ଜିସା 16

ମୟାବତି ଆ଼ସା ହିଲାଆ କାତା

1 ମୀରୁ ବାଟା ୱାକିତି ସେଲା ଗା଼ଡ଼ାଟି ଦେ଼ସା ସା଼ଲୱି କିନାଣାକି ସିୟନ ମା଼ଙ୍ଗାତି ହ଼ରୁତା ମେ଼ଣ୍ତା ପାଣ୍ତାଦୁ। 2 ଇଚିହିଁ ମୟାବତି ମା଼ସ୍‌କା ଅର୍‌ନନ କାଡା ଗା଼ଣ୍‌ନି ଟା଼ୟୁତା ରେ଼ଜିହିଁ ଡ଼ୟାମାନି ପଟା ଲେହେଁ ଅ଼ଡ଼େ ହୀପାୟାଁ ବିରିକିହାମାନି ବ଼ଣ ଲେହେଁ ଆ଼ନେରି।

3 କାତା ୱେସ୍ତାମୁ, ବିଚାରା କିମୁ; ମାଦେନା ବେ଼ଲାତି ଜାହାରା ସା଼ୟିଁତି ଲା଼ଆଁୟାଁ ଲେହେଁ କିମୁ; ପେ଼ର୍‌ୱି ଆ଼ହାମାନି ଲ଼କୁଣି ଡ଼ୁକ୍‌ହା କଡାମୁ; ରେ଼ନାରାଇଁ ତ଼ହ୍‌ଆନି। 4 ନା଼ ପେ଼ର୍‌ୱି ଆ଼ହାମାନି ଲ଼କୁଣି ନୀ ତଲେ ବାସା କିହାଲି ହୀମୁ; ନା଼ସା କିନାରି ନ଼କିତା ନୀନୁ ମୟାବ ତାକି ବାସା ଟା଼ୟୁ ଆ଼ମୁ; ଇଚିହିଁ କସ୍ତ ହୀନି ସା଼ୱୁକାରିୟାଁ ଏ଼ନାଆଁ କିହାଲି ଆ଼ଡି ହିଲଅରି, ଇଚିହିଁ ଦେ଼ସାଟି ଲାଗେଏ କିନାରି ସାପି ଆ଼ହାଁ ନା଼ସା ଆ଼ହାମାନେରି। 5 ଇଞ୍ଜାଁ, କାର୍ମାଟି ର଼ ସିଂଗାସାଣି କେ଼ପ୍‌ୱିଆ଼ନେ ଅ଼ଡ଼େ ରଅସି ସାତା ତଲେ ଦାୱୁଦତି ତୂମୁ ବିତ୍ରା ଏ଼ଦାନି ଲାକ କୁଗିନେସି; ଏ଼ୱାସି ନୀହାଁୟି ପାରାହାଁ ବିଚାରା କିନେସି ଅ଼ଡ଼େ ଦାର୍ମୁ କାମା କିହାଲି ଜାଗ୍ରାତା ଆ଼ନେସି।

6 ମା଼ମ୍ବୁ ମୟାବତି ବଡପଣ କାତା ୱେଞ୍ଜାମାନମି, ଏ଼ଦି ହା଼ରେକା ବଡପଣ, ତାନି ଡା଼ହାରା ଅ଼ଡ଼େ ତାନି ବଡପଣ ଅ଼ଡ଼େ କ଼ପାତି କାତା ୱେଞ୍ଜାମାନମି; ତାନି ବଡପଣ ଏ଼ନାୟି ଆ଼ଏ।

7 ଏ଼ଦାଆଁତାକି ମୟାବ, ମୟାବ ତାକି ଦୁକୁଟି କା଼ଲୱି ଆ଼ଦେରି, ବାରେ ଲ଼କୁ ଦୁକୁତଲେ କା଼ଲୱି ଆ଼ଦେରି; ଇଚିହିଁ ମୀରୁ ହା଼ରେକା ଦୁକୁ ଆ଼ହାଁ କିର୍‌-ହେରସତ ଗା଼ଡ଼ାତି ନେହେଁ କା଼ଦି ତାକି ଡ଼ୀଦେରି। 8 ଇଚିହିଁ ହିସ୍‌ବନ ଗା଼ଡ଼ାତି ବା଼ଡ଼ା ବାରେ ଅ଼ଡ଼େ ସିବ୍‌ମା ଗା଼ଡ଼ାତି ଅଙ୍ଗୁରିମା଼ଡ଼ା ୱା଼ଡ଼ିମାନେ; କୂଡ଼ାତି ସା଼ଲୱି କିନାରି ଏମ୍ବାତି ଆ଼ଚିତି ପା଼ଲା ବାରେ ଡିକ୍‌ହା ମାନେରି; ଏ଼ୱାରି ବାରେ ଜାସେର ଗା଼ଡ଼ା ପାତେକା ହାଚେରି, ବାଟା ପାତେକା ଇତାଲା ଆତାଲା ହାଚେରି; ତାନି କମାୟାଁ ବାରେ ସା଼ରିୱାକି ପାଡା ଆ଼ତୁ, ଏ଼ୱାରି ବାରେ ସାମ୍‌ଦୁରି ଗା଼ଣ୍‌ଚାହାଁ ହାଚେରି। 9 ଏ଼ଦାଆଁତାକି ନା଼ନୁ ଜାସେରତି ଲେହେଁ ଡ଼ୀକି କା଼ଲାତା ସିବ୍‌ମାତି ଅଙ୍ଗୁରିମା଼ଡ଼ା ତାକି ଡ଼ୀଇଁ; ଏ଼ ହିସ୍‌ବନ, ଏ଼ ଇଲିୟାଲି ନା଼ନୁ ନା଼ କାଣ୍ତ୍ରୁ ଏ଼ୟୁତଲେ ନିଙ୍ଗେ ଊତ୍‌ହାଇଁ; ଇଚିହିଁ ଲ଼କୁଣି ରା଼ହାଁ କିହାଲି ତାକି ଆର୍ନା କାମ୍ବାହିଲେଏ। 10 ଇଞ୍ଜାଁ, ରା଼ହାଁତି ଗାତା ବୂମିଟି ହେକ ଆ଼ହାମାନେ; ଅ଼ଡ଼େ, ଅଙ୍ଗୁରି ବା଼ଡ଼ାତା ପା଼ଚୁ କି ରା଼ହାଁତି ଗିୟାଁ ଆ଼ଏ; ଆମ୍ବାଆସି ପାଃଆନା ତଲେ ୱିସାହାଁ ଅଙ୍ଗୁରି କୁଣ୍ତିତା ଅଙ୍ଗୁରି ରାସା ହ଼ପ୍‌ଅସି; ନା଼ନୁ ଅଙ୍ଗୁରି କୂଡ଼ିକିନି ରା଼ହାଁତି ହା଼ଡା ସାପି କିହାମାଇଁ। 11 ଈଦାଆଁତାକି ନା଼ ମ଼ନ ମୟାବ ତାକି ଅ଼ଡ଼େ ନା଼ ହିୟାଁ କିର୍ହେରସ ତାକି ସେର୍‌ଙ୍ଗି ଲେହେଁ ଡ଼ୀହିମାନେ। 12 ଇଞ୍ଜାଁ, ମୟାବ ତା଼ନୁଏ ୱା଼ନି ବେ଼ଲାତା ଅ଼ଡ଼େ ପାଡାଆ଼ତି ଟା଼ୟୁତା ଜାହାରାଇଁ ୱା଼ହିକିହାଁ ପ୍ରା଼ତାନା କିହାଲି ତାକି ଦାର୍ମୁତା ହ଼ଡ଼୍‌ନି ବେ଼ଲାତା ଏ଼ୱାସି ଏ଼ନି ଲା଼ବା ଆ଼ଅସି।

13 ହାଚି ବେ଼ଲାତା ପ୍ରବୁ ମୟାବ ତାକି ଈ କାତା ଏଲେଇଞ୍ଜା ମାଚେସି। 14 ସାମା ନୀଏଁ ପ୍ରବୁ ଈ କାତା ଏଲେଇଞ୍ଜି ମାନେସି, କୂଲି ତଲେ କିହିମାନାଣି ବାର୍ସା ଲେହେଁ ତୀନି ବାର୍ସା ବିତ୍ରା ମୟାବତି ଗା଼ୱୁରମି ତାନି ହା଼ରେକା ଲ଼କୁ ଜିକେଏ ଲାଜା ଆ଼ନେରି, ଅ଼ଡ଼େ ଡ଼ୟାମାନାରି ହା଼ରେକା ଊଣା ଆ଼ନେରି ଅ଼ଡ଼େ ଏଜି କିହାଲି ଆ଼ଏ।