1 Ntɛ tencepər mɔ, Musa k’aka Yisrayel ŋaleŋsɛ MARIKI teleŋ ntɛ:

«Indeleŋsɛ MARIKI

bawo ɛnamentər debeki da kətam kɔn:

Ɛŋgbal afəlɛs kɔ wəyɛksɛnɛ ka ŋi dəkəba.

2 MARIKI ɔyɔnɛ sɔkət sem kɔ teleŋ tem,

Nkɔn ɔyɔnɛ wəyac kem.

Kanu kem kɔ, indeyek-yekəs kɔ.

Kanu ka papa kem kɔ,

indekor-koru debeki dɔn.

3 MARIKI korgba kɔ! Tewe tɔn tɔyɔnɛ MARIKI.

4 Ɛləm dəkəba cibil ca dəkəwan ca firawona kɔ kənay kɔn k’asɔdar.

Asɔdar abaŋsɛ aMisira,

anakal ŋa nde kəba ka Cəŋkɔlma.

5 Kɔ putukum pa kəba pɛŋgbəpərnɛ ŋa, kɔ ŋantor kəba dəntɔf pəmɔ masar.

6 Kəca kam kətɔt, MARIKI, kəyɔ fənɔntər fəwɛy-wɛy! Kəca kam kətɔt, MARIKI, kəmputuk wəterɛnɛ kam.

7 Debeki da dɛbɛ dam dɔsɔŋɛ kəyɛt aŋɛ ŋancəm’am dɛbəkəc mɔ.

Kɔ məwurɛ mɛtɛlɛ mam-ɛ:

Mendi ŋa pəmɔ ntɛ nɛnc dendi tuktukur ya mɛmpəlɛ mɔ.

8 Kifir k’aloləm ŋam gbəcərəm kəsɔŋɛ domun da dəkəba kəgbɛyɛnɛ,

kɔ yam yɛncəmɛ pəmɔ biŋkəli,

kɔ domun da kəba dəntɔf dɛncəp.

9 Wəterɛnɛ kosu oncloku: ‹Kəbɛləs ŋa k’inder, isumpər ŋa!

Ibaŋər ŋa ca cəŋan pəmɔ tɔkɔ pəncepərər kəbɔt im mɔ.

Kəwurɛ k’inder dakma, iməlkɛ ŋa kəca kem!›

10 Kɔ məfurup,

kɔ kəba kəŋkal ŋa,

kɔ ŋaŋkalɛ pəmɔ ntɛ tomunt pegbəleŋ pontor domun da dəkəba dɛwɛy-wɛy disrɛ mɔ.

11 Canu cəyi fɛ ncɛ cəntəŋnɛnɛ kɔ məna MARIKI mɔ!

An’eyi pəmɔ məna, dosoku dam dɛmbɛk, dɔyɔ wɛywɛy,

nwɛ pəmar a pakor-koru mɔ,

məna nwɛ məŋyɔ mes mmɛ moŋwosəs kusu mɔ?

12 Məntenci kəca kam kətɔt gbəcərəm,

kɔ antɔf ŋendi ŋa.

13 Kəsektərnɛ kam danapa kɔ məŋkɔtɛnɛ afum am akaŋɛ mənawurus mɔ,

fənɔntər fam fɔ məndesolɛ ŋa,

məliŋərnɛ ŋa nde dəkiyi dam dosoku.

14 Ntɛ andɛ asu ŋane ti mɔ, kɔ ŋayikcɛ.

Kɔ kənesɛ kəpɔŋ kəsumpər afum aka Filisti.

15 Ayekyek ŋosumpər abɛ a atɔf ŋa Edɔm,

kɔ kəyikcɛ kəsumpər afum akiriŋ a Mohab,

kɔ bəkəc yɛlɛcɛ-lɛcɛ aka Kanaŋ fəp.

16 Kənesɛ kɔ ayekyek ŋontorər ŋa.

Debeki da kəca kam, dɛnasɔŋɛ ŋa kəcaŋk pəmɔ tasar

haŋ afum am ŋaclip kəcepər, MARIKI, haŋ afum aŋɛ mənaway mɔ ŋaclip kəcepər.

17 Məde məkekərɛ ŋa məkɔ mədəs

nde tɔrɔ kəroŋ mpɛ məsɔŋ ŋa kɛ mɔ,

kəfo kaŋkɔ mənalompəs dəkiyi dam mɔ, MARIKI,

dəndo kəfo kəsoku kaŋkɔ mənacəmbərɛ, Mariki, waca wam mɔ.

18 MARIKI ɔntɔmpər dɛbɛ doru o doru.

19 Bawo fəlɛs ya firawona kɔ cibil cɔn ca dəkəwan kɔ ayɛksɛnɛ fəlɛs ɔn ŋantɛmpɛnɛ dəkəba.

Kɔ MARIKI ɛŋgbəpər ŋa domun da dəkəba,

mba aYisrayel ŋaŋkɔt antɔf ŋowosu kəba dacɔ, wɛcək waŋan wowos fər.»

20 Kɔ sayibɛ Miriyam, wəkirɛ ka Aruna ɛlɛk tamba, kɔ aran aYisrayel fəp ŋancəmɛ kɔ darəŋ, ŋacpisɛ ŋacfer mamba. 21 Kɔ Miriyam oluksɛ ŋa:

«Nəleŋsɛ MARIKI, bawo ɛnamentər debeki da kətam kɔn.

Ɛləm dəkəba afəlɛs kɔ wəyɛksɛnɛ ka ŋi.»

22 Kɔ Musa ɔsɔŋɛ aka Yisrayel kəyɛfɛ kəba ka Cəŋkɔlma, k’osolnɛnɛ ŋa dɔpɔ da tɛgbərɛ ta Sur. Kɔ ŋaŋkɔt mata maas dətɛgbərɛ, ŋasɔtɔ fɛ domun.

23 Kɔ ŋambɛrɛ Mara, mba ŋanatam fɛ kəmun domun da Mara, bawo dɛnadoktɛ. Ti tɔ awenɛ di tewe ta Mara «pədokət». 24 K’aka Yisrayel ŋancop kəcɔpɛnɛ-cɔpɛnɛ nnɔ Musa eyi mɔ, ŋacloku: «Ake andemun-ɛ?» 25 Kɔ Musa oŋkornɛ MARIKI, kɔ MARIKI ementər kɔ kətɔk nkɛ ɛnaləm dəromun mɔ, kɔ domun dadɔkɔ dɔyɔnɛ dobotu. Difɔ MARIKI ɛnasɔŋ aka Yisrayel sariyɛ kɔ tɔyɔ tokur tɔkɔ ŋande ŋacyɔ doru o doru mɔ. Dəndo MARIKI ɛnawakəs kəlaŋ kəŋan. 26 Kɔ Musa oloku: «Kɔ məncəŋkəl belbel dim da MARIKI Kanu kam, kɔ məyɔ ntɛ tentesɛ MARIKI fɔr kiriŋ mɔ, məsu ləŋəs məcəŋkəl mosom mɔn kɔ məmɛŋkərnɛ sariyɛ sɔn fəp-ɛ, ali docu din ifɔsɔŋ əm ndɛ isɔŋ aka Misira mɔ. In’ɔfɔ MARIKI, nwɛ ɛntaməs əm mɔ.»

27 K’aka Yisrayel ŋaŋkɔ ŋabɛrɛ Elim nde cələmp wəco kɔ mɛrəŋ (12) cənayi kɔ komp wəco camət-mɛrəŋ (70) mɔ. Kɔ ŋacəmbər saŋka səŋan dəndo domun kəsək.