Mateus 15

ର଼ ଇୟାନି ନାମୁ

21 ଜୀସୁ ଏ଼ ଟା଼ୟୁ ପିସାହାଁ ସ଼ର ଅ଼ଡ଼େ ସିଦନ ରା଼ଜିତା ହାଚେସି । 22 ଅ଼ଡ଼େ ମେହ୍‌ଦୁ ଏ଼ ହାନ୍ଦିଟି କିଣାନ ଦେ଼ସାତି ର଼ ଇୟା ୱା଼ହାଁ କାଜା ଗିୟାଁତଲେ ଏଲେଇଚେ, "ଏ଼ ପ୍ରବୁ ଦାୱୁଦ ମୀର୍‌ଏଣାତି ନାଙ୍ଗେ କାର୍ମା ମେସ୍ତାମୁ ଇଚିହିଁ ନା଼ ମା଼ଙ୍ଗାନି ହା଼ରେକା ଆଜିହ଼ପେତି ବୂତୁ ଆସାହାଁ କସ୍ତ ଆ଼ହିମାନେ ।"

23 ସାମା ଜୀସୁ ଏ଼ଦାନି ର଼ ପଦୁ ଜିକେଏ ଜ଼ଲାଆତେସି । ଇଞ୍ଜାଁ ତାନି ସୀସୁୟାଁ ୱା଼ହାଁ ଏ଼ୱାଣାଇଁ ଏଲେଇଚେରି, "ଈଦାନି ହେଲ ହୀହାଁ ପାଣ୍ତାତୁହ୍‌ମୁ, ଏ଼ନାଆଁତାକି ଇଚିହିଁ ଈଦି ମା଼ ଜେ଼ଚ କା଼ଲୱି ଆ଼ହିମାନେ ।"

24 ସାମା ଜୀସୁ ଏଲେଇଚେସି, "ନା଼ନୁ ଇସ୍ରାୟେଲ କୂଡ଼ାତା ଜା଼ଙ୍ଗାମାନି ମେ଼ଣ୍ତାୟାଁ ପିସ୍‌ପେ ଅ଼ଡ଼େ ଆମ୍ବାଆରି ତା଼ଣା ପାଣ୍ତ୍‌ୱି ଆ଼ହାହିଲଅଁ ।"

25 ଏ଼ ଇୟା ୱା଼ହାଁ ଜହରା କିହାଁ ଏଲେଇଚେ, "ଏ଼ ପ୍ରବୁ ନାଙ୍ଗେ କାର୍ମା ମେସ୍ତାମୁ ।"

26 ସାମା ଜୀସୁ ଏଲେଇଚେସି, "ମୀର୍‌କା ମା଼ସ୍‌କା କା଼ଦି ଅ଼ହାଁ ନେସ୍‌କା ଡାଗେ ମେତ୍‌ନାୟି ନେହେଁ ଆ଼ଏ ।"

27 ଏ଼ ଇୟା ଏଲେଇଚେ, "ହାଅ ପ୍ରବୁ ଇଚିହିଁ ନେସ୍‌କା ତାମି ସା଼ୱୁକାରିୟାଁ ତା଼ଣାଟି ତର୍‌ଗାମାନି ଜୁଟା ରା଼ନ୍ଦା ପେର୍‌ହା ତିନୁ ।"

28 ଏଚେଟିଏ ଜୀସୁ ଏ଼ ଇୟାନି ଏଲେଇଚେସି, "ଏ଼ ଇୟା ନୀଦି ହା଼ରେକା କାଜା ନାମୁ ନୀ ମ଼ନ ଲେହେଁଏ ନିଙ୍ଗ ଆୟାପେ ।" ଏ଼ ଦେବୁଣିଏ ତାନି ମା଼ଙ୍ଗା ନେହେଁ ଆ଼ତେ ।