ଜିସା 48

କାତା ୱେନାଆଗାଟି ଇସ୍ରାୟେଲ

1 ଏ଼ ଇସ୍ରାୟେଲ ଦ଼ରୁଟି ୱେ଼ଙ୍ଗାମାନାତି ଅ଼ଡ଼େ ଜୀହୁଦା ଏ଼ୟୁଟି ହ଼ଚାମାନି ଜାକୁବ କୂଲୁ ମୀରୁ ଈ କାତା ୱେଞ୍ଜୁ;

ମୀରୁ ପ୍ରବୁ ଦ଼ରୁଟି ପାର୍‌ମାଣା କିହିମାଞ୍ଜେରି

ଅ଼ଡ଼େ ଇସ୍ରାୟେଲ ମାହାପୂରୁ ଦ଼ରୁତି ଜହରା କିହିମାଞ୍ଜେରି,

ସାମା ସାତା ଅ଼ଡ଼େ ଦାର୍ମୁ ତଲେ ଆ଼ଏ।

2 ଇଚିହିଁ ଏ଼ୱାରି ଜାହାରାଇଁ ସୁଦୁ ଗା଼ଡ଼ାତି ଲ଼କୁ ଇଞ୍ଜିଁ ୱେ଼ଙ୍ଗି କିନେରି

ଅ଼ଡ଼େ ଇସ୍ରାୟେଲ ମାହାପୂରୁଇଁ ବା଼ର୍ସୁ ଇଟିନେରି;

ଏ଼ୱାଣି ଦ଼ରୁ ବା଼ଡ଼୍‌ୟୁଗାଟି ପ୍ରବୁ।

3 ନା଼ନୁ ପୁର୍ବେ ଦିନାତି କାତା ତଲି କା଼ଲାଟିଏ ୱେସାମାଇଁ;

ହାଅ, ଏ଼ଦି ନା଼ ଗୂତିଟି ହ଼ତେ ଅ଼ଡ଼େ ଏ଼ଦାଆଁ ନା଼ନୁ ତ଼ସ୍‌ତେଏଁ;

ନା଼ନୁ ଏ଼ଦାଆଁ କିତେଏଁ ଅ଼ଡ଼େ ଦେବୁଣିଏ ଏ଼ ବାରେ ଆ଼ତେ।

4 ନୀନୁ କାତା ମା଼ନୱି ଆ଼ଆଗାଟାତି,

ନୀ ହେର୍‌କି ଲ଼ହ ଡୁଙ୍ଗା ଅ଼ଡ଼େ ନୀ ମୁଞ୍ଜୁ ପିତାଡ଼ା ଲେହେଁ ଇଞ୍ଜିଁ ନା଼ନୁ ପୁଚେଏଁ।

5 ଏ଼ଦାଆଁତାକି ନା଼ନୁ ତଲି କା଼ଲାଟିଏ ନିଙ୍ଗେ ତାକି ଏ଼ଦାଆଁ ତ଼ସ୍‌ତାତେଏଁ;

ଏ଼ଦି ଆ଼ନି ନ଼କେଏ ନିଙ୍ଗେ ୱେସ୍ତାତେଏଁ; ଆ଼ଆତିଁ ନୀନୁ ଏଲେଇଚିମା,

"ନା଼ ପେ଼ନୁ ଈଦାଆଁ କିହାମାନେ; ନା଼ କା଼ର୍‌ହାଁ ଗାରାତଲେ କେ଼ପିତି ବମା ଈଦାଆଁ କିହାମାନେ।"

6 ନୀନୁ ୱେଞ୍ଜାମାଞ୍ଜି; ନୀଏଁ ଈ ବାରେ କାତାତା ମ଼ନ ହୀମୁ; ଅ଼ଡ଼େ ମେହ୍‌ମୁ,

ଏ଼ନାଆଁ ନୀନୁ ଈ କାତା ୱେ଼କ୍‌ଅତି ?

ନୀଏଟିଏ ନା଼ନୁ ନିଙ୍ଗେ ପୁଃନି ପୁଃନି କାତା

ଅ଼ଡ଼େ ଡ଼ୁଗାମାନି କାତା ୱେସ୍ତାଇଁ ଏମିନାଣି ନୀନୁ ପୁଞ୍ଜାହିଲଅତି।

7 ଏ଼ ବାରେ ତଲି କା଼ଲାଟିଏ ଆ଼ଏ, ସାମା ନୀଏଁ ଗା଼ଡ଼ି ଆ଼ହାମାନେ;

ନୀଞ୍ଜୁତି ଦିନା ନ଼କେଏ ନୀନୁ ଏ଼ଦାଆଁ ୱେଞ୍ଜା ହିଲାଆତି;

ଆ଼ଆତିଁ ନୀନୁ ଏଲେଇଚିମା, ଏ଼ ବାରେ ନା଼ନୁ ପୁଞ୍ଜାମାଚେଏଁ।

8 ସାତେଏ ନୀନୁ ଏ଼ଦାଆଁ ୱେନାଆତି; ନୀନୁ ପୁନାଆତି;

ତଲି ନୀ କିର୍ୟୁଁ ଦେପି ଆ଼ହା ହିଲାଆତେ;

ଇଚିହିଁ ନୀନୁ ହା଼ରେକା ନାମୁ ହିଲାଆ କାମା କିତି

ଅ଼ଡ଼େ ତାଲିନି ବାଣ୍ତିଟିଏ ଲାଗେଏତାସି ଇଞ୍ଜିଁ ୱେ଼ଙ୍ଗାମାଚି, ଈଦାଆଁ ନା଼ନୁ ପୁଚେଏଁ।

9 ନା଼ନୁ ଏ଼ନିକିଁ ନିଙ୍ଗେ ନା଼ସା କିୟଅଁ,

ଏ଼ଦାଆଁତାକି ନା଼ନୁ ନା଼ ଦ଼ରୁ ତାକି ନା଼ କାର୍‌ବି ଊଣା କିତେଏଁ

ଅ଼ଡ଼େ ନା଼ ଗା଼ୱୁରମି ତାକି ସାପି ଆ଼ତେଏଁ।

10 ମେହ୍‌ମୁ ନା଼ନୁ ନିଙ୍ଗେ ସୁଦୁ କିହାମାଞ୍ଜାଇଁ,

ସାମା ୱେଣ୍ତି ଲେହେଁ ଆ଼ଏ; ନା଼ନୁ ଦୁକୁତି ହଲୁଟି ନିଙ୍ଗେ ଆ଼ଚାମାଞ୍ଜାଇଁ।

11 ନା଼ନୁ ନା଼ ତାକି ହାଅ, ନା଼ ତାକି ନା଼ନୁ ଈଦାଆଁ କିଇଁ;

ଇଚିହିଁ ନା଼ ଦ଼ରୁ ଏ଼ନାଆଁତାକି ସୁଦୁ ହିଲାଆଗାଟାୟି ଆ଼ନେ ?

ଇଞ୍ଜାଁ ନା଼ନୁ ନା଼ ଗା଼ୱୁରମି ଏଟ୍‌କାତାଣାକି ହୀଅଁ।

ଇସ୍ରାୟେଲତି ମାହାପୂରୁ ହା଼ଟିନାୟି

12 ଏ଼ ଜାକୁବ, ଏ଼ ନା଼ ହା଼ଟାମାନି ଇସ୍ରାୟେଲ, ନା଼ ବ଼ଲୁତା ମ଼ନ ହୀମୁ;

ନା଼ନୁ ଏ଼ୱାତେଏଁ; ନା଼ନୁ ମା଼ଟ୍‌ନାତେଏଁ, ନା଼ନୁଏ ରା଼ପ୍‌ନାତେଏଁ।

13 ଅ଼ଡ଼େ ନା଼ କେୟୁ ଦାର୍‌ତିତି ପୁନାଦି କିହାମାନେ ଅ଼ଡ଼େ ନା଼ ଟିଃନି କେୟୁ ହା଼ଗୁପା଼କା ଦା଼ସାମାନେ;

ନା଼ନୁ ଏ଼ୱାରାଇଁ ହା଼ଟିସାରେ, ଏ଼ୱାରି ରହେଁଏ ନିନେରି।

14 ମୀରୁ ବାରେ ରୁଣ୍ତା ଆ଼ହାଁ ୱେଞ୍ଜୁ; ଏ଼ୱାରି ବିତ୍ରାଟି ଆମ୍ବାଆସି ଈ ବାରେ ୱେ଼କ୍‌ହାମାନେସି ?

ପ୍ରବୁ ଏ଼ୱାଣାଇଁ ଜୀୱୁ ନ଼ହାମାନେସି; ଏ଼ୱାସି ବାବିଲ ମୁହେଁ ତାନି ଅଣ୍‌ପୁ ପୂରା କିନେସି ଅ଼ଡ଼େ କଲ୍‌ଦିୟ ଲ଼କୁତି ମୁହେଁ ଏ଼ୱାଣି କେୟୁ ଡ଼ୟିନେ।

15 ନା଼ନୁ, ହାଅ, ନା଼ନୁ ଏ଼ୱାଣାଇଁ ବ଼ଲୁ ୱେସାମାଇଁ;

ନା଼ନୁ ଏ଼ୱାଣାଇଁ ହା଼ଟାମାଇଁ; ନା଼ନୁ ଏ଼ୱାଣାଇଁ ତାଚାମାଇଁ;

ଅ଼ଡ଼େ ଏ଼ୱାସି ତାନି କିନି କାମାତି ପୂରା କିନେସି।

16 ମୀରୁ ନା଼ ତା଼ଣା ୱା଼ହାଁ ଈ କାତା ୱେଞ୍ଜୁ;

ନା଼ନୁ ମୂଲୁଟିଏ ଡ଼ୁକ୍‌ହାଁ ୱେସାହିଲଅଁ;

ଏ଼ଦି ଆ଼ହିମାନି କା଼ଲାଟିଏ ନା଼ନୁ ଏମ୍ବାଆଁ ମାଇଁ;

ଇଞ୍ଜାଁ ନୀଏଁ ପ୍ରବୁ ନାଙ୍ଗେ ଅ଼ଡ଼େ ତାନି ଜୀୱୁତି ପାଣ୍ତାମାଞ୍ଜାନେସି।

ତାନି ଲ଼କୁ ତାକି ପ୍ରବୁତି ଅଣ୍‌ପୁ

17 ନୀ ଗେଲ୍‌ପାନି ପ୍ରବୁ ଇସ୍ରାୟେଲତି ଦାର୍ମୁତି ମାହାପୂରୁ,

ଈ କାତା ଏଲେଇଞ୍ଜି ମାନେସି; "ନା଼ନୁ ପ୍ରବୁ ନୀ ମାହାପୂରୁତେଏଁ,

ନିଙ୍ଗେ ନୀ ଲା଼ବା ତାକି ଜା଼ପ୍‌ହାଇଁ,

ଅ଼ଡ଼େ ଏମିନି ଜିରୁତା ନିଙ୍ଗେ ତା଼କାଲି ଆ଼ନେ ଏ଼ ଜିରୁତା ନିଙ୍ଗେ ଅୟାଇଁ।

18 ନୀନୁ ନା଼ ହୁକୁମି ମ଼ନ ହୀହାଁ ୱେଞ୍ଜାମାଚିହିଁ ନେହେଁ ଆ଼ତେମା!

ନୀ ହିତ୍‌ଡ଼ି କାଡା ଲେହେଁ ଅ଼ଡ଼େ ନୀ ଦାର୍ମୁ ସାମ୍‌ଦୁରିତି ଉଣ୍ତା ଲେହେଁ ଆ଼ତେମା;

19 ନୀ କୂଲୁ ଜିକେଏ ବାଃଲି ଲେହେଁ ଅ଼ଡ଼େ ନୀ ତା଼ଣାଟି ଜାର୍ନା ଆ଼ନି ମୀର୍‌କା ବାଃଲିତି କଡି ସମାନା ଆ଼ତେରିମା;

ଏ଼ୱାଣି ଦ଼ରୁ ନା଼ ନ଼କିଟି ମେଣ୍‌ଙ୍ଗାଆତେମା କି ନା଼ସା ଆ଼ଆତେମା।

20 ମୀରୁ ବାବିଲଟି ହ଼ଚା ହାଜୁ, କଲ୍‌ଦିୟ ଲ଼କୁ ତା଼ଣାଟି ହଣ୍‌ଦୁ;

ମୀରୁ ପା଼ଚିନି ଗିୟାଁ ତଲେ ୱେ଼କ୍‌ହାନା ୱେହ୍‌ଦୁ, ଦାର୍‌ତି ମୁଟ୍‌ପେ ଈ କାତା ୱେ଼କ୍‌ଦୁ; ମୀରୁ ଏଲେଇଞ୍ଜୁ,

ପ୍ରବୁ ତାନି ହ଼ଲେଏସି ଜାକୁବଇଁ ପିସ୍‌ପି କିହାମାନେସି।"

21 ଇଞ୍ଜାଁ ଏ଼ୱାସି ଏ଼ୱାରାଇଁ ବାଃଲି ବାଟାଟି ତା଼କି କିନି ବେ଼ଲାତା ଏ଼ୱାରି ଏ଼ସ୍‌କି ଆ଼ଆତେରି,

ଏ଼ୱାସି ଏ଼ୱାରି ତାକି ପା଼କା ୱାଲିଟି ଏ଼ୟୁ ଜାର୍‌ଣା କିତେସି,

ଅ଼ଡ଼େ ଏ଼ୱାସି ପା଼କା ୱାଲିତି ଡ଼ାୟିକିହାଁ ଏମ୍ବାଟି ଏ଼ୟୁ ହ଼ପ୍‌ହେସି।

22 ପ୍ରବୁ ଏଲେଇଞ୍ଜି ମାନେସି, "ଲାଗେଏତି ଲ଼କୁ ତାକି ଇଚାୟି ହିତ୍‌ଡ଼ି ହିଲେଏ।"