ମିସର ତାକି ୱା଼ନି ଦିନାତି କାତା
1 ମିସର କାତାତି ୱା଼ନି ଦିନାତି କାତା। ମେହ୍ଦୁ, ପ୍ରବୁ ଦାବ୍ଡ଼ି ହାନି ହା଼ଗୁତା ହ଼ଚାହାଁ ମିସରତା ୱା଼ହିମାନେସି; ଇଞ୍ଜାଁ, ତାନି ନ଼କିତା ମିସରତି ପେ଼ଣ୍କା ବମାୟାଁ ତୀର୍ଗାହାନୁ ଅ଼ଡ଼େ ମିସରତି ହିୟାଁ ତାନି ନ଼କିତା ରୂୟା ହାନେ। 2 ଇଞ୍ଜାଁ, "ନା଼ନୁ ମିସରତାରାଇଁ ମିସର କ଼ପାଟି ହୁତୁରି ଉହ୍ଇଁ; ଏଚେଟିଏ ଏ଼ୱାରି ବାରେ ଜାହାରା ଜାହାରା ତାୟି ଅ଼ଡ଼େ ଜାହାରା ଜାହାରା ପା଼ଡ଼ିତି ଲ଼କୁ କ଼ପାଟି ଜୁଜୁ କିନେରି; ଗା଼ଡ଼ା ଗା଼ଡ଼ା କ଼ପାଟି, ରା଼ଜି ରା଼ଜି କ଼ପାଟି, ଜୁଜୁ କିନେରି। 3 ଅ଼ଡ଼େ, ମିସରତି ବୁଦି କାମା ହୀଏ ଅ଼ଡ଼େ ମା଼ମ୍ବୁ ତାନି ଅଣ୍ପୁ ନା଼ସା କିଇଁ; ଏଚେଟିଏ ଏ଼ୱାରି ପେ଼ନୁ, ଗୂର୍କା, ଗାର୍ଡ଼ି ଅ଼ଡ଼େ ଗୂଣିୟାଁଙ୍ଗାଣି ପାରିନେରି। 4 ଅ଼ଡ଼େ, ନା଼ନୁ ମିସରତାରାଇଁ ର଼ କାର୍ମା ମେହ୍ଆ ସା଼ଲୱି କିନାଣି କେୟୁତା ହେର୍ପିଇଁ ଅ଼ଡ଼େ ର଼ କାର୍ବିଗାଟି ରାଜା ଏ଼ୱାରି ଲାକ ସା଼ଲୱି କିନେସି," ଈଦାଆଁ ପ୍ରବୁ ବା଼ଡ଼୍ୟୁଗାଟି ପ୍ରବୁ ଏଲେଇଞ୍ଜି ମାନେସି।
5 ଇଞ୍ଜାଁ ସାମ୍ଦୁରିତି ଏ଼ୟୁ ୱା଼ୟା ହାନୁ, ଅ଼ଡ଼େ କାଡା ସୀକାହାଁ ୱାର୍ଆୟି ଆ଼ନେ। 6 ଅ଼ଡ଼େ, କାଡାୟାଁ ବାରେ ଗାନ୍ଦା ଆ଼ନୁ; ମିସରତି ଜାର୍ଣା ବାରେ ଊଣା ଆ଼ହାଁ ୱା଼ୟାହାନୁ; ନା଼ଡା ଅ଼ଡ଼େ ଏ଼ୟୁତି ଜା଼ଡ଼ା ୱା଼ୟା ହାନେ। 7 ନିଲ କାଡା ଦାରିତି, ନିଲ କାଡା ଗାଟୁତି ବୂମି ବାରେ ଅ଼ଡ଼େ ନିଲ କାଡା ଟଟତା ଏ଼ନାଆଁ ମାଟ୍କି ଆ଼ନେ, ଏ଼ ବାରେ ୱା଼ୟାହାଁ ଊମ୍ବାହାନେ ଅ଼ଡ଼େ ଡ଼ୟେଏ। 8 ମୀଣ୍କା ଆହ୍ନାରି ଜିକେଏ ଡ଼ୀନେରି ଅ଼ଡ଼େ ଆମିନି ଗାଟାରି ନିଲ କାଡାତା କା଼ଟାୟାଁ ମେତ୍ନେରି ଏ଼ୱାରି ବାରେ ଦୁକୁ କିନେରି, ଇଞ୍ଜାଁ ଆମିନିଗାଟାରି ଏ଼ୟୁଣା ଜା଼ଲା ମେତ୍ନେରି, ଏ଼ୱାରି ସାପି ଆ଼ନେରି। 9 ଅ଼ଡ଼େ, ଏମିନିଗାଟାରି ନେହିଁ ଲୂଲୁ ଆଲିନେରି ଅ଼ଡ଼େ ଏମିନିଗାଟାରି ଦବ୍ଲା ହିମ୍ବରିକା ହୁଚିନାରି19:9 ଦବ୍ଲା ହିମ୍ବରିକା ହୁଚିନାରି, ଇଚିହିଁ ତିୟାରା କିନାରି ଏ଼ୱାରି ଲାଜା ଆ଼ନେରି। 10 ଇଞ୍ଜାଁ, ମିସରତି ମୁଣ୍ତାୟାଁ ବାରେ ଡିପ୍କି ଆ଼ହାଁ ଗାଣ୍ତ୍ରା ଗାଣ୍ତ୍ରା ଆ଼ନେ, କୂଲି ତାକି କାମା କିନି ଲ଼କୁ ବାରେ ଜୀୱୁତା ଦୁକୁ ଆ଼ନେରି।
11 ସୟନତି ସା଼ଲୱି କିନାରି ସାତେଏ ବୁଦି ହିଲାଆଗାଟାରି; ପା଼ରତି ବୁଦିଗାଟି ମନ୍ତ୍ରିୟାଁ ଅଣ୍ପୁ ଜ଼ନ୍ତ ଲେହେଁ ଆ଼ହାମାନେ; ମୀରୁ ଏ଼ନିକିଁ ପା଼ରଇଁ ଏଲେଇଞ୍ଜି ମାଞ୍ଜେରି, ମା଼ମ୍ବୁ ବୁଦିଗାଟାରି ମୀର୍କା, ତଲି କା଼ଲାତି ରାଜାୟାଁ ମୀର୍କା ? 12 ଆତିହିଁ ମୀ ବୁଦିଗାଟି ଲ଼କୁ ଏମ୍ବିୟା ? ଏ଼ୱାରି ନୀଏଁ ମିଙ୍ଗେ ପୁଣ୍ମ୍ବି କିୟାପେରି ଅ଼ଡ଼େ ବା଼ଡ଼୍ୟୁଗାଟି ପ୍ରବୁ ମିସର କାତାତା ଏ଼ନାଆଁ ଅଣ୍ପା ମାନେସି, ଏ଼ଦାଆଁ ଏ଼ୱାରି ପୁଣ୍ମ୍ବେରି। 13 ସୟନତି ସା଼ଲୱି କିନାରି ବୁଦି ହିଲାଆଗାଟାରି ଆ଼ହା ମାନେରି, ନପତି ସା଼ଲୱି କିନାରି ନା଼ଡ଼ି ଆ଼ହାମାନେରି; ଏମିନିଗାଟାରି ମିସରତି କୂଡ଼ାତି କନ ୱାଲି ଲେହେଁ, ଏ଼ୱାରି ମିସରତି ଏଟ୍କା ଜିରୁଟି ତା଼କି କିହିମାନେରି। 14 ପ୍ରବୁ ମିସର ବିତ୍ରା ନା଼ଡ଼ିକିନି ଲେହେଁତି ଜୀୱୁ ଆଟ୍ହା ମାନେସି; ଇଞ୍ଜାଁ, ହ଼ଚିତି ଲ଼କୁ ଏ଼ନିକିଁ ଜାହାରା ହୂପ୍କାଣା ରିନେସି, ଏଲେକିହିଁ ଏ଼ୱାରି ମିସରତି ତାନି ବାରେ କାମାତା ଏଟ୍କା ଜିରୁତା ତା଼କି କିହାମାନେସି। 15 ଇଞ୍ଜାଁ, ତା଼ର୍ୟୁଁ କି ଲେଂଗୁଣି କି କାଜୁରି ମାଟାୟାଁ କି ଏ଼ୟୁତି ଜା଼ଡ଼ା ଏ଼ନାଆଁ କିହାଲି ଆ଼ଡିନେ, ଇଲେତି ଏ଼ନି କାମା ମିସର ତାକି କିୱିଆ଼ଏ।
ମିସରତା ପ୍ରବୁଇଁ ଜହରା କିନାୟି
16 ଏ଼ ଦିନା ମିସରତି ଲ଼କୁ ଆୟାସିକା ଲେହେଁ ଆଜିନେରି, ଇଞ୍ଜାଁ, ବା଼ଡ଼୍ୟୁଗାଟି ପ୍ରବୁ, ଏ଼ଦାଆଁ ଲାକ ଏମିନି କେୟୁ ୱୀଟ୍ନେସି, ତାନି କେୟୁ ଦା଼ଙ୍ଗିନି କ଼ସମି ଏ଼ୱାସି ତୀର୍ଗିନେସି ଅ଼ଡ଼େ ଆଜିନେସି। 17 ମିସର ତାକି ଜୀହୁଦା ଦେ଼ସା ଆଜିଗାଟାୟି ଆ଼ନେ, ବା଼ଡ଼୍ୟୁଗାଟି ପ୍ରବୁ ଏ଼ଦାଣି ୱାକିଟି ଏମିନି ଅଣ୍ପୁ ଅଣ୍ପିନେସି, ଏ଼ଦାଣି ତାକି ବାରେ ଲ଼କୁଣି ଜୀହୁଦାତି ଦ଼ରୁ ଏଲେଇଣ୍ମ୍ବି ଆ଼ନେ, ଏ଼ୱାସି ଆଜିନେସି।
18 ଏ଼ ଦିନା ମିସର ଦେ଼ସା ବିତ୍ରା ପା଼ସାଗଟା ଗା଼ଡ଼ା କିଣାନତି ହା଼ଡା ଜ଼ଲିନାରି ଆ଼ନେରି ଅ଼ଡ଼େ ବା଼ଡ଼୍ୟୁଗାଟି ପ୍ରବୁତି ଦ଼ରୁତା ପାର୍ମାଣା କିନେରି, ର଼ ଗା଼ଡ଼ା ନା଼ସାଗାଟି ଗା଼ଡ଼ା ଇଞ୍ଜିଁ ୱେ଼ଙ୍ଗିନେ।
19 ଏ଼ ଦିନା ମିସର ଦେ଼ସାତା ମାଦି ଟା଼ୟୁତା ପ୍ରବୁତି ତାକି ର଼ ପୂଜାପିଣ୍ତା ଆ଼ନେ ଅ଼ଡ଼େ ଏମ୍ବାତି ପା଼ଡ଼ି ଟଟତା ପ୍ରବୁତି ତାକି ର଼ ମୁଣ୍ତା କେ଼ପ୍ୱିଆ଼ନେ। 20 ଇଞ୍ଜାଁ, ଏ଼ଦି ମିସର ଦେ଼ସାତା ବା଼ଡ଼୍ୟୁଗାଟି ପ୍ରବୁତି ସିନା ଅ଼ଡ଼େ ସା଼କି ଲେହେଁ ଆ଼ନେ; ଇଚିହିଁ ଏ଼ୱାରି ଲାଗେଏ କାମା କିନାରି ତାକି ପ୍ରବୁତି ନ଼କିତା ଡ଼ୀନେରି, ଏଚେଟିଏ ଏ଼ୱାସି ର଼ ଗେଲ୍ପିନାଣାଇଁ ଅ଼ଡ଼େ ଆଡୁ ଆ଼ନାଣାଇଁ ପାଣ୍ତିନେସି ଅ଼ଡ଼େ ଏ଼ୱାସି ଏ଼ୱାରାଇଁ ଗେଲ୍ପିନେସି। 21 ଇଞ୍ଜାଁ, ମିସରତି ପ୍ରବୁତି ପୁଣ୍ମ୍ବି କିନାୟି ହୀପ୍କି ଆ଼ନେ ଅ଼ଡ଼େ ଏ଼ ଦିନା ମିସରତାରି ପ୍ରବୁଇଁ ପୁନେରି; ଅ଼ଡ଼େ, ଏ଼ୱାରି ପୂଜା ଅ଼ଡ଼େ ଦା଼ନା ହୀହାଁ ଜହରା କିନେରି ଅ଼ଡ଼େ ପ୍ରବୁତି ତା଼ଣା ଆ଼ଞ୍ଜାହାଁ ଏ଼ଦାଆଁ ପୂରା କିନେରି। 22 ଇଞ୍ଜାଁ, ପ୍ରବୁ ମିସରତାରାଇଁ ଡଣ୍ତ ହୀନେସି, ଅ଼ଡ଼େ ଡଣ୍ତ ହୀହାଁ ନେହିଁ କିନେସି; ଇଞ୍ଜାଁ ଏ଼ୱାରି ପ୍ରବୁ ତା଼ଣା ୱେଣ୍ତା ୱା଼ନେରି, ଏଚେଟିଏ ଏ଼ୱାସି ତାମି ବାତିମା଼ଲିନାଣି ୱେଞ୍ଜାହାଁ ଏ଼ୱାରାଇଁ ନେହିଁ କିନେସି।
23 ଏ଼ ଦିନା ମିସରଟିଏ ଅସୁରତା ର଼ କାଜା ପା଼ହେରି ଆ଼ନେ, ଅସୁରତାରି ମିସରତା ଅ଼ଡ଼େ ମିସରତାରି ଅସୁରତା ହାନେରି ୱା଼ନେରି; ଇଞ୍ଜାଁ, ମିସରତାରି ଅସୁରତାରା ତଲେ ଜହରା କିନେରି। 24 ଏ଼ ଦିନା ଇସ୍ରାୟେଲ, ମିସର ଅ଼ଡ଼େ ଅସୁର ଈ ତୀନିଗଟା ଦେ଼ସାୟାଁ ଆ଼ହାଁ ଦାର୍ତି ବିତ୍ରା ବ଼ର ଗାଟାଇ ଆ଼ନୁ; 25 ଏ଼ନିଇଚିହିଁ ବା଼ଡ଼୍ୟୁଗାଟି ପ୍ରବୁ ଏ଼ୱାରାଇଁ ବ଼ର ହୀହାଁ ଏଲେଇଞ୍ଜା ମାନେସି, "ନା଼ ଲ଼କୁ ମିସର, ନା଼ କେୟୁତି କାମା ଅସୁର ଅ଼ଡ଼େ ନା଼ ଅଦିକାରା ଇସ୍ରାୟେଲ ବ଼ର ବେଟାଆ଼ପେରି।"
/images/a/b7d72741-6189-4a89-94c2-43952d9f2700)
/images/a/6c03efee-c76a-4ab8-fe2e-555683f90900)