1 ଏ଼ ଦାର୍ମୁତି ତା଼କିନାତେରି,

ଏ଼ ପ୍ରବୁଇଁ ପାରିନାତେରି, ମୀରୁ ନା଼ କାତା ୱେଞ୍ଜୁ,

ମୀରୁ ଏମିନି ୱାଲିଟି ଦା଼ପି ଆ଼ହା ମାଚେରି

ଅ଼ଡ଼େ ଏମିନି ଗା଼ଡ଼୍‌ୟୁଟି କା଼ର୍‌ୱି ଆ଼ହାମାଚେରି, ଏମ୍ବାଆଁ ସିନିକିଦୁ।

2 ମୀ ଆକୁ, ଅବ୍ରାହାମ, ଅ଼ଡ଼େ ମିଙ୍ଗେ ଜାର୍ନି କିୟାତି ସାରାନି ସିନିକିଦୁ,

ଇଚିହିଁ ଏ଼ୱାସି ରଅସି ମାଚାଟି ନା଼ନୁ ଏ଼ୱାଣାଇଁ ହା଼ଟିତେଏଁ

ଅ଼ଡ଼େ ନା଼ନୁ ବ଼ର ହୀହାଁ ଏ଼ୱାଣାଇଁ ହା଼ରେକା କୂଲୁ କିତେଏଁ।

3 ଇଚିହିଁ ପ୍ରବୁ ସିୟନତି ସା଼ସା ହୀହାମାନେସି;

ଏ଼ୱାସି ତାନି ଲାଗେଏତି ବାରେ ଟା଼ୟୁତି ସା଼ସା ହୀହାମାନେସି;

ଏ଼ୱାସି ତାନି ଲ଼କୁ ହିଲାଆ ଟା଼ୟୁତି ଏଦନ ଲେହେଁ

ଅ଼ଡ଼େ ତାନି ବାଃଲି ବାଟା ପ୍ରବୁତି ବା଼ଡ଼ା ଲେହେଁ କିହାମାନେସି;

ରା଼ହାଁ ଅ଼ଡ଼େ ଗାଡୁ ରା଼ହାଁ, ଜହରା ଅ଼ଡ଼େ ପା଼ଚୁତି ହା଼ଡା ଏମ୍ବାଆଁ ଆ଼ନେ।

4 "ଏ଼ ନା଼ ଲ଼କୁ, ନା଼ ବ଼ଲୁତା ମ଼ନ ହୀଦୁ;

ଏ଼ ନା଼ ଦେ଼ସାତି ଲ଼କୁ, ନା଼ କାତାତା କିର୍ୟୁଁ ଅଡାଦୁ;

ଇଚିହିଁ; ନା଼ ତା଼ଣାଟି ର଼ ମେ଼ରା ହ଼ନେ ଅ଼ଡ଼େ ନା଼ କୂଡ଼ାତି ଉଜେଡ଼ି ତାକି ନା଼ ବିଚାରା ତୀରି କିଇଁ।

5 ନା଼ ଦାର୍ମୁ ଡାଗେ ଆ଼ତେୟିଏ, ନା଼ ଗେଲ୍‌ପିନାୟି ୱା଼ହାମାନେ

ଅ଼ଡ଼େ ନା଼ ବାହା ବାରେ କୂଲୁତି ବିଚାରା କିନେ;

ସାମ୍‌ଦୁରି ମାଦି ମାନି କୁପ୍‌ଲି ନା଼ ଜିରୁ କା଼ଚାହାଁ ଡ଼ୟିନୁ

ଅ଼ଡ଼େ ନା଼ ବାହାତି ଆ଼ସା କିନେ।

6 ମୀରୁ ହା଼ଗୁପା଼କା ୱାକି ସିନିକିଦୁ ଅ଼ଡ଼େ ଡ଼଼ଇତି ଦାର୍‌ତି ସିନିକିଦୁ;

ଇଚିହିଁ ହା଼ଗୁପା଼କା ବ଼ୟିଁ ଲେହେଁ ମେଣ୍‌ଙ୍ଗିନେ ଅ଼ଡ଼େ ଦାର୍‌ତି ବାସ୍ତେରି ଲେହେଁ ଆର୍ଗିନେ,

ଇଞ୍ଜାଁ ଏମ୍ବାଆଁ ବାସା କିହାମାନାରି ୱୀହାଁ ଲେହେଁ ହା଼ହା ହାନେରି;

ସାମା ନା଼ ଗେଲ୍‌ପିନାୟି କା଼ଲେଏ ତାକି ଡ଼ୟିନେ ଅ଼ଡ଼େ ନା଼ ଦାର୍ମୁ ଡ଼ୁଗେଏ।

7 ଏ଼ ଦାର୍ମୁଗାଟି ଲ଼କୁ ମୀ ହିୟାଁତା ନା଼ ମେ଼ରା ମାନେ, ମୀରୁ ନା଼ କାତା ୱେଞ୍ଜୁ;

ମୀରୁ ମାଣ୍‌ସିତି ଆଜିକିନାଣି ଆଜାଆଦୁ,

କି ଏ଼ୱାରି ନିନ୍ଦା କିନି ତା଼ଣା କିଲିବିଲି ଆ଼ଆଦୁ।

8 ଇଚିହିଁ ଲୀମ୍ବୁ ଏ଼ୱାରାଇଁ ହିମ୍ବରିଦୂକି ଲେହେଁ ତିନେ

ଅ଼ଡ଼େ ପିଡ଼୍‌ୟୁଲି ଏ଼ୱାରାଇଁ ବା଼ଣାୟାଁ ଲେହେଁ ତିନେ;

ସାମା ନା଼ ଦାର୍ମୁ କା଼ଲେଏ ତାକି ଡ଼ୟିନେ ଅ଼ଡ଼େ ନା଼ ଗେଲ୍‌ପିନାୟି ପା଼ଟୁ ପା଼ଟୁ ତାକି ଡ଼ୟିନେ।"

9 ଏ଼ ପ୍ରବୁତି ବାହା ତେଃଏଲାମୁ, ତେଃଏଲାମୁ,

ଅ଼ଡ଼େ ବା଼ଡ଼୍‌ୟୁ ଆହ୍‌ମୁ, ଏ଼ନିକିଁ ତଲି କା଼ଲାତା,

ଅ଼ଡ଼େ ହାଚି ଦିନାତା ଏଲେକିହିଁଏ ତେଃଏଲାମୁ।

ଆମ୍ବାଆସି ରାହବଇଁ* ଗାଣ୍ତ୍ରା ଗାଣ୍ତ୍ରା ରାତ୍‌ହେସି ଅ଼ଡ଼େ ନା଼ଗାତି ଗ୍ଣାକ୍‌ହେସି ନୀନୁ ଏ଼ୱାତି ଆ଼ଏକି ?

10 ଆମ୍ବାଆସି ସାମ୍‌ଦୁରିତି ଇଚିହିଁ କୂଡ଼୍‌ହାମାନି ସାମ୍‌ଦୁରିତି ଏ଼ୟୁଣି ୱା଼ୟିକିତେସି,

ଆମ୍ବାଆସି ଗେଲ୍‌ପି ଆ଼ହାମାନି ଲ଼କୁ ଗା଼ଣ୍‌ଚା ହାଜାଲି କୂଡ଼୍‌ହାମାନି ସାମ୍‌ଦୁରିତି ଜିରୁ କିତେସି,

ଏ଼ୱାତି ନୀନୁ ଆ଼ଏକି ?

11 ଇଞ୍ଜାଁ ପ୍ରବୁତି ପିସ୍‌ପି ଆ଼ହାମାନି ଲ଼କୁ ୱେଣ୍ତା ୱା଼ନେରି

ଅ଼ଡ଼େ ରା଼ହାଁତି ପା଼ଚୁ ପା଼ଚିହିଁ ସିୟନତା ୱା଼ନେରି;

ଅ଼ଡ଼େ ଏମ୍ବାଆଁ କା଼ଲେଏତି ରା଼ହାଁ ବେଟାଆ଼ନେରି,

ଇଞ୍ଜାଁ ଦୁକୁ ଅ଼ଡ଼େ ଡ଼ୀକି ହା଼ଡା ହେକ ହାନେ।

12 ଆମ୍ବାଆସି ମିଙ୍ଗେ ସା଼ସା ହିୟାନେସି, ନା଼ନୁ ଏ଼ୱାତେଏଁ;

ହା଼କିତି ଡ଼଼ଇ ମାନି ମାଣ୍‌ସିଇଁ ଅ଼ଡ଼େ ଆମ୍ବାଆସି ଜା଼ଡ଼ା ସମାନା ୱା଼ଡ଼ିନି ମାଣ୍‌ସି,

ଇଲେତି ମୀର୍‌ଏଣାଇଁ ଆଜିମାଞ୍ଜେରି।

13 ଇଞ୍ଜାଁ ହା଼ଗୁପା଼କା ଦା଼ହ୍‌ନାସି ଅ଼ଡ଼େ ଦାର୍‌ତିତି ପୁନାଦି କିନାସି,

ନିଙ୍ଗେ ରାଚି କିୟାତି ପ୍ରବୁଇଁ ବା଼ଣା ଆ଼ହାମାଞ୍ଜି ଅ଼ଡ଼େ ଲାଗେଏ ପ଼ଲେଏତାସି ନା଼ସା କିନି ବେ଼ଲାତା,

ତାନି କାର୍‌ବି ତାକି ୱେ଼ଡ଼ା ଡୁମ୍ବେ କା଼ଲେଏ ଆଜିମାଞ୍ଜି ନୀନୁ, ନୀନୁ ଆମ୍ବାଆତି ? ଏ଼

ଲାଗେଏ ପ଼ଲେଏତାଣା କାର୍‌ବି ଆମ୍ବିୟା ?

14 ଦସ୍‌ପା ଅ଼ୱିଆ଼ହାମାନସି ତବେ ଗେଲ୍‌ପି ଆ଼ନେସି;

ଇଞ୍ଜାଁ ଏ଼ୱାସି ଗା଼ଡ଼୍‌ୟୁତା ହା଼ଅସି କି ତିନି କା଼ଦି ଏ଼ୱାଣାକି ଊଣା ଆ଼ଏ।

15 ଆମ୍ବାଆସି ସାମ୍‌ଦୁରିତି ୱୀଟ୍‌ନେସି ଏମିନାଣି ତଲେ ସାମ୍‌ଦୁରି ଗାର୍ଜିନେ,

ନା଼ନୁ ଏ଼ ପ୍ରବୁ ମୀ ମାହାପୂରୁତେଏଁ; ନା଼ ଦ଼ରୁ ବା଼ଡ଼୍‌ୟୁଗାଟି ପ୍ରବୁ।

16 ଇଞ୍ଜାଁ ହା଼ଗୁପା଼କା ଉହିନାଣି, ଦାର୍‌ତିତି ପୁନାଦି କିନାଣି,

ଅ଼ଡ଼େ ନୀନୁ ନା଼ ଲ଼କୁତି, ଈ କାତା ସିୟନଇଁ ଏଲେଇଞ୍ଜାଲି

ନା଼ନୁ ନୀ ଗୂତିତା ନା଼ ବ଼ଲୁ ଇଟାମାଇଁ ଅ଼ଡ଼େ ନା଼ କେୟୁ ତଲେ ଡ଼ୁକ୍‌ହା ମାଞ୍ଜାଇଁ।

17 ଏ଼ ଜିରୁସାଲମ ତେଃଏଲାମୁ, ତେଃଏଲାମୁ, ଅ଼ଡ଼େ ନିମୁ,

ନୀନୁ ପ୍ରବୁ କେୟୁଟି ତାନି କ଼ପାତି ସ଼ଲା ଅ଼ହାଁ ଗସାମାଞ୍ଜି;

ନୀନୁ ହ଼ଚିନି କାଜା ସ଼ଲାଟି ଗସାହାଁ ଏ଼ଦାଆଁ ରା଼ପ୍‌ହାମାଞ୍ଜି।

18 ଏ଼ଦି ଏମିନି ମୀର୍‌କାଣି ଜାର୍ନି କିହାମାନେ,

ଏ଼ ବାରେ ଜା଼ଣା ବିତ୍ରାଟି ଏ଼ଦାଣି ସେ଼ବା କିହାଲି ଆମ୍ବାଆସି ହିଲଅସି;

ଇଞ୍ଜାଁ ଏ଼ଦି ଏମିନି ମୀର୍‌କାଣି ପ଼ହିପାଡି କିହାମାନେ,

ଏ଼ ବାରେ ଜା଼ଣା ବିତ୍ରାଟି ଏ଼ଦାଣି କେୟୁ ଆସାହାଁ ଅ଼ହାଲି ଆମ୍ବାଆସି ହିଲଅସି।

19 ଈ ରୀ କାତା ନିଙ୍ଗେ ତାକି ଆ଼ହାମାନେ; ନିଙ୍ଗେ ତାକି ଆମ୍ବାଆସି ଡ଼ୀନେସି ?

ୱାର୍‌ଆୟି ଅ଼ଡ଼େ ନା଼ସା ଇଞ୍ଜାଁ କା଼ତାରା ଅ଼ଡ଼େ କାଣ୍ତା ୱା଼ହାମାନେ;

ନା଼ନୁ ଏ଼ନିକିଁ ନିଙ୍ଗେ ହିତ୍‌ଡ଼ି ହିୟାଇଁ ?

20 ଜା଼ଲାତା ହେର୍‌ୱାମାନି କୂର୍‌ହୁ ଲେହେଁ ନୀ ମୀର୍‌କା କାଟିୱେ଼ତି ଲେହେଁ ଆ଼ହାମାନେରି,

ଏ଼ୱାରି ବାରେ ପା଼ହେରି ଗାଟୁତା ରିହାମାନେରି;

ଏ଼ୱାରି ପ୍ରବୁତି କ଼ପାତା ନୀ ମାହାପୂରୁତି ଦାକା ତଲେ କାଟିୱେ଼ତି ଲେହେଁ ଆ଼ହାମାନେରି।

21 ଈଦାଆଁତାକି ଏ଼ ଦୁକୁଗାଟାତି ୱେନାମୁ,

ନୀନୁ ଅଙ୍ଗୁରି ରାସା ଗହ୍‌ଆନା ହ଼ଚାମାଞ୍ଜି

ସାମା ନୀନୁ ନୀଏଁ ଈ କାତା ୱେନାମୁ;

22 ନୀ ପ୍ରବୁ, ମାହାପୂରୁ ଅ଼ଡ଼େ ନୀ ଲ଼କୁତି ମାହାପୂରୁ ଈ କାତା ଏଲେଇଞ୍ଜି ମାନେସି,

"ମେହ୍‌ଦୁ ନା଼ନୁ ହ଼ଚି କିନି ଗହ୍‌ନି ସ଼ଲା,

ଇଚିହିଁ ନା଼ କ଼ପାତି କାଜା ସ଼ଲା ନୀ କେୟୁଟି ଅ଼ହାମାଇଁ;

ନୀନୁ ଅ଼ଡ଼େ ଏ଼ୱାଆଁ ଏଚେଲା ଗହ୍‌ଅତି;

23 ଇଞ୍ଜାଁ ଆମ୍ବାଆରି ନିଙ୍ଗେ ସା଼ସ୍ତି ହିୟାନେରି,

ଏ଼ୱାରି କେୟୁତା ନା଼ନୁ ଏ଼ଦାଆଁ ହୀଇଁ;

ଏ଼ୱାରି ନୀ ଜୀୱୁତି ଏଲେଇଞ୍ଜା ମାନେରି, ବଙ୍ଗାମୁ ମା଼ମ୍ବୁ ନୀ ଲାକଟି ହାନମି;

ଅ଼ଡ଼େ ନୀନୁ ବୂମି ଅ଼ଡ଼େ ପା଼ହେରି ଲେହେଁ ତା଼କିନାରାକି ନୀ ଜେ଼ନୁ ଅଗାମାଞ୍ଜି।"