1 «Kɔm, məsu aləŋəs, ilok-loku!

Antɔf, məcəŋkəl moloku ma kusu kem! Nəyɔn’em sede!

2 Kanu kəsɔŋɛ mɛtəksɛ mem mɛsamsər pəmɔ ntɛ wəcafən endetufər yɔbɔf mɔ,

Kanu kəsɔŋɛ a toloku tem tɛgbələr pəmɔ kibi,

pəmɔ tɔkɔ mewiy-wiy mendeŋsɛ yika yobuk kəroŋ,

pəmɔ ntɛ mɛbɛlɛk mendetufər yɔbɔf ya dalɛ mɔ.

3 Kəkor-koru k’inder tewe ta MARIKI.

Nəyek-yekəs debeki da Kanu kosu!

4 Nkɔn eyi pəmɔ asar.

Yɛbəc yɔn yentesɛ tɛm fəp,

bawo səpɔ sɔn fəp səlomp.

Kanu kɔ nkɛ kəntɔsəkpər mɔ, nkɛ kəntɔyɔ pətɔlomp mɔ.

Kanu kɔ nkɛ kəntɔmpər kance kɔ pəlompu mɔ.

5 Mba məna aka Yisrayel nəntalərnɛ nnɔ MARIKI eyi mɔ, nəyɔnɛ fɛ sɔ awut ɔn!

Pəyikyik paŋan pɔ.

Dɛtɛmp dɛlɛc donutəsnɛ dɔ.

6 Nəna afum atoŋkulu, atɔcərɛ kəkɔtɛnɛ mes,

tantɛ tɔ pəmar nəyɔ MARIKI ba?

Bafɔ wisi ɔyɔnɛ MARIKI, nwɛ owur’am doru mɔ ba?

Bafɔ nkɔn olompəs əm k’ɛlɛk əm kɔ məyɔnɛ fum kɔn ba?

7 Nəcɛm-cɛmnɛ mata mɔkɔ mɛnacepər pəwon mɔ,

Ta nəpələr meren ma dɛtɛmp kɔ dɛtɛmp dɔkɔ dɛnacepər mɔ,

Məyifət wisi, endekɔlɔmər əm ti,

abeki anu ŋandekɔloku nu ti.

8 Ntɛ Kanu nkɛ kəyi ca ya doru fəp kəroŋ kənasɔŋəs afum a tɔf ya doru kɛ,

ntɛ ɛŋgbɛy afum a doru tɔf tɔf mɔ,

k’ombocɛ ŋa cələncər,

tɔkɔ mɛlɛkɛ ma Kanu mɛlanɛnɛ mɔ.

9 Kɔ MARIKI ɛlɛk aka Yisrayel ŋayɔnɛ aka nkɔn,

yuruya ya Yakuba yɛnayɔnɛ kɛ kɔn.

10 Nde dətɛgbərɛ MARIKI ɛnabəp nəna yuruya ya Yakuba,

nde antɔf nŋɛ ŋɔyɔ yer-yer, mɛnɛ pukulɛ-kulɛ pa canda pɔkɔ yɛnayi dacɔ mɔ.

Kɔ MARIKI ombum yi, k’ondusum yi,

k’ɛŋgbɛkərɛ yi pəmɔ dɔfɔr dɔn.

11 MARIKI eyi nnɔ aka Yisrayel ŋayi mɔ pəmɔ ntɛ asiksik ŋentimi awut a ŋi mɔ,

MARIKI ombum aka Yisrayel pəmɔ ntɛ asiksik ŋombum awut a ŋi mɔ,

ŋemperi banca ntɛ tɔŋsɔŋɛ wan ka ŋi pədeŋsɛ yi kəroŋ mɔ,

ŋɛdeŋnɛ wan ka ŋi dəbanca.

12 MARIKI sona gboŋ ɛnasolɛ afum ɔn,

ali kanu kəcuru kin kənamar fɛ kɔ.

13 K’ɛfɛlərɛnɛ ŋa k’ɔŋkɔ pədəs mofo meŋeci tadarəŋ,

ŋacdi yokom ya dalɛ.

Pəcmɛsərɛ ŋa mɛsɛ ma cəme mmɛ moncwur masar dacɔ mɔ,

kɔ moro ma antɔf ŋa masar,

14 pəcmɛsərɛ ŋa mɛsɛ medirɛ ma cəna, mɛsɛ mɛcaŋki ma ŋkesiya kɔ cir,

kəlɛkɛnɛ sɛm yoboŋu ya ŋkesiya yowut, ŋkesiya ya Basan kɔ mbiyofo.

Məcdi yeri yɔtɔt nyɛ ancoŋɛ mɛŋgbɛn mɔtɔt mɔ,

məcmun sɔ wɛn wɔtɔt wa yokom ya ŋgbɔŋkəlɔ yam.

15 Yesurun endetəf oŋ, k’ɛyɛfɛ kəsimɛ Kanu.

Ntɛ Yisrayel ŋanasɔtɔ ntɛ o ntɛ ŋanafaŋ mɔ, kɔ ŋantaŋ ləŋəs!

Daka daŋan dɔsɔŋɛ ŋa kətəf, kɔ ŋasak Kanu nkɛ kəlompəs ŋa mɔ,

kɔ ŋance Kanu nkɛ kəyɔnɛ togbu taŋan mpɛ pɔyɔnɛ wəyac kəŋan mɔ.

16 Aka Yisrayel ŋancsɔŋɛ MARIKI kəyɔ kəraca teta canu cəcuru.

Ŋacdəktərɛ sɔ MARIKI pəyikyik mpɛ pɔyɔnɛ mɛrəŋka mɔ.

17 Ŋasak kəloŋnɛ Kanu, ŋacloŋnɛ yɔŋk yɛlɛc nyɛ yɔntɔyɔnɛ Kanu mɔ,

canu ncɛ ŋanatɔcərɛ mɔ,

canu ncɛ cəntɛp kəcder ndɛkəl mɔ,

ncɛ atem anu ŋanatɔcərɛ mɔ.

18 Mənce Kanu nkɛ kəsɔŋɛ k’aŋkom əm mɔ,

məmpələrnɛ Kanu nkɛ kəsɔŋ’am kəyi doru mɔ,

nkɛ kəyɔnɛ togbu pɔtɔt pa kiyi kam wəyeŋ.

19 Ntɛ MARIKI ɛnəŋk ntɛ awut ɔn ŋaŋfər-fərəs kɔ mɔ,

it’ɔsɔŋɛ k’esimɛ ŋa.

20 Kɔ MARIKI oloku: ‹Indelukus ŋa darəŋ,

imɔmən tɛləpsər taŋan!

Dɛtɛmp dɛtalərnɛ dɔ,

awut ŋɔ aŋɛ antɔtam kəgbɛkər kəlaŋ mɔ.

21 Ŋaŋsɔŋ’em kəyɔ kəraca teta pɔkɔ pɔntɔyɔnɛ Kanu,

ŋasɔŋ’em mɛtɛlɛ teta mɛrəŋka maŋan mmɛ mɔntɔyɔ dəkəcəmɛ mɔ.

Ina sɔ kəsɔŋɛ ŋa k’inder kəyɔ kəraca teta atɔf ŋa afum aŋɛ ŋantɔyɔ dəkəcəmɛ mɔ,

teta atɔf ŋa afum atoŋkulu t’indesɔŋɛnɛ ŋa mɛtɛlɛ.

22 Ɛy, nɛnc da mɛtɛlɛ mem dɛmar,

dɔncɔf haŋ kɔ dɛbəp aka dabiya,

dɔncɔf antɔf kɔ yokom ya ŋi fəp,

nɛnc ndɛ dɔncɔf tantɔf ta mɔrɔ mɔ.

23 Indedeŋsər ŋa pəlɛc,

ŋa ŋ’indelip kələmər cəbəlma cem.

24 Dor dendelɔləs ŋa dis, fiba fəsɔm ŋa fəlip,

docu dɔpɔŋ d’indewɛnərɛ ŋa.

Sɛm ya dop y’indewɛnərɛ ŋa,

kɔ mɔkən ma yeliŋɛ-liŋɛ yɛlɛc!

25 Kɔ ŋawur doru-ɛ, aterɛnɛ aŋan ŋadifɛ awut aŋan dakma,

kɔ wɔlɔ waŋan disrɛ-ɛ, aterɛnɛ aŋan ŋade ŋacsɔŋɛ ŋa kənesɛ kəpɔŋ.

Afum fəp ŋandefi, kəyɛfɛ wətɛmp kɔ wəyecəra,

kənaka kɔ wətem.›

26 K’iloku: ‹Kifir kin k’indesamsərɛ ŋa,

indenim kəcɛm-cɛmnɛ ka mewe maŋan afum a doru dacɔ!›

27 Mba ifɔwosɛ wəterɛnɛ kəŋan pəfan’im.

Ta aterɛnɛ aŋan, ŋadecɛm-cɛmnɛ a ŋa ŋasɔŋɛ ŋa kəməlkɛ,

ta ŋadeloku: ‹Waca wosu wɔyɔ fənɔntər,

bafɔ MARIKI ɔyɔ mamɛ fəp!›»

28 Bawo aka Yisrayel, afum ŋɔ aŋɛ mosumpər maŋan mɔntɔləpsər mɔ,

ŋasɔk fɛ səbomp.

29 K’aka Yisrayel ŋacərɛ kəkɔtɛnɛ mes-ɛ,

ŋancərɛ nde mamɛ fəp meŋkekərɛ ŋa mɔ.

30 «Kɔ pəntɔyɔnɛ Kanu togbu paŋan pɛcaməs ŋa-ɛ,

kɔ pəyɔnɛ fɛ a MARIKI ɔsɔŋ ŋa aterɛnɛ aŋan dəwaca-ɛ, cəke cɔ wəterɛnɛ wəkin gboŋ ɛntam kəbɛləs aka Yisrayel wul win-ɛ (1.000)?

Cəke cɔ aterɛnɛ aŋan mɛrəŋ, ŋantam kəbɛləs afum aka Yisrayel wul wəco-ɛ (10.000)?

31 Kanu togbu pa aka Yisrayel kəyi fɛ pəmɔ kanu togbu paŋan,

aterɛnɛ asu yati ŋancərɛ ti.

32 Aterɛnɛ anu ŋayi pəmɔ afum alɛc nde sədare sa Sodom kɔ Komora mɔ:

Mes maŋan mowurɛnɛ cɛk ya yokom ya ŋgbɔŋkəlɔ ya wɛn yayɔkɔ yondoktɛ kɔ yɛŋkəntəŋ mɔ.

33 Wɛn wa yi, mɔkən ma niŋkinaŋka mɔ,

mɔkən meyeŋki ma aŋkisin mɔ.

34 Bafɔ tɛfaŋ tem tantɛ t’ina MARIKI ifɔkərnɛ dɛbəkəc ba?

Bafɔ imɛŋkərnɛ dɛbəkəc tɔyɔ ntɛ indeyɔ aterɛnɛ anu mɔ pəmɔ ntɛ fum ɛncaŋər yɔsɔtɔ yɔn kumba mɔ ba?

35 In’ɔtɔmpər oŋ kəluksɛ ayɛk kɔ kəway ka pəlɛc ka aterɛnɛ anu,

tɛm ntɛ wɛcək waŋan wende wecyikcɛ mɔ!

Dɔsɔk da pəlɛc paŋan dɔlɔtərnɛ kəbəp ŋa,

tɛləpsər taŋan teyi kəbɛlkər.»

36 «Ɛy, MARIKI endebocɛ afum ɔn kiti kəlompu,

endeyɔnɛ amarəs ɔn nɔnɔfɔr,

k’endenəŋk tɔkɔ sɔkət saŋan səlip mɔ,

tɛm ntɛ wəcar ɔntɔdeyi, ta wəyi yɛŋən eyi pəyac ŋa mɔ.

37 MARIKI pəyif aterɛnɛ anu: ‹Deke canu conu cəyi-ɛ,

ncɛ cəbum nu mɔ,

38 canu ncɛ cəncsɔmɛ nu sɛm yoboŋu ya yoloŋnɛ mɔ,

canu ncɛ cəncmunɛ nu wɛn wa yoloŋnɛ mɔ-ɛ?

Canu cacɔkɔ cəyɛfɛ cəyac nu!

Canu cacɔkɔ cəyɛfɛ cəbum nu!›

39 Ndɛkəl oŋ, nənəŋk ina sona gboŋ ɔyɔnɛ Kanu, kəlɔma kəyi fɛ sɔ, kɔ pəyɔnɛ fɛ ina-ɛ!

In’ɔŋsɔŋɛ kəyi doru, in’ɔŋsɔŋɛ kəfi,

In’ombopər, in’ɔŋsɔŋɛ kətamnɛ,

ali fum ɔfɔtam kəbaŋər im nwɛ iŋsumpər mɔ.

40 Bawo indot kəca kem darenc k’indɛrəm, icloku:

‹Kanu k’iyɔnɛ nkɛ kəyi wəyeŋ, nkɛ kəyi doru o doru mɔ.

41 K’iwotər dakma dem haŋ kɔ domot,

isumpər di teta kəboc kiti-ɛ,

iŋluksɛ ayɛk nnɔ aterɛnɛ em ŋayi mɔ,

isɔŋ sɔ akɔ ŋanter im mɔ kəway ka pəlɛc paŋan.

42 Indecisəsɛ cəbəlma cem mecir ma aterɛnɛ em,

dakma dem degbint-gbinti dis da aŋɛ iŋsumpər mɔ,

kəlɛkɛnɛ ka domp da akiriŋ a aterɛnɛ em.

Indeloŋ mecir ma aŋɛ ambopər kɔ aŋɛ asumpər mɔ.›

43 O Kɔm, nəkul-kulɛnɛ pəbotu Mariki! Nəna canu fəp, nətontnɛ fɔr ya MARIKI kiriŋ!

bawo eyi kəluksɛ ayɛk ŋa awut ɔn,

kəluksɛ kɔ Kanu kənder ayɛk nnɔ aterɛnɛ ɔn ŋayi mɔ,

kəsɔkəs k’ɛndɛ antɔf ŋɔn, pəsɔkəs afum ɔn kiciya kəŋan.»

44 Musa kɔ Hose wan ka Nun ŋaŋkɔ ŋaloku moloku ma teleŋ tantɛ fəp aka Yisrayel fɔr kiriŋ.

45 Ntɛ Musa elip kəloku moloku ma teleŋ tantɛ aka Yisrayel fəp fɔr kiriŋ mɔ, 46 k’oloku ŋa: «Nəbɛrnɛ moloku mamɛ iloku nu mɔkɔ mɔ dɛbəkəc, nəde nəctəksɛ mi awut anu, ntɛ tɔŋsɔŋɛ ŋade ŋamɛŋkərnɛ kəcəmɛ ka moloku ma sariyɛ saŋsɛ fəp darəŋ mɔ. 47 Bafɔ toloku tefəli tɔ nnɔ nəyi mɔ, mba kiyi wəyeŋ konu kɔ! Toloku tantɛ t’endekɔsɔŋɛ nu kəwon doru antɔf nŋɛ nəŋkɔbaŋ, kɔ nəncepər Yurdɛn-ɛ.»

48 Dɔsɔk dadɔkɔ yati dɔ MARIKI oloku Musa: 49 «Məpɛ nde mɔrɔ ma Abarim, nde atɔf ŋa Mohab. Məpɛ tɔrɔ ta Nebo kəroŋ nde pəntɛfərɛnɛ kɔ Yeriko mɔ. Məkɔ məmɔmən atɔf ŋa Kanaŋ, nŋɛ impocɛ aka Yisrayel ŋɔyɔnɛ ŋaŋan mɔ. 50 Tɔrɔ tatɔkɔ məŋkɔpɛ mɔ, difɔ məŋkɔfi, məkɔ məbəp atem am, pəmɔ ntɛ Aruna wəbek’am ɛnafi nde tɔrɔ ta Hor, k’ɔŋkɔ pəbəp atem ɔn mɔ. 51 Bawo Aruna kɔ məna Musa, nənaleləs f’em fɔr ya aka Yisrayel kiriŋ teta domun da Meriba, nde Kadɛs, nde tɛgbərɛ ta Cin. Nənamentər fɛ fɔr ya aka Yisrayel kiriŋ a in’ɔyɔnɛ Kanu kəsoku yati. 52 Məŋkɔnəŋk atɔf ŋaŋɔkɔ fɔr yam kiriŋ, mba məfɔdekɔbɛrɛ atɔf ŋaŋɔkɔ isɔŋ aka Yisrayel mɔ.»