João 9

Rɨmani mbatɨgi guma neŋgi buni.

1 Zisas vov rɨmani mbatɨgi guma mbe gari. Ana wo niamuuŋ ndava vhera kav rɨmani mbatɨgim, ana niamuuŋ ana tegi. 2 ✝9.2: Kis 20.5; Ese 18.20; Ru 13.2-4Zisas phorga rui gumgi ana nzarigi, "Guman Rum, the muuŋgi tɨva mbatɨgeŋ kha guma niamuuŋ ana tegim, ana rɨmani mbatɨgi? Kha guma nduara muuŋgi tɨva mbatɨgeŋ o, ana niamuuŋ gu ndia muuŋgi tɨva mbatɨgeŋ?"

3 ✝ 9.3: Zo 11.4 Zisas mbe ŋgarkarav khaŋ nzuai, "Kha guma tɨva mbatɨga thueŋ muuŋgi fhu, ana niamuuŋ gu ndia vhɨra tɨva mbatɨk thueŋ muuŋgi fhu. Kha bigeŋ ana hɨgi, kha gumgi gu mbigi ana hɨgi bigeŋ gangirga, Fhe Bakɨmen ŋaar, ana guigira anan kɨrar hɨgɨrga. 4 ✝9.4: Zo 4.34; 5.17; 5.20; 11.9; 12.35; 17.4Ntige, mɨn thugim, nza ntigem na sarigi gu zɨgi guman ŋaarar muunga. Zumgum maaŋ gɨngirga, guma the ŋaara then muuŋgirga tuktɨgi fhuvara. 5 ✝9.5: Mt 5.14; Zo 1.5; 1.9; 3.19; 8.12; 12.35Gu kha nuianara ki, gu kha nuiana shɨrigi vhavar ŋaar ma."

6 ✝ 9.6: Mk 7.33; 8.23 Zisas maaŋ suaŋgiap, mbara nuiana pargiap, won mparir nuiana digap, mba nuianan mba rɨmani mbatɨgi guman rɨmani hɨvgi. 7 ✝9.7: 2 Kin 5.10Zisas maaŋ ana rɨmani ga muuŋgiap khaŋ ana nzuai, "Ndu ŋgɨp Siroam Mbok Mbɨn wo rɨmani ruagiri." Kha zɨ Siroam, ana khaŋ nzuai kameŋ ma, "Mbe ana sarigim, ana vui." Mba rɨmani mbatɨgi guma vov wo rɨmani ruagiap, taagia zav, ana rɨmani nzerigim, ana tuituigiap bigi gari.

8 Ana tuituigiap bigi garim, ana ŋgu ntɨɨri gum fhum ana garim, ana ŋkɨɨa gu bigir nzaŋgi gumgi gu mbigi, mbe khaŋ nzuai, "Ram muuŋgi? Mbu gumara fhum pigav kav ŋkɨɨa gu bigir gumgir nzagagi thi?" 9 Mbe mbari khaŋ nzuai, "Ahaŋ, mba gumara." Mbe mbari khaŋ nzuai, "Fhuvara. Ana mba guma khesharigi, ana harigi guma ma." Mbe maaŋ nzuaim, mba gumara khaŋ nzuai, "Ana gura."

10 Mbe anan nzarigi, "Ndu ram muuŋgiap ndun rɨmani nzerigi?" 11 Ana mbe ŋgarkarav khaŋ nzuai, "Mbe kha zɨn kaai guma, Zisas, ana nuiana digap, ana mbɨ muuŋgiap, na rɨmani hɨvgiap, khaŋ na nzuai, ‘Ndu ŋgɨp Siroam Mbok Mbɨn wo rɨmani ruagiri.’ Maaŋ muuŋgiap, gu vov wo rɨmani ruagim, nan rɨmani nzerigim, gu tuituigiap bigi gari." 12 Mbe mbara ana nzarigi, "Mba guma maaŋ ki?" Ana khaŋ mbe nzuai, "Gu kaŋgi fhu."