1 ସାମା ପୁର୍ବେ ଏମିନି ଦେ଼ସା କସ୍ତଗାଟାୟି ମାଚେ, ଏ଼ଦି ଆନ୍ଦେରି ଆ଼ହାଁ ଡ଼ୟେଏ। ପୁର୍ବେ କା଼ଲାତା ଏ଼ ସବୁଲୁନ ଦେ଼ସା ଅ଼ଡ଼େ ନପ୍ତାଲି ଦେ଼ସାତି ଲାଜା କିହାମାଚେରି, ସାମା ଡା଼ୟୁ କା଼ଲାତା ଏ଼ୱାସି ଏ଼ୱାଣାଇଁ ସାମ୍‌ଦୁରି ଜିରୁ ଟଟତି, ଜର୍ଦନ ଆତାଲା କା଼ଣ୍ତି, ଗାଲିଲିତି ଲ଼କୁଣି ବାତ୍‌କି କିନେସି। 2 ଏମିନି କୂଲୁ ଆନ୍ଦେରିତା ତା଼କିତେରି, ଏ଼ୱାରି କାଜା ଉଜେଡ଼ି ମେସାମାନେରି; ଏମିନିଗାଟାରି ହା଼କିତି ସା଼ୟିଁ ୱା଼ଣା ଦେ଼ସାତା ବାସା କିତେରି, ଏ଼ୱାରି ଲାକ ଉଜେଡ଼ି ଆ଼ଡାମାନେ। 3 ନୀନୁ ଏ଼ ଦେ଼ସାତି ଲ଼କୁଣି ହା଼ରେକା କିହାଁ ଏ଼ୱାରି ରା଼ହାଁ ପାଡିକିହାମାଞ୍ଜି; ଏ଼ୱାରି ଆର୍ନା ଦା଼ଃନି ରା଼ହାଁ ସମାନା ରା଼ହାଁ କିନେରି, ଦୂହିତାଣି ବା଼ଗା କିନି ବେ଼ଲାତି ଲେହେଁ ରା଼ହାଁ ଆ଼ନେରି, 4 ଏ଼ନିଇଚିହିଁ ମିଦିୟନ ଦିନାତା ଏ଼ନିକିଁ, ଏଲେକିଁ ନୀନୁ ତାନି ବ଼ଜୁ ଲେହେଁତି ଜୁୱେଡ଼ି ଅ଼ଡ଼େ ତାନି ବମିତି କା଼ଞ୍ଜୁ, ତାନି ସା଼ସ୍ତି ହୀହିମାନାଣି ବାଡ଼୍‌ଗା ଡିକ୍‌ହାମାଞ୍ଜି। 5 ଏ଼ଦାଆଁତାକି ଜୁଜୁତା ତିୟାରା ଆ଼ହାମାନି ବାରେ ଆ଼ସ୍ତି ଅ଼ଡ଼େ ନେତେରି ରୂଡିତି ବାସ୍ତେରି ବାରେ ୱେନି ଦିଣ୍‌ସୁ, ହିଚୁ ତାକି ୱେସ୍‌କା ଲେହେଁ ଆ଼ନେ। 6 ଇଚିହିଁ ମାଙ୍ଗେ ତାକି ର଼ କକାସି ଜାର୍ନା ଆ଼ହାମାନେସି, ମାଙ୍ଗେ ର଼ ମୀର୍‌ଏସି ହୀପ୍‌କି ଆ଼ହାମାଞ୍ଜାନେସି ଅ଼ଡ଼େ ତାନି ବମିତା ସା଼ଲୱି କିନି ବ଼ଜୁ ଇଟ୍‌କି ଆ଼ନେ; ଇଞ୍ଜାଁ, ତାନି ଦ଼ରୁ କାବାଆ଼ନାୟି, ମନ୍ତ୍ରି, ବା଼ଡ଼୍‌ୟୁଗାଟି ପ୍ରବୁ, କା଼ଲେଏତି ତାଞ୍ଜି, ହିତ୍‌ଡ଼ିତି ରାଜା ଆ଼ନେ। 7 ଏ଼ୱାଣି ସା଼ଲୱି କିନାୟି କା଼ଲେଏ ପାଡା ଆ଼ନେ ଅ଼ଡ଼େ ଏ଼ୱାଣି ହିତ୍‌ଡ଼ି ଏଚେଲା ରା଼ଏ, ଏ଼ଦାଆଁତାକି ଏ଼ୱାସି ଏ଼ୱାଣାକି ଦାୱୁଦତି ସିଂଗାସାଣିତା ନୀଏଁଟିଏ କା଼ଲେଏ ତାକି ନୀହାଁୟି ଅ଼ଡ଼େ ଦାର୍ମୁତଲେ କା଼ଲାକା଼ଲା ତାକି ତୀରି ଅ଼ଡ଼େ ଆ଼ଟ୍‌ୱା କିନେସି। ବା଼ଡ଼୍‌ୟୁଗାଟି ପ୍ରବୁତି ବ଼ଲୁ ଈଦାଆଁ ଆ଼ୱିକିନେ।

8 ପ୍ରବୁ ଜାକୁବକି ର଼ କାବ୍ରୁ ହୀହାମାନେସି ଅ଼ଡ଼େ ଏ଼ଦି ଇସ୍ରାୟେଲ କୂଡ଼ା ତାକି ଆ଼ହାମାନେ। 9 ଇଞ୍ଜାଁ ବାରେ ଲ଼କୁ, ଇପ୍ରୟିମ ଅ଼ଡ଼େ ସମରିୟାତା ବାସା କିହାମାନାରି ଜିକେଏ ଏ଼ଦାଆଁ ପୁନେରି; ଏ଼ୱାରି ଡା଼ହାରା ଅ଼ଡ଼େ ବଡପଣ ତଲେ ଏଲେଇନେରି। 10 "ଈଟା ବାରେ ୱେହାମାନେ ସାତା, ସାମା ମା଼ର ରାତ୍‌ହି ୱାଲ୍‌କା ତଲେ ଇଲୁ କେ଼ପିନ; ତ଼ୟା ମା଼ର୍‌କା ବାରେ ଟୂଣ୍‌ୱି ଆ଼ହାମାନୁ ସାତା, ସାମା ମା଼ର ଏ଼ଦାନି ବାଦୁଲି ଏରସ ମା଼ର୍‌କା ପାଡିକିନ।"

11 ଏ଼ଦାଆଁତାକି ପ୍ରବୁ ତାନି କ଼ପାଟି ରତ୍‌ସିନତି ବା଼ଦ୍ରି ଗାଟାରାଇଁ ପାଡିକିନେସି ଅ଼ଡ଼େ ତାନି ସାତ୍ରୁୟାଁଇଁ ଉସ୍‌କୱି କିନେସି; 12 ନ଼କିତା ଅରାମିୟ ଲ଼କୁ ଅ଼ଡ଼େ ଡା଼ୟୁୱାକି ପାଲେସ୍ତିୟ ଲ଼କୁ ଆ଼ନେରି; ଅ଼ଡ଼େ ଏ଼ୱାରି କାଜା ହା଼ଡା ତଲେ ଇସ୍ରାୟେଲଇଁ ହା଼ରୱି କିନେରି। ଈ ବାରେ ଆ଼ତି ଜିକେଏ ତାନି କାର୍‌ବି ଊଣା ଆ଼ଏ, ସାମା ତାନି କେୟୁ ତଲିତି ଲେହେଁ ଦା଼ସାହାଁ ଡ଼ୟାମାନେ।

13 ଆ଼ତିଜିକେଏ ଲ଼କୁଣି ଆମ୍ବାଆସି ୱେ଼ଚାମାନେସି, ଏ଼ୱାଣି ତା଼ଣା ଏ଼ୱାରି ୱେଣ୍ତା ହିଲଅରି, କି ଏ଼ୱାରି ବା଼ଡ଼୍‌ୟୁଗାଟି ପ୍ରବୁଇଁ ପାରାହିଲଅରି। 14 ଏ଼ଦାଆଁତାକି ପ୍ରବୁ ଇସ୍ରାୟେଲତି ତା଼ର୍ୟୁଁ ଅ଼ଡ଼େ ଲେଂଗୁଣି, କାଜୁରି ମାଟାୟାଁ ଅ଼ଡ଼େ ଏ଼ୟୁତି ଆ଼ଟ୍‌ୱା ଜା଼ଡ଼ା ରଣ୍ତିଏ ଦିନାତା ଦା଼ଃନେସି। 15 କାଜାରି ଅ଼ଡ଼େ ମା଼ନି ଗାଟି ଲ଼କୁ ଏ଼ ତା଼ର୍ୟୁଁ, ଇଞ୍ଜାଁ, ମିଚି ଜା଼ପ୍‌ନି ୱା଼ନି ଦିନାତି ବ଼ଲୁ ୱେ଼କ୍‌ନାରି ଲେଂଗୁଣି, 16 ଇଚିହିଁ ଈ ଲ଼କୁତି ଜିରୁ ତ଼ହ୍‌ନାରି ଏ଼ୱାରାଇଁ ନା଼ଡ଼ି କିନେରି, ଇଞ୍ଜାଁ, ଏମିନିଗାଟାରି ଏ଼ୱାରି ତଲେ ଜିରୁ ତ଼ସ୍‌ପି ଆ଼ନେରି, ଏ଼ୱାରି ନା଼ସା ଆ଼ନେରି। 17 ଏ଼ଦାଆଁତାକି ପ୍ରବୁ ଏ଼ୱାରି ଦାଂଗ୍‌ଣାୟାଁ ତା଼ଣା ରା଼ହାଁ କିଅସି, କି ତାମି ତାଞ୍ଜି ହିଲାଆ କକାରି ଅ଼ଡ଼େ ରା଼ଣ୍ତେଣିସିକାଣି କାର୍ମା ମେହ୍‌ଅସି; ଏ଼ନିଇଚିହିଁ ବାରେ ଲ଼କୁ ଦାର୍ମୁ ହିଲାଆଗାଟାରି ଅ଼ଡ଼େ ଲାଗେଏତି କାମା କିନାରି ଅ଼ଡ଼େ ବାରେତି ଗୂତି ମିଚିଗାଟାଇ। ଈ ବାରେ ଆ଼ତିୱା ତାନି କାର୍‌ବି ଊଣା ଆ଼ଏ, ସାମା ତାନି କେୟୁ ତଲିତି ଲେହେଁ ଦା଼ସାହାଁ ଡ଼ୟାମାନେ।

18 ଏ଼ନିଇଚିହିଁ ଲାଗେଏତାୟି ହିଚୁ ଲେହେଁ ଡ଼ୀଞ୍ଜିନେ; ଏ଼ଦି ଅଣ୍‌ଙ୍ଗ ଅ଼ଡ଼େ ହା଼ପ୍‌କା ମା଼ର୍‌କାଣି ଗୂହ୍‌ନେ; ଅ଼ଡ଼େ, ଏ଼ଦି ଜା଼ଡ଼ାତି କାଜା ଦୁପାତା ଡ଼ୀଞ୍ଜାହାଁ ଦୂନ୍ଦ୍ରା ଲେହେଁ ବ଼ୟିଁ ଆ଼ହାଁ ଲାକ ନିଙ୍ଗିନେ। 19 ବା଼ଡ଼୍‌ୟୁଗାଟି ପ୍ରବୁତି କ଼ପାତା ଦେ଼ସା ୱେହାମାନେ; ଇଞ୍ଜାଁ ଲ଼କୁ ହିଚୁ ତାକି ୱେସ୍‌କା ଲେହେଁ ଆ଼ହାମାନେରି; ଆମ୍ବାଆସି ଜାହାରା ତାୟିଇଁ କାର୍ମା ମେହ୍‌ଅସି। 20 ଏଚେଟିଏ ଲ଼କୁ ଟିଃନି କେୟୁଟି ତିନି କା଼ଦି ମୀଞ୍ଜିନେରି, ଇଞ୍ଜାଁ, ହାକି ଡ଼ୟିନେରି; ଇଞ୍ଜାଁ, ଟେ଼ବ୍ରି କେୟୁଟି ତିଞ୍ଜାହାଁ ଜିକେଏ ପାଞ୍ଜଅରି; ଏ଼ୱାରି ବାରେ ଜାହାରା ଜାହାରା ମୀର୍‌କାତି ଊଙ୍ଗା ତିନେରି।

ମନଃସି ଇପ୍ରୟିମ କ଼ପାଟି ଅ଼ଡ଼େ ଇପ୍ରୟିମ ମନଃସି କ଼ପାଟି ଜୁଜୁ କିନେରି, ଇଞ୍ଜାଁ, ଏ଼ୱାରି ରହେଁଏ ଆ଼ହାଁ ଜୀହୁଦା କ଼ପାଟି ଜୁଜୁ କିନେରି। ଈ ବାରେ ଆ଼ତିୱା ତାନି କାର୍‌ବି ଊଣା ଆ଼ଏ, ସାମା ତାନି କେୟୁ ତଲିତି ଲେହେଁ ଦା଼ସାହାଁ ଡ଼ୟାମାନେ।