1 ଇଚିହିଁ ପ୍ରବୁ ଜାକୁବଇଁ କାର୍ମା ମେହ୍‌ନେସି, ଇଞ୍ଜାଁ, ଇସ୍ରାୟେଲତି ୱେଣ୍ତେ ଆ଼ଚିନେସି ଅ଼ଡ଼େ ଏ଼ୱାରାଇଁ ତାମି ଦେ଼ସାତା ତୀରି କିନେସି, ଏଚେଟିଏ ଏଟ୍‌କା ଦେ଼ସାତି ଲ଼କୁ ଏ଼ୱାରି ତଲେ ଆଣ୍ତିନେରି, ଏ଼ୱାରି ଜାକୁବ କୂଡ଼ାତି ଜୂପ୍‌କା ଆ଼ନେରି। 2 ଇଞ୍ଜାଁ, ବାରେ କୂଡ଼ାତି ଲ଼କୁ ଏ଼ୱାରାଇଁ ଅ଼ହାଁ ତାମି ଜାହାରା ଟା଼ୟୁତା ଏପ୍‌ନେରି; ଅ଼ଡ଼େ ଇସ୍ରାୟେଲ କୂଡ଼ା ପ୍ରବୁତି ଦେ଼ସାତା ଏ଼ୱାରାଇଁ ହ଼ଲିୟା ହ଼ଲେଣି ଲେହେଁ ଅଦିକାରା କିନେରି; ଇଞ୍ଜାଁ, ଏ଼ୱାରି ଆମ୍ବାଆରି ତା଼ଣା ଦସ୍‌ପି ଆ଼ହା ମାଚେରି, ଏ଼ୱାରାଇଁ ଦସ୍‌ପାହାଁ ଅ଼ନେରି ଅ଼ଡ଼େ ଏ଼ୱାରି ତାମି ଦୂହିତାରା ଲାକ ସା଼ଲୱି କିନେରି।

3 ଇଞ୍ଜାଁ, ଏମିନି ଦିନା ପ୍ରବୁ ମିଙ୍ଗେ ମୀ ଦୁକୁ ଅ଼ଡ଼େ କସ୍ତଟି ଅ଼ଡ଼େ ଏମିନି ଆ଼ଟ୍‌ୱା ହ଼ଲିୟା କାମାତା ମିଙ୍ଗେ ହ଼ଲିୟା କାମା କିହାଲି ଆ଼ତେ, ଏମ୍ବାଟି ଜ଼ମି କିୟାନେସି, 4 ଏ଼ ଦିନା ମୀରୁ ବାବିଲ ରାଜା କ଼ପାଟି ଈ ପୁଣ୍‌ମ୍ବିକିନି କାତା ଅ଼ହାଁ ଏଲେଇଞ୍ଜେରି, କସ୍ତ ହିୟାନାସି ଏ଼ନିକିଁ ନା଼ସା ଆ଼ହାମାନେସି! ବାଂଗାରା ଗା଼ଡ଼ା ଏ଼ନିକିଁ ନା଼ସା ଆ଼ହାମାନେ! 5 ଆମ୍ବାଆରି କ଼ପାଟି ହା଼ରେକା କୂଡ଼ାତି କା଼ଲେଏ ୱେ଼ତେରି ଅ଼ଡ଼େ ହା଼ରେକା ଦେ଼ସାତି ଲ଼କୁଣି କାର୍‌ବିଟି ସା଼ଲୱି କିହାଁ କା଼ଲେଏ ସା଼ସ୍ତି ହୀତେରି, 6 ପ୍ରବୁ ଏ଼ ଲାଗେଏ ଲ଼କୁତି ବାଡ଼୍‌ଗା ଅ଼ଡ଼େ ସା଼ଲୱି କିନାରି ବାଡ଼୍‌ଗା ଡିକ୍‌ହା ମାନେସି। 7 ବାରେ ଦାର୍‌ତି ହିତ୍‌ଡ଼ି ଅ଼ଡ଼େ ସୁସ୍ତି ଆ଼ହାମାନେ; ଏ଼ୱାରି ରା଼ହାଁ ତଲେ ପା଼ଚିମାନେରି। 8 ହାଅ, ଦେବଦାରୁ ଅ଼ଡ଼େ ଲିବାନନତି ଏରସ ମା଼ର୍‌କା ବାରେ ମୀ କାତାତି ରା଼ହାଁ କିହାଁ ଏଲେଇନୁ, ମୀରୁ ନା଼ସା ଆ଼ହାଲିଏ, ଏମିନି ଟୂଣ୍‌ନାସି ଜିକେଏ ମାଙ୍ଗେ ଟୂଣ୍‌ହାଲି ୱା଼ହା ହିଲଅସି।

9 ତା଼ଡ଼େପୂରୁ ଡ଼଼ଇ ଦାର୍‌ତି ଲାକ ନିଙ୍ଗେ ଆଣ୍ତାଲି ତାକି କିଲିବିଲି ଆ଼ହିମାନେ; ଏ଼ଦି ନୀ ତାକି ହା଼ତି ଲ଼କୁଣି ଇଚିହିଁ ଦାର୍‌ତିତି ବାରେ କାଜାରାଇଁ ନିକ୍‌ନେ, ଅ଼ଡ଼େ ଏ଼ଦି କୂଡ଼ାତି ରାଜାୟାଁଇଁ ତାମି ସିଂଗାସାଣିଟି ନିକ୍‌ହାମାନେ। 10 ଏ଼ୱାରି ବାରେ ମିଙ୍ଗେ ଏଲେଇଞ୍ଜାନେରି, ନୀନୁ ଜିକେଏ ଏ଼ନାଆଁ ମା଼ ଲେହେଁ ବା଼ଡ଼୍‌ୟୁ ହିଲାଆଗାଟାତି ଆ଼ତି ? ନୀନୁ ଏ଼ନାଆଁ ମା଼ ସମାନା ଆ଼ତି ? 11 ନୀ ମା଼ନି ଅ଼ଡ଼େ ନୀ ସେର୍‌ଙ୍ଗିତି ଗିୟାଁ ତା଼ଡ଼େପୂରୁ ପାତେକା ରେ଼ଚା ୱା଼ହାମାନେ; ପୀଡ଼୍‌କା ନୀ ଡ଼଼ଇ ପା଼ସାମାନି ପା଼ସ୍‌ପନି ଅ଼ଡ଼େ ଲଦ୍‌ଣାୟାଁ ମିଙ୍ଗେ ପ୍ଡିକ୍‌ହାମାଞ୍ଜାନୁ।

12 ଏ଼ ୱେ଼ୟାଜାରା ହୁକା*, ମିଣ୍‌ସିମାନି ମୀର୍‌ଏଣା! ନୀନୁ ଏ଼ନିକିଁ ଲାକପୂରୁଟି ରିତି! ବାରେ କୂଲୁତାରାଇଁ ନୀନୁ ଲକ୍‌ହାମାଚି, ନୀନୁ ଏ଼ନିକିଁ ବୂମିତା ମେତ୍‌ପି ଆ଼ତି! 13 ଇଞ୍ଜାଁ, ନୀନୁ ମ଼ନ ମ଼ନତା ଏଲେଇଞ୍ଜାମାଚି, ନା଼ନୁ ଲାକପୂରୁ ହାଇଁ, ନା଼ନୁ ମାହାପୂରୁତି ହୁକାୟାଁ ଲାକ ନା଼ ସିଂଗାସାଣି ପାଡିକିଇଁ; ନା଼ନୁ ଟେ଼ବ୍ରି ବାଟାତି ସୁଦୁ ହ଼ରୁତା କୁଗିଇଁ; 14 ନା଼ନୁ ଦୂନ୍ଦ୍ରାତି ଲାକ ହାଇଁ; ନା଼ନୁ ବାରେ କିହାଁ ବା଼ଡ଼୍‌ୟୁ ଗାଟାତେଏଁ ସମାନା ଆ଼ଇଁ। 15 ସାମା ନୀନୁ ତା଼ଡ଼େପୂରୁତା, ଗା଼ଡ଼୍‌ୟୁତି ମୁଟ୍‌ପେତି ହାନ୍ଦିତା ମେତ୍‌ପି ଆ଼ଦି।

16 ଆମ୍ବାଆରି ମିଙ୍ଗେ ମେସ୍ତାନେରି, ଏ଼ୱାରି ତୀରେ ତଲେ ସିନିକିହାଁ ନୀ କାତା ଅଣ୍‌ପିହିଁ ଏଲେଇନେରି, ଆମ୍ବାଆସି ଦାର୍‌ତିତି ତୀର୍‌ଗି କିତେସି, ଆମ୍ବାଆସି ରା଼ଜିୟାଁଣି ତାରାତାରା କିତେସି; 17 ଆମ୍ବାଆସି ଦାର୍‌ତିତି ପା଼ଡ଼ୁ ଜା଼ଡ଼ା ଲେହେଁ କିତେସି ଅ଼ଡ଼େ ଏମ୍ବାତି ଗା଼ଡ଼ା ବାରେତି ନା଼ସା କିତେସି; ଆମ୍ବାଆସି ତାନି କାୟିଦି ଗାଟାରାଇଁ ତାମି ଇଲୁତା ହାଜାଲି ପିହ୍‌ଆତେସି, ଏ଼ୱାସି କି ଈ ମାଣ୍‌ସି ?

18 ବାରେ କୂଲୁତି ରାଜାୟାଁ, ଏ଼ୱାରି ବାରେ, ସାମ୍ବ୍ରମି ତଲେ ଜାହା ଜାହାରା ଇଲୁତା ହୁଞ୍ଜି ମାନେରି। 19 ସାମା ନୀନୁ କାମାହୀଆ କମା ସମାନା ଜାହାରା ମାହ୍‌ଣିମାଣ୍ତାଟି ହେକ ମେତ୍‌ପି ଆ଼ହାମାଞ୍ଜି; ନୀନୁ ପା଼ୱୁଲି ଡ଼଼ଇକା ୱିସାମାନି ମାଡ଼୍‌ହା ସମାନା ଆ଼ହାମାଞ୍ଜି, ଏମିନାୟି କାଣ୍ତା ତଲେ ଉସ୍‌ପି ଆ଼ହାଁ ଗା଼ଡ଼୍‌ୟୁତି ୱାଲ୍‌କା ବିତ୍ରା ମେତ୍‌ପି ଆ଼ହାଁ ପ୍ଡିପ୍‌କି ଆ଼ହାମାନି ସମାନା ଆ଼ହାମାଞ୍ଜି। 20 ନୀନୁ ଏ଼ୱାରି ତଲେ ମୁସ୍‌ପି ଆ଼ଅତି, ଇଚିହିଁ ନୀନୁ ନୀ ଦେ଼ସା ନା଼ସା କିହାମାଞ୍ଜି, ନୀନୁ ନୀ ଲ଼କୁଣି ପା଼ୟାମାଞ୍ଜି, ଲାଗେଏତି କାମା କିନି କୂଲୁତି ଦ଼ରୁ ଏଚେଲା ଜିକେଏ ରା଼ସ୍‌କି ଆ଼ଏ। 21 ତାନି ମୀର୍‌କା ନିଙ୍ଗାହାଁ ଏ଼ନିକିଁ ଦାର୍‌ତି ଅଦିକାରା କିଅରି ଅ଼ଡ଼େ ଦାର୍‌ତିତି ଗା଼ଡ଼ାତଲେ ନେଞ୍ଜିକିଅରି, ଏ଼ଦାଆଁତାକି ମୀରୁ ତାମି ଆକୁ ଆ଼ବାୟାଁତି ଦ଼ହ ତାକି ଏ଼ୱାରି ତାକି ପା଼ୟିନି ଟା଼ୟୁ ତିୟାରା କିଦୁ।

22 ଇଞ୍ଜାଁ, ବା଼ଡ଼୍‌ୟୁଗାଟି ପ୍ରବୁ ଏଲେଇଞ୍ଜି ମାନେସି, "ନା଼ନୁ ଏ଼ୱାରି କ଼ପାଟି ନିଙ୍ଗିଇଁ," ପ୍ରବୁ ଏଲେଇଞ୍ଜି ମାନେସି, "ନା଼ନୁ ବାବିଲଟି ଦ଼ରୁ ଅ଼ଡ଼େ ଡ଼ୟାମାନି, ମୀର୍‌କା ଅ଼ଡ଼େ ତାଙ୍ଗା ମୀର୍‌କାଣି ନା଼ସା କିଇଁ।" 23 ଅ଼ଡ଼େ, ବା଼ଡ଼୍‌ୟୁଗାଟି ପ୍ରବୁ ଏଲେଇଞ୍ଜି ମାନେସି, "ନା଼ନୁ ଏ଼ ଗା଼ଡ଼ାତି କର୍‌କଟି ପଟାତି ଅଦିକାରା ଅ଼ଡ଼େ ହା଼ରେକା ଏ଼ୟୁ କିଇଁ ଅ଼ଡ଼େ ନା଼ନୁ ନା଼ସା କିନି ହେ଼ପରି ତଲେ ଏ଼ଦାନି ହାଣ୍‌ଇଁ।"

24 ବା଼ଡ଼୍‌ୟୁଗାଟି ପ୍ରବୁ ପାର୍‌ମାଣା କିହାଁ ଏଲେଇଞ୍ଜାମାନେସି, "ନା଼ନୁ ଏ଼ନାଆଁ ଅଣ୍‌ପାମାଇଁ, ସାତେଏ ଏଲେକିହିଁ ଆ଼ନେ ଅ଼ଡ଼େ ନା଼ନୁ ଏ଼ନିକିଁ କାତା ଆ଼ହାମାଇଁ, ଏଲେକିହିଁଏ ତୀରି ଆ଼ନେ; 25 ନା଼ନୁ ନା଼ ଦେ଼ସାତା ଅସୁରିୟଇଁ ନା଼ସା କିଇଁ ଅ଼ଡ଼େ ନା଼ ହ଼ରୁ ଲାକ ଏ଼ଦାନି ପାଃଆନା ଡ଼଼ଇକା ୱିହ୍‌ଇଁ; ଆତିହିଁ ଲ଼କୁ ତା଼ଣାଟି ତାନି ଜୁୱେଡ଼ି ଅ଼ଡ଼େ ତାମି ବମିଟି ତାନି ବ଼ଜୁ ହେକ ଆ଼ନେ।" 26 ବାରେ ଦାର୍‌ତି ତାକି ଈ କାତା ତୀରି ଆ଼ହାମାନେ ଅ଼ଡ଼େ ଈ କେୟୁ ବାରେ କୂଡ଼ା ଲାକ ଦା଼ସାମାନେ। 27 ଇଚିହିଁ ବା଼ଡ଼୍‌ୟୁଗାଟି ପ୍ରବୁ କାତା ଆ଼ହାମାନେସି, ଅ଼ଡ଼େ ଏ଼ଦାନି ଆମ୍ବାଆସି ଏଟ୍‌କା କିନେସି ? ଅ଼ଡ଼େ ତାନି କେୟୁ ଦା଼ସ୍‌ପି ଆ଼ହାମାନେ, ଅ଼ଡ଼େ ଆମ୍ବାଆସି ଏ଼ଦାଆଁ ମୁଦା କିନେସି ?

28 ଏମିନି ବାର୍ସା ଆହସ୍‌ ରାଜା ହା଼ତେସି, ଏ଼ ବାର୍ସାତି ଈ କାବ୍ରୁ ୱେ଼ପ୍‌କିଆ଼ତେ।

29 ଏ଼ ପାଲେସ୍ତିୟ, ଏମିନି ବାଡ଼୍‌ଗା ନିଙ୍ଗେ ୱେ଼ତାତେ, ଏ଼ଦି ଡୀହାମାନେ ଇଞ୍ଜିଁ ମୀରୁ ବାରେ ରା଼ହାଁ କିଆଦୁ; ଇଚିହିଁ ରା଼ଚୁ ଡାକିଟି ବୀସା ରା଼ଚୁ ହ଼ନେ ଅ଼ଡ଼େ ଏ଼ଦାନି ପା଼ଡ଼େୟି ହିଚୁଗାଟି ଊମ୍ବିନି ର଼ ବୀସାଗାଟି ରା଼ଚୁ ଆ଼ନେ। 30 ଇଞ୍ଜାଁ, କା଼କୁଲିଗାଟି ପା଼ଣ୍‌ୱା ମୀର୍‌ଏସି ତିନେସି ଅ଼ଡ଼େ ଏ଼ନାଆଁ ହିଲାଆ ଲ଼କୁ ଆଜାଆ ରେ଼ଟୁ ଡୂରିନେରି; ଇଞ୍ଜାଁ, ନା଼ନୁ କାର୍‌ୱୁ ତଲେ ମୀ ଡାକିତି ପାଲେସ୍ତିୟ ଲ଼କୁଇଁ ନା଼ସା କିଇଁ ଅ଼ଡ଼େ ମୀ ଡ଼ୟାମାନି ଲ଼କୁ ପା଼ୟ୍‌ୱି ଆ଼ନେରି।

31 ଏ଼ ଗା଼ଡ଼ା ଦୁୱେରି, କା଼ଲୱି ଆ଼ମୁ; ଏ଼ ଗା଼ଡ଼ା, ଡ଼ୀମୁ; ଏ଼ ପାଲେସ୍ତିୟ, ନୀ ବାରେ ରୂୟା ହାଜାମାନେ; ଇଚିହିଁ ଟେ଼ବ୍ରି ୱାକିଟି ବ଼ୟିଁ ୱା଼ହିମାନେ ଅ଼ଡ଼େ ଆମ୍ବାଆସି ତାନି ତୀରିକିତି ବେ଼ଲାତା ହେକ ନିଚିହିଲଅସି।

32 ଅ଼ଡ଼େ, ଈ କୂଲୁତି କାବ୍ରୁ ହୀନାରାଇଁ ଏ଼ନି କାତା ୱେସ୍‌ପିଆ଼ନେ ? ଈ, ପ୍ରବୁ ସିୟନତି ପୁନାଦି କିହାମାନେସି ଅ଼ଡ଼େ ଏମ୍ବାଆଁ ତାନି ଦୁକୁଗାଟି ଲ଼କୁ ଜ଼ମିନେରି।