1 ଇଞ୍ଜାଁ, ପ୍ରବୁ ନାଙ୍ଗେ ଏଲେଇଞ୍ଜାତେସି, "ମୀରୁ ର଼ କାଜା ପା଼ଟା ଅ଼ହାଁ ନୀଏଁତି ଅ଼ଙ୍କରି ତଲେ ଏ଼ଦାନି ଲାକ ଈ କାତା ରା଼ଚାମୁ, ମହେର-ସାଲଲହାସ୍‌-ବସ୍‌, ଇଚିହିଁ ଦୂହିନାୟି ତବେ ୱା଼ହିମାନେ, ଦୂହିତି ଆ଼ସ୍ତି ତବେ ହାଜିମାନେ। 2 ଅ଼ଡ଼େ, ନା଼ନୁ ପାର୍‌ମାଣା ତାକି ଉରିୟ ପୂଜେରା ଅ଼ଡ଼େ ଜିବରିକିୟ ମୀର୍‌ଏସି ଜିକରିୟଇଁ ନା଼ ନାମୁତି ସା଼କି କିଇଁ।"

3 ଏଚେଟିଏ ନା଼ନୁ ନ଼କିତା ଆ଼ନି କାତା ୱେହ୍‌ନାଣି ତଲେ ଡୂରାଲିଏ ଏ଼ଦି ପୂରାମା଼ସା ଆ଼ହାଁ ର଼ କକାଣାଇଁ ଜାର୍ନି କିତେ, ଏଚେଟିଏ ପ୍ରବୁ ନାଙ୍ଗେ ଏଲେଇଞ୍ଜାତେସି, "ଏ଼ୱାଣି ଦ଼ରୁ ମହେର-ସାଲଲହାସ୍‌-ବସ୍‌ ଇଟାମୁ। 4 ଇଚିହିଁ କକାସି ନା଼ ତାଞ୍ଜି ଅ଼ଡ଼େ ନା଼ ତାଲି ଇଞ୍ଜିଁ ହା଼ଟାଲି ତାକି ବୁଦି ପୁନି ନ଼କେଏ ଦମେସକତି ଦ଼ନ ଅ଼ଡ଼େ ସମରିୟାତି ଦୂହିତାଣି ଅସୁର ରାଜାତି ନ଼କି ନ଼କିତା ଡେ଼କା ଅ଼ୱିଆ଼ନେ।"

5 ଏଚେଟିଏ ପ୍ରବୁ ନାଙ୍ଗେ ୱେଣ୍ତେ ଏଲେଇଞ୍ଜାତେସି, 6 "ଈ ଲ଼କୁ ସିଲହତି ଦୀରେ ଦୀରେ ୱା଼ହିମାନି ଜାର୍‌ଣା କାଡା ଅ଼ପାଆନା ରତ୍‌ସିନ ଅ଼ଡ଼େ ରମଲିୟତି ମୀର୍‌ଏସି ପେକ୍‌କା ତା଼ଣା ରା଼ହାଁ କିହିମାନେରି; 7 ଏ଼ଦାଆଁତାକି ମେହ୍‌ଦୁ, ପ୍ରବୁ ନୀଏଁ ପରାତ୍‌ କାଡାତି ହା଼ରେକା, ଗାଡି ଏ଼ୟୁ ଲେହେଁ ଅସୁରତି ରାଜାଇଁ ଅ଼ଡ଼େ ତାନି ବାରେ ବା଼ଡ଼୍‌ୟୁ ଏ଼ୱାରି ଲାକ ତାଚିମାନେସି; ଏଚେଟିଏ ଏ଼ୱାସି ତାନି ବାରେ ଏ଼ୟୁ ନା଼ଡ଼ା ଲାକ ପାଡା ଆ଼ହାଁ ତାନି ବାନ୍ଦା ଲାକଟି ତା଼କା ହାନେସି; 8 ଅ଼ଡ଼େ, ଏ଼ୱାସି ହା଼ରେକା ନ଼କିତା ପାଡା ଆ଼ହାଁ ଜୀହୁଦା ପାତେକା ହାନେସି; ଏ଼ୱାସି ତେ଼ଲେବୟେ ଆ଼ହାଁ ୱେ଼ଙ୍ଗିନେସି; ଏ଼ୱାସି ହେର୍‌କି ପାତେକା ନିଙ୍ଗିନେସି; ଇଞ୍ଜାଁ, ଏ଼ ଇମାନୁୟେଲ, ତାନି ମା଼ରାୟାଁ ପ୍ରେ଼କ୍‌ହାଁ ଦେ଼ସାଇଁ ଗେଲ୍‌ପିନେସି।

9 ଏ଼ କୂଡ଼ା ବାରେ, ମୀରୁ କା଼ଲୱି ଆ଼ଦୁ, ଅ଼ଡ଼େ ମୀରୁ ନା଼ସା ଆ଼ଦେରି; ଇଞ୍ଜାଁ, ଏ଼ ହେକ ଦେ଼ସାତି ଲ଼କୁ ବାରେ, ମୀରୁ କିର୍ୟୁଁ ଅଡାଦୁ; ମୀରୁ ଟେଡେଲିତା ଜାଟି ରୂପାଦୁ, ଆ଼ତି ଜିକେଏ ନା଼ସା ଆ଼ଦେରି। 10 ରହେଁଏ କାତା ଆ଼ଦୁ, ଆ଼ତି ଜିକେଏ ଏ଼ଦି ଉଜେଏ ଆ଼ନେ; କାତା ଜ଼ଲାଦୁ, ଆ଼ତି ଜିକେଏ ଏ଼ଦି ତୀରି ଆ଼ଏ; ଇଚିହିଁ ମାହାପୂରୁ ମା଼ ତଲେ ମାନେସି।"

11 ଇଚିହିଁ ପ୍ରବୁ ନାଙ୍ଗେ ତୀରେ ୱେସ୍ତାତେସି, ନା଼ନୁ ଏ଼ନିକିଁ ଈ ଲ଼କୁତି ଜିରୁତା ତା଼କଅଁ, ଏ଼ଦାଆଁତାକି ନାଙ୍ଗେ ହୁକୁମି ହୀହାଁ ଏଲେଇଞ୍ଜାତେସି, 12 "ଈ ଲ଼କୁ ଏମିନି ବାରେ କାତାତି ସାକ୍ରି ଇଞ୍ଜିଁ ଏଲେଇନେରି; ମୀରୁ ଏ଼ ବାରେତି ସାକ୍ରି ଇଞ୍ଜିଁ ଇନାଆଦୁ; କି ଏ଼ୱାରି ଆଜିନାଣି ମୀରୁ ଆଜାଆଦୁ, କି ଏ଼ କାତାତାକି କିଲିବିଲି ଆ଼ଆଦୁ।" 13 ବା଼ଡ଼୍‌ୟୁଗାଟି ପ୍ରବୁଇଁ ମୀରୁ ସୁଦୁଗାଟାସି ଇଞ୍ଜିହିଁ ମା଼ନି କିଦୁ, ଇଞ୍ଜାଁ, ଏ଼ୱାସି ମୀ ଆଜିନି ଟା଼ୟୁ ଆ଼ପେସି ଅ଼ଡ଼େ ଏ଼ୱାସି ମୀ ତାକି ଆଜିଗାଟାସି ଆ଼ପେସି। 14 ଏଚେଟିଏ ଏ଼ୱାସି ସୁଦୁ ଜ଼ମିନି ଟା଼ୟୁ ଲେହେଁ ଆୟାନେସି, ସାମା ଇସ୍ରାୟେଲତି ବାରେ କୂଲୁ ତାକି ନା଼ସାକିନି ପା଼କା ଅ଼ଡ଼େ ବା଼ଦା ହୀନି ପା଼କା ଆ଼ନେସି, ଜିରୁସାଲମତା ବାସା କିହିମାନି ଲ଼କୁ ତାକି ପା଼ନ୍ଦା ଲେହେଁ ଆ଼ନେସି। 15 ଅ଼ଡ଼େ, ହା଼ରେକା ଲ଼କୁ ଏ଼ଦାନି ତଲେ ପୁଟି କିନେରି ଅ଼ଡ଼େ ରିହାଁ ରା଼ଣାରାକା ଆ଼ନେରି; ଅ଼ଡ଼େ ପା଼ନ୍ଦାତା ହେର୍‌ୱାନା ଆସ୍‌ପି ଆ଼ନେରି।

16 ନୀନୁ ଈ ସେତ୍‌ନା ହୀନି ବ଼ଲୁ ଦହ୍‌ମୁ, ନା଼ ସୀସୁୟାଁ ବିତ୍ରା ମେ଼ରା ବୁଟୁ ମୁଦ୍ରା କିମୁ। 17 ଇଞ୍ଜାଁ, ଆମ୍ବାଆସି ଜାକୁବ-କୂଡ଼ାଟି ଜାହାରା ମୂମ୍ବୁ ପ୍ଡିକ୍‌ହା ମାନେସି, ନା଼ନୁ ଏ଼ ପ୍ରବୁଇଁ କା଼ଚାହାଁ ଡ଼ୟିଇଁ, ଅ଼ଡ଼େ ଏ଼ୱାଣାଇଁ ଆ଼ସା କିହାଁ ଡ଼ୟିଇଁ।

18 ମେହ୍‌ଦୁ, ନା଼ନୁ ଅ଼ଡ଼େ ପ୍ରବୁ ତା଼ଣାଟି ନାଙ୍ଗେ ହୀହାମାଞ୍ଜାନି ମୀର୍‌କା ସିୟନ ହ଼ରୁତା ବାସା କିହାମାନି ବା଼ଡ଼୍‌ୟୁଗାଟି ପ୍ରବୁ ତା଼ଣାଟି ଇସ୍ରାୟେଲ ବିତ୍ରା ସିନା ଅ଼ଡ଼େ କାବାଆ଼ନି କାମା ଲେହେଁ।

19 ଇଞ୍ଜାଁ, ଏଚିବେ଼ଲା ଏ଼ୱାରି ମିଙ୍ଗେ ଏଲେଇଞ୍ଜାନେରି, ଏମିନି ଗୂର୍‌କା ଅ଼ଡ଼େ ଗୂଣିୟାଙ୍ଗା ଗୂଣୁ ଗୂଣୁ ଅ଼ଡ଼େ ସିଦ୍‌ୱିଆ଼ହିଁ ଏଲେଇନେରି, ଏ଼ୱାରାଇଁ ପାରାଦୁ; ମୀରୁ ଏଲେଇଞ୍ଜୁ, ଲ଼କୁ ଏ଼ନାଆଁ ଜାହାରା ମାହାପୂରୁଇଁ ପାରଅରି ? ଏ଼ୱାରି ଏ଼ନାଆଁ ନୀଡାମାନାରା ୱାକିଟି ହା଼ତାରାଇଁ ପାରିନେରି ?

20 ମେ଼ରା ଅ଼ଡ଼େ ସେତ୍‌ନା ହୀନି ବ଼ଲୁ ପାରାଦୁ। ଏ଼ୱାରି ଈ ବ଼ଲୁ ତଲେ କାତା ଆ଼ଅରି, ଆତିହିଁ ସାତେଏ ଏ଼ୱାରି ତାକି ୱେ଼ଡ଼ାତି ଉଜେଡ଼ି ଆ଼ଡେଏ।

21 ଇଞ୍ଜାଁ, ଈ ଦେ଼ସାତା କସ୍ତ ଅ଼ଡ଼େ ହାକିଟି ତା଼କିନେରି, ଅ଼ଡ଼େ ଏ଼ୱାରି ଏଚେ଼ତା ହାକି ଆ଼ତିସାରେ, ଏଚେ଼ତା ଏ଼ୱାରି କାର୍‌ବି ଆ଼ହାଁ ତାମି ରାଜା ଅ଼ଡ଼େ ତାମି ମାହାପୂରୁଇଁ ବା଼କା ହୀହାଁ ଲାକ ୱାକି ତାମି ମୂମ୍ବୁ କିନେରି।

22 ଇଞ୍ଜାଁ, ଏ଼ୱାରି ବୂମି ୱାକି ସିନିକିନେରି, ଅ଼ଡ଼େ ମେହ୍‌ଦୁ, କସ୍ତ ଅ଼ଡ଼େ ଆନ୍ଦେରି, କସ୍ତତି ଗାଡି ଆନ୍ଦେରି; 23 ଇଞ୍ଜାଁ, ଏ଼ୱାରି କା଼ଡ଼କି ଆନ୍ଦେରିତା ମେତ୍‌ପି ଆ଼ନେରି।