1 ଆମ୍ବାଆରି ସା଼ୟେମି ତାକି ମିସରତା ହାନେରି ଅ଼ଡ଼େ ଗ଼ଡ଼ାୟାଁଣି ବା଼ର୍ସୁ କିନେରି ଇଞ୍ଜାଁ ରାତାୟାଁ ହା଼ରେକା ଆ଼ତାକି, ଅ଼ଡ଼େ ଗ଼ଡ଼ାୟାଁ ଲାକ ହ଼ନାରି ହା଼ରେକା ବା଼ଡ଼୍‌ୟୁ ଆ଼ତାକି ଏ଼ୱାରି ମୁହେଁ ନାମିନେରି; ସାମା ଇସ୍ରାୟେଲତି ଦାର୍ମୁ ଲେହେଁ ତାଣାଇଁ ସିନିକିଅରି, କି ପ୍ରବୁଇଁ ପାରଅରି, ଏ଼ୱାରି ଡଣ୍ତ ବେଟାଆ଼ନେରି! 2 ଆ଼ତିଜିକେଏ ଏ଼ୱାସି ବୁଦିଗାଟାସି ଅ଼ଡ଼େ ଏ଼ୱାସି ଦୁକୁଆ଼ୱି କିନେସି, ଇଞ୍ଜାଁ, ତାନି ବ଼ଲୁ ଉଜେଏ କିଅସି; ସାମା ଏ଼ୱାସି ଲାଗେଏ କାମା କିନାରି କୂଡ଼ା କ଼ପାଟି ଅ଼ଡ଼େ ଲାଗେଏ କାମାତା ସା଼ୟେମି କିନାରି କ଼ପାଟି ନିଙ୍ଗିନେସି। 3 ମିସରତାରି ମାଣ୍‌ସିୟାଁ ସାମା, ମାହାପୂରୁ ଆ଼ଏ ଅ଼ଡ଼େ ଏ଼ୱାରି ଗ଼ଡ଼ାୟାଁ ଜୀୱୁ ଆ଼ଏ, ଊୟୁଗାଟାଇ; ଇଞ୍ଜାଁ ପ୍ରବୁ ତାନି କେୟୁ ଦା଼ସ୍‌ତିସାରେ, ସା଼ୟେମି କିନାସି ପୁଟିକିହାଁ ରିନେସି ଅ଼ଡ଼େ ସା଼ୟେମି ବେଟାଆ଼ନାସି ରିହାହାନେସି, ଇଞ୍ଜାଁ ରିଆରିୱା ରହେଁଏ ନା଼ସା ଆ଼ନେରି।

4 ଇଚିହିଁ ପ୍ରବୁ ନାଙ୍ଗେ ଈ କାତା ଏଲେଇଞ୍ଜାତେସି, "ଏ଼ନିକିଁ ସିହଁ କ୍ଡାଃନି ଅ଼ଡ଼େ ଦାଂଗ୍‌ଣା ସିହଁ କ୍ଡାଃନି ତାନି ବେ଼ଟା ତାକି ଗାର୍ଜିନେ, ହା଼ରେ ହା଼ରେକା ଗ଼ଡ଼୍‌କା ଏ଼ଦାନି କ଼ପାଟି ହା଼ଟ୍‌କି ଆ଼ତିହିଁ ଜିକେଏ ଏ଼ଦି ଏ଼ୱାରି ହା଼ଡାତା ଆଜେଏ, କି ତାମି କା଼ଲୱିତା ଜାହାରାଇଁ ଊଣା କିଏ, ଏଲେକିହିଁଏ ବା଼ଡ଼୍‌ୟୁଗାଟି ପ୍ରବୁ ସିୟନ ହ଼ରୁତା ଅ଼ଡ଼େ ଏମ୍ବାତି ଊଣା ହ଼ର୍‌କାଣା ଜୁଜୁ କିହାଲି ରେ଼ଚା ୱା଼ନେସି। 5 ଏ଼ନିକିଁ ପଟାୟାଁ ଊମ୍ବି ଊମ୍ବି ଗେଲ୍‌ପିନୁ, ଏଲେକିଁ ବା଼ଡ଼୍‌ୟୁଗାଟି ପ୍ରବୁ ଜିରୁସାଲମତି ଗେଲ୍‌ପିନେସି; ଏ଼ୱାସି ଏ଼ଦାଆଁ ଗେଲ୍‌ପାହାଁ ମୁକ୍‌ଲୱି କିନେସି।"

6 ପ୍ରବୁ ଏଲେଇଚେସି, "ହେ଼ ଇସ୍ରାୟେଲତି ଲ଼କୁ, ଆମ୍ବାଆରି କ଼ପାଟି ମୀରୁ ହା଼ରେକା ପା଼ପୁ କିହାମାଞ୍ଜେରି, ଏ଼ୱାଣି ତା଼ଣା ୱେଣ୍ତା ୱା଼ଦୁ! 7 ଇଚିହିଁ ଏ଼ ଦିନାତା ମୀ ବାରେ ଜା଼ଣା ଜାହା ଜାହାରା କେୟୁ କେ଼ପିତି ୱେଣ୍ତି ଅ଼ଡ଼େ ବାଂଗାରା ପୂତ୍‌ଲା ଲେହେଁତି ପା଼ପୁ ଦିଣ୍‌ସୁ ମେତ୍‌ହା ତୁହ୍‌ନେରି। 8 ଏଚିବେ଼ଲାତା ଅସୁରିୟ କାଣ୍ତାତଲେ ନା଼ସା କିୱିଆ଼ନେ, ସାମା ମାଣ୍‌ସିତି କାଣ୍ତାତଲେ ଆ଼ଏ; ଇଞ୍ଜାଁ କାଣ୍ତା ଏ଼ୱାଣାଇଁ ଗୂହ୍‌ନେ, ସାମା ମାଣ୍‌ସିତି କାଣ୍ତା ଆ଼ଏ; ଅ଼ଡ଼େ, ଏ଼ୱାସି କାଣ୍ତା ନ଼କିଟି ହଣ୍‌ନେସି ଅ଼ଡ଼େ ତାନି ଦାଂଗ୍‌ଣାୟାଁ ହ଼ଲିୟା ଆ଼ନେରି। 9 ଇଞ୍ଜାଁ, ଆଜିହ଼ପେତି ତାନି ୱାଲି ମେଣ୍‌ଙ୍ଗା ହାନେ ଅ଼ଡ଼େ ତାନି ସା଼ୱୁକାରିୟାଁ ସିରେଲି ମେସାହାଁ କିଲିବିଲି ଆ଼ନେରି," ସିୟନତା ଆମ୍ବାଆରି ହିଚୁ ଅ଼ଡ଼େ ଜିରୁସାଲମତା ଆମ୍ବାଆରି ହିଚୁ ଗା଼ଡ଼୍‌ୟୁ ମାନେ, ଏ଼ ପ୍ରବୁ ଈ କାତା ଏଲେଇଞ୍ଜି ମାନେସି।