1 "ନା଼ ଲ଼କୁଣି ବା଼ର୍ସୁ ହୀଦୁ, ବା଼ର୍ସୁ ହୀଦୁ।" ଈଦାଆଁ ମୀ ମାହାପୂରୁ ଏଲେଇଞ୍ଜି ମାନେସି।

2 ମୀରୁ ଜିରୁସାଲମତି ହିୟାଁତି ହିତ୍‌ଡ଼ି ହା଼ଡା ଜ଼ଲାଦୁ,

ଅ଼ଡ଼େ ତାନି କସ୍ତତି କାମା ରା଼ତେ, ତାନି ଦ଼ହ କେମା ଆ଼ତେ,

ଏ଼ଦି ପ୍ରବୁ କେୟୁଟି ତାନି ବାରେ ପା଼ପୁ ତାକି ରୀ ଗୂଣୁ ବେଟାଆ଼ହାମାନେ ଇଞ୍ଜିଁ ତାନି ନ଼କିତା ୱେ଼କ୍‌ଦୁ।

3 ରଅଣି ହା଼ଡା ୱେ଼ଙ୍ଗିମାନେ, ମୀରୁ ଜା଼ଡ଼ାତା ପ୍ରବୁତି ଜିରୁ ତିୟାରା କିଦୁ,

ବାଃଲି ବାଟାତା ମା଼ ମାହାପୂରୁ ତାକି କାଜା ପା଼ହେରି ତିୟି କିଦୁ।

4 ବାରେ କୁପ୍‌ଲିୟାଁ ପାଡିକିୱି ଆ଼ନୁ,

ବାରେ ହ଼ର୍‌କା ଅ଼ଡ଼େ ଊଣା ହ଼ର୍‌କା ଊଣା କିୱିଆ଼ନୁ,

ଡ:ଙ୍ଗିତି ଜିରୁ ତିୟିକିୱି ଆ଼ନେ,

ଡେପା କାଡ଼୍‌ଦି ସମାନା କିୱିଆ଼ନେ।

5 ଇଞ୍ଜାଁ ପ୍ରବୁତି ଉଜେଡ଼ି ତ଼ଞ୍ଜାଆ଼ନେ ଅ଼ଡ଼େ ବାରେ ଦାର୍‌ତି ଲ଼କୁ ଏ଼ଦାଆଁ ରହେଁଏ ମେହ୍‌ନେରି;

ଇଚିହିଁ ପ୍ରବୁତି ଗୂତି ଈଦାଆଁ ୱେସାମାନେ।

6 ରଅଣି ହା଼ଡା ଏଲେଇଞ୍ଜିମାନେ, "ୱେ଼କ୍‌ଦୁ,"

ଏଚେଟିଏ ରଅସି ଏଲେଇଚେସି, "ଏ଼ନାଆଁ ୱେ଼କ୍‌ଇଁ ?"

ବାରେ ଜୀୱୁ ଗାଟାଇ ଜା଼ଡ଼ା ଲେହେଁ

ଅ଼ଡ଼େ ତାନି ବାରେ ଅ଼ଜୁ ଗୁଡିୟାତି ପୂୟୁ ଲେହେଁ;

7 ଜା଼ଡ଼ା ୱା଼ୟା ହାନେ, ପୂୟୁ ୱା଼ଡ଼ା ହାନେ;

ଇଚିହିଁ ଏ଼ଦାନି ଲାକ ପ୍ରବୁତି ଊକ୍‌ଅଡ଼ି ୱା଼ନେ,

ଏ଼ଦାଆଁତାକି ଲ଼କୁ ଜା଼ଡ଼ା ଲେହେଁ।

8 ଜା଼ଡ଼ା ୱା଼ୟା ହାନେ, ପୂୟୁ ୱା଼ଡ଼ା ହାନେ;

ସାମା ମା଼ ମାହାପୂରୁତି ବ଼ଲୁ କା଼ଲେଏତାୟି।

9 ଆଲ, ସିୟନ ନ଼କିତା ନେହିଁ କାବ୍ରୁ ୱେ଼କ୍‌ନାତି,

ନୀନୁ ପାଡାଆ଼ତି ହ଼ରୁତା ହାଲାମୁ;

ଆଲ, ଜିରୁସାଲମ ନ଼କିତା ନେହିଁ କାବ୍ରୁ ୱେ଼କ୍‌ନାତି

ନୀନୁ ବା଼ଡ଼୍‌ୟୁ ତଲେ କାଜା ଗିୟାଁ କିମୁ,

କାଜା ଗିୟାଁ ତଲେ ୱେହ୍‌ମୁ, ଆଜାଆନି;

ଜୀହୁଦାତି ଗା଼ଡ଼ାୟାଁଣି ୱେହ୍‌ମୁ,

"ମେହ୍‌ମୁ ଈୱାସି ମୀ ମାହାପୂରୁ।"

10 ମେହ୍‌ଦୁ ପ୍ରବୁ ମାହାପୂରୁ ହା଼ରେକା ବା଼ଡ଼୍‌ୟୁ ଗାଟାସି ଲେହେଁ ୱା଼ନେସି

ଅ଼ଡ଼େ ତାନି ବାହା ତଲେ ସା଼ଲୱି କିନେସି;

ମେହ୍‌ଦୁ, ତାନି ତଲେ ତାନି ଦା଼ନା ମାନେ ଅ଼ଡ଼େ ତାନି ନ଼କିତା ତାନି ବାଦୁଲି ହୀନାୟି ମାନେ।

11 ଏ଼ୱାସି ମେ଼ଣ୍ତାୟାଁ ଗ଼ଡ଼ୁ ଲେହେଁ ତାନି ମାନ୍ଦାତି ମେନେସି,

ମେ଼ଣ୍ତା ଡା଼ଲ୍‌କାଣି ପମାହାଁ ଏ଼ୱାସି ତାନି କଡାୟାଁଣା ଜ଼ଙ୍ଗିନେସି,

ଅ଼ଡ଼େ ପା଼ଲୁ ଊଟ୍‌ହିମାନାସିକାଣି ଦୀରେ ଦୀରେ ତା଼କି କିନେସି।

12 ଆମ୍ବାଆସି ତାନି କେୟୁତି ପାସିତା ସାମ୍‌ଦୁରିତି ଏ଼ୟୁ ଲା଼ଚାମାନେସି,

ବିତା ତଲେ ହା଼ଗୁତି ଲା଼ଚାମାନେସି,

ଅ଼ଡ଼େ ଗ଼ଣିତା ଦାର୍‌ତିତି ଦୂଡ଼ି ନେସାମାନେସି,

ଇଞ୍ଜାଁ ହ଼ର୍‌କାଣି ଅ଼ଡ଼େ ଊଣା ହ଼ର୍‌କାଣି ବୀସା ବାଡ଼୍‌ଗା ତଲେ ତୂକ୍‌ହାମାନେସି ?

13 ପ୍ରବୁତି ଜୀୱୁଇଁ ଆମ୍ବାଆସି ହୁକୁମି ହୀହାମାନେସି,

ଅ଼ଡ଼େ ଜା଼ପ୍‌ନାସି ଆ଼ହାଁ ଆମ୍ବାଆସି ଏ଼ୱାଣାଇଁ ଜା଼ପ୍‌ହାମାନେସି ?

14 ଏ଼ୱାସି ଆମ୍ବାଆରି ତଲେ କାତା ଆ଼ତେସି,

ଆମ୍ବାଆସି ଏ଼ୱାଣାଇଁ ଜା଼ପ୍‌ହାମାନେସି ଅ଼ଡ଼େ ବିଚାରା କିନି ଜିରୁ ଆମ୍ବାଆସି ଜା଼ପ୍‌ହେସି

ଅ଼ଡ଼େ ବୁଦି ଜା଼ପ୍‌ହେସି, ଅ଼ଡ଼େ ଅଣ୍‌ପିନି ଜିରୁ ତ଼ସ୍ତେସି ?

15 ମେହ୍‌ଦୁ, ଲ଼କୁ ଡ:କାତି ଏ଼ୟୁ ବନ୍ଦା ଲେହେଁ ଅ଼ଡ଼େ ବୀସା ବାଡ଼୍‌ଗାତି ଦୂଡ଼ି ଲେହେଁ ଆ଼ନେରି;

ମେହ୍‌ଦୁ, ଏ଼ୱାସି ସାମ୍‌ଦୁରି ମାଦି ମାନି ହ଼ର୍‌କାଣି ଦୂଡ଼ି ଲେହେଁ ନିକ୍‌ନେସି।

16 ଲିବାନନତି ୱେସ୍‌କା ହୂଡାଲି

ଅ଼ଡ଼େ ଏମ୍ବାତି ଜ଼ନ୍ତୟାଁ ହିଚୁତା ହୂଡିନି ପୂଜା ତାକି ସାରି ଆ଼ଏ।

17 ବାରେ ଦେ଼ସାତି ଲ଼କୁ ଏ଼ୱାଣି ନ଼କିତା ଏ଼ନାରି ଆ଼ଏ;

ଏ଼ୱାରି ଏ଼ୱାଣି ନ଼କିତା ୱାର୍‌ଆରି ଅ଼ଡ଼େ ଦାରା ହିଲାଆଗାଟାରି।

18 ଆତିହିଁ ମୀରୁ ଆମ୍ବାଆରି ତଲେ ମାହାପୂରୁଇଁ ଲେହେଁ କିଦେରି ?

ଆ଼ଆତିଁ ଆମିନି ବମାତି ଏ଼ୱାଣି ଲେହେଁ କିଦେରି ?

19 ବମା କିନାସି ଗାରାତା ୱା଼କ୍‌ନେସି,

ଅ଼ଡ଼େ କାମ୍ବାସା଼ଲି ବାଂଗାରା ରୁବିନେସି,

ଅ଼ଡ଼େ ଏ଼ଦାଣି ତାକି ୱେଣ୍ତିତି ପୂସାୟାଁ କିନେସି।

20 ଆମିନି ମାଣ୍‌ସି ଇଲେକିହିଁ ହୀହାଲି ଆ଼ଡାଆଗାଟି କା଼କୁଲି ଗାଟାସି,

ଏ଼ୱାସି ଇଲେତି ର଼ ସୀର୍‌ଆ ମା଼ର୍‌ନୁ ବାଚି କିନେସି;

ଇଞ୍ଜାଁ ର଼ ନେହିଁ ବାଡିୟାଇଁ ପାରାହାଁ ବମାତି ପତ୍‌ପି କିନେସି,

ଅ଼ଡ଼େ ଏ଼ଦାଣି ଇଲେକିଁ ତୀରି କିନେସି କି ଏ଼ଦି ଏ଼ନିକିଁ ୱୀଡେଏ।

21 ମୀରୁ କି ପୁଞ୍ଜା ହିଲଅତେରି ?

ମୀରୁ କି ୱେଞ୍ଜା ହିଲଅତେରି ?

ତଲି କା଼ଲାଟିଏ କି ମିଙ୍ଗେ ପୁଣ୍‌ମ୍ବି କିୱି ଆ଼ହାହିଲେଏ ?

ଦାର୍‌ତି ପୁନାଦି ଆ଼ତି ବେ଼ଲାତା ମୀରୁ ତେଲ୍‌ହା ହିଲଅତେରି ?

22 ଏ଼ୱାସି ଦାର୍‌ତି ଲାକ କୁଗା ମାନେସି ଅ଼ଡ଼େ ଏମ୍ବାଆଁ ବାସା କିହାମାନାରି ଗ଼ପ୍‌ଏରିକା ଲେହେଁ;

ଏ଼ୱାସି ଲେ଼ଞ୍ଜୁତି ଉଜେଡ଼ି ଲେହେଁ ହା଼ଗୁପା଼କା ଦା଼ହ୍‌ନେସି,

ଇଞ୍ଜାଁ ବାସା ଟା଼ୟୁ ତାକି ତୂମୁ ଲେହେଁ ଏ଼ଦାଆଁ ଦା଼ହ୍‌ନେସି;

23 ଏ଼ୱାସି ଦାର୍‌ତିତି କାଜା କାଜାରାଇଁ ଊଣା କିନେସି;

ଏ଼ୱାସି ଦାର୍‌ତିତି ବିଚାରା କିନାରାଇଁ ଲେକା ହିଲାଆ ଲେହେଁ କିନେସି।

24 ହାଅ, ଏ଼ୱାରି ଉହି ଆ଼ହା ହିଲଅରି;

ହାଅ, ଏ଼ୱାରି ମାଟ୍‌ୱି ଆ଼ହା ହିଲଅରି; ହାଅ,

ଏ଼ୱାରି ଡାକିତି ହୀରୁ ବୂମିତା ଜୀହାହିଲେଏ,

ଅ଼ଡ଼େ ଏ଼ୱାସି ଏ଼ୱାରି ଲାକ ଊକିନେସି, ଏଚେଟିଏ ଏ଼ୱାରି ୱା଼ୟା ହାନେରି

ଅ଼ଡ଼େ ରୁୱାଗା଼ଲି ନା଼ଡା ଲେହେଁ ଏ଼ୱାରାଇଁ ଊପ୍‌ହା ଅ଼ନେ।

25 ଈଦାଆଁତାକି ଏ଼ ଦାର୍ମୁଗାଟି ମାହାପୂରୁ ଏଲେଇଞ୍ଜି ମାନେସି,

ନା଼ନୁ ଆମ୍ବାଆରି ଲେହେଁ ଆ଼ହାଲି ଆ଼ଡିଇଁ,

ଇଲେକିଁ ଆମ୍ବାଆରି ଲେହେଁ ନାଙ୍ଗେ କିୟାଦେରି ?

26 ଲାକୱାକି ସିନିକିଦୁ ଅ଼ଡ଼େ ବାରେତି ଆମ୍ବାଆସି ଗା଼ଡ଼ି କିହାମାନେସି ?

ଏ଼ୱାସି ରିଜାରି କ଼ସ୍‌କା ଲେହେଁ ଲେକା ତଲେ ଏ଼ୱାରାଇଁ ହ଼ପ୍‌ହା ତାନେସି;

ଏ଼ ବାରେତି ଦ଼ରୁ ଆସାହାଁ ଏ଼ୱାରାଇଁ ହା଼ଟିନେସି;

ଏ଼ୱାସି ଇଲେତି ବପୁ ଅ଼ଡ଼େ ବା଼ଡ଼୍‌ୟୁ ଗାଟାସି ତାକି

ଏମ୍ବାଟି ଆମ୍ବାଆୟି ଜିକେଏ ୱା଼ଆନା ଡ଼ୟେଏ।

27 ମା଼ ଜିରୁ ପ୍ରବୁ ତା଼ଣା ଡ଼ୁଗା ହିଲେଏ ଅ଼ଡ଼େ ମା଼ ଅଣ୍‌ପୁ ମା଼ ମାହାପୂରୁ ବୁଦିଟି ୱା଼ହାମାନେ;

ଏ଼ ଜାକୁବ ନୀନୁ ଏ଼ନାଆଁତାକି ଏଲେଇଞ୍ଜିମାଞ୍ଜି,

ଏ଼ ଇସ୍ରାୟେଲ ନୀନୁ ଏ଼ନାଆଁତାକି ଏଲେଇଞ୍ଜିମାଞ୍ଜି ?

28 ନୀନୁ କି ପୁଞ୍ଜା ହିଲଅତି ?

ନୀନୁ କି ୱେଞ୍ଜା ହିଲଅତି ?

ଦାର୍‌ତି ମୁଟ୍‌ପେ ବାରେ ଗା଼ଡ଼ିକିତି କା଼ଲାକା଼ଲାତି ମାହାପୂରୁ ପ୍ରବୁ ୱା଼ହଅସି

କି ଜ଼ମଅସି ଏ଼ୱାଣି ବୁଦିତି କାତା ଆମ୍ବାଆସି ପୁନଅସି।

29 ଏ଼ୱାସି ୱା଼ହୁଗାଟି ଲ଼କୁକି ବପୁ ହୀନେସି

ଅ଼ଡ଼େ ବା଼ଡ଼୍‌ୟୁ ହିଲାଆ ଲ଼କୁକି ହା଼ରେକା ବା଼ଡ଼୍‌ୟୁ କିନେସି।

30 ଦାଂଗ୍‌ଣାୟାଁ ଜିକେଏ ୱା଼ହୁରା଼ତା ଆ଼ନେରି,

ଇଞ୍ଜାଁ ଦାଂଗ୍‌ଣାୟାଁ ସାତେଏ ପୁଟିକିହାଁ ରିହା ହାନେରି;

31 ସାମା ଆମିନିଗାଟାରି ପ୍ରବୁଇଁ କା଼ପୁ କା଼ଚାହାଁ ଡ଼ୟିନେରି,

ଏ଼ୱାରି ପୁଃନି ପୁଃନି ବା଼ଡ଼୍‌ୟୁ ବେଟାଆ଼ନେରି;

ଏ଼ୱାରି ଡେ଼ଗା ପଟା ଲେହେଁ ଲାକ ହ଼ଚା ହାନେରି;

ଏ଼ୱାରି ୱା଼ହାଆନା ହଣ୍‌ନେରି ଅ଼ଡ଼େ ୱା଼ହାଆନା ତା଼କିନେରି।