1 ମେହ୍‌ଦୁ, ପ୍ରବୁତି କେୟୁ ଊଣା ଆ଼ହାହିଲେଏ, କି ଏ଼ଦି ଗେଲ୍‌ପାଲି ଆ଼ଡେଏ, କି ତାନି କିର୍ୟୁଁ ବେ଼ରା ଆ଼ହାହିଲେଏ, କି ଏ଼ଦି ୱେଞ୍ଜାଲି ଆ଼ଡେଏ। 2 ସାମା ମୀ ଦ଼ହ ବାରେ, ମୀ ବିତ୍ରା ଅ଼ଡ଼େ ମୀ ମାହାପୂରୁତି ବିତ୍ରା ଏଟ୍‌କା କିହାମାଞ୍ଜାନେ ଅ଼ଡ଼େ ମୀ ପା଼ପୁ ବାରେ ମୀ ତା଼ଣାଟି ତାନି ମୂମ୍ବୁ ଡ଼ୁକ୍‌ହାମାନେ, ଏ଼ଦାଆଁତାକି ଏ଼ୱାସି ୱେନଅସି। 3 ଇଚିହିଁ ମୀ କେୟୁ ନେତେରିତା ଅ଼ଡ଼େ ମୀ ୱାସ୍‌କା ଲାଗେଏତି କାମା କିହାମାନୁ, ଅ଼ଡ଼େ ମୀ ଗୂତି ମିଚି ଜ଼ଲାମାନେ, ଅ଼ଡ଼େ ମୀ ୱେନ୍ଦରି ଲାଗେଏତି କାତା ୱେହ୍‌ନେ।

4 ଆମ୍ବାଆସି ନେହିଁ ତଲେ ଗ଼ହାରା ୱେନଅସି ଅ଼ଡ଼େ ଆମ୍ବାଆସି ସାତାତଲେ ଜ଼ଲଅସି; ଏ଼ୱାରି ମିଚି କାତାତା ଆ଼ସା କିନେରି ଅ଼ଡ଼େ ଉଜେଏତି କାତା ଜ଼ଲିନେରି; ଏ଼ୱାରି ଲାଗେଏତାଣି ମ଼ନତା ଇଟାହାଁ ଦ଼ହତି ଜାର୍ନି କିନେରି। 5 ଏ଼ୱାରି ବୀସାଗାଟି ରା଼ଚୁତି ଗୁଡୁୟାଁ ଅ଼ହ୍‌ନେରି ଅ଼ଡ଼େ କ଼ଚଟି ଲୂଲୁ ଆଲିନେରି; ଆମ୍ବାଆସି ଏ଼ୱାରି ଗୁଡୁୟାଁ ତିନେସି, ଏ଼ୱାସି ହା଼ନେସି, ଅ଼ଡ଼େ ଏ଼ୱାଆଁ ୱିସ୍‌ତିସାରେ ଏମ୍ବାଟି ବୀସାଗାଟି ରା଼ସ୍‌କା ହ଼ନୁ। 6 ଏ଼ୱାରି ଜା଼ଲା ବାସ୍ତେରି ଆ଼ଏ, କି ଏ଼ୱାରି ଜାହାରା କାମା ତଲେ ଜାହାରାଇଁ ପ୍ଡିକ୍‌ହା କଡଅରି; ଏ଼ୱାରି କାମା ବାରେ ଲାଗେଏତି କାମା ଅ଼ଡ଼େ ଏ଼ୱାରି କେୟୁତା ଲାଗେଏତି କାମା ଡ଼ୟିନେ। 7 ଏ଼ୱାରି ପା଼ୱୁଲି ଲାଗେଏତି କାମା ୱାକି ହଣ୍‌ନେ ଅ଼ଡ଼େ ଏ଼ୱାରି ଦ଼ହ ହିଲାଆଗାଟାରାଇଁ ପା଼ୟାଲି ତିୟାରା ଆ଼ନେରି; ଏ଼ୱାରି ଅଣ୍‌ପୁ ବାରେ ଲାଗେଏ କାମାତି ଅଣ୍‌ପୁ; ଏ଼ୱାରି ଜିରୁତା ନା଼ସା ଆ଼ନାୟି ଡ଼ୟିନେ। 8 ହିତ୍‌ଡ଼ିତି ଜିରୁ ଏ଼ୱାରି ପୁନଅରି ଅ଼ଡ଼େ ଏ଼ୱାରି ଜିରୁତା ଏ଼ନି ନୀହାଁୟି ହିଲେଏ; ଏ଼ୱାରି ଜାହାରା ତାକି ଡ:କ୍‌ଣି ଜିରୁ କିହାମାନେରି; ଆମ୍ବାଆସି ଏ଼ ଜିରୁତା ତା଼କିନେସି ଏ଼ୱାସି ହିତ୍‌ଡ଼ି ପୁନଅସି।

9 ଈଦାଆଁତାକି ନୀହାଁୟି ମା଼ ତା଼ଣାଟି ହେକ ଡ଼ୟିନେ, ଦାର୍ମୁ ମା଼ ତଲେ ଡ଼ୟେଏ; ମା଼ର ଉଜେଡ଼ିତି କା଼ଚାହାଁ ଡ଼ୟିନାୟି, ସାମା ମେହ୍‌ଦୁ ଆନ୍ଦେରି; ଉଜେଡ଼ିତି କା଼ଚାହାଁ ଡ଼ୟିନାୟି, ସାମା ମା଼ର ଆନ୍ଦେରିତା ତା଼କିନାୟି। 10 ମା଼ର କା଼ଣା ଲ଼କୁ ଲେହେଁ କାତି ତାକି ପାରିନାୟି, ହାଅ, କାଣ୍‌କା ହିଲାଆ ଲ଼କୁ ଲେହେଁ ମା଼ର ପାରିନାୟି; ମା଼ର ମିଡ଼୍‌ଅଲା ବେ଼ଲା ସମାନା ମାଦେନା ବେ଼ଲା ପୁଟିକିନାୟି; ମା଼ର ଆଙ୍ଗାଗାଟି ଲ଼କୁ ବିତ୍ରା ହା଼ତି ଲ଼କୁ ଲେହେଁ ମାନାୟି। 11 ମା଼ର ବାରେ ଅଃଅଡ଼ି ଲେହେଁ ଗାର୍ଜିନାୟି ଅ଼ଡ଼େ କୁଗୁରି ଲେହେଁ ଗୁଡ୍‌ରିନାୟି; ମା଼ର ନୀହାଁୟିତି କା଼ଚାହାଁ ଡ଼ୟିନାୟି, ସାମା ଏ଼ଦି ହିଲେଏ; ଗେଲ୍‌ପିନାଣି କା଼ଚାହାଁ ଡ଼ୟିନାୟି ସାମା ଏ଼ଦି ମା଼ ତା଼ଣାଟି ହେକ ମାନେ। 12 ଇଚିହିଁ ନୀ ନ଼କିତା ମା଼ ପା଼ପୁ ହା଼ରେକା ଗାଡି ଆ଼ହାମାନେ, ଅ଼ଡ଼େ ମା଼ ପା଼ପୁ ମା଼ କ଼ପାଟି ସା଼କି ହୀହିମାନେ; ଏ଼ନିଇଚିହିଁ ମା଼ ଲାଗେଏତି କାମା ମା଼ ତଲେ ମାନେ ଅ଼ଡ଼େ ମା଼ ଦ଼ହ ବାରେ ମା଼ର ପୁଞ୍ଜାମାନାୟି; 13 ଏ଼ଦି ର଼ ଦ଼ହ ଅ଼ଡ଼େ ପ୍ରବୁଇଁ ଊରିନାୟି ଅ଼ଡ଼େ ମା଼ ମାହାପୂରୁ ଜିରୁଟି ୱେଣ୍ତାହାନାୟି, ଲାଗେଏତି କାମା କିନାୟି, ଅ଼ଡ଼େ ଲାଗେଏତି କାତା ଜ଼ଲିନାୟି, ମିଚି କାତା ଆସାହାଁ ହିୟାଁଟି ହ଼ପ୍‌ନାୟି। 14 ଈଦାଆଁତାକି ନୀହାଁୟି ଡା଼ୟୁୱାକି ହାଜାମାନେ ଅ଼ଡ଼େ ଦାର୍ମୁ ହେକ ନିଚାମାନେ; ଡେ଼ଡ଼ା ଜିରୁତା ସାତା ମେଣ୍‌ଙ୍ଗାମାନେ ଅ଼ଡ଼େ ସ଼ଜେତାୟି ହ଼ଡାଲି ଆ଼ଡିହିଲେଏ। 15 ହାଅ, ସାତା ଊଣା ଆ଼ହାମାନେ ଅ଼ଡ଼େ ଆମ୍ବାଆସି ଲାଗେଏତି କାମା ପିହ୍‌ନେସି, ଏ଼ୱାସି ଜାହାରାଇଁ ସ଼ରୁ କିୱିଆ଼ତି ଲେହେଁ ଆ଼ନେସି; ଇଞ୍ଜାଁ ପ୍ରବୁ ଈ ବାରେ ମେସ୍ତେସି ଅ଼ଡ଼େ ନୀହାଁୟି ହିଲାଆକି ରା଼ହାଁ ଆ଼ଆତେସି।

16 ଅ଼ଡ଼େ ଏ଼ୱାସି ସିନିକିତେସି, କି ଏମିନି ମାଣ୍‌ସି ନୀଏଁ ହିଲଅସି, ଇଞ୍ଜାଁ ଗ଼ହାରା କିନାସି ଆମ୍ବାଆସି ହିଲଅସି ଇଞ୍ଜିଁ କାବା ଆ଼ତେସି; ଏ଼ଦାଆଁତାକି ତାନି ଜାହାରା ବାହା ତାଙ୍ଗେ ତାକି ଗେଲ୍‌ପିତେ ଅ଼ଡ଼େ ତାନି ଦାର୍ମୁ ତାଙ୍ଗେ ଆସା ଇଟିତେ। 17 ଇଞ୍ଜାଁ ଏ଼ୱାସି ବକ ପା଼ଟା ଲେହେଁତି ଦାର୍ମୁ ଅ଼ଡ଼େ ଗେଲ୍‌ପିନି ଟ଼ପେରି ତାନି ତା଼ର୍ୟୁଁତା ତୁର୍‌ହେସି; ଅ଼ଡ଼େ ଏ଼ୱାସି ବାଦୁଲି ଅ଼ନି ଲେହେଁତି ବାସ୍ତେରି ତୁର୍‌ହେସି ଅ଼ଡ଼େ ଜୀୱୁତି ସକା ସମାନା ରା଼ହାଁତି ସକା ତୁର୍‌ହେସି। 18 ଏ଼ୱାରି କାମାତି ଲେକା ତଲେ ଏ଼ୱାସି ଏ଼ୱାରାକି ପା଼ଡ଼େୟି ହୀନେସି, ତାନି କ଼ପାଟି ମାନି ଲ଼କୁଣି ଦାକା ହୀନେସି, ଅ଼ଡ଼େ ତାନି ସାତ୍ରୁୟାଁକି ତାମି କାମାତି ପା଼ଡ଼େୟି ହୀନେସି; ସାମ୍‌ଦୁରି ମାଦି ମାନି ଲ଼କୁକି ତାମି କାମାତି ପା଼ଡ଼େୟି ହୀନେସି। 19 ଏଚେଟିଏ ଲ଼କୁ ୱେ଼ଡ଼ା ହାଲ୍‌ୱୁ ୱାକିଟି ପ୍ରବୁ ଦ଼ରୁତି ଅ଼ଡ଼େ ୱେ଼ଡ଼ା ହ଼ପୁ ୱାକିଟି ଲ଼କୁ ତାନି ଗା଼ୱୁରମିତି ଆଜିନେରି; ଇଚିହିଁ ପ୍ରବୁତି ଊକ୍‌ଅଡ଼ି ତଲେ ହାଜିମାନି କାଡା ଲେହେଁ ସାତ୍ରୁୟାଁ ୱା଼ନେରି।

20 ଇଞ୍ଜାଁ ପ୍ରବୁ ଏଲେଇଞ୍ଜି ମାନେସି, "ସିୟନତି ଅ଼ଡ଼େ ଜାକୁବ ବିତ୍ରା ଆମିନିଗାଟାରି ଲାଗେଏ ତା଼ଣାଟି ୱେଣ୍ତିନେରି, ଏ଼ୱାରି ତା଼ଣା ର଼ ଗେଲ୍‌ପିନାସି ୱା଼ନେସି।" 21 ତାନି କାତା ପ୍ରବୁ ଏଲେଇଞ୍ଜି ମାନେସି, "ଏ଼ୱାରି ତଲେ ନା଼ ରା଼ଜିମା଼ନା ଈଦି, ନା଼ ଏମିନି ଜୀୱୁ ମୀ ଲାକ ଡ଼ୟିନେ ଅ଼ଡ଼େ ନା଼ ଏମିନି ବ଼ଲୁ ନା଼ନୁ ନୀ ଗୂତିତା ହୀହାମାଞ୍ଜାଇଁ, ଏ଼ଦି ନୀ ଗୂତିଟି ଅ଼ଡ଼େ ନୀ କୂଲୁତି ଗୂତିଟି ନୀଞ୍ଜୁଟିଏ କା଼ଲେଏ ତାକି ହେକ କିୱିଆ଼ଏ।" ଈ କାତା ପ୍ରବୁ ଏଲେଇଞ୍ଜି ମାନେସି।