1 ଏ଼ ଦିନା ଜୀହୁଦା ଦେ଼ସାତା ଈ ପା଼ଚୁ ପା଼ଚ୍‌ୱି ଆ଼ନେ;

"ମା଼ଦି ର଼ ଆ଼ଟ୍‌ୱା ଗା଼ଡ଼ା ମାନେ; ଏ଼ୱାସି ଗେଲ୍‌ପିନାଣି ଏମ୍ବାତି କ଼ଟା

ଅ଼ଡ଼େ ଆଡୁ ଲେହେଁ କିନେସି।

2 ସାତା ମା଼ନୱି ଆ଼ନାରି ଦାର୍ମୁଗାଟି କୂଡ଼ା ଏ଼ନିକିଁ ହ଼ଡାଲି ଆ଼ଡିନେରି,

ଏ଼ଦାଆଁତାକି ମୀରୁ ଗା଼ଡ଼ା ଦୁୱେରିକା ବାରେ ଦେଃଦୁ।

3 ଆମ୍ବାଆରି ମ଼ନ ନୀ ତା଼ଣା ତୀରି ଡ଼ୟିନେ,

ଏ଼ୱାଣାଇଁ ନୀନୁ ହିତ୍‌ଡ଼ି ତଲେ ଇଟିଦି;

ଏ଼ନିଇଚିହିଁ ଏ଼ୱାସି ନୀ ତା଼ଣା ଆ଼ସା ଇଟାନେସି।

4 ମୀରୁ କା଼ଲେଏ ପ୍ରବୁ ତା଼ଣା ଆ଼ସା ଇଟାଦୁ;

ଇଚିହିଁ ଜିହବା ପ୍ରବୁ କା଼ଲେଏତି ପା଼କା।

5 ଇଞ୍ଜାଁ, ଏ଼ୱାସି ପାଡାଆ଼ତି ଟା଼ୟୁତା ମାନାରାଇଁ, କାଜା ଗା଼ଡ଼ାତି ଊଣା କିହାମାନେସି;

ଏ଼ୱାସି ଏ଼ଦାଆଁ ଊଣା କିହାଁ କୁଡ଼୍‌ପୁନା଼ସା କିନେସି;

ଏ଼ୱାସି ଏ଼ଦାଆଁ ଦୂଡ଼ିତା ଆଟ୍‌ନେସି।

6 ଏ଼ଦି ପାଃଆନା ତଲେ ଇଚିହିଁ କାର୍ମାଗାଟାରି କଡାୟାଁ ତଲେ ୱିହ୍‌ନେ।"

7 ଦାର୍ମୁଗାଟାଣି ଜିରୁ ତିୟିତାୟି; ନୀନୁ ପା଼ଡ଼ା ଆ଼ତାତି,

ନୀନୁ ଦାର୍ମୁଗାଟାଣି ଜିରୁ ତ଼ସିମାଞ୍ଜି।

8 ଏ଼ ପ୍ରବୁ, ମା଼ମ୍ବୁ ନୀ ସା଼ଲୱିକିନି ଜିରୁତା ନିଙ୍ଗେ କା଼ଚାହାଁ ଡ଼ୟାମାନମି;

ନୀ ଦ଼ରୁ ଅ଼ଡ଼େ ନୀ ଅଣ୍‌ପିନି ସିନା ତାକି ମା଼ ଜୀୱୁତି ଆ଼ସା ମାନେ।

9 ଲା଼ଆଁୟାଁ ବେ଼ଲା ନା଼ନୁ ଜାହାରା ଜୀୱୁ ତଲେ ନୀ ଆ଼ସା କିହାମାଇଁ;

ହାଅ, ନା଼ନୁ ନା଼ ହିୟାଁତି ଜୀୱୁ ତଲେ ତବେ ନିଙ୍ଗେ ପାରାଇଁ;

ଇଚିହିଁ ଦାର୍‌ତିତା ନୀ ସା଼ଲୱି କିନାୟି ବାରେ ୱେ଼ପ୍‌କି ଆ଼ତିସାରେ ଦାର୍‌ତିତା ବାସା କିହାମାନାରି ଦାର୍ମୁ ଜା଼ପିନେରି।

10 ଲାଗେଏ ଲ଼କୁ ତାକି କାର୍ମା ମେସ୍‌ପି ଆ଼ତିହିଁ ଜିକେଏ ଏ଼ୱାସି ଦାର୍ମୁ ଜା଼ପଅସି;

ଦାର୍ମୁତି ଦେ଼ସାତା ଏ଼ୱାସି ଲାଗେଏ କିନେସି ଅ଼ଡ଼େ ପ୍ରବୁତି ସାମ୍ବ୍ରମିତି ସିନିକିଅସି।

11 ଏ଼ ପ୍ରବୁ, ନୀ କେୟୁ ନିଙ୍ଗାମାନେ, ଆ଼ତିଜିକେଏ ଏ଼ୱାରି ମେହ୍‌ଅରି,

ସାମା ଲ଼କୁ ୱାକି ନୀ ରା଼ହାଁ ମେସାହାଁ ଏ଼ୱାରି ଲାଜା ଆ଼ନେରି;

ହାଅ, ହିଚୁ ନୀ ସାତ୍ରୁୟାଁଇଁ ନା଼ସା କିନେ।

12 ଏ଼ ପ୍ରବୁ, ନୀନୁ ମା଼ ତାକି ହିତ୍‌ଡ଼ି ତୀରି କିଦି;

ଇଚିହିଁ ନୀନୁ ମା଼ ତାକି ମା଼ ବାରେ କାମା ପୂରା କିହାମାଞ୍ଜି।

13 ଏ଼ ପ୍ରବୁ, ମା଼ ମାହାପୂରୁ, ନୀ ପିସ୍‌ପେ ଏଟ୍‌କାତାରି ମା଼ ଲାକ ସା଼ଲୱି କିହାମାଚେରି,

ସାମା ୱାର୍‌ଇ ନୀ ତା଼ଣାଟି ମା଼ମ୍ବୁ ନୀ ଦ଼ରୁତି ପା଼ଚିନମି।

14 ଏ଼ୱାରି ହା଼ହାମାନେରି, ଏ଼ୱାରି ଅ଼ଡ଼େ ନୀଡଅରି;

ଏ଼ୱାରି ହା଼ହାମାନେରି, ଏ଼ୱାରି ନିଙ୍ଗଅରି;

ଏ଼ଦାଆଁତାକି ନୀନୁ ତାମି କାମାତି ପା଼ଡ଼େୟି ହୀହାଁ ଏ଼ୱାରାଇଁ ନା଼ସା କିହାମାଞ୍ଜି

ଅ଼ଡ଼େ ଏ଼ୱାରା ଅଣ୍‌ପୁ ଡ଼ୁକ୍‌ହାମାଞ୍ଜି।

15 ନୀନୁ ଈ ଦେ଼ସାତି ଲ଼କୁଣି ଏ଼ପା କିହାମାଞ୍ଜି,

ଏ଼ ପ୍ରବୁ, ନୀନୁ ଈ ଦେ଼ସାତି ଲ଼କୁଣି ଏ଼ପା କିହାମାଞ୍ଜି;

ନୀନୁ ଗା଼ୱୁରମି ଆ଼ହାମାଞ୍ଜି; ନୀନୁ ଦେ଼ସାତି ହାନ୍ଦି ବାରେ ଦା଼ସାମାଞ୍ଜି।

16 ଏ଼ ପ୍ରବୁ, କସ୍ତ ବେ଼ଲାତା ଏ଼ୱାରି ନିଙ୍ଗେ ପାରାମାଞ୍ଜାନେରି,

ନୀ ସା଼ସ୍ତି ତାମି ଲାକ ମାନି ବେ଼ଲା ଏ଼ୱାରି ପ୍ରା଼ତାନା କିୟାତେରି।

17 ପୂରାମା଼ସା ଆ଼ହାମାନି ଇୟା ଜାର୍ନିକିନି କାଟୁ ଆ଼ନି ବେ଼ଲାତା ଏ଼ନିକିଁ କିଲିବିଲି ଆ଼ନେ

ଅ଼ଡ଼େ ବୀସା ତାକି କା଼ଲୱି ଆ଼ହି ଡ଼ୀନେ,

ଏଲେକିହିଁ ଏ଼ ପ୍ରବୁ, ମା଼ମ୍ବୁ ନୀ ନ଼କିତା ଆ଼ହାମାନମି।

18 ମା଼ମ୍ବୁ ପୂରାମା଼ସା ଆ଼ହାମାନମି, ମା଼ମ୍ବୁ କିଲିବିଲି ଆ଼ହାଁ

ସାମା ଏ଼ନାଆଁ ଜାର୍ନି କିହାମାନମି;

ମା଼ମ୍ବୁ ଦେ଼ସାତି ଗେଲ୍‌ପିନାଣି କିହା ହିଲଅମି;

କି ଦାର୍‌ତିତା ବାସା କିନାରି ଜାର୍ନା ଆ଼ହା ହିଲଅରି।

19 ମୀ ହା଼ତାରି ନୀଡିନେରି; ମାଡ଼୍‌ହା ବାରେ ନିଙ୍ଗାହାଁ ନୀନୁ।

ଏ଼ ଦୂଡ଼ିତା ବାସା କିହାମାନାତେରି* ମୀରୁ ନିଙ୍ଗାହାଁ ପା଼ଚାଦୁ;

ଇଚିହିଁ ନୀ ପେଣ୍ତି ମାଚୁ ଜା଼ଡ଼ାତି ପେଣ୍ତି ମାଚୁ ଲେହେଁ

ଅ଼ଡ଼େ ବୂମି ହା଼ତାରାଇଁ ୱେଣ୍ତେ ହ଼ପ୍‌ହା ହୀନେ।

20 "ଏ଼ ନା଼ ଲ଼କୁତେରି, ୱା଼ଦୁ, ମୀ ଇଲୁ ବାକ୍ରାତା ହ଼ଡାହାଁ ମୀ ସା଼ରି ୱାକି ଦା଼ରାୟାଁ ସୁଣ୍ତାଦୁ; କାର୍‌ବି ଊଣା ଆ଼ୱେ ତାକି ଜାହାରାଇଁ ଡ଼ୁକ୍‌ହା କଡାଦୁ। 21 ଇଚିହିଁ ମେହ୍‌ଦୁ ପ୍ରବୁ ଦାର୍‌ତିତା ବାସା କିହାମାନାରି ଦ଼ହ ତାକି ଏ଼ୱାରାଇଁ ସା଼ସ୍ତି ହୀହାଲି ତାକି ତାନି ଟା଼ୟୁଟି ହ଼ଚା ୱା଼ହିମାନେସି; ଇଞ୍ଜାଁ ଦାର୍‌ତି ଜିକେଏ ତାନି ତା଼ଣାତି ନେତେରି ତ଼ହ୍‌ନେ ଅ଼ଡ଼େ ତାନି ହା଼ତି ଲ଼କୁଣି ପ୍ଡିକ୍‌ହା ଇଟେଏ।"