1 ଜୀହୁଦା-ରାଜା ଉସିୟତି ତାଙ୍ଗା ମୀର୍‌ଏସି ଜତମ୍‌ତି ମୀର୍‌ଏସି ଆହସ୍‌ ବେ଼ଲାତା ଅରାମତି ରତ୍‌ସିନ ରାଜା ଅ଼ଡ଼େ ରମଲିୟତି ମୀର୍‌ଏସି ପେକହ ଦ଼ରୁତି ଇସ୍ରାୟେଲ ରାଜା ଜିରୁସାଲମ କ଼ପାଟି ଜୁଜୁ କିହାଲି ତାକି ଏମ୍ବାଆଁ ହାଚେସି; ସାମା ଏ଼ଦାଆଁ ହା଼ରୱି କିହାଲି ଆ଼ଡାଆତେସି।

2 ଏଚେଟିଏ ଦାୱୁଦ କୂଡ଼ାତି ପୁଣ୍‌ମ୍ବି କିୱିଆ଼ତେ, ଅରାମ ଇପ୍ରୟିମତି ସା଼ୟେମି ଆ଼ହା ମାନେସି। ଏଚେଟିଏ ଏ଼ୱାଣି ହିୟାଁ ଅ଼ଡ଼େ ତାନି ଲ଼କୁତି ହିୟାଁ ଗା଼ଲିତା ତୀର୍‌ଗିନି ଜା଼ଡ଼ା ମା଼ର୍‌କା ଲେହେଁ ତୀର୍‌ଗିତୁ।

3 ଏଚିବେ଼ଲା ପ୍ରବୁ ଜିସାୟଇଁ ଏଲେଇଚେସି, "ନୀନୁ ଅ଼ଡ଼େ ନୀ ମୀର୍‌ଏସି ସାର-ଜାସୁବ, ଦ଼ବା ବୂମିତି ରା଼ଜିତି ଜିରୁ ଲାକନି ବାନ୍ଦାତି ନା଼ଡ଼ା ମୁଣ୍ତିତା ଆହସ୍‌ ତଲେ କାତା ଆ଼ହାଲି ହାଲାମୁ। 4 ଅ଼ଡ଼େ ଏ଼ୱାଣାଇଁ ଏଲେଇନାମୁ, ‘ଜାଗ୍ରାତା ଅ଼ଡ଼େ ସୁସ୍ତି ଆ଼ମୁ; ଈ ବ଼ୟିଁଗାଟି ୱେଗୁତି ରୀ ଲେଂଗୁଣି, ଇଚିହିଁ, ରତ୍‌ସିନ, ଅରାମ ଅ଼ଡ଼େ ରମଲିୟତି ମୀର୍‌ଏଣା ହା଼ରେକା କାର୍‌ବି ତାକି ଆଜାଆନି, କି ଜାହାରା ହିୟାଁତି ନୀରାସା ଆ଼ହାଲି ହୀଆନି। 5 ଇଚିହିଁ ଅରାମ ଜିକେଏ ଇପ୍ରୟିମ ଅ଼ଡ଼େ ରମଲିୟତି ମୀର୍‌ଏସି ମୀ କ଼ପାଟି କୁଟୁ କାତା କିହାଁ ଏଲେଇଞ୍ଜି ମାନେରି। 6 ୱା଼ମୁ, ନୀନୁ ଜୀହୁଦା କ଼ପାଟି ହାଜାହାଁ ଏ଼ୱାଣାଇଁ କିଲିବିଲି କିମୁ ଅ଼ଡ଼େ ମା଼ ତାକି ଏ଼ ବିତ୍ରା ବା଼ଗା କିହାଁ ର଼ ରାଜାଇଁ, ଇଚିହିଁ, ଟାବେଲତି ମୀର୍‌ଏଣାଇଁ ରାଜା କିମୁ।’"

7 ପ୍ରବୁ, ମାହାପୂରୁ ଈ କାତା ଏଲେଇଞ୍ଜି ମାନେସି, "ଏ଼ଦି ତୀରି ଆ଼ଏ କି ପୂରା ଜିକେଏ ଆ଼ଏ। 8 ଇଚିହିଁ ଅରାମତି ତା଼ର୍ୟୁଁ ଦମେସକ ଅ଼ଡ଼େ ଦମେସକତି ତା଼ର୍ୟୁଁ ରତ୍‌ସିନ; ଇଞ୍ଜାଁ, ତୀନି କ଼ଡ଼ି ପା଼ସା ବାର୍ସା ବିତ୍ରା ଇପ୍ରୟିମ ଇଲେକିହିଁ ଗାଣ୍ତ୍ରା ଗାଣ୍ତ୍ରା ଆ଼ହିଁ ଡୀନେ, ଏ଼ଦି ଅ଼ଡ଼େ ର଼ କୂଡ଼ା ଆ଼ହାଁ ଡ଼ୟେଏ; 9 ଅ଼ଡ଼େ, ଇପ୍ରୟିମତି ତା଼ର୍ୟୁଁ ସମରିୟା ଅ଼ଡ଼େ ସମରିୟାତି ତା଼ର୍ୟୁଁ ରମଲିୟାତି ମୀର୍‌ଏସି। ମୀରୁ ନାମଅତେରି, ଆତିହିଁ ତୀରି ଆ଼ଅତେରି, ଈ କାତା ସାତା।"

10 ଏଚେଟିଏ ପ୍ରବୁ ଆହସ୍‌ଇଁ ଅ଼ଡ଼େ ଏଲେଇଚେସି, 11 "ନୀନୁ ପ୍ରବୁ ନୀ ମାହାପୂରୁଇଁ ର଼ ସିନା ରୀହ୍‌ମୁ; ଦାର୍‌ତିତା କି ଲାକପୂରୁ ଆ଼ପେ।"

12 ସାମା ଆହସ୍‌ ଏଲେଇଚେସି, "ନା଼ନୁ ରୀହ୍‌ଅଁ କି ପ୍ରବୁଇଁ ତାୟିପାରି କିଅଁ।"

13 ଏଚେଟିଏ ଏ଼ୱାସି ଏଲେଇଚେସି, "ଏ଼ ଦାୱୁଦତି କୂଡ଼ା, ମୀରୁ ନୀଏଁ ୱେଞ୍ଜୁ; ମାଣ୍‌ସିତି ସା଼ସା ତାୟିପାରି କିନାଣି ମୀ ତାକି ଊଣା କାତା ଇଞ୍ଜିଁ କି ମୀରୁ ନା଼ ମାହାପୂରୁତି ସା଼ସା ଜିକେଏ ତାୟିପାରି କିଦେରି ? 14 ଏ଼ଦାଆଁତାକି ପ୍ରବୁ ତା଼ନୁଏ ମିଙ୍ଗେ ର଼ ସିନା ହିୟାନେସି; ମେହ୍‌ଦୁ, ର଼ ଡ଼ାଆ ମା଼ଙ୍ଗା ପୂରାମା଼ସା ଆ଼ହାଁ ର଼ ମୀର୍‌ଏଣାଇଁ ଜାର୍ନି କିନେ ଅ଼ଡ଼େ ତାନି ଦ଼ରୁ ‘ଇମାନୁୟେଲ’ ଇଚିହିଁ ମା଼ ତଲେ ମାହାପୂରୁ ଇଟିଦେରି।

15 ଲାଗେଏତାଣି ପିସାଲି ଅ଼ଡ଼େ ନେହାଣି ଆ଼ଚାଲି ପୁନି ବେ଼ଲାତା ଏ଼ୱାସି ଦ଼ୟି ଅ଼ଡ଼େ କିର୍‌ୟାଁ ତିନେସି। 16 ଇଚିହିଁ କକାସି ଲାଗେଏତାଣି ପିସାଲି ଅ଼ଡ଼େ ନେହାଣି ଆ଼ଚାଲି ପୁନି ନ଼କେଏ ଏମିନି ଦେ଼ସାତି ରୀ ରାଜାୟାଁଇଁ ନୀନୁ ଅ଼ପିହିଲଅତି, ଏ଼ ଦେ଼ସା ଲ଼କୁ ହିଲାଆଗାଟାୟି ଆ଼ନେ। 17 ଇପ୍ରୟିମ ଜୀହୁଦା ତା଼ଣାଟି ଏଟ୍‌କା ଆ଼ନି ଦିନାଟିଏ ଏ଼ନିଲେହେଁତି ଦିନା ଏଚେଲା ଆ଼ହା ହିଲେଏ, ଏଲେତି ଦିନା ପ୍ରବୁ ମୀ ତାକି ଅ଼ଡ଼େ ମୀ ଲ଼କୁ ତାକି ଅ଼ଡ଼େ ମୀ ଆକୁ ଆ଼ବାୟାଁ କୂଡ଼ା ତାକି କିନେସି; ଇଚିହିଁ, ଅସୁରତି ରାଜାଇଁ ତାନେସି।"

18 ଇଞ୍ଜାଁ, ଏ଼ ଦିନା ପ୍ରବୁ ମିସର ଦେ଼ସାତି କାଡା ଦାରିତି ୱୀହାଁୟାଁ ଅ଼ଡ଼େ ଅସୁର ଦେ଼ସାତି କିର୍‌ୟାଁ ୱୀହାଁୟାଁଣି ୱାଞ୍ଜୁ ଊକାହାଁ ହା଼ଟିନେସି। 19 ଏଚେଟିଏ ଏ଼ୱି ବାରେ ୱା଼ହାଁ ଊଣା ହ଼ର୍‌କାଣା ଅ଼ଡ଼େ କଟାୟାଁ ପାରୁତା ଅ଼ଡ଼େ ହା଼ପ୍‌କା ଜା଼ଡ଼ାତା ଅ଼ଡ଼େ ମେୟିଁନି ବୂମିତା କୁଗିନୁ।

20 ଏ଼ ଦିନା ପ୍ରବୁ ପରାତ୍‌ କାଡା ଆତାଲା ୱାକିତି ବା଼ଡ଼ାଗାଟି ହିଣ୍‌ନାଣି ତଲେ ଇଚିହିଁ, ଅସୁରତି ରାଜା ତା଼ଣାଟି ତା଼ର୍ୟୁଁ ଅ଼ଡ଼େ ଆଙ୍ଗାତି ବା଼ଣାୟାଁ ହିଣ୍‌ନେସି ଅ଼ଡ଼େ ଏ଼ଦାନି ତଲେ ହ଼ଡ଼ାୟାଁ ଜିକେଏ ନସ୍ତ ଆ଼ନୁ।

21 ଏ଼ ଦିନା ଆମ୍ବାଆସି ର଼ ଅ଼ସ୍‌ରି କ଼ଡି ଅ଼ଡ଼େ ରୀ ମେ଼ଣ୍ତାୟାଁ ପ଼ହି କିତିସାରେ, 22 ଏ଼ୱାସିକା ପା଼ଲୁ ହା଼ରେକା ତାକି ଏ଼ୱାସି ଦ଼ୟି ତିନେସି; ଇଚିହିଁ ଦେ଼ସା ବିତ୍ରା ବାରେ ଲ଼କୁ ଦ଼ୟି ଅ଼ଡ଼େ କିର୍‌ୟାଁ ତିନେରି।

23 "ଅ଼ଡ଼େ, ଏମିନି ଏମିନି ଟା଼ୟୁତା ର଼ ମା଼ଣା ୱେଣ୍ତି ଟାକାୟାଁ ଦାରାତି ଅଙ୍ଗୁରି ମା଼ଡ଼ା ମାଚେ, ଏ଼ ଦିନା ଏ଼ ବାରେ ଟା଼ୟୁତା ଅଣ୍‌ଙ୍ଗ ଅ଼ଡ଼େ ହା଼ପ୍‌କା ମା଼ର୍‌କା ଆ଼ନୁ। 24 ଇଞ୍ଜାଁ, ବାରେ ଦେ଼ସା ଅଣ୍‌ଙ୍ଗ ଅ଼ଡ଼େ ହା଼ପ୍‌କା ମା଼ର୍‌କା ଆ଼ତାକି ଲ଼କୁ ଆପ୍‌କା ୱେଲ୍‌କା ଆସାହାଁ ଏ଼ ଟା଼ୟୁତା ହାନେରି। 25 ଅ଼ଡ଼େ, ଏମିନି ବାରେ ହ଼ର୍‌କା କଡ଼୍‌ଗି ତଲେ କା଼ର୍‌ୱି ଆ଼ହା ମାଚୁ, ମୀରୁ ଅଣ୍‌ଙ୍ଗ ଅ଼ଡ଼େ ହା଼ପ୍‌କା ଜା଼ଡ଼ାତି ଆଜି ତାକି ଏ଼ ଟା଼ୟୁତା ଆମ୍ବାଆତେରି ହାଲଅତେରି, ସାମା ଏ଼ଦି କ଼ଡିୟାଁ ମେୟିଁନି ଟା଼ୟୁ ଅ଼ଡ଼େ ମେ଼ଣ୍ତାୟାଁ ପାଃଆନା ଡ଼଼ଇ ୱିହ୍‌ନି ଟା଼ୟୁ ଆ଼ନେ।"