1 ଏଚେଟିଏ ହିଜକିୟ ରାଜା ଏ଼ କାତା ୱେଞ୍ଜାଲିଏ, ତାନି ବାସ୍ତେରି ଗେସାହାଁ ଅ଼ଡ଼େ ଗ଼ଣି ପିଡ଼୍‌ଗାହାଁ ପ୍ରବୁତି ଇଲୁତା ହାଚେସି। 2 ଇଞ୍ଜାଁ, ଏ଼ୱାସି ରାଜା ଇଜତି କାଜାସି ଇଲିୟାକିମ୍‌ଇଁ, ସିବ୍‌ନ ରା଼ଚିନାଣାଇଁ ଅ଼ଡ଼େ ପୂଜେରାଙ୍ଗାତି କାଜାରାଇଁ ବାସ୍ତା ପ୍ଡିକ୍‌ହାହାଁ ଆମସତି ମୀର୍‌ଏସି ନ଼କିତା ଆ଼ନି କାତା ୱେହ୍‌ନି ଜିସାୟ ତା଼ଣା ପାଣ୍ତିତେସି। 3 ଏଚେଟିଏ ଏ଼ୱାରି ଏ଼ୱାଣାଇଁ ଏଲେଇଚେରି, "ହିଜକିୟ ଇଲେକିହିଁ ଏଲେଇଞ୍ଜି ମାନେସି, ‘ନୀଞ୍ଜୁ ଦିନା ବା଼ଦା, ଡଣ୍ତ ଅ଼ଡ଼େ ଲାଜାତି ଦିନା; ଇଚିହିଁ ମୀର୍‌କା ଜାର୍ନା ଆ଼ନାୟିମାନେ, ସାମା ଜାର୍ନି କିହାଲି ବା଼ଡ଼୍‌ୟୁ ହିଲେଏ। 4 ଆ଼ହାଲି ଆ଼ଡିତିହିଁ, ଜୀୱୁତି ମାହାପୂରୁଇଁ ନିନ୍ଦା କିହାଲି ତାକି ତାନି ପ୍ରବୁ ଅସୁରିୟ ରାଜା ତା଼ଣାଟି ପାଣ୍ତ୍‌ୱିଆ଼ତି ରବ୍‌ସାକିତି ବାରେ କାତା ପ୍ରବୁ ନୀ ମାହାପୂରୁ ୱେଞ୍ଜାନେସି, ଇଞ୍ଜାଁ, ପ୍ରବୁ ନୀ ମାହାପୂରୁ ଏମିନି କାତା ୱେଞ୍ଜାମାନେସି, ଏ଼ଦାଆଁତାକି ଲା଼ଗିନେସି; ଏ଼ଦାଆଁତାକି ଏମିନି ବା଼କି ମାନେରି, ଏ଼ୱାରି ତାକି ମୀରୁ ପ୍ରା଼ତାନା କିଦୁ।’"

5 ଏଲେକିହିଁ ହିଜକିୟ ରାଜାତି ହ଼ଲିୟାଙ୍ଗା ଜିସାୟ ତା଼ଣା ଏତେରି। 6 ଏଚେଟିଏ ଜିସାୟ ଏ଼ୱାରାଇଁ ଏଲେଇଚେସି, "ମୀରୁ ମୀ ସା଼ୱୁକାରିଇଁ ଇଲେକିଁ ଏଲେଇଞ୍ଜେରି, ‘ପ୍ରବୁ ଏଲେଇଞ୍ଜିମାନେସି, ଅସୁରିୟ ରାଜାତି ହ଼ଲିୟାଙ୍ଗା ନାଙ୍ଗେ ନିନ୍ଦା କିୟାତାଣି ଏମିନି କାତା ନୀନୁ ୱେଞ୍ଜାମାଞ୍ଜି, ଏ଼ଦାଆଁତାକି ଆଜାଆନି। 7 ମେହ୍‌ଦୁ, ନା଼ନୁ ଏ଼ୱାଣି ତା଼ଣା ର଼ ଜୀୱୁ ହୀଇଁ, ଇଞ୍ଜାଁ ଏ଼ୱାସି ଏ଼ନି ଲ଼କୁ କା଼ଲୱି ୱେଞ୍ଜାହାଁ ଜାହାରା ଦେ଼ସାତା ୱେଣ୍ତା ହାନେସି; ଅ଼ଡ଼େ, ନା଼ନୁ ତାନି ଦେ଼ସାତା କାଣ୍ତା ତଲେ ଏ଼ୱାଣାଇଁ ନା଼ସା କିଇଁ।’"

8 ଏଚେଟିଏ ଅସୁରତି ରାଜା ଲାକିସ୍‌ଟିଏ ହାଜାମାନେସି ଇଞ୍ଜିଁ ରବ୍‌ସାକି ୱେଞ୍ଜାହାଁ ୱେଣ୍ତା ହାଚେସି ଅ଼ଡ଼େ ଏ଼ୱାଣାଇଁ ଲିବ୍‌ନା କ଼ପାଟି ଜୁଜୁ କିହିମାନାଣି ମେସ୍ତେସି। 9 ଇଞ୍ଜାଁ, ଅସୁରତି ରାଜା କୂସ ଦେ଼ସାତି ତିର୍ହକ ରାଜାତି ଈ କାତା ୱେଚେସି, ଏ଼ୱାସି ନୀ କ଼ପାଟି ଜୁଜୁ କିହାଲି ୱା଼ହାମାନେସି; ଈଦାଆଁ ୱେଞ୍ଜାହାଁ ଏ଼ୱାସି ହିଜକିୟ ତା଼ଣା କାବ୍ରୁ ୱେହ୍‌ନାରାଇଁ ପାଣ୍ତାହାଁ ଏଲେଇଚେସି, 10 "ମୀରୁ ଜୀହୁଦାତି ରାଜା ହିଜକିୟଇଁ ଈ କାତା ଏଲେଇଞ୍ଜେରି, ଜିରୁସାଲମ ଅସୁରତି ରାଜାତି କେୟୁତା ୱା଼ଏ, ଈ କାତା ୱେସାହାଁ ମୀ ନାମୁତି ମାହାପୂରୁ ମିଙ୍ଗେ ନା଼ଡ଼ି କିୟାଆପେସି।" 11 ମେହ୍‌ଦୁ, ଅସୁରତି ରାଜାୟାଁ ନା଼ସା କିହାଲିଏ ବାରେ ଦେ଼ସାତି ଏ଼ନାଆଁ କିହାମାନେରି, ଏ଼ଦାଆଁ ମୀରୁ ୱେଞ୍ଜାମାଞ୍ଜେରି; ଅ଼ଡ଼େ, ମୀରୁ ଏ଼ନାଆଁ ଗେଲ୍‌ପି ଆ଼ଦେରି ? 12 ନା଼ ଆକୁ ଆ଼ବାୟାଁ ଏମିନି ଗ଼ସନ୍‌, ହାରଣ, ରେତ୍‌ସପ ଦେ଼ସାତାରାଇଁ ଅ଼ଡ଼େ ତଳସରତା ମାନି ଏଦନ ମୀର୍‌କାଣି ନା଼ସା କିତେରି, ତାମି ପେ଼ଣ୍‌କା ଏ଼ନାଆଁ ଏ଼ୱାରାଇଁ ଗେଲ୍‌ପିତୁ ? 13 ହମାତତି ରାଜା, ଅର୍ପଦତି ରାଜା, ସପର୍ବୟିମ ଗା଼ଡ଼ାତି, ହେନାର ଅ଼ଡ଼େ ଅବ୍‌ବାତି ରାଜା ଆମ୍ବିୟା ?

14 ଏଚେଟିଏ ହିଜକିୟ କାବ୍ରୁ ୱେହ୍‌ନାରି କେୟୁଟି ଆ଼କୁ ଅ଼ହାଁ ଏ଼ଦାଆଁ ପ଼ଡ଼ୱି ଆ଼ତେସି; ଅ଼ଡ଼େ, ହିଜକିୟ ପ୍ରବୁତି ଇଲୁତା ହାଜାହାଁ ପ୍ରବୁତି ନ଼କିତା ଏ଼ଦାଆଁ ଦେତେସି। 15 ଅ଼ଡ଼େ, ହିଜକିୟ ପ୍ରବୁ ତା଼ଣା ପ୍ରା଼ତାନା କିହାଁ ଏଲେଇଚେସି, 16 "ଏ଼ କିରୁବ ଦୂତୁୟାଁ ଲାକ ମାନି ବା଼ଡ଼୍‌ୟୁଗାଟି ପ୍ରବୁ, ଇସ୍ରାୟେଲତି ମାହାପୂରୁ, ନୀନୁ, ୱାର୍‌ଇ ନୀନୁ ଦାର୍‌ତିତି ବାରେ ରା଼ଜିତି ମାହାପୂରୁ; ନୀନୁ ଲାକପୂରୁ ଅ଼ଡ଼େ ଦାର୍‌ତି ଗା଼ଡ଼ି କିହାମାଞ୍ଜି। 17 ଏ଼, ପ୍ରବୁ, ନୀ କିର୍ୟୁଁ ଅଡାହାଁ ୱେନାମୁ; ଏ଼, ପ୍ରବୁ, ନୀ କାନୁ ଦେଚାହାଁ ସିନିକିମୁ; ଇଞ୍ଜାଁ, ଜୀୱୁତି ମାହାପୂରୁଇଁ ନିନ୍ଦା କିହାଲି ତାକି ସନ୍‌ହେରିବ ଏ଼ନାଆଁ ୱେସା ପାଣ୍ତା ମାଞ୍ଜାନେସି, ଏ଼ୱାଣି ଏ଼ ବାରେ କାତା ୱେନାମୁ। 18 ଏ଼, ପ୍ରବୁ, ଅସୁରତି ରାଜାୟାଁ ବାରେ ଦେ଼ସାତି ଲ଼କୁଣି, ଏ଼ୱାରି ଦେ଼ସାତି ନା଼ସା କିହାମାନେରି, 19 ଅ଼ଡ଼େ ତାମି ପେ଼ଣ୍‌କାଣି ହିଚୁତା ମେତ୍‌ହା ମାନେରି, ଈ କାତା ସାତା; ଇଚିହିଁ ଏ଼ୱି ମାହାପୂରୁ ଆ଼ଏ, ମାଣ୍‌ସି କେୟୁଟି କିତି, ୱେସ୍‌କା ଅ଼ଡ଼େ ୱାଲ୍‌କା; ଏ଼ଦାଆଁତାକି ଏ଼ୱାରି ଏ଼ୱାଆଁତି ନା଼ସା କିହାମାନେରି। 20 ଏ଼ଦାଆଁତାକି ନୀଏଁ, ଏ଼ ପ୍ରବୁ, ମା଼ ମାହାପୂରୁ, ତାନି କେୟୁଟି ମାଙ୍ଗେ ଗେଲ୍‌ପାମୁ, ଏଚେଟିଏ ନୀନୁ, ୱାର୍‌ଇ ନୀନୁ ପ୍ରବୁତି, ଈଦାଆଁ ଦାର୍‌ତିତି ବାରେ ରା଼ଜି ପୁନେ।"

21 ଏଚେଟିଏ ଆମସ ମୀର୍‌ଏସି ଜିସାୟ ହିଜକିୟ ତା଼ଣା ୱେସା ପାଣ୍ତିତେସି, "ପ୍ରବୁ ଇସ୍ରାୟେଲତି ମାହାପୂରୁ ଈ କାତା ଏଲେଇଞ୍ଜି ମାନେସି, ନୀନୁ ଅସୁରତି ରାଜା ସନ୍‌ହେରିବ କ଼ପାଟି ନା଼ ତା଼ଣା ପ୍ରା଼ତାନା କିହାଲିଏ, 22 ପ୍ରବୁ ଏ଼ୱାଣି କ଼ପାଟି ଈ କାତା ଏଲେଇଞ୍ଜି ମାନେସି; ସିୟନତି ଡ଼ାଆ ମା଼ଙ୍ଗା ନିଙ୍ଗେ ହୀଣି କିହାଁ ଲାଜା କିହାମାଞ୍ଜାନେ; ଜିରୁସାଲମତି ମା଼ଙ୍ଗା ନୀ ୱାକି ତା଼ର୍ୟୁଁ ୱୀଟ୍‌ହାମାନେ। 23 ନୀନୁ ଆମ୍ବାଆରାଇଁ ଲାଜା ଅ଼ଡ଼େ ନିନ୍ଦା କିହାମାଞ୍ଜି ? ଅ଼ଡ଼େ ନୀନୁ ଆମ୍ବାଆରି କ଼ପାଟି ନୀନୁ କାଜା ହା଼ଡା କିହାମାଞ୍ଜି ଅ଼ଡ଼େ ନୀ କାନୁ ଲାକ ପେର୍‌ହା ମାଞ୍ଜି ? ଇସ୍ରାୟେଲତି ଦାର୍ମୁଗାଟି ମାହାପୂରୁ କ଼ପାଟି। 24 ନୀନୁ ନୀ ହ଼ଲିୟାଙ୍ଗା ତଲେ ପ୍ରବୁଇଁ ନିନ୍ଦା କିହାମାଞ୍ଜି ଅ଼ଡ଼େ ଏଲେଇଞ୍ଜାମାଞ୍ଜି, ନା଼ନୁ ନା଼ ହା଼ରେକା ରାତାୟାଁ ତଲେ ହ଼ର୍‌କା ଲାକ ଲିବାନନ ଜା଼ଡ଼ାତି ମାଦି ୱା଼ହାମାଇଁ; ଅ଼ଡ଼େ ନା଼ନୁ ଏମ୍ବାତି ପାଡାଆ଼ତି ଏରସ ମା଼ର୍‌କା ଅ଼ଡ଼େ ଏମ୍ବାତି ନେହିଁ ଦେବଦାରୁ ମା଼ର୍‌କା ଟୂଣ୍‌ହାତୁହ୍‌ଇଁ; ଇଞ୍ଜାଁ, ନା଼ନୁ ତାନି ହେକ ଟା଼ୟୁତା ଅ଼ଡ଼େ ତାନି ପା଼ଡ଼େୟି ଆ଼ୟାମାନି ବୂମି ଲେହେଁତି ଜା଼ଡ଼ାତା ହ଼ଡ଼୍‌ଇଁ। 25 ନା଼ନୁ କା଼ର୍‌ହାଁ ଏ଼ୟୁ ଗସି ମାଇଁ, ଅ଼ଡ଼େ ନା଼ନୁ ନା଼ ପାଃଆନା ଡ଼଼ଇ ମିସରତି କାଡା ବାରେ ୱା଼ୟିକିଇଁ।

26 ଏ଼ନିକିଁ ନା଼ନୁ ହା଼ରେକା କା଼ଲାଟିଏ ଈଦାଆଁ ତିୟାରା କିହାମାଇଁ ଅ଼ଡ଼େ ପୁର୍ବେ କା଼ଲାଟିଏ ଈଦାଆଁ ତୀରି କିହାମାଇଁ, ଈ କାତା ଏ଼ନାଆଁ ନୀନୁ ୱେଞ୍ଜା ହିଲଅତି ? ନୀନୁ କାତି ଗୂର୍‌ଚାମାନି ଗା଼ଡ଼ା ନା଼ସା କିହାଁ ଏ଼ ବାରେତି ଗାତାକଟୁ କିଦି, ଈଦି ନୀଏଁ ନା଼ନୁ ପୂରା କିହାମାଇଁ। 27 ଏ଼ଦାଆଁତାକି ଏମ୍ବାଆଁ ବାସା କିହାମାନାରି ତାମି ବା଼ଡ଼୍‌ୟୁ ଊଣା କିତେରି, ଏ଼ୱାରି ନୀରାସା ଅ଼ଡ଼େ କିଲିବିଲି ଆ଼ତେରି; ଏ଼ୱାରି ବା଼ଡ଼ାତି ଜା଼ଡ଼ା ଅ଼ଡ଼େ କ଼ଡ଼୍‌ଗି ଜା଼ଡ଼ା, ଇଲୁ ତେ଼ପରି ଲାକତି ଜା଼ଡ଼ା ଅ଼ଡ଼େ କାମ୍ବାଆଗାଟି ଆର୍ନା ଗୁଡିୟା ଲେହେଁ ଆ଼ତେରି।

28 ସାମା ନୀ କୁଗିନାଣି, ପାଙ୍ଗାତା ହାନାଣି, ବିତ୍ରା ୱା଼ନାଣି ଅ଼ଡ଼େ ମା଼ କ଼ପା ତଲେ କାର୍‌ବି ଆ଼ନାଣି ନା଼ନୁ ପୁଇଁ। 29 ନୀନୁ ନା଼ କ଼ପାଟି କାର୍‌ବି ଆ଼ହାମାଞ୍ଜି ଅ଼ଡ଼େ ନୀ ବଡପଣତି କାତା ନା଼ କିର୍ୟୁଁତା ଏଜାମାନେ, ଏ଼ଦାଆଁତାକି ନା଼ନୁ ନୀ ମୁଙ୍ଗେଲିତା ନା଼ କ଼ଟିକାରା ଅ଼ଡ଼େ ଗୂତିତା ନା଼ ବାକେରି ହିୟାଇଁ, ଇଞ୍ଜାଁ ନୀନୁ ଏମିନି ଜିରୁଟି ୱା଼ତି, ଏ଼ ଜିରୁଟି ନା଼ନୁ ନିଙ୍ଗେ ୱେଟ୍‌ହା ପାଣ୍ତାଇଁ।"

30 ଏ଼ଦାଆଁତାକି ଏ଼ ହିଜକିୟ, ନୀ ତାକି ଈ ସିନା ଆ଼ନେ; ମୀରୁ ଇୟଁନା ଆ଼ନି ଆର୍ନା ଅ଼ଡ଼େ ୱା଼ନି ବାର୍ସା ଏମ୍ବାଆଁ ନେୟିଁତି ବାଣ୍‌ୱା ଆର୍ନା ତିଞ୍ଜେରି; ଇଞ୍ଜାଁ, ଆଗାଡ଼ା ବାର୍ସାତା ବିଚା ମାଟାହାଁ ଆର୍ନା ଦା଼ଃଦେରି ଅ଼ଡ଼େ ଅଙ୍ଗୁରି ବା଼ଡ଼ା କିହାଁ ଏମ୍ବାତି ପା଼ଡ଼େୟି ତିଞ୍ଜେରି। 31 ଇଞ୍ଜାଁ, ଜୀହୁଦା କୂଡ଼ାତି ଗେଲ୍‌ପିଆ଼ତି ବା଼କି ଲ଼କୁ ୱେଣ୍ତେ ଡ଼଼ଇ ହୀରୁ ଜୀନେରି ଅ଼ଡ଼େ ଲାକ ପା଼ଡ଼େୟି ଆ଼ୟିନେରି। 32 ଇଚିହିଁ ଜିରୁସାଲମଟି ଡ଼ୟାମାନି ଲ଼କୁ ଅ଼ଡ଼େ ଗେଲ୍‌ପିଆ଼ତି ଲ଼କୁ ସିୟନ ହ଼ରୁଟି ହ଼ନେରି; ବା଼ଡ଼୍‌ୟୁଗାଟି ପ୍ରବୁ ଈଦାଆଁ ଆ଼ୱିକିନେସି।

33 ଏ଼ଦାଆଁତାକି ପ୍ରବୁ ଅସୁରତି ରାଜାଇଁ ଈ କାତା ଏଲେଇଞ୍ଜି ମାନେସି, "ଏ଼ୱାସି ଈ ଗା଼ଡ଼ାତା ୱା଼ଅସି, କି ଏମ୍ବାଆଁ ୱେଲୁ ଜୀଅସି, କି ଏ଼ ନ଼କିତା ଆଡୁ ପା଼ଟା ଆସାହାଁ ୱା଼ଅସି, କି ଏ଼ ଗା଼ଡ଼ା କ଼ପାଟି ଗୂର୍‌ଅସି। 34 ପ୍ରବୁ ଏଲେଇଞ୍ଜି ମାନେସି, ଏ଼ୱାସି ଏମିନି ଜିରୁଟି ୱା଼ତେସି, ଏ଼ ଜିରୁଟି ୱେଣ୍ତାହାନେସି ଅ଼ଡ଼େ ଏ଼ୱାସି ଈ ଗା଼ଡ଼ାତା ୱା଼ଅସି। 35 ଏ଼ନାଆଁତାକି ଇଚିହିଁ ନା଼ନୁ ନା଼ ତାକି ଅ଼ଡ଼େ ନା଼ ହ଼ଲେଏସି ଦାୱୁଦ ତାକି ଈ ଗା଼ଡ଼ାତି ଗେଲ୍‌ପାଲି ତାକି ସା଼ୟେମି ଆ଼ଇଁ।"

36 ଏଚେଟିଏ ପ୍ରବୁତି ଦୂତୁ ହ଼ଚାହାଁ ଅସୁରିୟ ଲ଼କୁ ମାଚି ଟା଼ୟୁତା ର଼ ଲାକେ ସା଼ରିକ଼ଡ଼ି ପା଼ସା ମା଼ଣା ଲ଼କୁ ପା଼ୟିତେସି; ଇଞ୍ଜାଁ, ଲ଼କୁ ଲା଼ଇ ନିଙ୍ଗାଲିଏ, ମେହ୍‌ଦୁ, ବାରେ ହା଼ତି ମାଡ଼୍‌ହା। 37 ଏଚେଟିଏ ଅସୁରତି ରାଜା ସନ୍‌ହେରିବ ହାଚେସି ଅ଼ଡ଼େ ୱେଣ୍ତା ହାଜାହାଁ ନିନିବିତା ବାସା କିତେସି। 38 ଏଚେଟିଏ ଏ଼ୱାସି ତାନି ନିସ୍ରକ ଇନି ପେ଼ନୁ ଇଲୁତା ପୂଜା କିନି ବେ଼ଲା ଅଦ୍ରମେଲକ୍‌ ଅ଼ଡ଼େ ସରେସ୍‌ଚର ଇନି ତାନି ରୀ ମୀର୍‌କା ଏ଼ୱାଣାଇଁ କାଣ୍ତା ତଲେ ପା଼ୟିତେରି। ଏଚେଟିଏ ଏ଼ୱାରି ଆରାରାଟ୍‌ ଦେ଼ସାତା ହଟେରି। ଇଞ୍ଜାଁ, ତାନି ମୀର୍‌ଏସି ଏସର୍‌ହଦନ୍‌ ତାନି ପା଼ଣାତା ରା଼ଜି କିତେସି।