1 ୱେଞ୍ଜୁ, ପ୍ରବୁ ବା଼ଡ଼୍‌ୟୁଗାଟି ପ୍ରବୁ, ଜିରୁସାଲମ ଅ଼ଡ଼େ ଜୀହୁଦାତି ବାରେ ସା଼ୟେମି ହେକ କିନେସି। ଏ଼ୱାସି ତାମି ବାରେ କା଼ଦି ଏ଼ୟୁ ହେକ କିନେସି; 2 ବା଼ଡ଼୍‌ୟୁ ଗାଟାରି, ଜୁଜୁ କିନାରି, ବିଚାରା କିନାରି, ନ଼କିତା ଆ଼ନି ବ଼ଲୁ ୱେ଼କ୍‌ନାରି, ଗୂର୍‌କା, ପ୍ରାଚିନାଙ୍ଗା; 3 ଦୁଇକଡ଼ି ଦସ ରିଜାରି କ଼ସ୍‌କାତି କାଜାରି, ୱେ଼ଙ୍ଗିତି ମାଣ୍‌ସିୟାଁ, ବୁଦି ୱେ଼ହ୍‌ନାରି, ମନ୍ତ୍ରି, ନେହିଁ କାମା କିନାରି ଅ଼ଡ଼େ ଗୂର୍‌କା ହେକ କିୱିଆ଼ନେରି। 4 ଇଞ୍ଜାଁ, "ନା଼ନୁ ଊଣା କକାରାଇଁ ଏ଼ୱାରି ସା଼ୱୁକାରି କିଇଁ ଅ଼ଡ଼େ ଊଣା କକାରି ଏ଼ୱାରି ଲାକ ସା଼ଲୱି କିନେରି। 5 ଅ଼ଡ଼େ ଲ଼କୁ ରଅସି ଅ଼ର ରଅଣି ତା଼ଣାଟି ଅ଼ଡ଼େ ବାରେ ଲ଼କୁ ତାମି ପା଼ଡ଼ିତି ଲ଼କୁ ତା଼ଣାଟି ଲାଗେଏ ଆ଼ନେରି; କକାରି ପ଼ଦାଁ କାଜା ଲ଼କୁଣି ମା଼ନି କିଅରି ଅ଼ଡ଼େ ହୀଣି ଲ଼କୁ ସା଼ୱୁକାରି ଲ଼କୁ ନ଼କିତା ବଡପଣ ଆ଼ନେରି।"

6 ଏଚିବେ଼ଲା ଆମ୍ବା ଆମ୍ବାଆରି ଜାହାରା ତାଞ୍ଜି ଇଜତି ତାମି ତାୟିଇଁ ଆସାହାଁ ଏଲେଇନେରି, "ନିଙ୍ଗେ ବାସ୍ତେରିକା ମାନୁ, ଏ଼ଦାଆଁତାକି ନୀନୁ ମା଼ ସା଼ଲୱି କିନାତି ଆ଼ମୁ, ଇଞ୍ଜାଁ ଈ ସିନାସାତ୍ରା ରା଼ଜିତି ନୀ କେୟୁତା ଅ଼ମୁ।"

7 ଏ଼ ଦିନା ଏ଼ୱାସି ଏଲେଇନେସି, "ନା଼ନୁ ସା଼ୟେମି କିନାତେଏଁ ଆ଼ଅଁ; ଇଚିହିଁ ନା଼ ଇଲୁତା କା଼ଦି କି ବାସ୍ତେରିକା ହିଲାଉ; ମୀରୁ ନାଙ୍ଗେ ଲ଼କୁତି ସା଼ଲୱି କିହାଲି ହେର୍‌ପାଆଦୁ।"

8 ଇଚିହିଁ ଜିରୁସାଲମ ନା଼ସା ଅ଼ଡ଼େ ଜୀହୁଦା ନା଼ସା ଆ଼ହାମାନେ; ଇଚିହିଁ ପ୍ରବୁତି ଗା଼ୱୁରମି କାନୁତି କାର୍‌ବି କିହାଲି ତାକି ଏ଼ୱାରି ୱେନ୍ଦରି ଅ଼ଡ଼େ କାମା ତାନି କ଼ପାଟି ଆ଼ହାମାନେ। 9 ଏ଼ୱାରି ମୂମ୍ବୁତି ୱା଼ଣା ଏ଼ୱାରି କ଼ପାଟି ସା଼କି ହୀନେ; ଇଞ୍ଜାଁ, ଏ଼ୱାରି ସଦମ ଲେହେଁ ତାମି ପା଼ପୁ ୱେ଼କ୍‌ହାନା ଡ଼ୁକ୍‌ଅରି। ଆୟ଼ତା, ଏ଼ୱାରି ଜୀୱୁ! ଇଚିହିଁ ଏ଼ୱାରି ତାମି ନା଼ସା ଆ଼ନାଣି ତା଼ମ୍ବୁଏ କିହାମାନେରି।

10 ମୀରୁ ଦାର୍ମୁ ଗାଟାଣି କାତାତି ଏଲେଇଞ୍ଜେରି, ଏ଼ୱାଣି ନେହିଁ ଆ଼ନେ, ଇଚିହିଁ ଏ଼ୱାରି ଜାହାରା ଜାହାରା କାମାତି ପା଼ଡ଼େୟି ବେଟାଆ଼ନେରି। 11 ଆୟ଼ତା, ଲାଗେଏତି ଲ଼କୁ! ଏ଼ୱାଣାକି ଲାଗେଏ ଆ଼ନେ; ଇଚିହିଁ ତାନି କେୟୁତଲେ କିତି କାମାତି ପା଼ଡ଼େୟି ଏ଼ୱାଣାକି ହୀପ୍‌କି ଆ଼ନେ।

12 ନା଼ ଲ଼କୁତି କାତା ସିନିକିତିସାରେ, କକାରି ନା଼ ଲ଼କୁଣି ହୀଣି କିନେରି ଅ଼ଡ଼େ ଆୟାସିକା ଏ଼ୱାରି ମୁହେଁ ସା଼ଲୱି କିନୁ। ଏ଼ ନା଼ ଲ଼କୁ, ମୀ ଜିରୁ ତ଼ସ୍ତାନାରି ମିଙ୍ଗେ ନା଼ଡ଼ି କିୟାନେରି ଅ଼ଡ଼େ ମୀ ତା଼କିନି ଜିରୁ ନା଼ସା କିନେରି।

13 ପ୍ରବୁ ଲ଼କୁତି ଦାୱା କିହାଲି ନିଚିମାନେସି ଅ଼ଡ଼େ ବାରେ କୂଡ଼ାତି ଲ଼କୁଣି ନୀହାଁୟି କିହାଲି ନିଚିମାନେସି। 14 ପ୍ରବୁ ତାନି ଲ଼କୁତି ପ୍ରାଚିନାଙ୍ଗା ଅ଼ଡ଼େ ସା଼ଲୱି କିନାରି ତଲେ ନୀହାଁୟିତା ଦାୱା କିନେସି; ମୀରୁଏ ଅଙ୍ଗୁରି ବା଼ଡ଼ା ଗୂସା ମାଞ୍ଜେରି; କାର୍ମାଗାଟାରି ତା଼ଣାଟି ଦୂହିତି ଦିଣ୍‌ସୁ ମୀ ଇଲ୍‌କାଣା ମାନେ। 15 ମୀରୁ ମା଼ ଲ଼କୁଣି ୱିସିମାଞ୍ଜେରି ଅ଼ଡ଼େ କା଼କୁଲିଗାଟାରି ମୂମ୍ବୁ ରା଼କ୍‌ହି ମାଞ୍ଜେରି, ଇମ୍ବାଆଁ ମୀ ଅଣ୍‌ପୁ ଏ଼ନାୟି ? ପ୍ରବୁ, ବା଼ଡ଼୍‌ୟୁଗାଟି ପ୍ରବୁ ଈ କାତା ଏଲେଇଞ୍ଜି ମାନେସି।

16 ଅ଼ଡ଼େ ପ୍ରବୁ ଏଲେଇଚେସି, "ସିୟନତି ମା଼ସ୍‌କା ଡା଼ହାରା ଗାଟାଇ ଅ଼ଡ଼େ ହେର୍‌କି ଗ଼କ୍‌ହାଁ ଅ଼ଡ଼େ ଇତାଲା ଆତାଲା ସିନିକିହିଁ ତା଼କିନୁ, ତା଼କି ତା଼କିହିଁ ପାଃଆନାୟାଁ ଦାଗା ଅ଼ଡ଼େ କଡାୟାଁ ସିଲି ସିଲି ଡ଼ିତ୍‌ନୁ; 17 ଏ଼ଦାଆଁତାକି ପ୍ରବୁ ସିୟନତି ମା଼ସ୍‌କାତି ତା଼ର୍ୟୁଁ ହିଣ୍‌ନେସି ଅ଼ଡ଼େ ପ୍ରବୁ ଏ଼ୱାସିକାଣି ତା଼ର୍ୟୁଁ ଟାଙ୍ଗ୍ରା କିହାଁ ପିହ୍‌ନେସି।"

18 ଏ଼ ଦିନା ପ୍ରବୁ ତାମି ବଡପଣ ଲେହେଁ କଡାତି ସିଲିମୁୟାଁ, ତା଼ର୍ୟୁଁତି ସାଜୁ, ପୂସାୟାଁ; 19 କିର୍ୟୁଁତି ନା଼ଗୁୟାଁ, କେୟୁତି ପା଼ଜାୟାଁ, ତା଼ର୍ୟୁଁତା ପିଡ଼୍‌ଗିନାଣି; 20 ଟ଼ପେରି, କଡାତି ସାନ୍ଦେୟାଁ, ବୁଡ଼୍‌ପାମା଼ଡ଼ା, ଗାନ୍ଦା ନିୟୁଁ ଗା଼ଜୁ, ବିଦି; 21 ମୁଦି, ମୁଙ୍ଗେଲି ମୁର୍କା, 22 ପାର୍ବୁତା ତୁର୍‌ନି ବାସ୍ତେରି, ତର୍‌ଦଲି ସକା, ଡିସ୍‌କ ହିମ୍ବରି, ଜା଼ଡ଼ିୟା; 23 ଦାର୍ପେଣି, ପା଼ତାଡ଼ା ହିମ୍ବରି, କୁବୁସାରି ଅ଼ଡ଼େ ତା଼ର୍ୟୁଁତା ପିଡ଼୍‌ଗିନି ହିମ୍ବରି ଦେତାନେସି।

24 ଏଚେଟିଏ ନେହିଁ ଗାନ୍ଦା ଦିଣ୍‌ସୁ ବାଦୁଲି ଲାଗେଏତି ଗାନ୍ଦା ସୀୱେଁସି, ବୁଡ଼୍‌ପାମା଼ଡ଼ା ବାଦୁଲି ଡ:ରି, ଅ଼ଜିତି ତା଼ର୍ୟୁଁ ବା଼ଣାୟାଁ ବାଦୁଲି ତା଼ର୍ୟୁଁ ବା଼ଣାୟାଁ ହିଲାଆଗାଟାୟି, ନେହିଁ ବାସ୍ତେରି ବାଦୁଲି ବାସ୍ତା; ନେହିଁ ଅ଼ଜୁତି ବାଦୁଲି ୱେତି ଗା଼ହାଁ ଆ଼ନେ।

25 ମୀ ଆ଼ବାୟାଁ କାଣ୍ତା ତଲେ ଅ଼ଡ଼େ ମୀ ବା଼ଡ଼୍‌ୟୁ ଗାଟାରି ଜୁଜୁତା ନା଼ସା ଆ଼ନେରି।

26 ସିୟନତି ଗା଼ଡ଼ା ଦୁୱେରିତା ବାରେ ଦୁକୁଟି ଡ଼ୀନୁ, ଅ଼ଡ଼େ ଏ଼ଦି ନୀରାସା ଆ଼ହାଁ ବୂମିତା କୁଗିନେ।