Ruk 9

Zisas ŋaarar wo farasegi 12 thɨgi ŋaara gumgi ga ndɨɨv mbe sasarigi.

1 ✝ 9.1: Mt 10.1; Mk 3.13-15 Zisas wo farasegi 12 thɨgi ŋaara gumgir kamgim, mbe ana han zim, ana mbe fugi. Ana mbe fugap, za ŋiniŋgi mbatɨgi ga vharvharav, vhɨra mbarkɨrga rɨmrɨɨ vhɨzɨrga ne nzuav zɨ bakɨme gum ŋkasŋkan mbe ndɨɨi. 2 Ana zɨ bakɨme gum ŋkasŋkan mbe nɨɨŋgip, mbe sararim, mbe ŋgɨp Fhe Bakɨme wo gumgi gu mbigi ganɨrim, mbe ana piin kɨrga buni vhuuiŋ bun mbe suaŋv, vhɨra gumgi gu mbigi rɨmrɨɨ vhɨzɨrga. 3 ✝9.3: Ru 10.4-11Ana kha suambarar mbe mbuav mbe ndim mbai, "Nde ŋgɨv bigi thari ndigip wari ŋgɨ thari. Nde ŋgɨv sɨga suigɨ thari, nde vhɨra mpaa thar thige rugɨ thari, nde mba thaneŋ ndi thari. Nde vhɨra kɨmararaŋ thueŋ suigɨ thari. Nde vhɨra fhava shaara mpugeni ndi thari, nde bagera sharav ŋgɨri. 4 ✝9.4: Mt 10.11; Mk 6.10Nde maaŋ muuŋgip ŋgɨv ŋgu then ŋgɨgɨrim, mbe phena then nden nɨɨŋgirim, nde mba phenara kɨv kɨv, mba ŋgu thav harigi ŋgun ŋgɨri. 5 ✝9.5: Mt 10.14; Mk 6.11; FG 13.51Nde maaŋ muuŋgip ŋgɨp, ŋgu then ŋgɨgɨrim, mbe nde vuzvugi fhuv, mbe vhɨra nde nzuai buni mbararagi fhuv, nde khaŋ muuŋri! Nde mba ŋgu thav ŋgɨv, wari wo ŋkari shari nuiana pɨzgip, wari mba ŋgu thav ŋgɨri. Nde maaŋ muuŋgirim, mbe gangip kaŋgirga, mbe tɨvar vhuun nde muuŋgi fhuvara." *9.5 Mbe Zudaiŋ, mbe ŋkari shari nuiana pɨzi. Nza Kiriiŋ, nzan tɨv khare. Nza mba ŋgun vugim, mbe tɨva mbatɨgar nza muuŋgim, nza mba ŋgu thav vov, nza khira phɨrav tuap hurav vui. Nza maaŋ muuŋgirga, mba ŋgu gumgi gu mbigi gangip kaŋgirga, mbe tɨvar vhuun kheiŋ ga muuŋgi fhuvara. Mbe taagip nza ŋgun zegɨrga tuktɨgi fhuvara. Khe nza Kiriiŋ, nza tɨv ma. Mbe Zudaiŋ, mbe tɨv mbure, mbe ŋkari shari nuiana pɨzi. 6 ✝9.6: Mk 6.12Ana maaŋ mbe suaŋgiap, mbe sarigim, mbe vui. Mbe vov, ŋgu mben vugap, Fhe Bakɨmen buni vhuuin mbe suaŋgiap, khavgiap, harigi nen vui. Mbe maaŋ mbua ruav, za mba rui ŋguir gumgi gu mbigi vhɨrver kurkurav mbe mbuim, mbe rɨmrɨɨ vhɨzgi.