1 ଆମସତି ମୀର୍‌ଏସି ଜିସାୟତି ସେୟାଁଣା ହାପାନା ମେହ୍‌ନାୟି, ଏ଼ୱାସି ଜୀହୁଦା ରାଜାୟାଁ ଉସିୟ, ଜତମ୍‌, ଆହସ୍‌ ଅ଼ଡ଼େ ହିଜକିୟ ସା଼ଲୱି କିନି ବେ଼ଲାତା ଜୀହୁଦା ଅ଼ଡ଼େ ଜିରୁସାଲମ ତାକି ଈ ସେୟାଁଣା ହାପାନା ମେସ୍ତେସି।

2 ଏ଼ ହା଼ଗୁପା଼କା ୱେନାମୁ, ଏ଼ ଦାର୍‌ତି କିର୍ୟୁଁ ଅଡାମୁ, ଇଚିହିଁ ପ୍ରବୁ ଏଲେ ଇଞ୍ଜିମାନେସି, "ନା଼ନୁ କକାରି ପ଼ଦାୟାଁଣି ପ଼ହିପାଡି କିହାମାଇଁ, ସାମା ଏ଼ୱାରି ନା଼ କ଼ପାଟି ନିଙ୍ଗାମାନେରି। 3 କ଼ଡି ତାନି ସା଼ୱୁକାରିଇଁ ଅ଼ଡ଼େ ଗା଼ଡ଼୍‌ଦେ ତାନି ସା଼ୱୁକାରି ଦ଼ନିତି ପୁନେ; ସାମା ଇସ୍ରାୟେଲ ଲ଼କୁ ପୁନଅରି, ନା଼ ଲ଼କୁ ଅଣ୍‌ପଅରି।"

4 ଆଡ଼େ ପା଼ପୁତି କୂଡ଼ା, ଲାଗେଏତି ଦାର୍ମୁତା ବ଼ଜୁଗାଟି ଲ଼କୁ, ଲାଗେଏ କାମା କିନି କୂଡ଼ା, ନା଼ଡ଼ିକିୱି ଆ଼ହାମାନି ମୀର୍‌କା! ଏ଼ୱାରି ପ୍ରବୁଇଁ ପିସା ମାନେରି, ଏ଼ୱାରି ଇସ୍ରାୟେଲତି ଦାର୍ମୁତି ମା଼ନୱି ଆ଼ହାହିଲଅରି, ଏ଼ୱାରି ୱେଣ୍ତାହାଁ ଡା଼ୟୁ ହାଜା ମାନେରି। 5 ମୀରୁ ଏ଼ନାଆଁତାକି ଗଡ଼୍‌ହା କିହାଲି ହା଼ରେକା ମା଼ଡା ବେଟାଆ଼ଦେରି ? ମୀ ତା଼ର୍ୟୁଁ ବାରେ ଗା଼ହାଁ ଆ଼ହାମାନେ ଅ଼ଡ଼େ ମୀ ହିୟାଁ ବା଼ଡ଼୍‌ୟୁ ହିଲାଆଗାଟାୟି ଆ଼ହାମାନେ। 6 ପାଃଆନାଟିଏ ତା଼ର୍ୟୁଁ ପାତେକା ଇଚାୟି ନେହିଁ ଆଙ୍ଗା ହିଲେଏ; ୱାର୍‌ଇ ଗା଼ହାଁୟାଁ ସିନା, ଅ଼ଡ଼େ ସୀୱେଁସି ଗା଼ହାଁ; ଏ଼ ବାରେ ନର୍‌ହାଁ ଦସ୍‌ପି ଆ଼ହାହିଲାଉ, କି ନିୟୁଁ ରୁବାହାଁ କ଼ଡ଼୍‌ଗି କିୱି ଆ଼ହାହିଲେଏ।

7 ମୀ ଦେ଼ସା ନା଼ସାଆ଼ନି ଟା଼ୟୁ; ମୀ ଗା଼ଡ଼ା ବାରେ ହିଚୁତା ୱେତାୟି; ମୀ ବୂମି ଏଟ୍‌କା ଦେ଼ସାତାରି ମୀ ନ଼କିତା ମୀଞ୍ଜାନେରି, ଏ଼ଦି ଏଟ୍‌କା ଦେ଼ସାତାରି ତା଼ଣାଟି ନା଼ସା ଆ଼ନି ଲେହେଁ ନା଼ସା ଟା଼ୟୁ ଆ଼ହାମାନେ। 8 ଇଞ୍ଜାଁ, ସିୟନ ଲ଼କୁତି ଅଙ୍ଗୁରି ବା଼ଡ଼ାତି ଗୂଡ଼ା, ମୁଣ୍ତ୍ରା ବା଼ଡ଼ାତି ବାସାଟା଼ୟୁ, ସୁଣ୍ତିତି ଗା଼ଡ଼ା ଲେହେଁ ଆ଼ହାଁ ଡ଼ୟାମାନେ। 9 ବା଼ଡ଼୍‌ୟୁଗାଟି ପ୍ରବୁ ମା଼ ତାକି ଏଚରଜା଼ଣା ଲ଼କୁଣି ବା଼କି ପିସାହିଲାଆତିହିଁ, ମା଼ର ସଦମ ଲେହେଁ ଆ଼ତାୟିମା, ମା଼ର ହମରା ଲେହେଁ ଆ଼ତାୟିମା।

10 ଏ଼ ସଦମତି ସା଼ଲୱି କିନାତେରି, ପ୍ରବୁତି ବ଼ଲୁ ୱେଞ୍ଜୁ, ଏ଼ ହମରାତି ଲ଼କୁ, ମୀରୁ ମା଼ ମାହାପୂରୁତି ମେ଼ରାତା କିର୍ୟୁଁ ଅଡାଦୁ। 11 ପ୍ରବୁ ଏଲେଇଞ୍ଜି ମାନେସି, "ନା଼ ତାକି ମୀ ହା଼ରେକା ପୂଜା ହୀନାୟି ଏ଼ନାୟି ? ନା଼ନୁ ମେ଼ଣ୍ତାୟାଁ ହୂଡିନି ପୂଜାତା ଅ଼ଡ଼େ ଆଙ୍ଗା ଆ଼ତି ଜ଼ନ୍ତତି କଡ଼୍‌ୱାତା ନେଞ୍ଜାମାଇଁ; ଇଞ୍ଜାଁ, କ଼ଡି କି ଗରି କି ମେ଼ଣ୍ତାୟାଁ ନେତେରିତା ନା଼ ରା଼ହାଁ ହିଲେଏ। 12 ମୀରୁ ନା଼ ନ଼କିତା ୱା଼ନି ବେ଼ଲା ନା଼ ଆଂଗେଣିକା ବାରେ ପାଃଆନା ଡ଼଼ଇ ୱିସାଲି ଆମ୍ବାଆସି ମୀ ତା଼ଣାଟି ଅଣ୍‌ପାମାନେସି ? 13 ଉଜେଏତି ଦା଼ନା ଅ଼ଡ଼େ ତାଆଦୁ; ଦୁପ୍‌ଣି ହୂଡିନାଣି ନା଼ନୁ ଅ଼ପଅଁ, ମୀ ଲେ଼ଞ୍ଜୁତି କ଼ଡ଼୍‌ଗି ଲେ଼ଞ୍ଜୁ ଅ଼ଡ଼େ ଜ଼ମିନି ଦିନା, କୁଟମି କୁଗାଲି ୱେ଼କ୍‌ନାୟି ନାଙ୍ଗେ ତାକି ଲାଗେଏ ଅ଼ଡ଼େ କୁଟମି କୂଡ଼ା ଆ଼ନାଣି ତଲେ ଉଜେଏତି କାମା କିନାଣି ନା଼ନୁ ଅ଼ର୍‌ହାଲି ଆ଼ଡଅଁ। 14 ନା଼ ଜୀୱୁ ମୀ ଲେ଼ଞ୍ଜୁତି କା଼ଡ଼କି ଅ଼ଡ଼େ ତୀରି କିହାମାନି ପାର୍ବୁ ବାରେ ଅ଼ପେଏ; ଏ଼ୱି ବାରେ ନା଼ ତାକି ବା଼ଦା ଗାଟାଇ; ଏ଼ ବାରେ ଅ଼ର୍‌ହାଲି ନା଼ନୁ ବା଼ଡ଼୍‌ଚାମାଇଁ।

15 ମୀରୁ କେସ୍କା ପେର୍‌ହାଁ ହା଼ଟାନାଟି, ନା଼ନୁ ମୀ ତା଼ଣାଟି ନା଼ କାଣ୍‌କା ପଜାକଡିିଇଁ; ଅ଼ଡ଼େ ମୀରୁ ହା଼ରେକା ପ୍ରା଼ତାନା କିନାଟି ନା଼ନୁ ୱେଞ୍ଜଅଁ। ଇଚିହିଁ ମୀ କେସ୍କା ନେତେରି ତଲେ ନେଞ୍ଜାମାନୁ। 16 ମୀରୁ ଜାହାରାଇଁ ନର୍‌ହା କଡାଦୁ, ଜାହାରାଇଁ ସୁଦୁ କିଦୁ; ନା଼ ନ଼କିଟି ମୀ କାମାତି ଲାଗେଏତାଣି ହେକ କିଦୁ; ଲାଗେଏତି କାମା କିହାଲି ପିହ୍‌ଦୁ; 17 ନେହିଁ କାମା କିହାଲି ଜା଼ପାଦୁ; ନେହିଁ ବିଚାରା କିହାଲି ଅଣ୍‌ପାଦୁ, ସା଼ୟେମି ହିଲାଆ ଲ଼କୁଣି ସା଼ୟେମି କିଦୁ, ତାଲି ତାଞ୍ଜି ହିଲାଆଗାଟି ଲ଼କୁଣି ନେହିଁ ବିଚାରା କିଦୁ, ରା଼ଣ୍ତେଣିସିକା ୱାକିଟି କାତା ଜ଼ଲାଦୁ।"

18 ପ୍ରବୁ ଏଲେଇଞ୍ଜି ମାନେସି, "ୱା଼ଦୁ, ମା଼ର ୱେସ୍‌ପି ଆ଼ନ; ମୀ ପା଼ପୁ ବାରେ କିର୍‌ଙ୍ଗୁ ୱା଼ଣା ଲେହେଁ ଆ଼ତିହିଁ ଜିକେଏ ପେଣ୍ତି ଲେହେଁ ଦବ୍‌ଲା ଆ଼ନେ; ଏ଼ ବାରେ ଗାଦ୍‌ଗା ଲେହେଁ ଆ଼ତିହିଁ ଜିକେଏ ଦବ୍‌ଲା ମେ଼ଣ୍ତା ବା଼ଣାୟାଁ ଲେହେଁ ଆ଼ନେ। 19 ମୀରୁ ରା଼ଜି ଆ଼ହାଁ କାତା ମା଼ନୱି ଆ଼ତିସାରେ, ଦେ଼ସାତି ନେହିଁ ଦିଣ୍‌ସୁ ବେଟାଆ଼ଦେରି। 20 ସାମା ମୀରୁ ରା଼ଜି ଆ଼ଆନା ଅ଼ଡ଼େ ନା଼ କ଼ପାଟି ତା଼କିସାରେ, ଆତିହିଁ କାଣ୍ତା ତଲେ ପା଼ୟ୍‌ୱି ଆ଼ଦେରି; ଇଚିହିଁ ପ୍ରବୁତି ଗୂତି ଈ କାତା ଏଲେଇଞ୍ଜାମାନେ।"

21 ମା଼ନିଗାଟି ଗା଼ଡ଼ା ଏ଼ନିକିଁ ଦା଼ରେଣି ଆ଼ହାମାନେ! ଏ଼ଦି ନୀହାଁୟି ତଲେ ନେଞ୍ଜାମାଚେ। ଦାର୍ମୁ ଏ଼ଦାନି ତା଼ଣା ବାସା କିତେ, ସାମା ନୀଏଁ ପା଼ୟିନାରି ମାନେରି। 22 ମୀ ୱେଣ୍ତି କିଟସି ଉର୍‌ହାମାନେ, ମୀ ଅଙ୍ଗୁରି ରାସାତା ଏ଼ୟୁ ଆଣ୍ତାମାନୁ। 23 ମୀ ସା଼ଲୱି କିନାରି ଗଡ଼୍‌ହା ଗାଟାରି ଅ଼ଡ଼େ ସ଼ର୍‌କାତି ତ଼ଡ଼ୁ; ବାରେ ଲା଼ଞ୍ଚାତି ଜୀୱୁ ନ଼ନେରି ଅ଼ଡ଼େ ଦ଼ନତି ଜେ଼ଚ ହାନେରି; ଏ଼ୱାରି ତାଲି ତାଞ୍ଜି ହିଲାଆଗାଟି ଲ଼କୁତି ବିଚାରା କିଅରି, କି ରା଼ଣ୍ତେଣିନି ଗ଼ହାରା ତାମି ତା଼ଣା ୱା଼ଏ।

24 ଏ଼ଦାଆଁତାକି ପ୍ରବୁ, ବା଼ଡ଼୍‌ୟୁଗାଟି ପ୍ରବୁ, ଇସ୍ରାୟେଲତି ବା଼ଡ଼୍‌ୟୁ ହୀନାସି ଏଲେଇଞ୍ଜି ମାନେସି, ୱେଞ୍ଜୁ, "ନା଼ନୁ ନା଼ ସାତ୍ରୁୟାଁଣି ବାଦୁଲି ଅ଼ଇଁ ମୀମ୍ବୁ ଅ଼ଡ଼େ ନାଙ୍ଗେ କିଲିବିଲି କିହାଲି ଆ଼ଡଅତେରି। 25 ଇଞ୍ଜାଁ, ନା଼ନୁ ମୀ ୱାକି ନା଼ କେୟୁ ଦା଼ସାହାଁ ମୀ ମା଼ଚି ବାରେ ନର୍‌ଇଁ ଅ଼ଡ଼େ ମୀ ଲାଗେଏତାଣି ବାରେ କୁତ୍‌ହା ଅ଼ଇଁ; 26 ଅ଼ଡ଼େ, ନା଼ନୁ ତଲିକା଼ଲାତି ଲେହେଁ ମୀ ସା଼ଲୱି କିନାରାଇଁ ଅ଼ଡ଼େ ମୂଲୁ ବେ଼ଲାତି ଲେହେଁ ମୀ ମନ୍ତ୍ରିୟାଁଣି ୱେଣ୍ତେ ତୀରି କିଇଁ; ଏଚେଟିଏ ନୀନୁ ଦାର୍ମୁ ଅ଼ଡ଼େ ମା଼ନିଗାଟି ଗା଼ଡ଼ା ଇଞ୍ଜିଁ ୱେ଼ଙ୍ଗିଦି।"

27 ସିୟନ ନେହିଁ ବିଚାରା ତଲେ ଅ଼ଡ଼େ ତାନି ତା଼ଣା ୱେଣ୍ତା ୱା଼ନି ଲ଼କୁ ଦାର୍ମୁଟି ଗେଲ୍‌ପି ଆ଼ନେରି। 28 ସାମା ଲାଗେଏତାରି ଅ଼ଡ଼େ ପା଼ପୁ ଗାଟାରି ରହେଁଏ ନା଼ସା ଆ଼ନେରି ଅ଼ଡ଼େ ଏମିନି ଗାଟାରି ପ୍ରବୁଇଁ ପିହ୍‌ନେରି, ଏ଼ୱାରାଇଁ ନା଼ସା କିନେସି।

29 ଇଚିହିଁ ଏ଼ୱାରି ତାମି ପ୍ଣାଃଇ ଆ଼ଟ୍‌ୱା ଅଲନ୍‌ ମା଼ର୍‌ନୁ କାତାତାକି ଲାଜା ଆ଼ନେରି, ଇଞ୍ଜାଁ ମୀରୁ ମୀ ବାରେ ଆ଼ଚାମାନି ବା଼ଡ଼ା ତାକି ନୀରାସା ଆ଼ଦେରି। 30 ଏ଼ନିଇଚିହିଁ ମୀରୁ ୱା଼ୟିତି ଆ଼କୁ ପ୍ଣାଃଇ ଆ଼ଟ୍‌ୱା ଅଲନ୍‌ ମା଼ର୍‌ନୁ ଅ଼ଡ଼େ ଏ଼ୟୁ ହିଲାଆ ବା଼ଡ଼ା ଲେହେଁ ଆ଼ଦେରି। 31 ଇଞ୍ଜାଁ, ବା଼ଡ଼୍‌ୟୁଗାଟି ଲ଼କୁ ୱା଼ୟିତି ନା଼ଡା ଲେହେଁ ଅ଼ଡ଼େ ତାନି କାମା ହିଚୁପୁୟାଁ ଲେହେଁ ଆ଼ନେ; ଏ଼ ରିଣ୍ତି ରହେଁଏ ଡ଼ୀଞ୍ଜିନୁ ଅ଼ଡ଼େ ଆମ୍ବାଆସି ଏ଼ଦାଆଁ ଡୁପ୍‌ଅସି।