1 ପ୍ରବୁ ଈ କାତା ଏଲେଇଞ୍ଜି ମାନେସି, "ମୀରୁ ନେହିଁ ବିଚାରା ମା଼ନୱିଆ଼ଦୁ; ଅ଼ଡ଼େ ଦାର୍ମୁକାମା କିଦୁ, ଇଚିହିଁ ନା଼ନୁ ମିଙ୍ଗେ ତବେ ଗେଲ୍‌ପାଇଁ, ଅ଼ଡ଼େ ନା଼ ଦାର୍ମୁ ତ଼ଞ୍ଜାଆ଼ନେ। 2 ଆମ୍ବାଆସି ଜ଼ମିନି ଦିନାତି ମା଼ନୱି ଆ଼ହାଁ ଏ଼ଦାଆଁ ଲାଗେଏ କିଅସି ଅ଼ଡ଼େ ବାରେ ଲାଗେଏ କାମାଟି ଜାହାରା କେୟୁ ସାପି କିନେସି; ଏମିନି ମାଣ୍‌ସି ଈ କାମା କିନେସି ଏମିନି ମାଣ୍‌ସି ମୀର୍‌ଏସି ଈ ବାରେ ଆ଼ଟ୍‌ୱା ତଲେ କିନେସି ଏ଼ୱାସି ନେହେଁ।"

3 "ସାତେଏ ପ୍ରବୁ ଜାହାରା ଲ଼କୁ ତା଼ଣାଟି ନାଙ୍ଗେ ଏଟ୍‌କା କିୟାନେସି," ଈଦାଆଁ ପ୍ରବୁ ତା଼ଣା ମାନି ଏଟ୍‌କା ଦେ଼ସାତି ଲ଼କୁ ଏଲେ ଇନାଆପେସି; କି "ମେହ୍‌ଦୁ, ନା଼ନୁ ର଼ ୱା଼ୟିତି ମା଼ର୍‌ନୁ, ଈଦାଆଁ ପେଜୁ ଏଲେ ଇନାଆପେସି।" 4 ଇଚିହିଁ ପେଜୁୟାଁତି କାତା ପ୍ରବୁ ଈ କାତା ଏଲେଇନେସି, "ଆମ୍ବାଆରି ନା଼ ଜ଼ମିନି ଦିନା ମା଼ନୱି ଆ଼ନେରି ଅ଼ଡ଼େ ନା଼ ନେହିଁ କାତା ଆ଼ଚିନେରି ଅ଼ଡ଼େ ମା଼ନୱି ଆ଼ନେରି; 5 ଏ଼ୱାରାଇଁ ନା଼ନୁ ନା଼ ଇଲୁ ବିତ୍ରା ଅ଼ଡ଼େ ନା଼ କ଼ଟା ବିତ୍ରା ମୀର୍‌କା ମା଼ସ୍‌କା କିହାଁ ନେହିଁ ଅଣ୍‌ପୁତି ମୁଣ୍ତା ଅ଼ଡ଼େ ଦ଼ରୁ ହୀଇଁ; ନା଼ନୁ ଏ଼ୱାରାଇଁ କା଼ଲେଏ ତୀରିଆ଼ହାଁ ଡ଼ୟିନି ଦ଼ରୁ ହୀଇଁ, ଏ଼ଦି ଏଚେଲା ମେଣ୍‌ଙ୍ଗି କିୱିଆ଼ଏ।"

6 "ଅ଼ଡ଼େ, ଏମିନି ଏଟ୍‌କା ଦେ଼ସାତି ଲ଼କୁ ପ୍ରବୁତି ସେ଼ବା କିହାଲି ଅ଼ଡ଼େ ପ୍ରବୁତି ଦ଼ରୁ ଜୀୱୁ ନ଼ହାଲି ଅ଼ଡ଼େ ତାନି ହ଼ଲିୟା ଆ଼ହାଲି ତାକି ଜୂପ୍‌କା ଆ଼ନେରି, ଇଚିହିଁ ଆମିନିଗାଟାରି ଜ଼ମିନି ଦିନା ମା଼ନୱି ଆ଼ହାଁ ଏ଼ଦାଆଁ ଲାଗେଏ କିଆନା ନା଼ ରା଼ଜିମା଼ନା ମା଼ନୱି ଆ଼ନେରି; 7 ଏ଼ ବାରେତି ନା଼ନୁ ନା଼ ସୁଦୁ ହ଼ରୁତା ତାଇଁ ଅ଼ଡ଼େ ନା଼ ପ୍ରା଼ତାନା ଇଲୁତା ଏ଼ୱାରାଇଁ ରା଼ହାଁ କିଇଁ; ଏ଼ୱାରି ହିଚୁତା ହୂଡିନି ପୂଜା ଅ଼ଡ଼େ ପା଼ପୁ ମ୍ଣେକ୍‌ନି ପୂଜା ନା଼ ପୂଜା ପିଣ୍ତାତା ମା଼ନି ଆ଼ନେ; ଇଚିହିଁ ନା଼ ଇଲୁ ବାରେ କୂଡ଼ାତି ପ୍ରା଼ତାନା ଇଲୁ ଇଞ୍ଜିଁ ୱେ଼ଙ୍ଗିନେ।"

8 ଆମ୍ବାଆସି ଇସ୍ରାୟେଲତି ହେକ ଆ଼ହାମାନି ଲ଼କୁଣି କୂଡ଼ି କିନେସି, ଏ଼ ପ୍ରବୁ ମାହାପୂରୁ ଏଲେଇଞ୍ଜି ମାନେସି, "ତାନି କୂଡ଼ିକିତି ଜାହାରା ଲ଼କୁ ପିସ୍‌ପେ, ନା଼ନୁ ଏଟ୍‌କା ଲ଼କୁଣି ତାନି ତା଼ଣା କୂଡ଼ିକିଇଁ।"

9 ଏ଼ ଗୁଡିୟାତି ଜ଼ନ୍ତ ଅ଼ଡ଼େ ଏ଼ ଜା଼ଡ଼ାତି ଜ଼ନ୍ତ, ମୀରୁ ତିଞ୍ଜାଲି ୱା଼ଦୁ। 10 ତାନି କା଼ପୁ କା଼ଃନାରି କା଼ଣାୟାଁ, ଏ଼ୱାରି ବାରେ ବୁଦି ହିଲାଆଗାଟାରି; ଏ଼ୱାରି ବାରେ ଗୁଲା ନେସ୍‌କା, ଏ଼ୱାରି ମୁସ୍‌କାଲି ଆ଼ଡଅରି; ଏ଼ୱାରି ହାପାନା ହେଣ୍‌ନେରି, ଇଦାଗାଟାରି, ଡୂରାଲି ରା଼ହାଁ ଆ଼ନେରି। 11 ଅ଼ଡ଼େ, ଏ଼ ନେସ୍‌କା ଟିଣ୍ତିକାଉୟାଁ, ଏ଼ୱାରି ଏଚେଲା ପାଞ୍ଜାଆଗାଟାରି; ଅ଼ଡ଼େ, ଈୱାରି ଅଣ୍‌ପିନି ବା଼ଡ଼୍‌ୟୁ ହିଲାଆ ଗ଼ଡ଼ୁ; ଏ଼ ବାରେ ସା଼ରି ୱାକିଟି ଜାହା ଜାହାରା ଲା଼ବା ଅଣ୍‌ପୁଟି ଜାହା ଜାହାରା ଜିରୁ ୱାକି ୱେଣ୍ତାମାନେରି। 12 ବାରେ ଏଲେଇନେରି, "ୱା଼ଦୁ, ମା଼ର ଅଙ୍ଗୁରି ରାସା ତାନ ଅ଼ଡ଼େ ମା଼ର କା଼ଡ଼ୁ ଗସାହାଁ ହ଼ଚିନ, ଇଞ୍ଜାଁ, ଏ଼ନିକିଁ ନୀଞ୍ଜୁ, ଏଲେକିହିଁ ୱିଏ ଆ଼ନେ, ଏ଼ଦି ହା଼ରେକା କାଜା ଦିନା ଆ଼ନେ।"