କୂସ ଦେ଼ସା ତାକି ନ଼କିତା ଆ଼ନି ହା଼ଡା
1 କୂସ ଦେ଼ସାତି କାଡା ଆତାଲାୱାକି ଏ଼ନିକିଁ ଦେ଼ସା ମାନେ ଏମିନି ତା଼ଣା ପଟାତି ମା଼ରାୟାଁତି ହା଼ଡା ୱେ଼ଙ୍ଗିନେ। 2 ଏ଼ ସାମ୍ଦୁରି ଜିରୁତା ନା଼ଡାୟାଁ ତଲେ କେ଼ପିତି ଡଂଗତା ଏ଼ୟୁ ଲାକ କାବ୍ରୁ ହୀନାରାଇଁ ପାଣ୍ତାହାଁ ଏଲେଇନେସି, ଏ଼ ତବେ ହାନି କାବ୍ରୁ ହୀନାତେରି, ଏମିନି କୂଡ଼ାତି ଲ଼କୁ ପାଡାଆ଼ତାରି ଅ଼ଡ଼େ ଅପ୍ହାରି, ବା଼ଡ଼୍ୟୁଗାଟାରି ଅ଼ଡ଼େ ଜୀଣାଆ଼ନାରି ଅ଼ଡ଼େ ଆମ୍ବାଆରି ଦେ଼ସା କାଡାୟାଁ ତଲେ ବା଼ଗା ଆ଼ହାମାନେ, ଆମିନି ଗାଟାରାଇଁ ସା଼ରିୱାକି ଆଜିମାନେରି ଏ଼ୱାରି ତା଼ଣା ଈ କାବ୍ରୁ ଏପ୍ଦୁ।
3 ହେ଼ ଦାର୍ତିତା ବାସା କିହାମାନାତେରି ବାରେ, ଏଚେ଼ତା ହ଼ର୍କା ଲାକ ସିରେଲି ଗ଼ଞ୍ଜ୍ୱି ଆ଼ନିବେ଼ଲା, ଏ଼ଦାଆଁ ମେହ୍ଦୁ! ଅ଼ଡ଼େ ଏଚେ଼ତା କମୁ ଊକ୍ୱି ଆ଼ନେ, ଏଚିବେ଼ଲା ମୀରୁ ୱେଞ୍ଜୁ! 4 ଇଚିହିଁ ପ୍ରବୁ ମାଙ୍ଗେ ଇଲେକିଁ ଏଲେଇଞ୍ଜା ମାଞ୍ଜାନେସି, "କାରା ବେ଼ଲାତି ଉଜେଡ଼ିତି ଉସମି ଲେହେଁ, ଆର୍ନା ଦାନି କା଼ଲାତା ଉସମି ବେ଼ଲାତି ମାଚୁ ଆଣ୍ତିତି ହା଼ଗୁ ଲେହେଁ ନା଼ନୁ ସାପିଆ଼ଇଁ ଅ଼ଡ଼େ ଜାହାରା ବାସା ଟା଼ୟୁତା ମାଞ୍ଜାହାଁ ସିନିକିୟାଇଁ।" 5 ଇଚିହିଁ ଅଙ୍ଗୁରି କୂଡ଼ିକିନି ନ଼କେଏ ଏଚେ଼ତା ବ଼ଣ୍ତା ଦା଼ଲାମାନେ ଅ଼ଡ଼େ ଅଙ୍ଗୁରି ଜପୁ ଆ଼ହାଁ କାମ୍ବିନି ବେ଼ଲା, ଏ଼ୱାସି କ଼ଚାଡୱେଲି ଅ଼ହାଁ ଏମ୍ବାତି କା଼ର୍ଡାୟାଁ ଦା଼ଚା ତୁହ୍ନେସି ଅ଼ଡ଼େ ଏମ୍ବାତି ଅ଼ସାରା କମାୟାଁ ବାରେ ରାତ୍ହା ତୁହ୍ନେସି। 6 ଜୁଜୁକିନାରି ହା଼ତି ମାଡ଼୍ହାତି ଅ଼ଡ଼େ ହ଼ରୁତି ହେକତି ପଟାୟାଁ ଅ଼ଡ଼େ ଦାର୍ତିତି ଜ଼ନ୍ତୟାଁ ତାକି ମେତ୍ପି ଆ଼ନୁ; ହେକତି ପଟାୟାଁ କାରା କା଼ଲମିତା ତିନୁ ଅ଼ଡ଼େ ଦାର୍ତିତି ଜ଼ନ୍ତ ବାରେ ପେନି କା଼ଲାତା ତିନୁ।
7 ଏ଼ ବେ଼ଲାତା ବା଼ଡ଼୍ୟୁ ଗାଟାରି ଅ଼ଡ଼େ ଅ଼ଜିତାରି ଅ଼ଡ଼େ ତଲିଟିଏ ନୀଏଁ ପାତେକା ଆଜିହ଼ପେତି ର଼ କୂଡ଼ାତି ଲ଼କୁ; ଆମ୍ବାଆରି ଲା଼ଚିନେରି ଅ଼ଡ଼େ ପାଃଆନା ଡ଼଼ଇ ୱିହ୍ନେରି, ଆମିନି ଗାଟାରି ଦେ଼ସାତି କାଡାୟାଁ ବା଼ଗା, ଇଲେତି ର଼ ଲ଼କୁତି ମାନ୍ଦା ବା଼ଡ଼୍ୟୁଗାଟି ପ୍ରବୁତି ଦା଼ନା ଲେହେଁ ବା଼ଡ଼୍ୟୁଗାଟି ପ୍ରବୁତି ଦ଼ରୁଗାଟି ଟା଼ୟୁ ସିୟନ ହ଼ରୁତା ତାପିଆ଼ନେରି।
/images/a/b7d72741-6189-4a89-94c2-43952d9f2700)
/images/a/6c03efee-c76a-4ab8-fe2e-555683f90900)