Ruk 8

Zisas rimgi biptar gum rɨɨi mbiga mbe muuŋgim, mani taagia nzerigi.

40 Zisas kema ndigap, mba mbɨ thugap, taagia mueŋ nderen hɨgim, gumgi gu mbigi vhɨrve anan rarga ki. Ana vov hɨgim, mbe ana gangiap guigira ndikndigi. 41 ✝8.41: Mt 9.18; Mk 5.22Zisas havra thagim, mba Fhe Bakɨme buni mbararagi phenan ŋaari gari guman pana mbe, ana zɨ Zairus, ana Zisas han zi. Ana zav wo fegap Zisas nɨma khɨngiap, guigira khaŋ tɨgap wo phenan ŋgɨr zav Zisas ga nzuai. 42 Ana kambiga banera ki, anan mpari khaŋ muuŋgi, 12 thɨgi. Ana rɨmɨn zav gor vhɨk bisanera ki. Ana maaŋ muuŋgiap wo phenan ŋgɨr zav khaŋ tɨgap Zisas ga nzuai.

Zisas ana kameŋ mbararagiap, ana phorga vuim, gumgi gu mbigi vhɨrve ana phorga vov guigira ana nderigi. 43 ✝8.43: Mt 9.20; Mk 5.28Mbe vuim, mbe rɨgar vɨzɨna ti rɨmrɨm ki mbiga mbe vhɨra mbe phorga vui. Mba mbik, ana wo sargori rɨmrɨm anan kim, 12 thɨgi mpari vhɨzgi. Ana fhum mba rɨmrɨm vhɨzɨ zav mbuim, guma the anan kurav, mba rɨmrɨm vhɨzgirga tuktɨgi fhuvara.*8.43 Bigi kaŋgi gumgi mbari kha ndɨkndɨga mbui, harigi buna mueŋ phorga kha vezar ki. Mba kameŋ khaŋ nzuai, "Ana won kurkurar zav, ana za won ŋkɨɨa fova rɨɨi phenan ŋgari gumgi ga suegi. Ana won rɨmrɨm vhɨzgir zav maaŋ muuŋgi." 44 Mba mbik mbaram vov, Zisas zɨn kɨrar vugap ana shaa tɨva suirigi. Ana ana shaa tɨva suigavara thagi, mba sargori rɨmrɨm fhura thuga mbar vugi. Ana wo khɨkhɨm mbararagi, ana fhav taagia nzerigi. 45 Mba mbik Zisas shaa tɨva suigara thagim, Zisas khaŋ mbe nzuai, "The nan suirigi?" Ana maaŋ mbe nzuaim, mbe wari ndi zaahav, Pita khaŋ ana nzuai, "Guma Rum, ndu garim, kha gumgi gu mbigi vhɨrve za ndu rorgiap ndu nderigi." 46 ✝8.46: Mk 5.30; Ru 6.19Pita ne nzuaim, Zisas mbaram khaŋ nzuai, "Gu kaŋgi, guma mbe nan suirigi. Gu vhɨra wo khɨkhɨm mbararagim, mba Fhe Bakɨme mba gumgir rɨmrɨɨ vhɨzɨ zav na nɨɨŋgi ŋkasŋka na fhava khavgi." 47 Zisas ne nzuaim, mba mbik, ana wo vhargeŋ mbovara thav, ninɨk ana mbuim, ana zav wo thɨpani phɨrgiap, Zisas nɨman fav, wo nɨma ndi nuiana dagi. Ana wo nɨma ndi nuiana dav, mbaram mba gumgi gu mbigi vhɨrve nɨmara mba ana suirigi bigɨna nɨɨeŋ bun Zisas ga nzuai. Ana nen ana nzuav vhɨra khaŋ ana nzuai, "Gu ndu shaa suiravra thagim, nan rɨmrɨm fhura thuga vugi." 48 ✝8.48: Ru 7.50Ana maaŋ nzuaim, Zisas mbaram khaŋ ana nzuai, "Na kambik, ndu na khothɨgim, ndu rɨmrɨm vhɨzgi. Ndu ndav mbɨrav ŋgɨri."

49 Zisas maam mba mbiga nzuavra kim, guma mbe mba Fhe Bakɨme buni mbararagi phenan ŋaari gari guma Zairus phenan kegap zɨgi. Ana zɨgap khaŋ Zairus ga nzuai, "Ai, ndun kambik rimgi, ndu kavtuigar guma ruma su thari." 50 Ana nen Zairus ga nzuaim, Zisas ne mbararagiap khaŋ Zairus ga nzuai, "Zairus, ndu rɨvɨ thari, ndu fhura na khothɨgɨrim, ana taagip khavgirga." 51 Zisas ne suaŋgiap, mbe vov Zairus phena hegap, ana za mba gumgi gu mbigi thɨvav, mbe ndi kɨra tɨgap, Pita gum Zon, Zems, mba tara ndia gum niamuuŋ, ana mbera kov vhen veri. 52 ✝8.52: Ru 7.13; Zo 11.11-13Ana verap garim, mba tara khuma han ki gumgi gu mbigi, mbe zam mba tara nzuav nzɨɨva nziav ki. Zisas mbe garav khaŋ mbe nzuai, "Ai, nde zam nzigi. Mbige maaŋ rimgi, ana kui." 53 Zisas nen mbe nzuaim, mbe thɨri fierav khaŋ ana nzuai, "Ee, nza tarire, e? Nza kaŋgi, ana guigira rimgi." 54 ✝8.54: Ru 7.14; Zo 11.43Mbe ne nzuaim, Zisas mbaram ana hara suirav khaŋ ana nzuai, "Nan tar, ndu khavik." 55 Zisas nen ana nzuavra thagim, mba biptara vhen ki guma taagia zav ana rugim, ana taagia khavgia thɨgi. Ana khavgim, Zisas mbaram khaŋ mbe nzuai, "Nde mban mba biptaran nɨɨŋgirim, ana mbɨ." 56 ✝8.56: Mk 7.36; Ru 5.14Zisas maaŋ mani ga nzuaim, mba biptara niamuuŋ gu ndia ana gangiap, guigira ŋgava mbatɨga muuŋgi. Mani ŋgava mbatɨga mbuim, Zisas mbaram kama havharan mani ga ndɨɨv khaŋ mani ga nzuai, "Ŋko kha hɨgi bigeŋ bun harigi guma the suaŋ thari."