1 "ଆ଼ତିଜିକେଏ ଏ଼ ନା଼ ହ଼ଲେଏଣା ଜାକୁବ

ଅ଼ଡ଼େ ନା଼ ଆ଼ଚାମାନି ଇସ୍ରାୟେଲ, ନୀଏଁ ୱେନାମୁ;

2 ଆମ୍ବାଆସି ନିଙ୍ଗେ ରାଚି କିୟାତେସି

ଅ଼ଡ଼େ ଗାର୍‌ବାଣା ମାଚାଟି ନିଙ୍ଗେ କେ଼ପାତେସି,

ଆମ୍ବାଆସି ନିଙ୍ଗେ ସା଼ୟେମି କିୟାନେସି,

ଏ଼ ପ୍ରବୁ ଈ କାତା ଏଲେଇଞ୍ଜି ମାନେସି;

ହେ଼ ନା଼ ହ଼ଲେଏଣା ଜାକୁବ,

ଏ଼ ନା଼ ଆ଼ଚାମାନି ଜିସୁରୁଣ*44:2 ଜିସୁରୁଣ, ଇଚିହିଁ ଇସ୍ରାୟେଲ ଆଜାଆନି।

3 ଇଚିହିଁ ନା଼ନୁ ଏ଼ସ୍‌କି ବୂମି ଲାକ ଏ଼ୟୁ

ଅ଼ଡ଼େ ୱା଼ୟିତି ବୂମି ଲାକ ଏ଼ୟୁତି ଜାର୍‌ଣା କିଇଁ;

ନା଼ନୁ ନୀ କୂଲୁ ଲାକ ନା଼ ଜୀୱୁ

ଅ଼ଡ଼େ ମୀ ମୀର୍‌କା ମା଼ସ୍‌କା ଲାକ ନା଼ ବ଼ର ୱା଼କ୍‌ଇଁ;

4 ଏଚେଟିଏ ଏ଼ୱାରି ଏ଼ୟୁ ଜାର୍‌ଣା ଟଟତି ବାଇସି ମା଼ର୍‌ନୁ ଲେହେଁ

ଜା଼ଡ଼ା ବିତ୍ରାଟି ପାଡା ଆ଼ନେରି।

5 ରଅସି, ଏଲେଇନେସି, ‘ମା଼ମ୍ବୁ ପ୍ରବୁତି ଲ଼କୁତମି;’

ଅ଼ଡ଼େ ରଅସି ଜାକୁବ ଦ଼ରୁଟି ଜାହାରାଇଁ ୱେ଼ଙ୍ଗି କିନେସି;

ଅ଼ଡ଼େ ରଅସି ପ୍ରବୁତି କ଼ସମି ଜାହାରା କେୟୁ ତଲେ ସନ୍ତକି କିନେସି

ଅ଼ଡ଼େ ଇସ୍ରାୟେଲ କୂଲୁ ଦ଼ରୁଟି ଜାହାରାଇଁ ୱେ଼ଙ୍ଗି କିନେସି।"

6 ପ୍ରବୁ, ଇସ୍ରାୟେଲତି ରାଜା

ଅ଼ଡ଼େ ତାନି ଗେଲ୍‌ପିନି ବା଼ଡ଼୍‌ୟୁଗାଟି ପ୍ରବୁ ଈ କାତା ଏଲେଇନେସି;

"ନା଼ନୁ ମା଼ଟ୍‌ନାତେଏଁ ଅ଼ଡ଼େ ରା଼ପ୍‌ନାତେଏଁ,

ଇଞ୍ଜାଁ ନା଼ ପିସ୍‌ପେ ମାହାପୂରୁ ଅ଼ଡ଼େ ହିଲଅସି।

7 ନା଼ନୁ ଏ଼ ତଲି କା଼ଲାତି ଲ଼କୁଣି ତୀରି କିତି ବେ଼ଲାଟିଏ ନା଼ ଲେହେଁ ଆମ୍ବାଆସି ହା଼ଟିନେସି

ଅ଼ଡ଼େ ଏ଼ଦାଆଁ ତ଼ହ୍‌ନେସି ଅ଼ଡ଼େ ଦା଼ଡ଼ି ତଲେ ଏ଼ଦାଆଁ ଇଟିନେସି ?

ଇଞ୍ଜାଁ ଏ଼ନା ଏ଼ନାୟି ଡାଗେତାୟି ଅ଼ଡ଼େ ଏ଼ନା ଏ଼ନାୟି ଗଟୱି ଆ଼ନେ

ଏ଼ଦାଆଁ ଏ଼ୱାରି ୱେସ୍‌ପାରି।

8 ମୀରୁ ତୀର୍‌ଗିହିଁ ଆଜାଆଦୁ;

ନା଼ନୁ ଏ଼ନାଆଁ ତଲି କା଼ଲାଟିଏ ମୀ ତା଼ଣା ତ଼ସାମାଞ୍ଜଅଁ ଅ଼ଡ଼େ ମିଙ୍ଗେ ଏ଼ଦାଆଁ ୱେସାମାଞ୍ଜଅଁ ?

ମୀରୁ ନା଼ ସା଼କି। ନା଼ ପିସ୍‌ପେ କି ଅ଼ଡ଼େ ମାହାପୂରୁ ମାନେସି ?

ନା଼ ପିସ୍‌ପେ ଏଟ୍‌କାତି ପେ଼ନୁ ହିଲେଏ;

ନା଼ନୁ ଅ଼ଡ଼େ ଆମ୍ବାଆରାଇଁ ପୁନଅଁ।"

9 ଆମ୍ବାଆରି ଇର୍‌ଆତି ପୂତ୍‌ଲା କେ଼ପିନେରି, ଏ଼ୱାରି ବାରେ ଉଜେଏ ଅ଼ଡ଼େ ତାମି ରା଼ହାଁତି କାତା ଲା଼ବା ଆ଼ଏ; ଏ଼ୱାରି ଏ଼ନିକିଁ ଲାଜା ଆ଼ନେରି, ଏ଼ଦାଆଁତାକି ତାମି ଜାହାରା ସା଼କିୟାଁ ମେହ୍‌ଅରି, କି ପୁନଅରି। 10 ଏମିନାୟି ଏ଼ନି କାତାତା ଲା଼ବା ଆ଼ଏ, ଇଲେତି ପେ଼ନୁ ଆମ୍ବାଆସି କେ଼ପାମାନେସି, ଆ଼ଆତି ଇର୍‌ଆତି ପୂତ୍‌ଲା ଆମ୍ବାଆସି ଗାରାତା ମେତ୍‌ହା ମାନେସି ? 11 ମେହ୍‌ଦୁ, ତାନି ସେ଼ବା କିନାରି ବାରେ ଲାଜା ଆ଼ନେରି; ଇଞ୍ଜାଁ, କେ଼ପିନାରି ମାଣ୍‌ସିୟାଁ; ଏ଼ ବାରେ ଜା଼ଣା ରଣ୍ତିଏ ଆ଼ହାଁ ନିପାରି; ଏ଼ୱାରି ତୀର୍‌ଗିନେରି, ଏ଼ୱାରି ରହେଁଏ ଲାଜା ଆ଼ନେରି। 12 କାମ୍ବ୍ରେଃଏସି ଲ଼ହତି ଆ଼ସ୍ତି କେ଼ପାହାଁ ହିଚୁଗାଟି ରୀଙ୍ଗା ତଲେ କାମା କିନେସି ଅ଼ଡ଼େ ମୂତ୍‌ଲା ତଲେ ଏ଼ଦାଆଁ କଲ୍‌ହାଁ ଜାହାରା ବା଼ଡ଼୍‌ୟୁତି ବାହା ତଲେ ଏ଼ଦାନି କେ଼ପିନେସି; ହାଅ, ଏ଼ୱାସି ହାକି ଆ଼ନେସି ଅ଼ଡ଼େ ଏ଼ୱାଣି ବା଼ଡ଼୍‌ୟୁ ଊଣା ଆ଼ନେ, ଏ଼ୱାସି ଏ଼ୟୁ ଗହ୍‌ଆନା ୱା଼ହିନେସି।

13 ବାଡିୟା ଲୂଲୁ ଆସାହାଁ ଦା଼ହ୍‌ନେସି; ଏ଼ୱାସି ମା଼ଞ୍ଜେଣି ତଲେ ସିନା କିନେସି, ଏ଼ୱାସି ରା଼ନ୍ଦା ୱେ଼ଚାହାଁ ଲା଼ଚିନାଣି ତଲେ ମ଼ନ କିତି ସିନାୟାଁ କିନେସି ଅ଼ଡ଼େ ଇଲୁତା ବାସା କିହାଲି ମାଣ୍‌ସିତି ଅ଼ଜୁ ଅ଼ଡ଼େ ହା଼ରେକା ୱା଼ଣା ତଲେ ଏ଼ଦାଆଁ କେ଼ପିନେସି। 14 ଏ଼ୱାସି ତାଙ୍ଗେ ତାକି ଏରସ ମା଼ର୍‌ନୁ ଦା଼ଃଆନେସି, ତର୍ସା ଅ଼ଡ଼େ ଅଲନ୍‌ ମା଼ର୍‌ନୁ ଅ଼ନେସି, ଏ଼ୱାସି ଜା଼ଡ଼ାତି ମା଼ର୍‌ନୁ ବିତ୍ରାଟି ର଼ ମା଼ର୍‌ନୁ ପ଼ହି କିନେସି; ଏ଼ୱାସି ଦେବଦାରୁ ମା଼ର୍‌ନୁ ଉହିନେସି ଅ଼ଡ଼େ ପିୟୁ ଏ଼ଦାଣି ପାଡିକିନେ। 15 ଏଚେଟିଏ ଏ଼ଦି ମାଣ୍‌ସିତି ହୂଡିନି ୱେଗୁ ଆ଼ନେ; ଏ଼ୱାସି ଏମ୍ବାଟି କଚେକା ଅ଼ହାଁ ହିଚୁ କେର୍‌ଞ୍ଜିନେସି; ଅ଼ଡ଼େ ଏ଼ୱାସି ଏ଼ୱାଆଁ ହୂଡାହାଁ ରା଼ନ୍ଦା ୱାଜିନେସି; ଅ଼ଡ଼େ ର଼ ବମା କିହାଁ ଏ଼ଦାଣି ପୂଜା କିନେସି; ଏ଼ୱାସି ର଼ ତୀର୍‌ସିତି ବମା କିହାଁ ଏ଼ଦାଣି ନ଼କିତା ମେଣ୍ତା କୁତିନେସି। 16 ଏ଼ୱାସି ଏମ୍ବାତି ର଼ ବା଼ଗା ହିଚୁତା ହୂଡିନେସି; ଅ଼ର ବା଼ଗାତା ଏ଼ୱାସି ଊଙ୍ଗା ୱାଜାହାଁ ତିନେସି ଅ଼ଡ଼େ ଊଙ୍ଗା ହୂଡି କିହାଁ ରା଼ହାଁ କିନେସି, ଅ଼ଡ଼େ ଏ଼ୱାସି ହିଚୁ କେର୍‌ଞ୍ଜାହାଁ ଏଲେଇନେସି, ହା଼ୟି, ନା଼ନୁ ଉସମି ଆ଼ତେଏଁ. ଅ଼ଡ଼େ ନା଼ନୁ ହିଚୁ ମେସ୍ତେଏଁ। 17 ଇଞ୍ଜାଁ ଏ଼ୱାସି ଏମ୍ବାତି ମାନି ୱେଗୁ ତଲେ ର଼ ପେ଼ନୁ ଅ଼ଡ଼େ ତୀର୍‌ସିତି ବମା ତିୟାରା କିନେସି; ଏ଼ୱାସି ଏ଼ଦାଣି ନ଼କିତା ମେଣ୍ତା କୁତାହାଁ ପୂଜା କିନେସି ଅ଼ଡ଼େ ଏ଼ଦାଣି ନ଼କିତା ପ୍ରା଼ତାନା କିହାଁ ଏଲେଇନେସି, "ନାଙ୍ଗେ ଗେଲ୍‌ପାମୁ, ନୀନୁ ନା଼ ପେ଼ନୁତି।"

18 ଏ଼ୱାରି ପୁନଅରି, କି ଅଣ୍‌ପଅରି, ଇଚିହିଁ ଏ଼ୱାରି ଏ଼ନିକିଁ ମେସାଲି ଆ଼ଡଅରି, ଏ଼ଦାଆଁତାକି ଏ଼ୱାରି କାଣ୍‌କା ଅ଼ଡ଼େ ଏ଼ୱାରି ଏ଼ନିକିଁ ତେଲ୍‌ହାଲି ଆ଼ଡଅରି ଏ଼ଦାଆଁତାକି ଏ଼ୱାରି ହିୟାଁ ଏ଼ୱାସି ପଜାମାନେସି। 19 ଆମ୍ବାଆସି ଅଣ୍‌ପଅସି, କି ଈ କାତା ୱେସାଲି ଆମ୍ବାଆରି ବୁଦି ହିଲେଏ, ଏମ୍ବାତି ର଼ ବା଼ଗା ଅ଼ହାଁ ମା଼ର ହିଚୁତା ହୂଡାମାନାୟି ଅ଼ଡ଼େ ଏମ୍ବାତି ରୀଙ୍ଗାୟାଁ ତଲେ ରା଼ନ୍ଦା ୱାଜାମାନାୟି ଅ଼ଡ଼େ ଊଙ୍ଗା ୱାଜାହାଁ ତିଞ୍ଜାମାନାୟି, ଏମ୍ବାତି ର଼ ବା଼ଗା ଅ଼ହାଁ କି ଅ଼ପାଆଗାଟି ଆ଼ସ୍ତି ତିୟାରା କିନାୟି ? ମା଼ର କି ର଼ ୱେଗୁ ନ଼କିତା ମେଣ୍ତା କୁତିନାୟି ? 20 ଏ଼ଦି ଦାର୍‌ମ୍ବୁ ତିଞ୍ଜିମାନେ; ଏ଼ଦି ତାନି ଜୀୱୁତି ଗେଲ୍‌ପାଲି ଆ଼ଡେଏ, "କି ନା଼ ଟିଃନି କେୟୁତା ମିଚି ହିଲେଏ," ଈ କାତା ୱେସାଲି ଆ଼ଡେଏ, ଏ଼ଦାଆଁତାକି ନା଼ଡ଼ିକିନି ହିୟାଁ ଏ଼ଦାଣି ଏଟ୍‌କା ଜିରୁତା ଅ଼ହାମାନେ।

21 ହେ଼ ଜାକୁବ, ହେ଼ ଇସ୍ରାୟେଲ,

ନୀନୁ ଈ କାତା ଅଣ୍‌ପାମୁ, ଇଚିହିଁ ନୀନୁ ନା଼ ହ଼ଲେଏଣାତି;

ନା଼ନୁ ନିଙ୍ଗେ ଗା଼ଡ଼ି କିହାମାଞ୍ଜାଇଁ; ନୀନୁ ନା଼ ହ଼ଲେଏଣାତି;

ଏ଼ ଇସ୍ରାୟେଲ, ନା଼ନୁ ନିଙ୍ଗେ ବା଼ଣା ଆୟଅଁ।

22 ନା଼ନୁ ନୀ ଦ଼ହ ଗାଡି ଦୂନ୍ଦ୍ରା ଲେହେଁ ଅ଼ଡ଼େ ନୀ ପା଼ପୁ ହା଼ଗୁ ଲେହେଁ ଗୁଚି କିହାମାଇଁ;

ନା଼ ତା଼ଣା ୱେଣ୍ତା ୱା଼ମୁ; ଇଚିହିଁ ନା଼ନୁ ନିଙ୍ଗେ ଗେଲ୍‌ପା ମାଞ୍ଜାଇଁ।

23 ଏ଼ ହା଼ଗୁପା଼କା ପା଼ଚାମୁ, ଇଚିହିଁ ପ୍ରବୁ ଈ ବାରେ କିହାମାନେସି;

ଏ଼ ଦାର୍‌ତିତି କୂଡ଼୍‌ହାମାନି ଟା଼ୟୁ, ରା଼ହାଁତି ହା଼ଡା ଜ଼ଲାମୁ;

ଏ଼ ହ଼ର୍‌କାତେରି, ଏ଼ ଜା଼ଡ଼ା ଅ଼ଡ଼େ ଏମ୍ବାତି ମା଼ର୍‌କା ମୀରୁ କାଜା ହା଼ଡା ତଲେ ପା଼ଚାଦୁ;

ଇଚିହିଁ ପ୍ରବୁ ଜାକୁବଇଁ ଗେଲ୍‌ପା ମାନେସି

ଅ଼ଡ଼େ ଇସ୍ରାୟେଲ ବିତ୍ରା ତାଙ୍ଗେ ଗା଼ୱୁରମି କିନେସି।

24 ମିଙ୍ଗେ ଗେଲ୍‌ପାନି ପ୍ରବୁ, ତାଲିନି ବାଣ୍ତିଟିଏ ନିଙ୍ଗେ ଗା଼ଡ଼ି କିୟାତେସି,

ଏ଼ୱାସି ଏଲେଇଞ୍ଜି ମାନେସି, "ନା଼ନୁ ପ୍ରବୁତେଏଁ, ନା଼ନୁ ବାରେ କାମା କିନାତେଏଁ,

ନା଼ନୁ ରଅତେଏଁ ହା଼ଗୁପା଼କା ଦା଼ହ୍‌ଇଁ;

ନା଼ନୁ ଦାର୍‌ତିତି ଅ଼ସାରା କିଇଁ; ନା଼ ତ଼ଡ଼ୁ ଆମ୍ବାଆସି।

25 ନା଼ନୁ ମିଚି ଜ଼ଲିନାରା ସିନା ବାରେ ଉଜେଏ କିଇଁ,

ଅ଼ଡ଼େ ଗୂର୍‌କାଣି ବୁଦି ହିଲାଆଗାଟାରି କିଇଁ;

ନା଼ନୁ ବୁଦି ଗାଟାରାଇଁ ଡା଼ୟୁ କିଇଁ ଅ଼ଡ଼େ ଏ଼ୱାରି ବୁଦି ମୁର୍କୁ ଗାଟାଣି କିଇଁ;

26 ନା଼ନୁ ନା଼ ହ଼ଲେଏଣା ବ଼ଲୁ ପୂରା କିଇଁ ଅ଼ଡ଼େ ନା଼ କାବ୍ରୁ ୱେହ୍‌ନାରି କାତା ତୀରି କିଇଁ;

ନା଼ନୁ ଜିରୁସାଲମତି କାତା ୱେସିମାଇଁ,

ଏ଼ଦି ୱେଣ୍ତେ ବାସା ଟା଼ୟୁ ଆ଼ନେ, ଅ଼ଡ଼େ ଜୀହୁଦାତି ଗା଼ଡ଼ାୟାଁ କାତା ୱେସିମାଇଁ,

ଏ଼ୱି ବାରେ ୱେଣ୍ତେ ତିୟାରା ଆ଼ନୁ,

ଇଞ୍ଜାଁ ନା଼ନୁ ଏମ୍ବାତି ଡୀହାମାନି ଟା଼ୟୁ ବାରେ ୱେଣ୍ତେ ତିୟାରା କିଇଁ;

27 ନା଼ନୁ କୂଡ଼୍‌ହି ଏ଼ୟୁଣି ଏଲେଇଇଁ, ୱା଼ୟା ହାଲାମୁ;

ଇଞ୍ଜାଁ ନା଼ନୁ ମୀ କାଡା ବାରେ ୱା଼ୟିକିଇଁ;

28 ନା଼ନୁ କରସତି କାତା ୱେସିମାଇଁ,

ଏ଼ୱାସି ନା଼ ମାନ୍ଦାତି ଗ଼ଡ଼ୁ, ଏ଼ୱାସି ନା଼ ଅଣ୍‌ପୁ ପୂରା କିନେସି;

ଏ଼ୱାସି ଜିରୁସାଲମ କାତା ଏଲେଇନେସି, ଏ଼ଦି ୱେଣ୍ତେ ତିୟାରା ଆ଼ନେ,

ଅ଼ଡ଼େ ମାହାପୂରୁ ଇଲୁତି ଏଲେଇନେସି, ନୀ ପୁନାଦି କିୱିଆ଼ନେ।"