Fhe Bakɨmen vuzvugi thugɨrga bigɨn the ki fhu.
31 8.31: Nam 14.9; Sng 118.6 Maaŋ muuŋgiap, nza ram Fhe Bakɨme muuŋgi bigi ga suaŋrie? Fhe Bakɨme nzan kurkurigim, the nza kambararie? Zakɨra fhuvara! 32 8.32: Zo 3.16Fhe Bakɨme zaa ndiv rɨmɨngen won kama thɨvigi fhuvara. Ana ana sarigim, ana za nzan kurkura zav zergi. Ana won kamanra nza nɨɨŋgi, ana vhɨra maaŋ muuŋgip za mba harigi bigir nzan nɨɨŋgirga.
33 8.33: Ais 50.8 Fhe Bakɨme nzan wora mbuigi, ana maaŋ nzan muuŋrim, the nza suaŋv suaŋrie? Fhuvara. Fhe Bakɨme nduara, kha zɨn nza rɨgi, nza tɨvir vhuuiaŋ mbui gumgi gu mbigi ma. 34 8.34: Sng 110.1; FG 7.55-56; Kor 3.1; Hi 7.25; 9.24; 1 Zo 2.1The nza muuŋgi tɨvi mbatɨgi ga suaŋv, khaŋ nza suaŋgirie, "Nde rimgirga"? Fhuvara. Zisas Krais ana rimgiap, ana vhɨra taagia khavgi. Ana ntigem Fhe Bakɨmen guva haren kav, ana nzan kurkurar zav nza nzuav Fhe Bakɨme phorga nzuai. 35 8.35: Ro 8.38-39Krais, ana guigira won ndavara nza nɨɨŋgi. Mba vuzvuk, ana guigi guarara za nzan ki, bigɨn the ana vuzvuga thugɨrga tuktɨgi fhuvara. Zakɨra fhuvara! Maaŋ muuŋgip, simtɨk nzan hɨrga o, nza maaŋ muuŋgip zaa ndirga o, harigi gumgi tɨvi mbatɨgir nzan muunga o, nza thi hɨrga o, nza shagi ga sosuagirga o, bigɨna mbatɨga thueŋ nzan hɨr saŋv muunga o, mbe nza shogiri nza vhɨzɨrga. Mba bigi, nta Krais vuzvuga thugɨrie? Zakɨra fhuvara! 36 8.36: Sng 44.22; 1 Ko 15.30-31; 2 Ko 4.11Mba bigi guigira nzan hɨrga. Fhe Bakɨme buni vhuuiŋ ki gap ne suaŋgi,
"Nza ndun gumgi gu mbigi ki. Maaŋ muuŋgiap, mbe zazera nza shogirim, nza vhɨzir za mbui.
Mbe nza garim, nza sipsivi fara muuŋgim, mbe fura nza shogi."
37 8.37: Zo 16.33; 1 Ko 15.57; 2 Ko 2.14; 1 Zo 4.4; VB 12.11 Krais, ana won ndavar nza nɨɨŋgi. Mba nzan hi bigi, nta fhura ki bigi ma. Krais, ana zazera nzan kurkurigim, nza guigira mba bigi kambai. 38,39 8.38-39: Ef 1.21; Kor 1.16; 2.15; 1 Pi 3.22Fhe Bakɨme, ana guigira won ndavar nza nɨɨŋgim, gu khueŋ khothɨgi, bigɨna the Fhe Bakɨme vuzvuga thugɨrga tuktɨgi fhuvara. Nza rimgirga o, nza ŋamki o, Fhe Bakɨme enseri o, tori gu ŋiniŋgi havhari o, ntige khar ki bigi o, zumgu hɨrga bigi o, mbarkɨrga bigi nta ŋkasŋka ki o, kha vun ki bigi o, kha nɨɨn nuianan ki bigi o, mbar tamtam khar ki bigi, mba bigi, nta zam, nta Fhe Bakɨme wo ndavar nza nɨɨŋgi vuzvuga thugɨrga tuktɨgi fhuvara. Ana wo ndavar nza nɨɨŋgi vuzvuk, ana nza Bakɨme Krais Zisas muuŋgi ŋaarar panan, ana wo ndavar nza nɨɨŋgi vuzvugar nza khɨvigi.