ଜିସା 21

ବାବିଲତି ନା଼ସା ଆ଼ନାଣି ସେୟାଁଣା ହାପାନା

1 ସାମ୍‌ଦୁରି ଦାରିତି ବାଟାତି କାତା ତାକି ନ଼କିତା ଆ଼ନି କାତା। ଏ଼ଦି ଟିଃନି ୱାକି ହା଼ରେକା ତବେ ୱା଼ନି ରୁୱାଗା଼ଲି ଲେହେଁ ବାଟାଟି, ର଼ ଆଜିହ଼ପେତି ଦେ଼ସାଟି ୱା଼ହିମାନେ।

2 ର଼ ଦୁକୁଗାଟି ସେୟାଁଣା ହାପାନା ମା଼ ତାକି ତ଼ସ୍‌ପି ଆ଼ହାମାନେ; ନା଼ଡ଼ି କିନାସି ନା଼ଡ଼ି କିହିମାନେସି ଅ଼ଡ଼େ ଦୂହିନାସି ଦୂହିମାନେସି। ହେ଼ ଏଲମ୍‌, ଲାକ ହାଲାମୁ; ହେ଼ ମାଦିୟେ, ଗୂର୍‌ମୁ; ନା଼ନୁ ଏମ୍ବାତି ଦୁକୁତି କା଼ଲୱି ବାରେ ସାପି କିହାମାଇଁ।

3 ଏ଼ଦାଆଁତାକି ନା଼ ଟେଡେଲିତା ବୀସା ନେଞ୍ଜାମାନେ; ଜାର୍ନି କିନି ବୀସା ଲେହେଁ ବୀସା ନାଙ୍ଗେ ଆ଼ହାମାଞ୍ଜାନେ; ନା଼ନୁ ଇଲେକିଁ ବିଲ୍‌କି, ନା଼ନୁ ୱେଞ୍ଜାଲି ଆ଼ଡିହିଲଅଁ; ନା଼ନୁ ଇଲେକିଁ ଆଡାଜାକା, ନା଼ନୁ ମେସାଲି ଆ଼ଡିହିଲଅଁ।

4 ନା଼ ହିୟାଁ ୱୀଡିମାନେ, ନା଼ନୁ ହା଼ରେକା ଆଜିମାଇଁ; ଏମିନି ମିଡ଼୍‌ଅଲା ବେ଼ଲା ନା଼ନୁ ଅଣ୍‌ପିତେଏଁ, ଏ଼ଦି ନା଼ ତାକି ତୀର୍‌ଗିନାୟି ଆ଼ହାମାନେ।

5 ଏ଼ୱାରି ତିଞ୍ଜାଲି କିହିମାନେରି, ଏ଼ୱାରି କା଼ପୁ କା଼ଃନାରାଇଁ ହେର୍‌ପିନେରି, ଏ଼ୱାରି ତିନେରି ଉନେରି; ଏ଼ ସା଼ଲୱି କିନାତେରି, ନିଙ୍ଗାଦୁ, ଆଡୁ ପା଼ଟାତି ନିୟୁଁ ୱା଼କ୍‌ଦୁ*21:5 ଆଡୁ ପା଼ଟାତି ନିୟୁଁ/ଜୁଜୁ ତାକି ତିୟାରା କିଦୁ କିଦୁ।

6 ଏ଼ନିଇଚିହିଁ, ପ୍ରବୁ ନାଙ୍ଗେ ଈ କାତା ୱେସାମାଞ୍ଜାନେସି, "ହାଲାମୁ, ର଼ କା଼ପୁ କା଼ଃନାଣାଇଁ ହେର୍‌ପାମୁ; ଏ଼ୱାସି ଏ଼ନାଆଁ ମେହ୍‌ନେସି, ଏ଼ଦାଆଁ ୱେ଼ପ୍‌କାସି; 7 ଇଞ୍ଜାଁ, ଏ଼ୱାସି ଏଚିବେ଼ଲା ର଼ ଗଚି ଜୁଜୁ କିନାରି, ରୀ ରୀ ଗ଼ଡ଼ାୟାଁଣା ହ଼ତାରି, ର଼ ଗଚି ଗା଼ଡ଼୍‌ଦେୟାଁଣା ହ଼ତାରି ଅ଼ଡ଼େ ର଼ ଗଚି ଊଟୁଣା ହ଼ତାରାଇଁ ମେହ୍‌ଦେରି, ଏଚିବେ଼ଲା ଏ଼ୱାସି ମ଼ନ ହୀହାଁ ହା଼ରେକା ଜାତ୍‌ନୁ ତଲେ କିର୍ୟୁଁ ଅଡିନେସି।"

8 ଏଚେଟିଏ ଏ଼ୱାସି ସିହଁ ଲେହେଁ କାଜା ଗିୟାଁ କିହିଁ ଏଲେଇଚେସି, "ଏ଼ ପ୍ରବୁ, ନା଼ନୁ ମାଦେନା ବେ଼ଲା କା଼ଲେଏ କା଼ପୁ କା଼ଃନି କ଼ଟାତା ନିଚା ଡ଼ୟିଇଁ ଅ଼ଡ଼େ ଏଚେକା ଲା଼ଆଁ ଆ଼ତେ ନା଼ନୁ ଜାହାରା କା଼ପୁ କା଼ଃନି ଟା଼ୟୁତା ଡ଼ୟାମାଇଁ।"

9 ଅ଼ଡ଼େ, ମେହ୍‌ଦୁ, ଇମ୍ବାଆଁ ର଼ ଗଚି ଲ଼କୁ ରୀ ରୀ ଗ଼ଡ଼ାୟାଁଣା ହ଼ଚାଁ ୱା଼ହିମାନେରି। ଅ଼ଡ଼େ, ଏ଼ୱାସି ୱେଣ୍ତେ ଏଲେଇଚେସି, "ବାବିଲ ରିତେ; ରିତେ ଅ଼ଡ଼େ ତାନି କେ଼ପିତି ବମାୟାଁ ବାରେ ଡୀହାଁ ନା଼ସା ଆ଼ତୁ।"

10 ଏ଼ ନା଼ ଇସ୍ରାୟେଲ ଲ଼କୁ, ମୀରୁ କା଼ଡ଼୍‌ନୁତା ଆର୍ନା ନ଼ର୍ପିନି ଲେହେଁ ଆ଼ହାମାଞ୍ଜେରି, ନା଼ନୁ ଇସ୍ରାୟେଲତି ମାହାପୂରୁ ବା଼ଡ଼୍‌ୟୁଗାଟି ପ୍ରବୁ ତା଼ଣାଟି ଏ଼ନାଆଁ ୱେଞ୍ଜାମାଇଁ, ଏ଼ଦାଆଁ ମିଙ୍ଗେ ୱେସ୍ତାତେଏଁ।

ଇଦମ ଅ଼ଡ଼େ ଆରବ ତାକି ନ଼କିତା ଆ଼ନି କାତା

11 ଦୁମାତି*21:11 ଦୁମା/ଇଦମ ନ଼କିତା ଆ଼ନି କାତା। ରଅସି ସେୟିରଟି ନାଙ୍ଗେ ହା଼ଟାହାଁ ଏଲେଇଞ୍ଜି ମାଞ୍ଜାନେସି, "କା଼ପୁ କା଼ଃନାତି, ଏଚେକା ଲା଼ଆଁୟାଁ ଆ଼ତେ ? କା଼ପୁ କା଼ଃନାତି, ଏଚେକା ଲା଼ଆଁୟାଁ ଆ଼ତେ ?"

12 କା଼ପୁ କା଼ଃନାସି ଏଲେଇଚେସି, "ଲା଼ଇ ୱା଼ହିମାନେ ଅ଼ଡ଼େ ଲା଼ଆଁ ଜିକେଏ ୱା଼ହିମାନେ; ମୀରୁ ୱେଞ୍ଜାଦେରି ଆତିହିଁ ୱେଞ୍ଜାଦୁ, ମୀରୁ ୱେଣ୍ତାଦୁ, ୱା଼ଦୁ।"

13 ଆରବ କାତାତି ଅଣ୍‌ପୁତି ହା଼ଡା। ଏ଼ ଦଦାନିୟ ଜିରୁ ତା଼କିନି ଗଚି, ମୀରୁ ଆରବତି ଜା଼ଡ଼ା ବିତ୍ରା ଲା଼ଆଁୟାଁ ଡ଼ୟିଦେରି। 14 ଏମିନି ଲ଼କୁ ଏ଼ସ୍‌କି ମାଚେସି, ଏ଼ୱାରି ଏ଼ୱାଣି ତା଼ଣା ଏ଼ୟୁ ତାତେରି; ତେମା ଦେ଼ସାତାରି କା଼ଦି ଅ଼ହାଁ ହଟିହିଁ ରେ଼ନାରି ତଲେ ଆଣ୍ତିତେରି। 15 ଇଚିହିଁ ଏ଼ୱାରି କାଣ୍ତାତଲେ, ୱାସାମାନି କାଣ୍ତାଟି, ଗ଼ଞ୍ଜାମାନି ଆମ୍ବୁଟି ଅ଼ଡ଼େ କସ୍ତଗାଟି ଜୁଜୁଟି ହଟେରି।

16 ଏ଼ନିଇଚିହିଁ ପ୍ରବୁ ନାଙ୍ଗେ ଏଲେଇଞ୍ଜା ମାଞ୍ଜାନେସି, "ବୁତିଗାଟାଣି ବାର୍ସାତି ଲେକା ତଲେ ର଼ ବାର୍ସା ବିତ୍ରା କେଦାରତି ବାରେ ବା଼ଡ଼୍‌ୟୁ ଡ଼ୁଗାହାନେ; 17 ଅ଼ଡ଼େ, କେଦାର କୂଲୁତି ବା଼ଡ଼୍‌ୟୁଗାଟାରି ବିତ୍ରା ଇଚରା ଜା଼ଣା ଆପ୍‌କା ଆସ୍ତାରି ଡ଼ୟିନେରି" ଇଚିହିଁ ପ୍ରବୁ ଇସ୍ରାୟେଲତି ମାହାପୂରୁ ଈଦାଆଁ ୱେସାମାନେସି।