1 ବଡପଣତି ଟ଼ପେରି ଗାଟାରି, ଅହ଼ତା, ଏ଼ୱାରି ଡଣ୍ତ! ଏମିନାୟି ଇପ୍ରୟିମତି ହ଼ଚିତାରାୱାୟି, ତା଼ର୍ୟୁଁତା ମାନି ତାନି ସାଜୁତି ଅ଼ଜୁ ୱା଼ଡ଼ାହାନି ପୂୟୁ ବ଼ଣ୍ତା ଲେହେଁ, ଏମିନାୟି ହା଼ରେକା କାମ୍ବିନି କୁପ୍‌ଲିୟାଁ ଲାକ ଅଙ୍ଗୁରି ରାସାତା ହ଼ଚି କିନେ। 2 ମେହ୍‌ଦୁ ପ୍ରବୁତି ର଼ ବା଼ଡ଼୍‌ୟୁ ଅ଼ଡ଼େ ସା଼ସାଗାଟି ଲ଼କୁ ମାନେସି; ଏ଼ୱାସି ଆ଼ଜି ପିୟୁ, କ୍ଡୁପ୍‌ହା ଅ଼ନି ପିୟୁତି କାଜା ୱା଼ରୁ ଲେହେଁ, ଏ଼ୱାସି ତାନି କେୟୁ ତଲେ ତବେ ବୂମିତା ରିୱିକିନେସି। 3 ଇପ୍ରୟିମ ହ଼ଚିତି ଲ଼କୁତି ବଡପଣ ଟ଼ପେରି ପାଃଆନା ଡ଼଼ଇ ୱିସ୍‌ପି ଆ଼ନେ; 4 ଅ଼ଡ଼େ ଏ଼ଦାନି ସାଜୁତି ଅ଼ଜୁ ୱା଼ଡ଼ାହାନି ପୂୟୁ ବ଼ଣ୍ତା ହା଼ରେକା କାମ୍ବିନି କୁପ୍‌ଲିୟାଁ ଲାକ ମାନେ, ଏ଼ଦି କାରା ବେ଼ଲା ନ଼କେଏ କାମ୍ବିନି ତ଼ୟା ଲେହେଁ ଆ଼ନେ; ଏମିନାଣି ଆମ୍ବାଆସି ମେସ୍‌ପନିଏ ଗୁରି କିନେସି ଅ଼ଡ଼େ କେୟୁତା ଆସ୍‌ପନିଏ ଗୂହ୍‌ନେସି।

5 ଏ଼ ଦିନା ବା଼ଡ଼୍‌ୟୁଗାଟି ପ୍ରବୁ ତାନି ଡ଼ୟାମାନି ଲ଼କୁ ତାକି ଅ଼ଜିତି ଟ଼ପେରି ଅ଼ଡ଼େ ଗା଼ୱୁରମିତି ଉଜେଡ଼ି ଲେହେଁ ଆ଼ନେସି। 6 ଇଞ୍ଜାଁ ବିଚାରା କିହାଲି କୁଗାମାନି ଲ଼କୁ ତାକି ବିଚାରା କିନି ଜୀୱୁ ଅ଼ଡ଼େ ଆମ୍ବାଆରି ଗା଼ଡ଼ା ଦୁୱେରିଟି ଜୁଜୁତି ପେ଼ର୍‌ହା ପାଣ୍ତିନେରି, ଏ଼ୱାରାକି ବା଼ଡ଼୍‌ୟୁ ସମାନା ଆ଼ନେସି।

7 ସାମା ଈୱାରି ଜିକେଏ ଅଙ୍ଗୁରି ରାସାତା ନା଼ଡ଼ିକିୱି ଆ଼ହାମାନେରି ଅ଼ଡ଼େ କା଼ଡ଼ୁ ଗସାହାଁ ଏଟ୍‌କା ଜିରୁତା ହାଜାମାନେରି; ପୂଜେରାଙ୍ଗା ଅ଼ଡ଼େ ନ଼କିତା ଆ଼ନି କାତା ୱେହ୍‌ନାରି କା଼ଡ଼ୁ ଗସାହାଁ ନା଼ଡ଼ିକିୱି ଆ଼ହାମାନେରି, ଅଙ୍ଗୁରି ରାସା ଏ଼ୱାରାଇଁ ଗୂସାମାନେ, କା଼ଡ଼ୁ ଗସାହାଁ ଏ଼ୱାରି ଏଟ୍‌କା ଜିରୁଟି ହାଜାମାନେରି; ଏ଼ୱାରି ସେୟାଁଣା ତଲେ ମେହ୍‌ନି ତା଼ଣା ନା଼ଡ଼ିକିୱି ଆ଼ହିମାନେରି ଅ଼ଡ଼େ ବିଚାରା କିହାଲି ପୁଞ୍ଜିହିଲଅରି। 8 ଇଚିହିଁ ତିନି ପା଼ସ୍‌ପନିକା ବାରେ ହୂପ୍‌କା ନେଞ୍ଜାମାନେ ଇଚାୟି ନେହିଁ ଟା଼ୟୁ ହିଲେଏ।

9 ଏ଼ୱାସି ଆମ୍ବାଆରାଇଁ ବୁଦିତି କାତା ଜା଼ପ୍‌ନେସି ? ଅ଼ଡ଼େ ଏ଼ୱାସି ଆମ୍ବାଆରାଇଁ କାବ୍ରୁ ତେଲ୍‌ହି କିନେସି ? ପା଼ଲୁ ପିସ୍ତାରାଇଁ କି ପା଼ଲୁ ଗସାଲି ପିସ୍ତି ଊଣା କକାରି ପ଼ଦାୟାଁଣି ? 10 ଇଚିହିଁ ଈଦି ମେ଼ରା ଲାକ ମେ଼ରା, ମେ଼ରା ଲାକ ମେ଼ରା, ଦା଼ଡ଼ି ତାକି ଦା଼ଡ଼ି, ଦା଼ଡ଼ି ତାକି ଦା଼ଡ଼ି, ଇମ୍ବାଆଁ ଇଚାୟି ଏମ୍ବାଆଁ ଇଚାୟି।

11 ଏ଼ୱାରି ଈ ଲ଼କୁ ତା଼ଣାଟି ଏଟ୍‌କା ଦେ଼ସାତି ଲୂଡ଼ା, ଅ଼ଡ଼େ ଏଟ୍‌କା ଦେ଼ସାତି ହା଼ଡା ତଲେ କାତା ଆ଼ନେସି; 12 ଏ଼ୱାସି ଏ଼ୱାରାଇଁ ଏଲେଇଚେସି, "ଈ ଜ଼ମିନାଣି, ମୀରୁ ୱା଼ହୁଗାଟି ଲ଼କୁଣି ଜ଼ମି କିଦୁ, ଇଞ୍ଜାଁ ଈଦି ମୂଲୁ," ସାମା ଏ଼ୱାରି ୱେଞ୍ଜାଲି କୂତେରି। 13 ଈଦାଆଁତାକି ଏ଼ୱାରି ଏ଼ନିକିଁ ଡା଼ୟୁ ହାଜାହାଁ ନା଼ସା ଆ଼ନେରି, ପା଼ନ୍ଦାତା ହେର୍‌ୱାନା ଆସ୍‌ପି ଆ଼ନେରି, ଈଦାଆଁତାକି ଏ଼ୱାରି କ଼ସମି ପ୍ରବୁତି ବ଼ଲୁ ମେ଼ରା ଲାକ ମେ଼ରା, ମେ଼ରା ଲାକ ମେ଼ରା; ଦା଼ଡ଼ି ତାକି ଦା଼ଡ଼ି, ଦା଼ଡ଼ି ତାକି ଦା଼ଡ଼ି; ଇମ୍ବାଆଁ ଇଚାୟି ଏମ୍ବାଆଁ ଇଚାୟି ଆ଼ନେ।

14 ଈଦାଆଁତାକି ଏ଼ ଜିରୁସାଲମ ଲ଼କୁତି ସା଼ଲୱି କିନି ନିନ୍ଦା କିନାତେରି, ମୀରୁ ପ୍ରବୁତି ବ଼ଲୁ ୱେଞ୍ଜୁ; 15 ମୀରୁ ଏଲେଇଞ୍ଜା ମାଞ୍ଜେରି, "ମା଼ମ୍ବୁ ହା଼କି ତଲେ ମେ଼ରା କିହାମାନମି ଅ଼ଡ଼େ ତା଼ଡ଼େପୂରୁ ତଲେ ରା଼ଜିମା଼ନା କିହାମାନମି; ଈଦାଆଁତାକି କ୍ଡୁପ୍‌ହିମାନି ଲେହେଁ ବା଼ଦା ୱା଼ନି ବେ଼ଲାତା ଏ଼ଦି ମା଼ ତା଼ଣା ୱା଼ଏ; ଇଚିହିଁ ମା଼ମ୍ବୁ ମିଚିତି ମା଼ ବାସା ଟା଼ୟୁ କିହାମାନମି ଅ଼ଡ଼େ ସାତା ହିଲାଆଗାଟାଣି ତା଼ଣା ମା଼ମ୍ବୁ ମାଙ୍ଗେ ଡ଼ୁକ୍‌ହା କଡାମାନମି।" 16 ଈଦାଆଁତାକି ପ୍ରବୁ ମାହାପୂରୁ ଈ କାତା ଏଲେଇଞ୍ଜି ମାନେସି, "ମେହ୍‌ଦୁ ନା଼ନୁ ପୁନାଦି ତାକି ସିୟନଟି ର଼ ୱାଲି, ତାୟିପାରି କିତି ୱାଲି, ଆ଼ଟ୍‌ୱା ପୁନାଦି ଲେହେଁ ହା଼ରେକା ଦାରାତି କନତି ୱାଲି ଇଟିମାଇଁ; ଆମ୍ବାଆସି ନାମିନେସି ଏ଼ୱାସି ଲାଜା ବେଟାଆ଼ଅସି। 17 ଇଞ୍ଜାଁ ନା଼ନୁ ବିଚାରାତି ଲା଼ଚିନି ଡ:ରି ତଲେ ଅ଼ଡ଼େ ଦାର୍ମୁତି ଉଲୁମି ତଲେ ତିୟି କିଇଁ; ଅ଼ଡ଼େ ମୀ ମିଚିତି ବାସା ଟା଼ୟୁ ଆ଼ଜିୟାଁ ତଲେ ନା଼ସା କିନେ ଅ଼ଡ଼େ ଏ଼ୟୁ ମୀ ଡ଼ୁଗିନି ଟା଼ୟୁ ମୁଞ୍ଜିକିନେ।" 18 ଇଞ୍ଜାଁ ହା଼କି ତଲେ ମୀ କିହାମାନି ମେ଼ରା ହେକ କିୱିଆ଼ନେ, ଅ଼ଡ଼େ ତା଼ଡ଼େପୂରୁ ତଲେ ମୀ ରା଼ଜିମା଼ନା ତୀରିଆ଼ହାଁ ଡ଼ୟେଏ; କ୍ଡୁପ୍‌ହିମାନି ଲେହେଁତି ବା଼ଦା ୱା଼ନି ବେ଼ଲାତା ମୀରୁ ମୁଞ୍ଜା ହାଜେରି। 19 ଏ଼ଦି ଏଚର ପା଼ଲି ୱା଼ନେ ଏଚର ପା଼ଲି ମିଙ୍ଗେ ଅୟାନେ; ଇଚିହିଁ ଲା଼ଇ ତାକି ଲା଼ଇ, ଲା଼ଆଁୟାଁ ଅ଼ଡ଼େ ମାଦେନା ୱା଼ନେ; ଇଞ୍ଜାଁ ଈ ଜାଗ୍ରାତା ବ଼ଲୁତି ମୀରୁ ତେଲ୍‌ହାଲି ଆ଼ଡିସାରେ ୱାର୍‌ଇ କିଲିବିଲି ଆଜି ୱା଼ନେ। 20 ଇଚିହିଁ ଜାହାରା କଡାୟାଁ ଦା଼ସାଲି ମାଣ୍‌ସିତି ପା଼ସ୍‌ପନି ଊଣା ଅ଼ଡ଼େ ଜାହାରାଇଁ ପ୍ଡିକ୍‌ହା କଡାଲି ହିମ୍ବରି ସା଼କଡ଼ି। 21 ଇଚିହିଁ ପ୍ରବୁ ଏ଼ନିକିଁ ପରାସିମ ହ଼ରୁତା ନିତେସି ଏ଼ୱାସି ଏଲେକିହିଁ ନିନେସି ଅ଼ଡ଼େ ଏ଼ନିକିଁ ଗିବିୟନ ଡ଼଼ଇତି ବୂମିତା ଏ଼ୱାସି କାର୍‌ବି ଆ଼ହାମାଚେସି; ଏଲେକିହିଁ ଏ଼ୱାସି କାର୍‌ବି ଆ଼ନେସି, ଏଚେଟିଏ ଏ଼ୱାସି ତାନି କାମା, ତାନି କାବାଆ଼ନି କାମା ପୂରା କିନେସି ଅ଼ଡ଼େ ତାନି ବେ଼ବାରା ଅ଼ଡ଼େ ତାନି ଏଟ୍‌କା ଦେ଼ସାତି ବେ଼ବାରା ପୂରା କିନେସି।

22 ଈଦାଆଁତାକି ନୀଏଁ ମୀରୁ ନିନ୍ଦା କିନାତେରି ଆ଼ଆଦୁ, ଡା଼ୟୁ ମୀ ପା଼ନ୍ଦା ଆ଼ଟ୍‌ୱା ଆ଼ନେ; ଇଚିହିଁ ପ୍ରବୁ ବା଼ଡ଼୍‌ୟୁଗାଟି ପ୍ରବୁ ତା଼ଣାଟି ମା଼ର ବାରେ ଦାର୍‌ତି ଲାକ ନା଼ସା ଆ଼ହାଲି ତୀରି ଆ଼ହାମାନେ।

23 ମୀରୁ କିର୍ୟୁଁ ଅଡାହାଁ ନା଼ ହା଼ଡା ୱେଞ୍ଜୁ; ମ଼ନ ହୀହାଁ ନା଼ ବ଼ଲୁ ୱେଞ୍ଜୁ। 24 ତା଼ସା କିନାସି ବିଚା ମାଟାଲି କା଼ଲେଏ ହେ଼ରୁ ଡ଼ୂନେସି ? ଏ଼ୱାସି ଏ଼ନାଆଁ କା଼ଲେଏ ଡେପ୍‌ଲା ୱେ଼ଆନା ସା଼ରା କିନେସି ? 25 ଏ଼ନାଆଁ ଏ଼ୱାସି ବୂମିତି ଲାକନି ପାରୁ ଲେହେଁ କିତି ଡା଼ୟୁ କା଼ଡ଼ିନି ଜୀରା ଡ଼ାଞ୍ଜଅସି ଅ଼ଡ଼େ ଜୀରା ମାଟଅସି ଅ଼ଡ଼େ ଦା଼ଡ଼ି ଦା଼ଡ଼ି ଗ଼ହଁୟାଁ ମାଦି ମାଦି କାଃୱା ଜ଼ନା ଅ଼ଡ଼େ ବା଼ଡ଼ାତି ଗାଟୁତା ଜ଼ନାୟାଁ ଉହଅସି ? 26 ଇଚିହିଁ ତାନି ମାହାପୂରୁ ଏ଼ୱାଣାଇଁ ନେହିଁ କାମା କିହାଲି ୱେହ୍‌ନେସି ଅ଼ଡ଼େ ଜା଼ପ୍‌ନେସି। 27 ଇଚିହିଁ କା଼ଡ଼ିନି ଜୀରା ଏ଼ନି ୱାହ୍‌ନି ଆ଼ସ୍ତି ତଲେ ୱିସ୍‌ପି କିହାଲି ଆ଼ଏ କି ଜୀରା ଲାକ ସଗଡ଼ି ବିଲା ତା଼କି କିହାଲି ଆ଼ଏ; ସାମା କା଼ଡ଼ିନି ଜୀରା ଅ଼ଡ଼େ ଜୀରା ବାଡ଼୍‌ଗା ତଲେ ହାସାଲି ଆ଼ନେ। 28 ରୂଟି କିନି ଆର୍ନା ଗୁଣ୍ତା କିୱିଆ଼ନେ; ଇଚିହିଁ ଏ଼ଦାଆଁ କା଼ଲେଏ ୱିସ୍‌ପି କିହାଲି ଆ଼ଏ; ଅ଼ଡ଼େ ତାନି ସଗଡ଼ି ବିଲା କି ତାନି ଗ଼ଡ଼ାୟାଁ ସିନାସାତ୍ରା କିନୁ, ଆ଼ତିଜିକେଏ ଏ଼ଦି ଗୁଣ୍ତା ଆ଼ଏ। 29 ଈଦି ଜିକେଏ ବା଼ଡ଼୍‌ୟୁଗାଟି ପ୍ରବୁ ତା଼ଣାଟି ଆ଼ନେ, ଏ଼ୱାଣି ଅଣ୍‌ପୁତା କାବା ଆ଼ନାୟି ଅ଼ଡ଼େ ବୁଦିତା କାଜାସି।