ଜିସା 62

ସିୟନତି ପୁଃନି ଦ଼ରୁ

1 ନା଼ନୁ ସିୟନ ତାକି ପାଲେଏ ଡ଼ୟଅଁ, ଅ଼ଡ଼େ ଜିରୁସାଲମ ତାକି ଜ଼ମଅଁ,

ଏଚେ଼ପାତେକା ତାନି ଦାର୍ମୁ ଉଜେଡ଼ି ଲେହେଁ ଅ଼ଡ଼େ ତାନି ଗେଲ୍‌ପିନାୟି ଡ଼ୀଞ୍ଜିମାନି ଦୀୱଁ ସମାନା ତ଼ଞ୍ଜା ଆ଼ଏ।

2 ଇଞ୍ଜାଁ, ଏଟ୍‌କା ଦେ଼ସାତାରି ନୀ ଦାର୍ମୁ ଅ଼ଡ଼େ ବାରେ ରାଜାୟାଁ ନୀ ଗା଼ୱୁରମି ମେହ୍‌ନେରି;

ଅ଼ଡ଼େ ନୀନୁ ପ୍ରବୁତି ଗୂତି ତଲେ ର଼ ପୁଃନି ଦ଼ରୁଟି ୱେ଼ଙ୍ଗିଦି।

3 ଅ଼ଡ଼େ, ନୀନୁ ପ୍ରବୁତି କେୟୁତା ର଼ ନେହିଁ ଟ଼ପେରି ସମାନା

ଅ଼ଡ଼େ ନୀ ମାହାପୂରୁ କେୟୁତା ର଼ ରାଜା ଟ଼ପେରି ଲେହେଁ ଆ଼ଦି।

4 ନୀନୁ ପିସ୍ତାତି ଇଞ୍ଜିଁ ଦ଼ରୁ ବେଟାଆ଼ଅତି, କି ନୀ ଦେ଼ସା ତାଲି ତାଞ୍ଜି ହିଲାଆଗାଟାୟି ଇଞ୍ଜିଁ ହା଼ଟଅରି;

ସାମା ନୀନୁ ହିପ୍‌ସିବା*62:4 ହିପ୍‌ସିବା/ ରା଼ହାଁଗାଟାୟି ଅ଼ଡ଼େ ନୀ ଦେ଼ସା ବିୟଲା*62:4 ବିୟଲା/ ବୀହା ଆ଼ତାୟି ଦ଼ରୁଟି ୱେ଼ଙ୍ଗିନେ;

ଇଚିହିଁ ପ୍ରବୁ ନୀ ତା଼ଣା ରା଼ହାଁ ଆ଼ନେସି ଅ଼ଡ଼େ ନୀ ଦେ଼ସା ବୀହା ଆ଼ତାୟି ଆ଼ନେ।

5 ଦାଂଗ୍‌ଣେଏସି ଏ଼ନିକିଁ ଡ଼ାଆ ମା଼ଙ୍ଗାନି ବୀହା ଆ଼ନେସି,

ଏଲେକିହିଁ ନୀ ମୀର୍‌କା ନିଙ୍ଗେ ବୀହା କିୟାନେରି;

ଇଞ୍ଜାଁ ହନେଏସି ଏ଼ନିକିଁ ମା଼ଙ୍ଗାନି ତା଼ଣା ରା଼ହାଁ କିନେସି,

ଏଲେକିହିଁଏ ନୀ ମାହାପୂରୁ ନୀ ତା଼ଣା ରା଼ହାଁ କିନେସି।

6 ଏ଼ ଜିରୁସାଲମ, ନା଼ନୁ ନୀ କ଼ଟା କାତି ଲାକ କା଼ଃନାରାଇଁ ଇଟାମାଇଁ;

ଏ଼ୱାରି ଲା଼ଆଁୟାଁ କି ମାଦେନା ଏଚେଲା ପାଲେଏ ଡ଼ୟଅରି।

7 ଏ଼ ପ୍ରବୁଇଁ ଅଣ୍‌ପିକିନି ଲ଼କୁ, ଏଚେ଼ପାତେକା ଜିରୁସାଲମତି ତୀରି କିଅସି

ଅ଼ଡ଼େ ଦାର୍‌ତିତା ତାନି ରା଼ହାଁତି କାତା ଏପ୍‌ଅସି,

ଏଚେ଼ପାତେକା ମୀରୁ ଜ଼ମାଆଦୁ, କି ଏ଼ୱାଣାଇଁ ଜ଼ମାଲି ହୀଆଦୁ।

8 ପ୍ରବୁ ତାନି ଟିଃନି କେୟୁ ଅ଼ଡ଼େ ବା଼ଡ଼୍‌ୟୁଗାଟି ବାହା ତଲେ ପାର୍‌ମାଣା କିହାମାନେସି,

ନା଼ନୁ ସାତେଏ ମୀ ଆର୍ନା ମୀ ସାତ୍ରୁୟାଁ କା଼ଦି ଆ଼ହାଲି ହୀଅଁ ଅ଼ଡ଼େ ଏ଼ନାଆଁତାକି ମୀରୁ କସ୍ତ କିହିମାଞ୍ଜେରି,

ମୀ ଏ଼ ଅଙ୍ଗୁରି ରାସା ଏଟ୍‌କା ଦେ଼ସାତାରି ଅ଼ଡ଼େ ଗହ୍‌ଅରି।

9 ସାମା ଆମ୍ବାଆରି ଏ଼ଦାଆଁ କୂଡ଼ି କିହାମାନେରି,

ଏ଼ୱାରି ଏ଼ଦାଆଁ ତିଞ୍ଜାହାଁ ପ୍ରବୁତି ରା଼ହାଁ କିନେରି ଅ଼ଡ଼େ ଆମ୍ବାଆରି ଏ଼ଦାଆଁ କୂଡ଼ି କିହାମାନେରି,

ଏ଼ୱାରି ନା଼ ସୁଦୁ ଟା଼ୟୁତି ଦୁୱେରିତା ଗହ୍‌ନେରି।

10 ମୀରୁ ହାଜୁ, ଗା଼ଡ଼ା ଦୁୱେରି ହୀହାଁ ହାଜୁ; ଲ଼କୁତି ଜିରୁ ତିୟାରା କିଦୁ;

ରାଜା ଆଂଗେଣି ତିୟାରା କିହାଁ ପାଡିକିଦୁ;

ୱାଲ୍‌କା ବାରେ ପାଙ୍ଗାତା ହ଼ପ୍‌ହାଁ କୂଡ଼ି କିଦୁ;

ଲ଼କୁ ତାକି ର଼ ସିରେଲି ଗ଼ଞ୍ଜାହାଁ ଲାକ ପେର୍‌ଦୁ।

11 ମେହ୍‌ଦୁ, ପ୍ରବୁ ଦାର୍‌ତି ମୁଟ୍‌ପେ ତାକି ଈ କାତା ୱେସାମାନେସି,

"ମୀରୁ ସିୟନ ମା଼ଙ୍ଗାନି ୱେହ୍‌ଦୁ, ମେହ୍‌ମୁ ନୀ ଗେଲ୍‌ପିନାୟି ୱା଼ହିମାନେ,

ମେହ୍‌ମୁ ତାନି ଦା଼ନା ତାନି ତଲେ ମାନେ ଅ଼ଡ଼େ ତାନି କାମା ତାନି ତଲେ ମାନେ।"

12 ଅ଼ଡ଼େ ଲ଼କୁ ଏ଼ୱାରାଇଁ, "ସୁଦୁଗାଟି ଲ଼କୁ, ଅ଼ଡ଼େ ପ୍ରବୁତି ଗେଲ୍‌ପିଆ଼ତି ଲ଼କୁ ଇଞ୍ଜିଁ ହା଼ଟିନେରି।"

ଅ଼ଡ଼େ ନୀ ଦ଼ରୁ ମାହାପୂରୁତି ଜୀୱୁ ନ଼ନାୟି ଅ଼ଡ଼େ ପିସ୍‌ପି ଆ଼ଆତି ଗା଼ଡ଼ା ଇଞ୍ଜିଁ ୱେ଼ଙ୍ଗିନେ।