ଜିସା 34

ସାତ୍ରୁୟାଁଣି ମାହାପୂରୁତି ଡଣ୍ତ

1 ଏ଼ ଦେ଼ସାତାତେରି, ଡାଗେ ୱା଼ହାଁ ୱେଞ୍ଜୁ, ମୀରୁ ମ଼ନ ହୀଦୁ; ଦାର୍‌ତି ଅ଼ଡ଼େ ଏମ୍ବାଆଁ ମାନାୟି ଅ଼ଡ଼େ ଏମ୍ବାଟି ଆ଼ହାମାନି ଆ଼ସ୍ତି ୱେନାପେ। 2 ଇଚିହିଁ ଦେ଼ସାତି ବାରେ ଲ଼କୁ କ଼ପାଟି ପ୍ରବୁତି କାର୍‌ବି ଅ଼ଡ଼େ ଏ଼ୱାରି ବାରେ ରିଜାରି କ଼ସ୍‌କା କ଼ପାଟି ତାନି ହା଼ରେକା କ଼ପା ମାନେ; ଏ଼ୱାସି ଏ଼ୱାରାଇଁ ତୀରେ ତଲେ ନା଼ସା କିହାମାନେସି, ଏ଼ୱାସି ଏ଼ୱାରାଇଁ ହା଼ନି ପାତେକା ହେର୍‌ପା ମାନେସି। 3 ତାମି ପା଼ୟ୍‌ୱି ଆ଼ତି ଲ଼କୁ ପାଙ୍ଗାତା ମେତ୍‌ପି ଆ଼ନେରି, ତାମି ମାଡ଼୍‌ହାଟି ଲାଗେଏତି ଗାନ୍ଦା ହ଼ନେ, ଅ଼ଡ଼େ ଏ଼ୱାରି ନେତେରି ତଲେ ହ଼ର୍‌କା ରେ଼ଚାହାନୁ। 4 ଇଞ୍ଜାଁ, ହା଼ଗୁପା଼କାତି ବାରେ ଜୁଜୁ କିନାରି ନା଼ସା ଆ଼ନେରି ଅ଼ଡ଼େ ହା଼ଗୁ ରୂପିତି ପତି ଲେହେଁ ରୂପ୍‌ୱି ଆ଼ନେ; ଅ଼ଡ଼େ, ଏ଼ନିକିଁ ଅଙ୍ଗୁରିମା଼ଡ଼ାତି ୱା଼ଡ଼ିତି ଆ଼କୁ ଅ଼ଡ଼େ ତ଼ୟା ମା଼ର୍‌ନୁତି ୱା଼ଡ଼ିତି ଆ଼କୁ ଡୁଲିନେ, ଏଲେକିଁ ତାମି ଜୁଜୁ କିନାରି ବାରେ ନା଼ସା ଆ଼ନେରି।

5 ଇଚିହିଁ ନା଼ କାଣ୍ତା ଲାକପୂରୁ କେ଼ପ୍‌ୱି ଆ଼ହାମାନେ; ମେହ୍‌ଦୁ ଏ଼ଦି ବିଚାରା କିହାଲି ଇଦମ ଅ଼ଡ଼େ ମା଼ ବା଼କାଗାଟି ଲ଼କୁ ମୁହେଁ ରିନେ। 6 ପ୍ରବୁତି କାଣ୍ତା ନେତେରିତା ନେଞ୍ଜାମାନେ, ଏ଼ଦି କଡ଼୍‌ୱା ଅ଼ଡ଼େ ମେ଼ଣ୍ତା ଡା଼ଲୁ ଅ଼ଡ଼େ ଗରିତି ନେତେରି ତଲେ, ଅ଼ଡ଼େ ମେ଼ଣ୍ତାତି ଟା଼କୁୟାଁ କଡ଼୍‌ୱାତା ନେଞ୍ଜାମାନେ; ଇଚିହିଁ ବସ୍‌ରାତା ପ୍ରବୁତି ର଼ ପୂଜା ପିଣ୍ତା ଅ଼ଡ଼େ ଇଦମ ଦେ଼ସାତା ର଼ କାଜା ପା଼ୟିନାୟି ଆ଼ନେ। 7 ଇଞ୍ଜାଁ, ଏ଼ୱାସିକା ତଲେ ଜା଼ଡ଼ା କ଼ଡି, ଡ଼ୁକି ତଲେ ବାଚା ୱା଼ନେ; ଏଚେଟିଏ ତାମି ବୂମି ନେତେରି ଗହ୍‌ନେ ଅ଼ଡ଼େ ତାମି ଦୂଡ଼ି କଡ଼୍‌ୱାତା ନେଞ୍ଜିନେ। 8 ଇଚିହିଁ ଈଦି ପ୍ରବୁତି ବାଦୁଲି ଅ଼ନି ଦିନା, ଈଦି ସିୟନତି ବାଦୁଲି ହୀନି ର଼ ବାର୍ସା।

9 ଇଞ୍ଜାଁ, ଇଦମତି କାଡା ବାରେ ଦୁପ୍‌ଣିତା ଅ଼ଡ଼େ ଏମ୍ବାତି ଦୂଡ଼ି ଗାନ୍ଦୁକିତା ଆଣ୍ତିନେ ଅ଼ଡ଼େ ଏମ୍ବାତି ବୂମି ଡ଼ୀଞ୍ଜିନି ଦୁପ୍‌ଣି ଆ଼ନେ। 10 ଏ଼ଦି ଲା଼ଆଁ ମାଦେନା ଡୁମ୍ବେଏ; ଅ଼ଡ଼େ ଏମ୍ବାତି ବ଼ୟିଁ କା଼ଲେଏ ହ଼ନେ; ପା଼ଟୁ ପା଼ଟୁ ତାକି ଏ଼ଦି ବାଃଲି ବୂମି ଆ଼ହାଁ ଡ଼ୟିନେ; ଅ଼ଡ଼େ ଏମ୍ବାଟି ଏଚେଲା ଆମ୍ବାଆରି ତା଼କଅରି। 11 ଡେ଼ଗାୟାଁ ଅ଼ଡ଼େ ସାହିଁୟାଁ ଏ଼ଦାଣି ଅଦିକାରା କିନୁ; କର୍‌କଟି ଅ଼ଡ଼େ କାଃୱା ଏ଼ ବୂମିତା ବାସା କିନୁ; ଇଞ୍ଜାଁ ଏ଼ଦାଣି ଲାକ ଗୂର୍‌ନି ଡ:ରି ଅ଼ଡ଼େ ତ଼ଞ୍ଜାଆ଼ଆଗାଟି ଉଲୁମି ଲା଼ଚିନେସି। 12 ଏ଼ୱାରି ଏମ୍ବାତି କାଜାରାଇଁ ସା଼ଲୱି କିହାଲି ହା଼ଟିନେରି; ସାମା ଆମ୍ବାଆସି ଏମ୍ବାଆଁ ଡ଼ୟଅରି ଅ଼ଡ଼େ ଏମ୍ବାତି କାଜାରି ବାରେ ନା଼ସା ଆ଼ନେରି। 13 ଏମ୍ବାତି ଇଲ୍‌କାଣା ହା଼ପ୍‌କା ଅ଼ଡ଼େ ଏମ୍ବାତି ବାରେ କ଼ଟାତା କା଼ଜାୱାଣି ଅ଼ଡ଼େ ହା଼ପ୍‌କା ମା଼ଡ଼ା ପାଡାଆ଼ନୁ, ଅ଼ଡ଼େ ଏ଼ଦି ନାକାୟାଁତି ବାସା ଟା଼ୟୁ ଅ଼ଡ଼େ କର୍‌କଟି ପଟାୟାଁତି ମେୟିଁନି ଟା଼ୟୁ ଆ଼ନେ। 14 ଇଞ୍ଜାଁ, ଏମ୍ବାଆଁ ଜା଼ଡ଼ା ଜ଼ନ୍ତୟାଁ ଗଦ କ୍ଡାଃନିୟାଁ ତଲେ ଆଣ୍ତିନୁ, ଅ଼ଡ଼େ ଗରି ତାନି ତ଼ଡ଼ୁତି ହା଼ଟିନେ; ଲା଼ଆଁ ଡୂମ୍ବାୟାଁ ଜ଼ମିନି ଟା଼ୟୁ ପାରାଲି ୱା଼ନୁ। 15 ଏ଼ ଟା଼ୟୁତା କର୍‌କଟି ଜାହାରା ବ଼ଣ ର଼ସାହାଁ ଗୁଡୁୟାଁ ଇଟିନେ ଅ଼ଡ଼େ ହୀପାୟାଁ ପିଣ୍‌ହାଁ ତାନି ସା଼ୟିଁ ଡ଼଼ଇ କୂଡ଼ିକିନେ; ଅ଼ଡ଼େ, ଲେ଼ଡ଼୍‌କା ବାରେ ଜାହାରା ଜାହାରା ତ଼ଡ଼ୁ ତଲେ ଏମ୍ବାଆଁ ରୁଣ୍ତା ଆ଼ନୁ।

16 ମୀରୁ ପ୍ରବୁତି ରୂପିତି ପତିଟି ପାରାହାଁ ପ଼ଡ଼ୱି ଆ଼ଦୁ; ଈୱାଆଁ ବିତ୍ରାଟି ରଣ୍ତିୱା ପୂରା ଆ଼ଆନା ଡ଼ୟେଏ, ଆମ୍ବାଆସି ଜାହାରା ତ଼ଡ଼ୁ ହିଲାଆଗାଟାସି ଆ଼ଏ; ଇଚିହିଁ ନା଼ ଗୂତି ତଲେ ଏ଼ୱାସି ଈଦାଆଁ ହୁକୁମି କିହାମାନେସି ଅ଼ଡ଼େ ତାନି ଜୀୱୁ ଏ଼ୱାରାଇଁ କୂଡ଼ି କିହାମାନେ। 17 ଇଞ୍ଜାଁ, ଏ଼ୱାସି ଏ଼ୱାରି ତାକି ପାଦି କିହାମାନେସି ଅ଼ଡ଼େ ତାନି କେୟୁ ଲା଼ଚିନି ଡ:ରି ତଲେ ଏ଼ଦାଆଁ ବା଼ଗା କିହାଁ ଏ଼ୱାରାଇଁ ହୀହାମାନେସି; ଏ଼ୱାରି ଏ଼ଦାଆଁ କା଼ଲେଏ ତାକି ଅଦିକାରା କିନେରି, ଏ଼ୱାରି ପା଼ଟୁ ପା଼ଟୁ ତାକି ଏମ୍ବାଆଁ ବାସା କିନେରି।