1 Kəpocɛ pətɔt nkɛ kɔ Musa fum ka Kanu ɛnatolanɛ aka Yisrayel, a pəcfi.

2 Kɔ Musa oloku:

«Kɔ MARIKI ɛyɛfɛ tɔrɔ ta Sinayi,

k’ɛyɛfɛ aka Yisrayel kəroŋ pəmɔ ntɛ dec dɛmpɛ atɔf ŋa Sehir mɔ.

Kəyɛfɛ nde tɔrɔ ta Paran, k’omot aka Yisrayel nɔrɔ,

k’ender nnɔ afum ɔn ŋayi mɔ, mɛlɛkɛ mosoku wul wəco (10.000) mɛkɛl kɔ.

Pətɔmpər dəkəca sariyɛ səmotər-motər.

3 Ɛy, MARIKI ɔmbɔtər afum ɔn acempi,

aŋɛ ampus mɔ fəp ŋayi kɔ dəkəca.

Ŋancəmɛ məna MARIKI dəntɔf,

kɔ ŋawosɛ moloku mam.

4 Sariyɛ nsɛ Musa osom su mɔ,

kəloŋkanɛ ka Yakuba, afum a Yisrayel ŋayɔ si!

5 MARIKI ɛnayɔnɛ wəbɛ ka Yesurun afum em,

tɛm ntɛ abɛ aka Yisrayel ŋancloŋkanɛ kɔ cusuŋka cəŋan mɔ.»

6 Kɔ Musa ontolanɛ cusuŋka ca Yisrayel ntɛ:

«Kanu kəsɔŋɛ a kusuŋka ka Ruben kəyi doru, ta kəlip,

ali tɔyɔnɛ afum ɔn ŋapicɛ!»

7 Kɔ Musa oloku teta kusuŋka ka Yuda ntɛ:

«MARIKI, məcəŋkəl dim da Yuda,

Məlompəs aka kusuŋka ka Yuda dacɔ kɔ cusuŋka cəlpəs ca Yisrayel!

Məsɔŋɛ waca waŋan wɛyac ŋa.

Məna MARIKI məyɔnɛ wəyac kəŋan nnɔ aterɛnɛ aŋan ŋayi mɔ!»

8 Kɔ Musa oloku teta kusuŋka ka Lewy ntɛ:

«MARIKI, məsɔŋ masar ma kiti mam Tumim kɔ Yurim amarəs am aka kusuŋka ka Lewy,

aŋɛ mənawakəs Masa mɔ, aŋɛ mənatɛnsər kəcɔp nde domun da Meriba kəsək mɔ.

9 Nwɛ oŋloku teta kas kɔ kɛrɛ mɔ:

‹Ifɔmɔmən ŋa!›

Nwɛ ɔntɔcərɛ awɛnc aŋa mɔ,

ta ɛncərɛ awut ɔn mɔ,

bawo ŋamɛŋkərnɛ toloku ta məna MARIKI,

kɔ ŋatɔmpərnɛ sɔ danapa dam.

10 Ŋatəksɛ afum a Yakuba mɔyɔ mokur mam,

ŋatəksɛ aka Yisrayel sariyɛ sam!

Ŋasɔŋ’am kəne ambɔnc ŋa suray,

ŋasɔŋ əm poloŋnɛ pɔcɔf pam nde dətetek toloŋnɛ tam kəroŋ!

11 Məpocɛ sɔkət sa kusuŋka ka Lewy pətɔt, MARIKI,

məpocɛ sɔ mosumpər mɔn pətɔt!

Mətepi mɔkɔc ma aŋɛ ŋaŋyektər aLewy kəyɛfərɛnɛ mɔ,

kɔ akɔ ŋanter ŋa mɔ. Ta ŋatam sɔ kəyɛfɛ!»

12 Kɔ Musa oloku teta yuruya ya Beŋyamin, ntɛ:

«Abɔt aka MARIKI ŋɔ,

ŋayi kubum kɔn dəntɔf.

MARIKI ombum ŋa dɔsɔk o dɔsɔk,

eyi ŋa dacɔ tɛm fəp.»

13 Kɔ Musa oloku teta kusuŋka ka Isifu ntɛ:

«MARIKI ɔsɔŋ kəpocɛ kətɔt antɔf ŋaŋan,

Kibi ka darenc kənde kəctufər antɔf ŋaŋan,

kɔ domun ndɛ dende kəcpɛ kəyɛfɛ ka dəntɔf mɔ.

14 Dec dɔŋsɔŋɛ yɔbɔf kəpoŋ,

ŋof o ŋof yokom yofu yɔŋlɔl.

15 MARIKI ompocɛ ŋa yokom yɔtɔt ya antɔf ŋa mɔrɔ mokur,

kɔ kəctesɛ yɔbɔf mofo meŋeci ma tɛm tobol-bolu.

16 MARIKI pəsɔŋɛ daka da antɔf ŋɔtɔt dadɔkɔ,

kɔ kəmar ka Kanu nkɛ kənalok-lokər Musa dɛrəntəm mɔ,

daka dadɔkɔ dɛlarɛ kusuŋka ka Isifu,

nkɔn nwɛ anapus awɛnc aŋa dacɔ mɔ!

17 Isifu ɔyɔ pəlel pəmɔ tura pɔcɔkɔ-cɔkɔ pa yɔcɔl ya cəna.

Lɛn yɔn mɛrəŋ yɔyɔ fənɔntər pəmɔ lɛn ya wana wa dop,

iy’ɛŋwɛnsɛ afum a doru fəp, haŋ nde doru dɛləpsər mɔ.

Kəlɛn kin, kənay kəpɔŋ ka yuruya ya Efrayim kɔ,

kɔ kəlɛn ka mɛrəŋ, afum wul wul aka kusuŋka ka Manase kɔ.»

18 Kɔ Musa oloku teta aka cusuŋka ca Sabulon kɔ Isakar ntɛ:

«Sabulon, kəwur kam delek kəbɔt əm,

kɔ məna Isakar mənɔnɛ pəbotu nde abal ŋam disrɛ!

19 Ŋandewe cusuŋka ca Yisrayel nde tɔrɔ taŋan kəroŋ,

ŋaŋkɔ ŋacloŋnɛ di yoloŋnɛ nyɛ sariyɛ səloku mɔ,

bawo dəkəba ŋandekɔ ŋacwurɛ daka daŋan,

kɔ daka dɔkɔ dɔŋgbɔpnɛ dəkəsənc mɔ.»

20 Kɔ Musa oloku teta yuruya ya Kadu ntɛ:

«Iyek-yekəs MARIKI nwɛ ɔsɔŋ yuruya ya Kadu antɔf ŋowokəlu mɔ!

Ŋa aŋɛ ŋaŋliŋɛ pəmɔ kusunuŋku kəran mɔ,

ŋa aŋɛ ŋaŋwatəri-watəri kəyɛfɛ dəkəcək haŋ dəromp mɔ.

21 Kusuŋka ka Kadu kəyɛk-yɛk antɔf ŋɔtɔt ŋa atɔf,

k’ɛmɛŋkərnɛ daka pəmar wəbɛ pəsɔtɔ mɔ.

Nkɔn eyi aka Yisrayel kiriŋ,

k’ɔŋkɔtɛnɛ mɛfaŋ ma MARIKI dolompu disrɛ,

k’ɔŋkɔtɛnɛ sariyɛ sɔn nnɔ aka Yisrayel ŋayi mɔ.»

22 Kɔ Musa oloku teta kusuŋka ka Dan ntɛ:

«Dan kusunuŋku kəwut kɔ,

nkɛ kəŋgbəpərnɛ kəyɛfɛ nde atɔf ŋa Basan mɔ.»

23 Kɔ Musa oloku teta aka kusuŋka ka Naftali ntɛ:

«Kusuŋka ka Naftali kənɛmbərɛ kəmar kɔ kəlarɛ kəpocɛ kətɔt ka MARIKI.

Naftali, məwɔkələs atɔf ŋam ntende dec dɛŋkalɛ, kɔ ntende kəca kətɔt ka nde dec dɛmpɛ mɔ!»

24 Kɔ Musa oloku teta aka kusuŋka ka Asɛr ntɛ:

«MARIKI pəpocɛ Asɛr pətɔt awut a Yakuba dacɔ!

Pəsɔtɔ kəmar ka kəbɔtər ka awɛnc aŋa,

dɛlay da moro dɔsɔŋɛ Asɛr pəgbət mi wɛcək wɔn!

25 Asɛr, Kanu kəpoc’am a məyi kumba ka fɛc kɔ kɔpər darəŋ.

Kanu kəsɔŋ kusuŋka kam sɔkət kəyi kam doru fəp!

26 Ali kanu kəlɔma kəwurɛnɛ fɛ kɔ Kanu ka nəna Yesurun afum em,

nkɛ kəncal-cali darenc kədemar nu,

nkɛ kəncepərɛnɛ kɔm debeki dɔn disrɛ mɔ.

27 Kəyɛfɛ kəcop ka doru o doru Kanu kəyɔnɛ dəkəyacnɛ donu,

tɛm fəp eyi yɛbəc ya kəbum nu.

Fɔr yam kiriŋ k’ɛmbɛləs wəterɛnɛ kam,

kəcloku: ‹Mədifət!›

28 Aka Yisrayel nəyi kubum disrɛ,

Yuruya ya Yakuba ŋandɛ taciŋa

nde atɔf ŋa mɛŋgbɛn kɔ member ma wɛn,

antɔf nŋɛ kibi kəntufər kəŋyɛfɛ darenc mɔ.

29 Pəmbɔt nu nəna aka Yisrayel!

Are ŋayi pəmɔ nəna-ɛ?

Nəna nəyɔnɛ afum aŋɛ MARIKI ɛyac mɔ.

MARIKI ɔyɔnɛ nu aca nŋɛ ŋɛŋyac nu mɔ,

ɔyɔnɛ dakma ndɛ dɔŋsɔŋɛ nu kətam aterɛnɛ anu mɔ.

Aterɛnɛ anu ŋandeder ŋalɛtsɛnɛ nu kəŋaŋnɛ,

mba nəndenas-nas dofum daŋan.»