1 ଦମେସକ ତାକି ନ଼କିତା ଆ଼ନି କାତା, ମେହ୍‌ଦୁ, ଦମେସକ ଗା଼ଡ଼ା ଡ଼ୟେଏ, ଏ଼ଦି ନା଼ସା ଆ଼ହାଁ କାତିୟାଁ ନିଚାହାଁ ଡ଼ୟିନୁ। 2 ଅରୟର ଗା଼ଡ଼ା ବାରେ ପିସ୍‌ପି ଆ଼ହାମାନେ; ଏ଼ ବାରେ ଜ଼ନ୍ତୟାଁ ମେୟିଁନି ଟା଼ୟୁ ଆ଼ନେ, ଜ଼ନ୍ତ ଏମ୍ବାଆଁ ହୁଞ୍ଜିନୁ, ଅ଼ଡ଼େ ଏ଼ୱାସିକାଣି ଆଜିକିନାରି ଆମ୍ବାଆରି ଡ଼ୟଅରି। 3 ଅ଼ଡ଼େ, ଇପ୍ରୟିମତି ପାଡାଆ଼ତି କାତି ଅ଼ଡ଼େ ଦମେସକଟି ରା଼ଜି ଅ଼ଡ଼େ ଅରାମତି ଡ଼ୟାମାନାୟି ଡ଼ୁଗା ହାନେ; ବା଼ଡ଼୍‌ୟୁଗାଟି ପ୍ରବୁ ଏଲେଇଞ୍ଜି ମାନେସି, "ଏ଼ ବାରେ ଇସ୍ରାୟେଲ ମୀର୍‌କାତି ଗା଼ୱୁରମି ଲେହେଁ ଆ଼ନେ।"

4 "ଅ଼ଡ଼େ, ଏ଼ ଦିନାତା ଜାକୁବତି ଗା଼ୱୁରମି ଊଣା କିୱିଆ଼ନେ ଅ଼ଡ଼େ ତାନି କାଜା ଆଙ୍ଗା ଊଣା ଆ଼ନେ; 5 ଅ଼ଡ଼େ, ଏ଼ନିକିଁ ଆର୍ନା ଦା଼ଃନି ଲ଼କୁ ଗୁଡିୟାତି ଆର୍ନା କୂଡ଼ିକିନି ବେ଼ଲା ଅ଼ଡ଼େ ତାନି କେୟୁ ଜେ଼ଙ୍ଗୁ ଦା଼ଃନି ବେ଼ଲାତା, ଏ଼ନିକିଁ ଆମ୍ବାଆସି ରପାୟିମ ଡ଼଼ଇ ବୂମିତା ରିହାମାନି ଜେ଼ଙ୍ଗୁ କୂଡ଼ିକିନି ବେ଼ଲା ଆ଼ନେ, ଏଲେକିହିଁଏ ଆ଼ନେ। 6 ଆ଼ତିଜିକେଏ ଜୀତ ମା଼ର୍‌ନୁତି ପା଼ଡ଼େୟି ଡୂର୍‌ହା ଅ଼ତି ଡା଼ୟୁ ଏ଼ନିକିଁ ତାନି ପାଡାଆ଼ତି କମାତା ରିଣ୍ତି, ତୀନିଗଟା ପା଼ଡ଼େୟି ଅ଼ଡ଼େ ଆ଼ୟିତି ମା଼ର୍‌ନୁତି ପାଙ୍ଗା କମାତା ସା଼ରି, ପା଼ସାଗଟା ପା଼ଡ଼େୟି ଡ଼ୟିନେ, ଏଲେକିଁ ତାନିୱାୟି ଇଚାୟି ଡ଼ୟିନେ, ଈଦାଆଁ ପ୍ରବୁ ଇସ୍ରାୟେଲତି ମାହାପୂରୁ ଏଲେଇଞ୍ଜି ମାନେସି।"

7 ଏ଼ ଦିନା ମାଣ୍‌ସି ତାନି ଗା଼ଡ଼ି କିତାଣାଇଁ ସିନିକିନେସି ଅ଼ଡ଼େ ତାନି କାନୁ ଇସ୍ରାୟେଲତି ଦାର୍ମୁଗାଟି ମାହାପୂରୁଇଁ ସିନିକିନେ। 8 ଇଞ୍ଜାଁ, ଏ଼ୱାସି ତାନି କେୟୁତଲେ କେ଼ପିତି ପୂଜା ପିଣ୍ତାୟାଁ ୱାକି ସିନିକିଅସି, କି ତାନି ୱାଞ୍ଜୁ ତଲେ କିତି ଆସେର ପୂତ୍‌ଲା କି ୱେ଼ଡ଼ା ପୂତ୍‌ଲା ୱାକି ସିନିକିଅସି।

9 ଏ଼ ଦିନା ତାନି ଆ଼ଟ୍‌ୱା ଗା଼ଡ଼ା ବାରେ ଇସ୍ରାୟେଲ ମୀର୍‌କାତି ଆଜିତାକି ଜା଼ଡ଼ା ଅ଼ଡ଼େ ହ଼ରୁତି ଲାକ ପିସ୍ତି ଟା଼ୟୁ ଲେହେଁ ଆ଼ନେ ଅ଼ଡ଼େ ଦେ଼ସା ନା଼ସା ଆ଼ନେ।

10 ଇଚିହିଁ ମୀରୁ ମୀ ଗେଲ୍‌ପିନି ମାହାପୂରୁଇଁ ବା଼ଣା ଆ଼ହାମାଞ୍ଜେରି ଅ଼ଡ଼େ ମୀ ବା଼ଡ଼୍‌ୟୁ ଲେହେଁତି ପା଼କା କାତାତା ମ଼ନ ହୀହା ହିଲଅତେରି; ଏ଼ଦାଆଁତାକି ମୀରୁ ଅ଼ଜି ଅ଼ଜିତି ପା଼ଲା ଉହିମାଞ୍ଜେରି ଅ଼ଡ଼େ ଏଟ୍‌କା ଦେ଼ସାତି କ଼ଲମି କମା ତଲେ ଏ଼ଦାଆଁ ଦୂର୍‌ସିମାଞ୍ଜେରି; 11 ମୀରୁ ଉହିନି ଦିନା ଏମ୍ବାତି ସା଼ରିୱାକି ବେୟିଁ ଗୂର୍‌ଚି ମାଞ୍ଜେରି ଅ଼ଡ଼େ ଲା଼ଇଅ଼ଲି ମୀରୁ ମୀ ବିଚାତି ବ଼ଣ୍ତା ଦା଼ଲି କିହିମାଞ୍ଜେରି; ଆ଼ତିଜିକେଏ ଦୁକୁ ଅ଼ଡ଼େ କସ୍ତ ବେ଼ଲାତା ପା଼ଡ଼େୟି ନସ୍ତ ଆ଼ନେ।

12 ଅହ଼ତା, ହା଼ରେକା କୂଡ଼ାତି କା଼ଲୱି, ଏ଼ୱାରି ସାମ୍‌ଦୁରିତି କା଼ଲୱି ଲେହେଁ ଗାର୍ଜି ମାନେରି; ହା଼ରେକା ଦେ଼ସାତାରି ୱା଼ହିମାନେରି, ଏ଼ୱାରି କ୍ଡୁପ୍‌ହିମାନି କାଜା ୱା଼ରୁ ଲେହେଁ ୱା଼ହିମାନେରି! 13 ହା଼ରେକା ଦେ଼ସାତାରି, କାଜା ଏ଼ୟୁ ଉଣ୍ତା ୱା଼ନି ଲେହେଁ ୱା଼ହିମାନେରି; ସାମା ଏ଼ୱାସି ଏ଼ୱାରାଇଁ ଦାକା ହୀନେସି, ଏଚେଟିଏ ଏ଼ୱାରି ହେକ ହଣ୍‌ନେରି ଅ଼ଡ଼େ ଗା଼ଲି ନ଼କିତା ହ଼ରୁତି ପ଼ଡ଼ୁ ଲେହେଁ ଅ଼ଡ଼େ କାଜା ଗା଼ଲି ନ଼କିତା ରୁୱାଗା଼ଲିତି ଦୂଡ଼ି ଲେହେଁ ପେ଼ର୍‌ୱି ଆ଼ନେରି। 14 ମେହ୍‌ଦୁ, ମିଡ଼୍‌ଅଲା ବେ଼ଲା କିଲିବିଲି ଅ଼ଡ଼େ ଲା଼ଇ ୱେ଼ୟିନି ନ଼କେଏ ଏ଼ୱାରି ହିଲଅରି। ମାଙ୍ଗେ ଦୂହାତାରା ବା଼ଗା ଅ଼ଡ଼େ ମାଙ୍ଗେ ସ଼ରୁ କିହାମାଞ୍ଜାତାରା ବା଼ଗା ଈଦି।