ଇସ୍ରାୟେଲତି ୱା଼ନି ଦିନାତି ଗା଼ୱୁରମି
1 ନିଙ୍ଗାଦୁ, ଉଜେଡ଼ି ଆ଼ଦୁ, ଇଚିହିଁ ମୀ ଉଜେଡ଼ି ଏଜାମାଞ୍ଜାନେ
ଅ଼ଡ଼େ ପ୍ରବୁତି ଗା଼ୱୁରମି ମୀ ଲାକ ଆ଼ଡାମାଞ୍ଜାନେ।
2 ଇଚିହିଁ, ମେହ୍ଦୁ, ଆନ୍ଦେରି ଦାର୍ତିତି ପ୍ଡିକ୍ହାମାନେ
ଅ଼ଡ଼େ କା଼ଡ଼କି ଆନ୍ଦେରି କୂଡ଼ାତି ଲ଼କୁଣି ପ୍ଡିକ୍ନେ;
ସାମା ମୀ ଲାକ ପ୍ରବୁ ଉଜେଡ଼ି ଆ଼ନେସି ଅ଼ଡ଼େ ତାନି ଗା଼ୱୁରମି ମୀ ଲାକ ତ଼ଞ୍ଜାଆ଼ନେ।
3 ଇଞ୍ଜାଁ, ଏଟ୍କା ଦେ଼ସାତାରି ମୀ ଉଜେଡ଼ି ଡାଗେ
ଅ଼ଡ଼େ ରାଜାୟାଁ ମୀ ୱେ଼ଡ଼ା ହ଼ନି ଉଜେଡ଼ି ଡାଗେ ୱା଼ନେରି।
4 ମୀରୁ ସା଼ରିୱାକି ସିନିକିହାଁ ମେହ୍ଦୁ, ଏ଼ୱାରି ବାରେ ରହେଁଏ ଆ଼ହିମାନେରି,
ଏ଼ୱାରି ନୀ ଡାଗେ ୱା଼ହିମାନେରି; ମୀ ମୀର୍କା ହେକଟି ୱା଼ନେରି
ଅ଼ଡ଼େ ମୀ ମା଼ସ୍କା ତାମି ପାଡ଼୍କାତା ପମାହାଁ ତାପିଆ଼ନୁ।
5 ଏଚିବେ଼ଲା ନୀନୁ ଏ଼ୱାଆଁ ମେସାହାଁ ନୀ ମୂମ୍ବୁ ଉଜେଡ଼ି ଆ଼ନେ
ଅ଼ଡ଼େ ନୀ ହିୟାଁ ରା଼ହାଁଟି ତାରାତାରା ଆ଼ନେ;
ଇଚିହିଁ ସାମ୍ଦୁରିତି ବାରେ ଆ଼ସ୍ତି ଅ଼ଡ଼େ ଏଟ୍କା ଦେ଼ସା ଲ଼କୁତି ବାତ୍କୁ ନୀ ତା଼ଣା ୱା଼ନେ।
6 ହା଼ରେକା ଊଟୁୟାଁ, ମିଦିୟନ ଅ଼ଡ଼େ ଅୟିପା ଦେ଼ସାତି ହା଼ରେକା ହଣ୍ନି ଊଟୁୟାଁ,
ନୀ ତା଼ଣା କୂଡ଼ାଆ଼ନୁ; ସିବା ଦେ଼ସାଟି ବାରେ ଲ଼କୁ ୱା଼ହାଁ ବାଂଗାରା ଦୁପା ଦୁପ୍ଣି ତାନେରି
ଅ଼ଡ଼େ ପ୍ରବୁତି ଜହରା ୱେ଼କ୍ନେରି।
7 କେଦାରତି ବାରେ ମେ଼ଣ୍ତାୟାଁ ମାନ୍ଦା ନୀ ତା଼ଣା ରୁଣ୍ତା କିୱିଆ଼ନୁ,
ନବାୟତ୍ ମେ଼ଣ୍ତାୟାଁ ନୀ ସେ଼ବା କିୟାନୁ;
ଏ଼ୱି ପା଼ଡ଼ାଆ଼ତାଇ ଆ଼ହାଁ ନୀ ପୂଜା ପିଣ୍ତାତା ୱା଼ନୁ,
ଇଞ୍ଜାଁ ନା଼ନୁ ନା଼ ଗା଼ୱୁରମିଗାଟି ଇଲୁତି ଗା଼ୱୁରମି କିଇଁ।
8 ହା଼ଗୁ ସମାନା ଅ଼ଡ଼େ ଜାହାରା ବା଼ଡ଼ାଟି ଊମ୍ବିମାନି ପା଼ର୍ୱାୟାଁ ଲେହେଁ
ଊମ୍ବା ୱା଼ହିମାନେରି, ଈୱାରି ଆମ୍ବାଆରି ?
9 ସାତେଏ ସାମ୍ଦୁରି ମାଦି ମାନାରି ନାଙ୍ଗେ କା଼ତାନେରି,
ଇଞ୍ଜାଁ ତର୍ସିସତି ଜା଼ଜାୟାଁ ବାରେ ୱା଼ହାଁ ତାନି ମୀର୍କାଣି ବାଂଗାରା,
ୱେଣ୍ତି ତଲେ ହେକଟି ତାଚାହାଁ, ନୀ ମାହାପୂରୁ ପ୍ରବୁତି ଦ଼ରୁ ତାକି
ଅ଼ଡ଼େ ଇସ୍ରାୟେଲତି ଦାର୍ମୁଗାଟି ମାହାପୂରୁ ତାକି ୱା଼ନେରି,
ଇଚିହିଁ ଏ଼ୱାସି ମିଙ୍ଗେ ଅ଼ଜି କିହାମାଞ୍ଜାନେସି।
10 ଇଞ୍ଜାଁ ଏଟ୍କା ଦେ଼ସାତାରି ନୀ କ଼ଟା ତିୟାରା କିନେରି
ଅ଼ଡ଼େ ଏ଼ୱାରି ରାଜାୟାଁ ମୀ ସେ଼ବା କିୟାନେରି;
ଇଚିହିଁ ନା଼ନୁ ନା଼ କ଼ପାଟି ନିଙ୍ଗେ ଦୁକୁ ହିୟାତେଏଁ,
ସାମା ନୀଏଁ ନିଙ୍ଗେ ରା଼ହାଁ ଆ଼ହାଁ କାର୍ମା ଆ଼ହାମାଞ୍ଜାଇଁ।
11 ଏଟ୍କା ଦେ଼ସାତାରି ବାତ୍କୁ ଅ଼ଡ଼େ ତାନି ତଲେ ଏ଼ୱାରି ରାଜାୟାଁ କା଼ୟିଦି ଆ଼ହାଁ ଏ଼ନିକିଁ ନୀ ତା଼ଣା ୱା଼ନେରି,
ଏ଼ଦାଆଁତାକି ନୀ ଗା଼ଡ଼ା ଦୁୱେରିକା ବାରେ କା଼ଲେଏ ଦେପି ଆ଼ହାଁ ଡ଼ୟିନୁ,
ଲା଼ଆଁ ମାଦେନା ଏ଼ ବାରେ ସୁଣ୍ତ୍କି ଆ଼ଉ।
12 ଇଚିହିଁ ଏମିନି ଦେ଼ସା ଅ଼ଡ଼େ ରା଼ଜି ନିଙ୍ଗେ ସେ଼ବା କିୟେଏ
ଏ଼ଦି ସାତେଏ ନା଼ସା ଆ଼ନେ,
ହାଅ, ଏ଼ ଦେ଼ସା ବାରେ କୁଡ଼୍ପୁନା଼ସା କିୱିଆ଼ନୁ।
13 ଲିବାନନତି ଗା଼ୱୁରମି ନୀ ତା଼ଣା ୱା଼ନେ,
ଦେବଦାରୁ, ତିଦର, ତାସୁର ମା଼ର୍କା କୂଡ଼ି କିୱିଆ଼ହାଁ ନା଼ ସୁଦୁ ଟା଼ୟୁତି ଅ଼ଜି କିହାଲି ନୀ ତା଼ଣା ୱା଼ନୁ,
ଇଞ୍ଜାଁ ନା଼ନୁ ନା଼ ପା଼ୱୁଲି ଇଟିନି ଟା଼ୟୁ ଗା଼ୱୁରମି କିଇଁ।
14 ଅ଼ଡ଼େ ଆମିନିଗାଟାରି ନିଙ୍ଗେ ଦୁକୁ ହିୟାତେରି,
ଏ଼ୱାରି ମୀର୍କା ଊଣା ଆ଼ହାଁ ନୀ ତା଼ଣା ୱା଼ନେରି ଅ଼ଡ଼େ ଆମିନିଗାଟାରି ନିଙ୍ଗେ ହୀଣି କିୟାତେରି
ଏ଼ୱାରି ବାରେ ନୀ ପାଃଆନା ଡ଼଼ଇକା ଜହରା କିୟାନେରି;
ଅ଼ଡ଼େ ଏ଼ୱାରି ନିଙ୍ଗେ ପ୍ରବୁତି ଗା଼ଡ଼ା, ଇସ୍ରାୟେଲତି ଦାର୍ମୁଗାଟାଣି ସିୟନ ଇଞ୍ଜିଁ ଜ଼ଲିନେରି।
15 ନୀନୁ ପିସ୍ତାତି ଅ଼ଡ଼େ ଅ଼ପାଆ ଗାଟାତି ଆ଼ତାକି ଆମ୍ବାଆସି ନୀ ତା଼ଣାଟି ତା଼କାଆତେସି,
ଏ଼ଦାଣି ବାଦୁଲି ନା଼ନୁ ନିଙ୍ଗେ କା଼ଲେଏତି ଗା଼ୱୁରମି
ଅ଼ଡ଼େ ହା଼ରେକା ଆ଼ବାୟାଁ ପା଼ଣା ପା଼ଟୁତି ରା଼ହାଁ ଲେହେଁ କିୟାଇଁ।
16 ନୀନୁ ଏଟ୍କା ଦେ଼ସା ଲ଼କୁ ଅ଼ଡ଼େ ରାଜାୟାଁ ପ଼ହିକିୟାନେରି
ଏ଼ନିକିହିଁ ଜାହାରା ମୀର୍କାଣି ତାଲି ସେ଼ବା କିନେ;
ଏଚେଟିଏ ନା଼ନୁ ପ୍ରବୁ ନୀ ଗେଲ୍ପାନାତେଏଁ ଅ଼ଡ଼େ ପିସ୍ପି କିୟାନାତେଏଁ,
ଜାକୁବତି ବା଼ଡ଼୍ୟୁ ହୀନାତେଏଁ ଈଦାଆଁ ନୀନୁ ପୁଞ୍ଜି।
17 ନା଼ନୁ ପିତାଡ଼ା ବାଦୁଲି ବାଂଗାରା ତାଇଁ ଅ଼ଡ଼େ ଲ଼ହ ବାଦୁଲି ୱେଣ୍ତି,
ମା଼ର୍କା ବାଦୁଲି ପିତାଡ଼ା ଅ଼ଡ଼େ ୱାଲ୍କା ବାଦୁଲି ଲ଼ହ ତାଇଁ;
ଅ଼ଡ଼େ ନା଼ନୁ ନୀ କାଜା ପା଼ଣାତା ହିତ୍ଡ଼ି ଅ଼ଡ଼େ ନୀ ଅଦିକାରା ପା଼ଣାତା ଦାର୍ମୁତି ନିପ୍ଇଁ।
18 ନୀ ଦେ଼ସାତା ଲାଗେଏତି କାତା ଅ଼ଡ଼େ ନୀ ହାନ୍ଦିତା ନା଼ସା କିନାୟି
ଅ଼ଡ଼େ ନସ୍ତ କିନି କାତା ୱେଣ୍ମ୍ବି ଆ଼ଏ;
ସାମା ନୀନୁ ନୀ କ଼ଟାତି ଦ଼ରୁ ଗେଲ୍ପିନାୟି ଅ଼ଡ଼େ ଗା଼ଡ଼ା ଦୁୱେରିକା ଦ଼ରୁ ଜହରା ଇଟିଦି।
19 ମାଦେନା ୱେ଼ଡ଼ା ନୀ ଉଜେଡ଼ି ଆ଼ଏ, କି ଉଜେଡ଼ି ତାକି ଲେ଼ଞ୍ଜୁ ନିଙ୍ଗେ ଉଜେଡ଼ି ହିୟେଏ;
ସାମା ପ୍ରବୁ ନିଙ୍ଗେ ତାକି କା଼ଲେଏତି ଉଜେଡ଼ି ଅ଼ଡ଼େ ନୀ ମାହାପୂରୁ ନୀ ଗା଼ୱୁରମି ଲେହେଁ ଆ଼ନେସି।
20 ନୀ ୱେ଼ଡ଼ା କୂଡ଼୍ଏ, କି ଲେ଼ଞ୍ଜୁ ତାଙ୍ଗେ ହେକ କିହାକଡେଏ;
ଇଚିହିଁ ପ୍ରବୁ ନୀ କା଼ଲେଏତି ଉଜେଡ଼ି ଲେହେଁ ଆ଼ନେସି ଅ଼ଡ଼େ ନୀ ଡ଼ୀକିତି ଦିନା ରା଼ନେ।
21 ଅ଼ଡ଼େ ନୀ ଲ଼କୁ ବାରେ ଦାର୍ମୁଗାଟାରି ଆ଼ନେରି,
ଏ଼ୱାରି କା଼ଲେଏ ତାକି ଦେ଼ସା ଅଦିକାରା କିନେରି,
ଏ଼ୱାରି ନା଼ ଗା଼ୱୁରମି ତାକି ନା଼ ଉହିତି କମା ଅ଼ଡ଼େ ନା଼ କେୟୁ ତଲେ କେ଼ପିତି କାମା ଆ଼ନେରି।
22 ଊଣା ଜା଼ଣା ମା଼ଣା ମା଼ଣା ଆ଼ନେରି ଅ଼ଡ଼େ ବା଼ଡ଼୍ୟୁ ହିଲାଆଗାଟାସି ବା଼ଡ଼୍ୟୁଗାଟି କୂଡ଼ା ଆ଼ନେରି;
ନା଼ନୁ ପ୍ରବୁତେଏଁ ଟିକାଣା ବେ଼ଲାତା ଈଦାଆଁ ତବେ ପୂରା କିଇଁ।
/images/a/b7d72741-6189-4a89-94c2-43952d9f2700)
/images/a/6c03efee-c76a-4ab8-fe2e-555683f90900)