1 ଏଚିବେ଼ଲାତା ବଲ୍‌ଦନ୍‌ ମୀର୍‌ଏସି ବାବିଲତି ରାଜା ମରଦକ୍‌-ବଲ୍‌ଦନ୍‌ ହିଜକିୟ ତା଼ଣା ଆ଼କୁ ଅ଼ଡ଼େ ଦା଼ନା ପାଣ୍ତିତେସି; ଇଚିହିଁ ତାନି ର଼ଗ ଆ଼ତାଣି ଅ଼ଡ଼େ ନେହିଁ ଆ଼ହାମାନି କାବ୍ରୁ ଏ଼ୱାସି ୱେଞ୍ଜାମାଚେସି। 2 ଏଚେଟିଏ ହିଜକିୟ ଏ଼ୱାରାଇଁ ରା଼ହାଁ ଆ଼ହାଁ ତାନି ଦାରାଗାଟି ଦିଣ୍‌ସୁତି ଇଲୁ, ୱେଣ୍ତି, ବାଂଗାରା, ନେହିଁ ଗାନ୍ଦା ଦିଣ୍‌ସୁ, ହା଼ରେକା ଦାରା ନିୟୁଁ ଅ଼ଡ଼େ ତାନି ହା଼ରେକା ଦାରାଗାଟି ସାଜୁ ମାନି ଇଲୁ ଅ଼ଡ଼େ ତାନି ଇଲୁତି ବାରେ ଦିଣ୍‌ସୁ ଏ଼ୱାରାଇଁ ତ଼ସ୍ତେସି; ହିଜକିୟ ଏ଼ନାଆଁ ଏ଼ୱାରାଇଁ ତ଼ହ୍‌ଆତେସି, ଇଲେତି ଏ଼ନି ଦିଣ୍‌ସୁ ତାନି ଇଲୁତା କି ତାନି ବାରେ ରା଼ଜିତା ହିଲାଆତେ। 3 ଏଚିବେ଼ଲା ନ଼କିତା ଆ଼ନି କାତା ୱେହ୍‌ନି ଜିସାୟ ହିଜକିୟ ରାଜା ତା଼ଣା ୱା଼ହାଁ ଏ଼ୱାଣାଇଁ ଏଲେଇଚେସି, "ଈ ଲ଼କୁ ଏ଼ନାଆଁ ଇଞ୍ଜାତେରି ? ଏ଼ୱାରି ଏମ୍ବିଟି ନୀ ତା଼ଣା ୱା଼ହାମାଚେରି ?" ଏଚେଟିଏ ହିଜକିୟ ଏଲେଇଚେସି, "ଏ଼ୱାରି ହେକ ଦେ଼ସା ବାବିଲଟି ନା଼ ତା଼ଣା ୱା଼ହାମାନେରି।"

4 ଏଚେଟିଏ ଏ଼ୱାସି ୱେଚେସି, "ଏ଼ୱାରି ନୀ ଇଲୁତା ଏ଼ନାଆଁ ମେସାମାନେରି ?" ଏଚେଟିଏ ହିଜକିୟ ଏଲେଇଚେସି, "ନା଼ ଇଲୁତା ଏ଼ନା ଏ଼ନାୟି ମାନେ, ଏ଼ ବାରେ ଏ଼ୱାରି ମେସାମାନେରି; ଏ଼ନାଆଁ ନା଼ନୁ ଏ଼ୱାରାଇଁ ତ଼ସାହିଲଅଁ, ଇଲେତି ଏ଼ନି ଦିଣ୍‌ସୁ ନା଼ ଇଲୁତା ହିଲେଏ।"

5 ଏଚେଟିଏ ଜିସାୟ ହିଜକିୟଇଁ ଏଲେଇଚେସି, "ବା଼ଡ଼୍‌ୟୁଗାଟି ପ୍ରବୁତି ବ଼ଲୁ ୱେନାମୁ। 6 ମେହ୍‌ମୁ, ନୀ ଇଲୁତି ବାରେ ଦିଣ୍‌ସୁ ଅ଼ଡ଼େ ନୀଞ୍ଜୁ ପାତେକା ନୀ ଆକୁ ଆ଼ବାୟାଁତି କୂଡ଼ି କିତି ବାରେ ଦିଣ୍‌ସୁ ବାବିଲତା ଅ଼ୱିଆ଼ନି ବେ଼ଲା ୱା଼ହିମାନେ; ପ୍ରବୁ ଏଲେଇଞ୍ଜି ମାନେସି, ଇଚାୟିୱା ପିସ୍‌ପି ଆ଼ଏ। 7 ଅ଼ଡ଼େ, ନୀ ମୀର୍‌କା ବିତ୍ରା ଆମ୍ବାଆରି ନୀ ତା଼ଣାଟି ଜାର୍ନା ଆ଼ହାମାନେରି ଅ଼ଡ଼େ ନୀ ତା଼ଣାଟି ହ଼ନେରି, ଏ଼ୱାରାଇଁ ଏ଼ୱାରି ଅ଼ନେରି ଅ଼ଡ଼େ ଏ଼ୱାରି ବାବିଲ ରାଜାତି ଇଲୁତା ପେଜୁ ଆ଼ହାଁ ଡ଼ୟିନେରି।"

8 ଏଚିବେ଼ଲା ହିଜକିୟ ଜିସାୟଇଁ ଏଲେଇଚେସି, "ନୀନୁ ପ୍ରବୁତି ଏମିନି ବ଼ଲୁ ଜ଼ଲାମାଞ୍ଜି, ଏ଼ଦି ନେହେଁ।" ଏ଼ୱାସି ଅ଼ଡ଼େ ଏଲେଇଚେସି, "ଇଚିହିଁ ନା଼ ବେ଼ଲାତା ହିତ୍‌ଡ଼ି ଅ଼ଡ଼େ ସାତା ଡ଼ୟିନେ।"