1 "ହେ଼ ଏ଼ସ୍‌କିଗାଟି ଲ଼କୁ, ମୀରୁ ଏ଼ୟୁ ଡାଗେ ୱା଼ଦୁ,

ଇଞ୍ଜାଁ ଆମ୍ବାଆରି ଡାବୁୟାଁ ହିଲାଉ,

ଏ଼ୱାସି ୱା଼ପେସି; ମୀରୁ ୱା଼ଦୁ, କଡାଦୁ ଅ଼ଡ଼େ ତିଞ୍ଜୁ;

ହାଅ, ୱା଼ଦୁ, ଡାବୁୟାଁ ଅ଼ଡ଼େ ଏ଼ନାଆଁ ହୀଆନା

ଅଙ୍ଗୁରି ରାସା ଅ଼ଡ଼େ ପା଼ଲୁ କଡାଦୁ।

2 ଏମିନାୟି ତିନାଆଗାଟାୟି ଏ଼ଦାଆଁତାକି ଏ଼ନାଆଁତାକି ଡାବୁୟାଁ କାର୍ଚୁ କିହିମାଞ୍ଜେରି ?

ଏ଼ନାୟି ପାଞ୍ଜି କିଆଗାଟାୟି ଏ଼ଦାଆଁତାକି ଏ଼ନାଆଁତାକି କାମା କିହିମାଞ୍ଜେରି ?

ମ଼ନ ହୀହାଁ ନା଼ କାତା ୱେଞ୍ଜାଦୁ ଅ଼ଡ଼େ ନେହିଁ ରା଼ନ୍ଦା ତିଞ୍ଜୁ

ଅ଼ଡ଼େ ନେହିଁ ରା଼ନ୍ଦା ତିଞ୍ଜାହାଁ ମୀ ଜୀୱୁତି ରା଼ହାଁ କିଦୁ।

3 କିର୍ୟୁଁ ଅଡାଦୁ ଅ଼ଡ଼େ ନା଼ ତା଼ଣା ୱା଼ଦୁ; ୱେଞ୍ଜୁ, ଆତିହିଁ ମୀ ଜୀୱୁ ନୀଡିନେ;

ଇଞ୍ଜାଁ, ନା଼ନୁ ମୀ ତଲେ ର଼ କା଼ଲେଏତି ରା଼ଜିମା଼ନା,

ଇଚିହିଁ, ଦାୱୁଦତି କ଼ସମି ସାତାତି କାର୍ମା ତୀରି କିଇଁ।

4 ମେହ୍‌ମୁ, ନା଼ନୁ ଏ଼ୱାଣାଇଁ ଦେ଼ସାତି ଲ଼କୁ ତାକି ସା଼କି ଲେହେଁ

ଦେ଼ସାତି ଲ଼କୁ ନ଼କିତା ନ଼କାଲି ଅ଼ଡ଼େ ହୁକୁମି ହୀନାଣି ଲେହେଁ କିହାମାଇଁ।

5 ମେହ୍‌ମୁ, ଏମିନି କୂଡ଼ାତି ନୀନୁ ପୁଞ୍ଜି ହିଲଅତି,

ଏ଼ଦାଣି ନୀନୁ ହା଼ଟିଦି ଅ଼ଡ଼େ ଏମିନି କୂଡ଼ା ନିଙ୍ଗେ ପୁଞ୍ଜାଆତେ,

ଏ଼ଦି ନୀ ନ଼କିତା ହଟାନେ, ପ୍ରବୁ ନୀ ମାହାପୂରୁ ଅ଼ଡ଼େ ଇସ୍ରାୟେଲତି ଦାର୍ମୁଗାଟି ମାହାପୂରୁ ତାକି ଈଦି ଆ଼ନେ;

ଇଚିହିଁ ଏ଼ୱାସି ନିଙ୍ଗେ ଗା଼ୱୁରମି କିହାମାଞ୍ଜାନେସି।

6 ଏମିନି ପାତେକା ପ୍ରବୁଇଁ ମେ଼ଡ଼ା ଆ଼ହିମାନାଇ,

ଏଚେ଼ପାତେକା ମୀରୁ ଏ଼ୱାଣାଇଁ ପାରାଦୁ,

ଏଚେ଼ପାତେକା ଏ଼ୱାସି ଡାଗେ ମାନେସି,

ଏଚେ଼ପାତେକା ଏ଼ୱାଣି ତା଼ଣା ପ୍ରା଼ତାନା କିଦୁ।

7 ଲାଗେଏତାସି ତାନି ଜିରୁ ଅ଼ଡ଼େ ଦାର୍ମୁ ହିଲାଆଗାଟାସି ତାନି ଅଣ୍‌ପୁ ପିସ୍‌ପେସି;

ଇଞ୍ଜାଁ, ଏ଼ୱାସି ପ୍ରବୁତି ୱାକି ୱେଣ୍ତାପେସି,

ଏଚେଟିଏ ଏ଼ୱାସି ଏ଼ୱାଣାଇଁ କାର୍ମା ମେହ୍‌ନେସି;

ଅ଼ଡ଼େ, ଏ଼ୱାସି ନା଼ ମାହାପୂରୁ ୱାକି ୱେଣ୍ତାପେସି,

ଇଚିହିଁ ଏ଼ୱାସି ହା଼ରେକା ପା଼ପୁ ମ୍ଣେକ୍‌ନେସି।

8 ଏ଼ନିଇଚିହିଁ ପ୍ରବୁ ଏଲେଇଞ୍ଜି ମାନେସି, ନା଼ ଅଣ୍‌ପୁ ବାରେ ମୀ ଅଣ୍‌ପୁ ଲେହେଁ ଆ଼ଏ,

କି ମୀ ଜିରୁ ନା଼ ଜିରୁ ଲେହେଁ ଆ଼ଏ।

9 ଇଚିହିଁ ଦାର୍‌ତି କିହାଁ ହା଼ଗୁପା଼କା ଏ଼ନିକିଁ ପାଡାଆ଼ହାମାନେ,

ଏଲେକିହିଁ ନା଼ ଜିରୁ ବାରେ ମୀ ଜିରୁ କିହାଁ ଅ଼ଡ଼େ ନା଼ ଅଣ୍‌ପୁ ବାରେ ମୀ ଅଣ୍‌ପୁ କିହାଁ ପାଡାଆ଼ତାୟି।

10 ଏ଼ନିଇଚିହିଁ ଏ଼ନିକିଁ ପିୟୁ ଅ଼ଡ଼େ ପେଣ୍ତି ହା଼ଗୁଟି ଡ଼଼ଇ ୱା଼ନେ ଅ଼ଡ଼େ ଏମ୍ବାଆଁ ୱେଣ୍ତା ହାଲେଏ,

ସାମା ବୂମିତି ଊତ୍‌ନେ, ଇଞ୍ଜାଁ ପା଼ଡ଼େୟି ଅ଼ଡ଼େ ଜା଼ଡ଼ା ନେୟିଁ କିହାଁ ମାଟିନାଣାକି ବିଚା ଅ଼ଡ଼େ ତିନାରାକି କା଼ଦି ହୀନେ;

11 ନା଼ ଗୂତିଟି ହ଼ତି ବ଼ଲୁ ଏଲେକିହିଁ ଆ଼ନେ;

ଏ଼ଦି ଉଜେଏ ଆ଼ହାଁ ନା଼ ତା଼ଣା ୱେଣ୍ତା ୱା଼ଏ,

ସାମା ନା଼ନୁ ଏ଼ନାଆଁ ମ଼ନ କିଇଁ, ଏ଼ଦାଆଁ ପୂରା କିନେ

ଅ଼ଡ଼େ ଏମିନି କାମା ତାକି ନା଼ନୁ ପାଣ୍ତାମାଇଁ, ଏ଼ଦି ପୂରା ଆ଼ନେ।

12 ଏ଼ଦାଆଁତାକି ମୀରୁ ରା଼ହାଁ ତଲେ ହ଼ଚାହାଁ ହିତ୍‌ଡ଼ି ତଲେ ନ଼କି ନ଼କିତା ଅ଼ୱି ଆ଼ଦେରି;

ହ଼ର୍‌କା ଅ଼ଡ଼େ ଊଣା ହ଼ର୍‌କା ମୀ ନ଼କିତା କାଜା ଗିୟାଁତଲେ ପା଼ଚିନୁ

ଅ଼ଡ଼େ ବୂମିତି ମା଼ର୍‌କା ବାରେ ଟାପୁଡ଼ି ୱେ଼ନୁ।

13 ହା଼ପ୍‌କା ମା଼ର୍‌କା ବାଦୁଲି ଦେବଦାରୁ ଅ଼ଡ଼େ ଅଣ୍‌ଙ୍ଗ ହା଼ପ୍‌କା ବାଦୁଲି ବେତ୍‌ଲା ମା଼ର୍‌ନୁ ନେୟିଁନୁ;

ଇଞ୍ଜାଁ, ଏ଼ଦି ପ୍ରବୁତି ଦ଼ରୁ ଲେହେଁ ଅ଼ଡ଼େ ନା଼ସାଆ଼ଆ କା଼ଲେଏ ଡ଼ୟିନି ସିନା ଲେହେଁ ଆ଼ନେ।"