1 ବେଲ୍‌ ପେ଼ନୁ ମୁନୁକୁତିନେ, ନବ ପେ଼ନୁ ଊଣା ଆ଼ନେ;

ଏ଼ୱାରି ପେ଼ଣ୍‌କା ବମାୟାଁ ଜ଼ନ୍ତ ଅ଼ଡ଼େ ଜ଼ନ୍ତୟାଁ ଲାକ ଇଟ୍‌କି ଆ଼ହାମାନୁ;

ଏମିନି ଆ଼ସ୍ତି ମୀରୁ ଡେ଼କାହାଁ ରେ଼ଚେରି,

ଏ଼ୱି ବାରେ ବ଼ଜୁ ଆ଼ହାମାନୁ,

ୱା଼ହିତି ଜ଼ନ୍ତ ତାକି ବ଼ଜୁ ଆ଼ହାମାନେ।

2 ଏ଼ୱି ମୁନୁକୁତିନୁ, ଏ଼ୱି ବାରେ ରହେଁଏ ଊଣା ଆ଼ନୁ;

ଏ଼ୱି ବ଼ଜୁ ଡେ଼କାଲି ଆ଼ଡାଆତୁ ସାମା ତା଼ମ୍ବୁଏ ଦସ୍‌ପି ଆ଼ହାଁ ହାଜାମାନୁ।

3 ଏ଼ ଜାକୁବ କୂଲୁ, ଏ଼ ଇସ୍ରାୟେଲ କୂଲୁତି ଡ଼ୟାମାନି ବାରେ ଲ଼କୁ ନା଼ କାତା ୱେଞ୍ଜୁ;

ମୀରୁ ବାଣ୍ତିତା ଡ଼ୟିତି ଦିନାଟିଏ ନା଼ ତା଼ଣାଟି ଡେ଼କ୍‌ୱି ଆ଼ହାମାଞ୍ଜେରି,

ମୀରୁ ବାଣ୍ତି ବିତ୍ରାଟିଏ ଡେ଼କ୍‌ୱି ଆ଼ହାମାଞ୍ଜେରି।

4 ଇଞ୍ଜାଁ ନା଼ନୁ ମୀ ବୁଡ଼୍‌ହା ପାତେକା ଜିକେଏ ଏଲେକିଁ ଡ଼ୟିଇଁ

ଅ଼ଡ଼େ ତା଼ର୍ୟୁଁ କାମ୍ବିନି ପାତେକା ଜିକେଏ ନା଼ନୁ ମିଙ୍ଗେ ଡେ଼କାଇଁ;

ନା଼ନୁ ମିଙ୍ଗେ ଗା଼ଡ଼ି କିହାମାଞ୍ଜାଇଁ ଅ଼ଡ଼େ ନା଼ନୁ ଡେ଼କାଇଁ;

ହାଅ, ନା଼ନୁ ଡେ଼କାଇଁ ଅ଼ଡ଼େ ଗେଲ୍‌ପାଇଁ।

5 ମୀରୁ ନାଙ୍ଗେ ଆମ୍ବାଆରି ଲେହେଁ ଅ଼ଡ଼େ ଲେହେଁ କିୟାଦେରି

ଅ଼ଡ଼େ ଆମ୍ବାଆରି ତଲେ ନାଙ୍ଗେ ତୂକ୍‌ହାସାରେ, ନା଼ନୁ ଲେହେଁ ଆ଼ଇଁ ?

6 ଏ଼ୱାରି ମ଼ଣାତା ବାଂଗାରା ୱା଼କ୍‌ନେରି ଅ଼ଡ଼େ ବୀସାବାଡ଼୍‌ଗାତା ୱେଣ୍ତି ତୂକ୍‌ନେରି,

ଏ଼ୱାରି କାମ୍ବାସା଼ଲିକି କୂଲି ହୀନେରି ଅ଼ଡ଼େ ଏ଼ୱାସି ର଼ ପେ଼ନୁ ତିୟାରା କିନେସି;

ଏ଼ୱାରି ଜହରା କିହାଁ ପୂଜା କିନେରି।

7 ଏ଼ୱାରି ଏ଼ଦାଣି ବମିତା ଡେ଼କିନେରି ଅ଼ଡ଼େ ଏ଼ଦାଣି ଡେ଼କାହାଁ ଏ଼ଦାଣି ଟା଼ୟୁତା ଏ଼ଦାଣି ଇଟିନେରି,

ଏଚେଟିଏ ଏ଼ଦି ନିନେ; ଏ଼ଦି ତାନି ଟା଼ୟୁଟିଏ ଗୁଚାଆ଼ଏ;

ଅ଼ଡ଼େ ଆମ୍ବାଆସି ଏ଼ଦାଣି ହା଼ଟିସାରେ ଏ଼ଦି ଜ଼ଲାଲି ଆ଼ଡେଏ,

କି କସ୍ତଟି ଗେଲ୍‌ପାଲି ଆ଼ଡେଏ।

8 ଏ଼ ଲାଗେଏ କାମା କିନାତେରି, ନା଼ନୁ ଏ଼ନାଆଁ କିହାମାଇଁ ମୀରୁ ଈଦାଆଁ ଅଣ୍‌ପାଦୁ

ଅ଼ଡ଼େ ବା଼ଡ଼୍‌ୟୁ ଆହ୍‌ଦୁ; ଅ଼ଡ଼େ ମ଼ନ ହୀଦୁ।

9 ପ୍ଣାଃଇ କାତା ବାରେ ଅଣ୍‌ପାଦୁ; ଇଚିହିଁ ନା଼ନୁଏ ମାହାପୂରୁତେଏଁ,

ଅ଼ଡ଼େ ଅ଼ର ରଅସି ହିଲଅସି; ନା଼ନୁ ମାହାପୂରୁତେଏଁ ନା଼ ଲେହେଁ ଆମ୍ବାଆସି ହିଲଅସି;

10 ନା଼ନୁ ରା଼ନି କାତା ମୂଲୁଟିଏ ୱେ଼କ୍‌ଇଁ, ଇଞ୍ଜାଁ ଏ଼ନାୟି ଆ଼ହା ହିଲେଏ,

ଏ଼ଦାଆଁ ତଲି କା଼ଲାଟିଏ ୱେହ୍‌ଇଁ, ଅ଼ଡ଼େ ଏଲେଇଇଁ, ନା଼ ଅଣ୍‌ପୁ ତୀରି ଆ଼ନେ

ଅ଼ଡ଼େ ନା଼ନୁ ନା଼ ବାରେ ମ଼ନତି ଅଣ୍‌ପୁ ପୂରା କିଇଁ।

11 ନା଼ନୁ ୱେ଼ଡ଼ା ହ଼ପୁ ୱାକିଟି ଡେ଼ଗାତି,

ହେକ ଦେ଼ସାଟି ନା଼ ଅଣ୍‌ପୁତି ମାଣ୍‌ସିଇଁ ହା଼ଟିଇଁ;

ନା଼ନୁ ଈ କାତା ଏଲେଇଞ୍ଜାମାଇଁ, ଅ଼ଡ଼େ ଏ଼ଦାଆଁ ପୂରା କିଇଁ;

ନା଼ନୁ ଅଣ୍‌ପାମାଇଁ ଅ଼ଡ଼େ ନା଼ନୁ ଏ଼ଦାଆଁ ପୂରା କିଇଁ।

12 ଏ଼ ଦାର୍ମୁଟି ହେକ ମାନି ଆ଼ଟ୍‌ୱା ହିୟାଁଗାଟି ଲ଼କୁ,

ନା଼ କାତା ୱେଞ୍ଜୁ।

13 ନା଼ନୁ ନା଼ ଦାର୍ମୁତି ଦାରିତା ତାଚିମାଞ୍ଜାଇଁ,

ଏ଼ଦି ହେକ ଆ଼ଏ ଅ଼ଡ଼େ ନା଼ ଗେଲ୍‌ପିନାୟି ହେକ ଆ଼ଏ;

ନା଼ ଗା଼ୱୁରମି ଲେହେଁତି ଇସ୍ରାୟେଲ ତାକି ନା଼ନୁ ସିୟନତା ଗେଲ୍‌ପିନାଣି ହୀଇଁ।