତାନି ବାସା କିହାମାନାରି ତାକି ଲାଗେଏ ଆ଼ହାମାନେ, ଇଚିହିଁ ଏ଼ୱାରି ବାରେ ମେ଼ରା ଊରାମାନେରି, ମେ଼ରା ଏଟ୍‌କା କିହାମାନେରି, କା଼ଲେଏତି ମେ଼ରା ଡିକ୍‌ହା ମାନେରି। 6 ଏ଼ଦାଆଁତାକି ବା଼କା ଦାର୍‌ତିତି ଗୂସାମାନେ ଅ଼ଡ଼େ ଏମ୍ବାଆଁ ବାସା କିହାମାନି ଲ଼କୁ ଦ଼ହଗାଟାରି ଆ଼ହାମାନେରି; ଏ଼ଦାଆଁତାକି ଦାର୍‌ତିତା ବାସା କିହାମାନି ଲ଼କୁ ୱେହାମାନେରି ଅ଼ଡ଼େ ଇଚରା ଲ଼କୁ ଡ଼ୟାମାନେରି। 7 ପୁଃନି ଅଙ୍ଗୁରିରାସା ୱା଼ୟା ହାଜିମାନେ, ଅଙ୍ଗୁରିମା଼ଡ଼ା ୱା଼ଡ଼ାମାନେ, ରା଼ହାଁଗାଟାରି ହିୟାଁ ବାରେ ଦୁକୁତଲେ ମାନେ। 8 ବା଼ଜାତି ରା଼ହାଁ ଊଣା ଆ଼ହିମାନେ, ରା଼ହାଁ କିନାରି ଗିୟାଁ ରା଼ହିମାନେ, ରାମଗଂଟତି ରା଼ହାଁ ସାପି ଆ଼ହିମାନେ। 9 ଲ଼କୁ ପା଼ଚିହିଁ ଅଙ୍ଗୁରି ରାସା ଗହ୍‌ଅରି; ଅଙ୍ଗୁରି ରାସା ଗହ୍‌ନାରାକି ଅଙ୍ଗୁରି ରାସା କାମ୍ବେଲି ଆ଼ନୁ। 10 ଲ଼କୁ ହିଲାଆ ଗା଼ଡ଼ା ଡୀହାମାନେ; ଏ଼ନି ମାଣ୍‌ସି ଏ଼ନିକିଁ ବିତ୍ରା ହ଼ଡାଲି ଆ଼ଡଅରି, ଏ଼ଦାଆଁତାକି ବାରେ ଇଲୁ ସୁଣ୍ତ୍‌କି ଆ଼ହାମାନେ। 11 ଅଙ୍ଗୁରି ରାସା ତାକି ଜିରୁତା କା଼ଲୱି ଆ଼ନେରି; ବାରେ କୂଡ଼ାତି ରା଼ହାଁ ଆନ୍ଦେରି ଆ଼ହାମାନେ, ଦେ଼ସାତି ରା଼ହାଁ ହାଜାମାନେ। 12 ଗା଼ଡ଼ାତା ନା଼ସା ବା଼କି ମାଣ୍‌ମ୍ବିନେ ଅ଼ଡ଼େ ଦୁୱେରି ଡୀହାଁ ନା଼ସା ଆ଼ହାମାନେ। 13 ଇଚିହିଁ ଏ଼ନିକିଁ ଜୀତ ମା଼ର୍‌ନୁ ଡୁଲ୍‌ନି ବେ଼ଲା ଆ଼ନେ ଅ଼ଡ଼େ ଅଙ୍ଗୁରି ପା଼ଡ଼େୟି ଏସ୍ତି ଡା଼ୟୁ ଏ଼ନିକିଁ ଅଙ୍ଗୁରି କୂଡ଼ି କିହାଲି ଆ଼ନେ, ଏଲେକିଁ ଦାର୍‌ତିତି କୂଡ଼ା ବିତ୍ରା ଆ଼ନେ।

14 ଈୱାରି କାଜା ଗିୟାଁ କିନେରି, ଈୱାରି ରା଼ହାଁତି ହା଼ଡା କିନେରି; ପ୍ରବୁତି ଗା଼ୱୁରମି ତାକି ଏ଼ୱାରି ୱେ଼ଡ଼ା ହାନି ୱାକିଟି କାଜା ଗିୟାଁ କିନେରି। 15 ଏ଼ଦାଆଁତାକି ମୀରୁ ୱେ଼ଡ଼ା ହ଼ପୁ ୱାକି ଦେ଼ସାତା ପ୍ରବୁଇଁ, ଇଚିହିଁ, ଇସ୍ରାୟେଲତି ମାହାପୂରୁ ପ୍ରବୁ ଦ଼ରୁତି ଗା଼ୱୁରମି ସାମ୍‌ଦୁରି ମାଦିମାନି କୁପ୍‌ଲିତା ୱେ଼କ୍‌ଦୁ। 16 ଦାର୍ମୁଗାଟାରି ସ଼ବା ବେଟାଆ଼ନେରି, ଈ ପା଼ଚୁ ମା଼ମ୍ବୁ ଦାର୍‌ତି ହାନ୍ଦି ମୁଟ୍‌ପେଟି ୱେଞ୍ଜାମାନମି। ସାମା ନା଼ନୁ ଏଲେଇଚେଏଁ, "ନା଼ନୁ ହୀଣି ଆ଼ହିମାଇଁ, ନା଼ନୁ ହୀଣି ଆ଼ହିମାଇଁ! ନା଼ନୁ ଡଣ୍ତ ବେଟାଆ଼ନାତେଏଁ! ନାମୁତି ଊରିନାରି ନାମୁତି ଊରାମାନେରି; ହାଅ, ନାମୁତି ଊରିନାରି ହା଼ରେକା ନାମୁତି ଊରାମାନେରି।" 17 ଏ଼ ଦାର୍‌ତିତା ବାସା କିହାମାନି ଲ଼କୁ, ମୀ ତାକି ଆଜି, ଗା଼ଡ଼୍‌ୟୁ ଅ଼ଡ଼େ ପା଼ନ୍ଦା ତିୟାରା ଆ଼ହାମାନେ। 18 ଅ଼ଡ଼େ, ଇଲେକିଁ ଆ଼ନେ, ଆମ୍ବାଆସି ଆଜି ହା଼ଡାଟି ହଣ୍‌ନେସି, ଏ଼ୱାସି ଗା଼ଡ଼୍‌ୟୁତା ରିନେସି; ଆମ୍ବାଆସି ଗା଼ଡ଼୍‌ୟୁ ବିତ୍ରାଟି ନିଙ୍ଗା ୱା଼ତିସାରେ, ଏ଼ୱାସି ପା଼ନ୍ଦାତା ଆସ୍‌ପି ଆ଼ନେସି; ଇଚିହିଁ ଲାକତି କିଡ଼୍‌କିୟାଁ ବାରେ ଦେପି ଆ଼ହାମାନୁ ଅ଼ଡ଼େ ଦାର୍‌ତିତି ବାରେ ପୁନାଦି ତୀର୍‌ଗିମାନେ। 19 ଦାର୍‌ତି ସାତେଏ ଡ଼ାୟାମାନେ, ଦାର୍‌ତି ସାତେଏ ରୂୟା ହାଜାମାନେ, ଦାର୍‌ତି ହା଼ରେକା କିଲିବିଲି ଆ଼ହାମାନେ। 20 ଦାର୍‌ତି ହ଼ଚିତି ଲ଼କୁ ଲେହେଁ ଦା଼ଙ୍ଗିନେ ଅ଼ଡ଼େ ଗୂଡ଼ା ଲେହେଁ ଇତାଲା ଆତାଲା ଆ଼ନେ; ଅ଼ଡ଼େ, ତାନି ଦ଼ହ ତାନି ଲାକ ବ଼ଜୁ ଆ଼ନେ, ଏଚେଟିଏ ଏ଼ଦି ରିନେ, ଅ଼ଡ଼େ ନିଙ୍ଗେଏ।

21 ଇଞ୍ଜାଁ, ଏ଼ ଦିନା, ପ୍ରବୁ ଲାକପୂରୁତି ରିଜାରି କ଼ସ୍‌କାଣି ଦାର୍‌ତି ଅ଼ଡ଼େ ଦାର୍‌ତିତି ରାଜାୟାଁଇଁ ଡଣ୍ତ ହୀନେସି। 22 ଏଚେଟିଏ ଏ଼ନିକିଁ କା଼ୟିଦିଗାଟାରି ରଣ୍ତିଏ ତା଼ଣା ରୁଣ୍ତା ଆ଼ନେରି, ଏଲେକିଁ ଏ଼ୱାରି ରଣ୍ତିଏ ତା଼ଣା ରୁଣ୍ତା ଆ଼ହାଁ କାୟିଦିତା ସୁଣ୍ତ୍‌କି ଆ଼ନେରି, ଇଞ୍ଜାଁ ହା଼ରେକା ଦିନା ଡା଼ୟୁ ଏ଼ୱାରାଇଁ ବିଚାରା କିୱିଆ଼ନେ। 23 ଏଚିବେ଼ଲା ଲେ଼ଞ୍ଜୁ ଉଜେଡ଼ି ଆ଼ଏ, ଅ଼ଡ଼େ ୱେ଼ଡ଼ା ଏଚେଲା ମ୍ଣିହ୍‌ଏଦେଁ, ଇଚିହିଁ ବା଼ଡ଼୍‌ୟୁଗାଟି ପ୍ରବୁ ସିୟନ ହ଼ରୁତା, ଜିରୁସାଲମ ଅ଼ଡ଼େ ଲ଼କୁତି କାଜାରି ନ଼କିତା ହା଼ରେକା ବା଼ଡ଼୍‌ୟୁଟି ସା଼ଲୱି କିନେସି।